fatrubylo的个人专页

早幾日同fd去打邊爐，來到尚上下夏-養生雞煲，尖沙咀山林道，但其實佐敦近d, 係雞蛋仔檔轉入去直行，都要行得幾入先到。估唔到環境幾好，d位都坐得幾舒服。雞煲可以揀雞既部位，全隻/半隻/雞脾/雞胸，我地就揀左雞脾(小份)唔辣，因為仲要預打邊爐，就揀埋個湯底，好多都好想試，最後揀左瑤柱群翅雞湯。個鍋一放底已經聞到好香，我地食左雞煲先，揀左雞脾係唔同d, 每舊都好滑，雞味好出，裡面仲有豬皮tim, 本身我唔愛食，都試左啖，估唔到勁入味，又爽，最後我食多左兩塊tim呀。而我最欣賞個雞煲汁，偏甜帶麻，完全冇嗆喉，仲好易入口。個雞煲好快比我地食晒，就開始打邊爐。群翅雞湯直情好似燉湯咁，我地一開始仲一人飲左碗湯先開始落野打邊爐，瑤柱同雞味極濃，但唔會咸，正。鬼馬墨魚，即係墨魚滑釀油炸鬼，好搞笑，落湯度會自動反轉墨魚向底油炸鬼向面，等墨魚滑熟左，油炸鬼已經吸收晒湯汁，不過就會變得唔脆，所以我覺得普通。 :) 三色滑：瑶柱墨魚滑，陳皮鯪魚滑，蟹子蝦滑。墨魚滑好彈牙，陵魚滑果皮味重，整得軟嫩，蝦滑整得好爽口好滑，一次過試晒三隻味。Good 牛魔王拼盤，用high tea盤架上菜，好精緻。 上層係牛柳粒(一口大小，好淋)  ，中層係牛爽喉同黑柏葉(呢2款真係勁爽脆，係新鮮先會做到！) ，底層係牛舌，靚牛皇同牛小排(牛脷就冇乜特別，反而靚牛皇同牛小排就睇見d雪花紋就知正野，食落都冇失望，嫩淋又牛味重) 呢個拼盤足料有質素，必點。 我見佢仲有自家製羅漢果水飲，叫左杯飲，清熱下火，羅漢果味好重，但又唔會太甜。好飲。好滿意呢個雞煲邊爐，個湯底同雞煲比足100分，下次一定會再來食。 :)…查看更多

之前已經知道呢間素食店，一直冇機會試，係旺角等客既其間想來個晚餐快速醫肚，經過見到就即刻行入去食。都知佢豆漿豆花出名，不過想食湯麵，就叫左個全素麵套餐$45,包埋杯豆漿。五色全素湯麵，個湯非常地甜，飲得出係蔬菜個種甜味，完全冇味精，配料有菜心，木耳絲，甘筍絲，海草片，粟米粒。可以話味道偏淡，冇乜落鹽，不過我就係鍾意清清甜甜咁，間唔中健康一餐。但我唔知原來有得揀麵底，早知都試下波菜麵啦，食完先知。豆漿我反而冇太大感覺，都係淡淡的，唔太甜。我都會再來食，試埋其他款式 :)…查看更多

估唔到呢家去元朗咁方便，前日入去賀個fd新居入伙，跟住就去左呢間放題，果陣7點幾已經見門口排晒隊等入場，因為我地walk in, 仲驚會冇位，點知經理好快就已經安排到比我地，very good!我地係C段時間，食2個鐘，都好多款式揀，仲可以升級生蠔同松葉蟹腳tim! 上菜好快，刺身亦夠凍夠新鮮，最鍾意食甜蝦，好大隻，三文魚厚身，帶子都鮮甜！壽司都唔錯，不過個飯可以整得細舊d.串燒都做得幾好，竟然係個翠玉瓜不停reorder, 焗蠔夠熱，岩岩整好上菜，個肉骨腸就普通d, 同埋我幾鍾意佢呢度個蟹粥，好棉又夠鮮味 :)呢度d食物全部都係即叫即整，唔係預先整定放晒係度，呢樣我好欣賞，連呢個牛油炒雜菌都係熱㷫㷫上枱，比個good佢！下次如果約人來元朗我都會推介呢間放題。…查看更多

之前係openrice已經有睇過Cafe1950資料，一直想來試，不過之前分店得大圍屯門天水圍，太遠喇！新分店開係長沙灣就岩晒，約埋2個姊妹來試一試！未知係咪平日夜晚，人比較少，不過仲好，静d又舒服d! 歐陸style環境真係好靚，有花過心思！餐牌勁多選擇，日韓歐美國菜都有得揀，價錢仲好大眾化！韓式拉芝士辛辣泡菜雞肉石板飯 ($98) 芝士真係拉得到，仲好濃味，辣就唔係好辣，泡菜都幾爽，做得幾韓feel! 德國式咸豬手 ($128) 外皮脆卜卜，肉又夠多汁。慕尼黑肉腸拼盤 ($93) 正，最愛腸仔，配菜醬汁都好食！無限添飲$12/位， 抵~! 正所謂三個女人一個墟，其實我估成間餐廳都聽到我地既笑聲。。。仲要食到一半先有人發現冇影相。。。泣:( 約定下次再戰cafe1950! :)…查看更多

日本咖哩其實一向唔係吸引到我既食物，亦唔明白點解會咁貴一碟飯，本身冇諗過會入來食，不過今日一早就番公司開會完全冇食野，下午茶時間都到喇，經過見冇乜人就決定入去試試啦！實在餓到諗唔到野！環境又幾舒服既，落地玻璃，木質檯凳，完全乎合日式西餐廳風格。睇睇餐牌，都幾多選擇，雖然全部係飯，但全部都望落好好食咁，今日餓太耐，都係揀番d冇乜刺激既口味，所以揀左温泉蛋雞肉漢堡秋葵豆腐咖哩飯！:)賣相同相片一樣咁靚，雞肉漢堡有軟骨粒，咬落好有口感，温泉蛋都做得出色，秋葵豆腐就淋左d, 咖哩汁夠香，整體都唔錯！ 不過我冇追加其他前菜or飲品，一個飯埋單已經90幾蚊，抵唔抵食就要衡量了！…查看更多