ic_market的个人专页

黎得金鳳大餐餐廳，一定係食佢懷舊嘅味道，尖沙咀山林道係佢第一間，荃灣同埋山林道嗰間都有食過，我自己本身住荃灣，所以會過去八米半食。餐廳每一晚都好多人排隊，想食就預早少少過去穩陣啲，如果唔係可以上去商場行吓先，佢哋都好快有位。佢哋嘅雜扒好好食，不過今次想叫個海鮮焗飯加個魚柳條，佢哋嘅份量一如以往咁大份，個炸魚柳條新鮮炸起，佢哋個粉漿落得好少，入口好脆身，我哋推薦食呢個。之後叫咗個海鮮焗飯，鋪面嘅芝士好多，啱晒我呢啲芝士控，另外佢海鮮嘅種類都好多，有魚柳、蝦、魷魚、青口，總之鋪滿晒成個飯上面，同埋佢嘅汁都幾多，唔會好似出邊食食吓好乾，整體嚟講好滿意呢餐。…查看更多

屋企附近原來一直有一間工廠區嘅茶餐廳，啲嘢食價錢好親民，同埋都好多人食，次次中午叫親嘢食落去拎，都見到有好多外賣，我之前都已經早餐叫過好幾次外賣，對比起附近幾間茶餐廳真係平靚正。佢哋個餐牌真係太多選擇，有選擇困難症嘅人真係應該幾難揀到食咩，我今次試吓XO醬豬頸肉炒烏冬，XO醬味好濃郁，豬頸肉好淋，啲公仔麵好彈牙，整個份量都好多。杯凍紅豆奶茶唔太甜，紅豆杯粒粒勁多，飲完唔會好口渴。另外叫左個中式芝士燴雞扒飯都算係比較特別嘅餐牌佢知士餐牌入邊有好多唔同嘅款式，有魚雞豬仲有蝦，啱晒唔同口味既人。呢個雞扒份量都一樣大份，可能始終都係俾工廠既人士食，真係要食飽啲🤣同埋好多人會嚟食下午茶。最後埋單都係$119 ，真係抵食夾大件。…查看更多

今晚試吓屋企附近間日式食肆，其實住喺呢度附近，成日經過都見到，不過成日都好多人，都冇乜機會入去食，同埋有好多外賣仔企喺門口等外賣，我驚等得耐，今晚唔煮飯，就試吓食吓呢間外賣。佢哋嘅款式真係好多，用QR code落單，不過我叫外賣就係同店員講，淨係便當都有十幾款，我老婆想食刺身，所以叫咗個特選五式丼，有五款刺身，三文魚、北寄貝、帶子、赤蝦、海膽，每樣刺身都好靚仔，三文魚夠肥，海膽同赤蝦好鮮甜，唔會有陣苦澀味，其實佢嘅份量都算幾多， $100左右一個刺身飯抵食。我自己就叫咗個秋田便當，飯嘅份量真係好多好多，佢嘅刺身一樣咁新鮮，三文魚好肥美，甜蝦好彈呀爽口，豬軟骨好入味好淋，另外佢個三文魚有啲三文魚肉同埋蘿蔔，兩樣都好腍。最後加多個小食，日式蜜桃烤雞翼，甜味幾重，好香，雞肉入口好滑，同埋佢哋啲雞翼都算幾大隻，好入味。…查看更多

呢間酒吧位於荃灣工廠區附近，不過都唔算太難搵，喺市中心行過去大概都係10分鐘左右，就算平日來講，都算幾多人嚟食。裝修都幾靚，不過位置唔算有太多，如果想去嘅就真係要book位，咁啱我哋今日去到，可能就嚟關門，所以人唔算多。呢度半條豬肋骨，份量嚟講都算幾大份，兩個人一定夠食，新鮮熱辣上枱，薯條卜卜脆，薯條灑上BBQ粉，配合個豬肋骨一齊食，好惹味。之後嚟咗個招牌芝士漢堡，蔬菜同肉嘅比例差唔多，塊牛肉好口，一咬落去勁多汁流出來，漢堡包個皮係焗過，所有配合一齊食，好好味。另外叫咗個墨西哥餅，呢個係個前菜黎，唔好講笑，佢嘅汁食完之後好夜魅同埋好開胃，加埋檸檬酸酸甜甜嘅口感，食完之後好想再食。…查看更多

呢間金鳳大餐廳好出名，好多地方都有，之前食過荔枝角嗰間，啲食物都唔錯，今次中午特登過嚟荃灣試吓佢嘅味道點先。午市套餐如果食到個扒，仲要唔使加一，個性價比真係幾高，今日我叫咗個洋蔥汁西冷牛扒，陪個煎雞肉拼法蘭克福腸。落咗單唔夠幾分鐘就有個熱辣辣嘅餐包同個忌廉湯上枱，餐包好軟熟，加入牛油，溶溶地嘅感覺好好食，忌廉湯冇乜特別，不過都好濃味。西冷扒同埋個雞塊拼法蘭克福腸一齊上枱，個西冷扒夠晒淋，洋蔥汁拼埋一齊食好好食，我哋兩個都叫咗薯菜，啲薯條脆脆地，佢唔係麥當勞嗰隻薯條，而係波浪紋薯條，另外雞扒煎得好香脆，入邊好滑，好食！最後發現佢有個外賣自取套餐，價錢都唔錯！…查看更多

今晚自己一個人食，返屋企途中見到有間食漢堡，好想試吓，同埋見到環境唔錯，所以就決定今晚食burger。環境都唔錯，價錢都唔係好貴，不過我見都幾多人食，因為好多訂單係叫外賣，有幾個車手喺度等外賣。叫咗個花生和牛漢堡配雞堡5件，另外叫咗個玄米茶，完全冇諗過花生醬可以加和牛食。外賣到啦，佢好好用個紙盒裝住，另外再放入個袋入面，完全唔驚佢會倒瀉。先講吓個花生醬和牛漢堡，肉味香濃多汁，配埋花生醬，超濃郁，加埋芝士一齊食口感好豐富，好creamy，成個包嘅份量都算大，另外叫咗五件雞堡，因為我哋即食，所以好脆，雞味都好濃唔似一般食快餐店咁好多粉。…查看更多

荃灣好多嘢食，但係今日心思思，好想食下冰室，心目中有幾間冰室想食，但係到最後都係決定食樓下冰室，一來抵食夾大件，二來佢嘅懷舊風繼續一樣吸引到我。外面望入去真係好似八九十年代嘅冰室。雖然裝修風格比較懷舊，但係食物嘅種類都好多，除咗傳統嘅冰室食物外，仲有一啲比較適合現代人食嘅快餐。叫咗個台式滷肉雞扒飯，分量多不在話下，味道濃郁，台式肉醬香味濃，雞扒煎得好香脆，配合埋肉鬆一齊食，可口。另外叫咗個番茄湯上海麵，配牛肉同埋一隻瑞士汁雞髀，蕃茄濃湯超多蕃茄肉，牛肉偏淋，滑板超滑溜。瑞士汁雞髀個瑞士汁香甜，唔似得出邊嗰啲汁好鹹，雞髀肉鮮嫩多汁。…查看更多

好日都唔會入嚟馬鞍山，今次朋友介紹入嚟食間幾好食嘅東南亞菜，我哋好早就已經到，五點幾去到都好多位，但係六點幾就已經坐滿晒人。環境好舒適，食物種類好多，樣樣都好想試，但係基於兩個人，叫嘅嘢食唔多，下次可以試吓叫多幾個朋友一齊嚟食。叫咗個越式蝦米紙卷，個紙卷好薄，面頭隻蝦好大隻，呢個前菜好好食。叫咗個芒果糯米飯，芒果好甜，糯米飯熱辣辣上枱。串燒沙嗲六吋，新鮮燒起上枱，好好食，好惹味，牛肉好有牛香味，雞肉好稔，正。叫咗個越式蝦炒金邊粉，金邊粉酸酸地好開胃，佢哋嘅配料好多，傳統嘅金邊粉好似真係有個蛋包喺面，兩個人食真係夠晒。叫咗個馬沙文牛腩配印度薄餅，牛腩好有牛香味，好軟身，入口即溶，如果配白飯都好正，但係我哋想試吓印度薄餅，配埋薄餅一齊食個口感唔錯，不知不覺間食晒。…查看更多

大圍站都有好多好嘢食，但係西餐廳就唔係好多，通常都係去食小食，不過今日咁啱經過大圍，就嚟試吓呢間餐廳。佢哋食物嘅選擇都幾多，午餐見到佢哋嘅漢堡好似好好食，所以我哋就叫咗一個漢堡同埋一個千層麵試吓。一如以往，西式餐廳通常都會上個沙律菜同埋細湯，佢哋嘅細湯就係洋蔥湯，沙律菜淋上醋一齊食，酸酸地好開胃。先來個豬扒包，豬扒包都幾厚，兩塊豬扒夾中間，連埋蕃茄、菜、芝士一齊食，豬扒好Juicy，另外好欣賞就係佢個包，佢個包唔係普通嘅法包，個包皮好煙韌，整體好好食。另外個千層麵配上芝士一齊焗，好香濃，但係一啲都唔會覺得滯，入面配有翠玉瓜，俾人有種好Fresh既感覺。…查看更多

平時都有食開西餐，但係估唔到大角咀都有間高質素嘅西餐，睇舖面真係裝修得好靚，仲好舒服。今日星期日，店員同我講啱啱轉左個新嘅Menu，一於試下。內部裝修好舒服，好似係叢林中嘆緊咖啡一樣，枱同枱之間都有段距離，可以好放心食飯，店員仲好都禮貌同耐心介紹餐牌上既食物。先上左個蒜茸包同磨菇湯，磨菇湯味道濃，菇茸好多，食得岀用就新鮮磨菇打成，份量仲唔少，蒜蓉包既蒜味好重，條邊好香脆，好香口。沙律配醋好閂胃，又唔太凍，菜亦都好新鮮。先上左個b餐，長通粉好彈牙，連埋香濃芝士一齊食，好想食多兩啖，隻菇好鮮味，菇味勁重，啱晒鐘意食菇既朋友，溝埋半熟蛋黃一齊食，好creamy。之後叫左個黑啤西班牙豚肉辣肉腸意大利飯，佢既啤酒揮發晒就冇酒味，不過口感好好，啲飯既煙韌度好好，另外佢辣肉腸既煙燻味勁重，係一個驚喜口感。好欣賞呢間餐廳，絕對推介黎試一下。…查看更多

今日入開嚟屯門探朋友，時間尚早，所以喺建生邨附近一間咖啡店食下午茶。冇諗過係屋村入邊都有間咁有文青氣息嘅coffee shop。佢哋嘅裝修好靚，感覺好舒服，就好似入咗去一間買藝術品嘅舖頭，俾人有一種好放鬆嘅感覺。佢哋出名食全日早餐同埋熱狗，不過我哋叫咗個意粉同埋一個all day breakfast。蟹子蟹肉明太子忌廉意粉，蟹子同蟹肉嘅份量好多，每一啖都有蟹子入口，另外明太子醬加忌廉，令到整個意粉好creamy。另外一個全日早餐，份量一樣唔少，滑蛋炒得好滑，配埋黑松露食，好香濃，另外有塊我最鍾意食嘅脆薯餅，加埋煙三文魚，好滿足。…查看更多

太耐冇去旅行，好掛住台灣嘅嘢食。台灣嘅肉燥飯、鹽酥雞同埋蛋餅，都係我嘅至愛，再加埋杯珍珠奶茶，簡直一流。呢間係我平時去開食嘅台灣店，佢哋嘅肉燥飯瘦肉偏多，啱我最唔鍾意食肥肉嘅人。門面細細，但係佢都有三個出入口，去到商場下面一啲都唔難搵，舖頭入面都唔係好多位，大概坐到十幾張枱。 Menu大概分為主食同小食，煮食就係雞翼豬扒配肉操飯或米線，小食類就係食蛋餅或者炸燒賣。叫咗一個雞翼肉燥飯同豬扒肉燥飯，飯係用珍珠米，配有半隻滷水蛋同肉燥，上枱時熱辣辣，雞翼同豬扒炸到外脆內軟，豬扒好淋好易入口同咬開，雞翼好大隻。另外整咗個青瓜配木耳，青瓜同木耳都好爽口，配埋秘製醬汁好開胃。最後加多杯珍珠奶茶，珍珠份量好多，好彈牙，奶茶少甜。…查看更多

之前已經有朋友介紹黎呢間日本料理，佢地既lunch set都幾平 ，仲要係愉景新城入面，個價錢真係好抵！食物選擇種類多，刺身，串燒，丼飯，仲有特別推介。我地兩個人食就叫左個二人套餐。先黎個小食拼盤，由七種不同小食合併而成，都係一啲日本傳統既小食黎，酸酸甜甜好開胃。黎個前菜溫泉蛋豆腐沙律，豆腐好滑，菜都好新鮮冇苦澀味，溫泉蛋係啱啱熟蛋漿流岀。壽司類，六件壽司加三件卷物，壽司魚生都好新鮮，款式都係比較大眾類別，魷魚，蝦，三文魚等，下面飯既份量適中，一口一件。燒鯖魚，廚師清得好乾淨，魚身一啲骨都冇，適合怕麻煩既人，魚皮燒得香香的，魚油係面仲流緊岀黎，連我唔鐘意食魚都覺得好好食。之後黎左個鍋物，雜菜鍋配要碗白飯，其實都已經有7成飽，可想而知佢地既份量幾多，白米好軟棉，鍋底湯好香濃，食完肉食返啲菜一流。最後食返個飯後果燒鳳梨，燒得香香的，配埋華梅粉更能突岀鳳梨既甜味同香。…查看更多

雞煲好多地方都係食辣嘅，不過今次比我搵到間雞煲係有得食用花膠螺片做湯底嘅味道，聽落去都覺得好補除咗雞煲之外，佢哋嘅手打丸都好出名。可能我哋太早到，我哋五點幾就到，所以冇咩人一嚟到店員就拎定個調味盤過嚟，佢哋嘅調味料都幾多選擇，我自己食牛一定加芝麻醬個雞煲終於到，個湯底好香濃，啲花膠好大塊，個份量仲好多，呢個價錢真係物超所值啲雞好滑，啲花膠同雞吸收晒啲湯底，食落好夠味，啲湯飲落去仲唔會覺得好鹹好味精因為兩個人食嘅關係，食完個雞煲都已經飽飽地，另外我哋再叫多個雲吞同埋芝士炸響鈴，雲吞就唔太大特別，但係我覺得一定要試吓呢個芝士炸響鈴，個響鈴需時都耐，主要係因為佢即叫即炸，嚟到點一點湯食，吸晒啲未，入邊有陣濃濃既芝士，正…查看更多

如果食個飯閑閑哋都要成$70-80，仲要份量都好少，今日食呢間嗰份真係好大份，食得飽之餘仲好好味。入到黎好有懷舊嘅感覺。呢度嘅招牌係食瑞士雞髀，我哋當然要返個瑞士雞髀啦，但係一隻雞髀邊夠食，我哋仲叫咗兩個飯同一碟菜。咖喱牛腩飯，咖喱香濃，牛腩夠稔同入味，上枱熱辣辣，個飯仲要好大。另外叫咗個豬扒肉餅飯，豬扒厚切勁大塊，肉餅勁入味，呢個價錢真係冇得輸，仲有少少配菜，成個份量真係夠兩個人食。主角出場，就係瑞士汁雞脾，瑞士汁夠甜，肉嘅質地夠稔，果然名不虛傳。…查看更多