肥仔良的个人专页

今晚同太太第一次嚟呢度食飯，第一碟上嘅泰式海鮮炒河味道唔錯，有好多隻蝦，魷魚亦都新鮮第二碟相嘅上湯浸蘿蔔，價錢$10，但係個湯味精太濃，味道太鹹，蘿蔔有渣第三條上既係星期三做特價嘅明爐烏頭，第一條魚超多鱗，第二內臟沒有清潔好，好多血，亦非常腥，食到最尾諗住夾條椰菜食，點知係一大張摺埋咗嘅保鮮紙，告知侍應，他亦有表達協議，又話送飲品俾我，我話唔需要啦最後佢送咗四件，應該係斑蘭椰汁糕，賣相極差，但味道都過得去總結價錢算抵食，但師傅做條魚係完全沒有俾個心去做，所以亦沒有下次了…查看更多

週五晚，老婆突然話想食魚生， 走咗去尖沙咀厚福街，但太多人排隊， 諗住走去金巴利街食韓國嘢， 點知畀我哋發現一間日本小店。舖頭面積不大，裏面只有兩枱客， 抱住一試無妨的心態， 走入去探下險😂。裏面裝修簡潔，員工招呼殷勤， 先點小黃魚一碟， 壽司拼盤，海之寶石卷及海膽各一客，幾款味道都不錯，亦都新鮮。 於是再散叫六款壽司， 亦都有驚喜。用餐時候，店員不停替我們添加熱茶及向我們講解每款壽司的材料，服務十分貼心。 傾談之間發現他們也有做廚師發板，一於下次嚟試下😋😋…查看更多

買咗半島酒店三千幾蚊嘅staycation套票, 包嘉麟樓晚餐，大堂tea-set及露台餐廳的早餐, 原先也不會有什麼大期望, 但早餐及tea set的而且確貨真價實，物超所值。 但晚餐就真的有點失望了。首先環境及服務的確係比一流更高一級， 香港最著名嘅五星級酒店嘅環境及服務真的不容置疑。 但晚餐的設計及安排的確有點令人費解。首先奉上的是頭盤及湯，侍應叫我們先吃醉雞再吃叉燒，跟住飲湯。 再來是金沙蝦，炒菜及炒飯三道一齊奉上， 侍應再細心叫我們先吃蝦再吃菜，最後才吃炒飯。 其實粵菜一熱遮三醜，只要食物夠熱及有鑊氣，基本上都唔差得去邊。 但你看這個程序，食物又有什麼可能會夠熱呢。再者，我們這些中年人士，平常吃一隻金沙蝦已經超quota，酒樓卻安排我們每人吃三隻金沙蝦，滯得有點過份。 雖然這道已是全晚最好味的一碟餸，但用牛油及鹹蛋黃煮成的蝦，正常人又怎麼可能一次過食三隻。最令人失望的是那碗 黑松露帶子炒飯，又凍又硬，真的比一般茶記的揚州炒飯更差。總括兩日一夜的半島酒店之旅， 除了這頓晚餐，其他真的是物超所值， 服務一流， 但嘉麟樓真的要再設計一份餐單及重新安排上菜的方法， 才可挽回名店的面子。…查看更多

本身為土瓜灣街坊，知道有新鋪開張，一早 同家人落嚟食個早餐捧下場， 早餐碟頭夠大， 出品亦都唔錯， 雖然價錢唔算平，但環境搭夠， 坐得舒服，有天花吊扇，夠涼爽。 第二晚再落嚟試呢度嘅疫情外賣， $205三個餐，大件夾抵食。（可惜餓得滯冇影相） 羅宋湯夠曬足料， 羊扒夠淋，有羊味唔騷，黑松露炒意粉好香口， 龍蝦湯天使麵略嫌淋咗啲， 不過或者太好生意，侍應只畀得一個湯， 麵包亦忘記放進去， 扣少少分， 不過只是忙中有錯， 問題不大。…查看更多

土瓜灣上路一向冇pizza食， 知道有間新pizza店開，立刻一行六人去幫襯。去到已經覺得不妙， 坐滿人之外仲有好多外賣員等緊攞食物， 見到店員做到頭暈暈。既然嚟到，即管坐低order食物， 總共叫咗四個小食兩個pizza一個意粉， 等咗大概45分鐘，第一個嚟到嘅係千層麵， 之後兩個pizza都到。 味道可以，又夠熱，份量足夠， 算係唔錯。四個小食包括焗雞翼，蒜蓉包，田園沙律及 炸蝦， 三催四請之下， 終於喺order食物後大概七十五分鐘後到齊😭。近門口一台客，突然之間和侍應理論，話到了一個鐘水都冇得飲。其實呢間餐廳好明顯係廚房出貨能力不足， 仲要接咁多外賣， 當然係順得哥情失嫂意， 結果大部分客人都是等好耐才有得食。總括而言，這間餐廳食物不錯，價錢亦算平，坐得都舒服，但係要等咁耐就真係有啲令人卻步。…查看更多

剛剛搬嚟土瓜灣試過蘇三, 已經係12年前嘅事, 當年覺得佢價錢太貴,所以一路冇再黎食。 適逢朋友睇完李錦聯介紹， 話呢間海鮮煲超正，於是一行八人來到再試一次。除了圖片顯示菜色，還點了一個煙燻拼盤、咖哩牛肉餅及黑松露意大利飯。 每碟菜式的份量也十分足夠， 但就正如其他食家都曾經提出過， 呢間飯店個餐牌係幾特別， 但係做出嚟嘅賣相及味道真係一般， 再加上價錢真係超貴， 八個人食左$4100，真心覺得有少少中伏的感覺。下次有機會再嚟，都係專心食過海鮮煲好過，其他餸菜米搞我:(…查看更多

在附近返工，見到一間新開的湯飯， 由於食茶記食到悶，所以立即要試試。看看餐牌，其實菜式和油麻地出名的湯飯餐廳村爺x差不多, 立即點了一個88元的龍蝦湯飯， 湯飯送上來的時候，有半隻龍蝦、 幾件豆泡和扎肉， 立即試下個湯， 沒有預期中的濃郁， 但也不過不失， 再試下隻龍蝦， 就大失所望， 既沒有龍蝦的鮮甜， 又煮過了火，十分韌， 一點也不爽口。 反而，最好味的是豆泡， 索咗啲湯汁，十分滋味。最後埋單有驚喜， 推廣期內，龍蝦湯飯只收68元， 不包飲品。希望下次再來的時候，龍蝦的水準可以提高。…查看更多

收你30蚊嘅早餐, 你點都估唔到有即燒牛肉畀你, 呢間嘅招牌早餐沙嗲安格斯牛肉麵， 即叫即製，即燒牛肉， 再加上好重花生味嘅沙爹汁， 感覺好似食梗九龍城方x榮記火鍋一樣, 真係唔係四圍可以食到。 仲有一份炒滑蛋多士，冰鎮奶茶或咖啡， 收你咁嘅價錢，真係冇得輸。 再加上兩個經常面露陽光笑容既老闆仔, 令人有賓至如歸嘅感覺, 未試過值得黎試下。餐廳位處土瓜灣巷仔，比較難搵， 其實就係天光道對面。 衰在禮拜日休息， 想放假同老婆黎嘆下早餐都唔得。…查看更多

第一次幫襯老坑火鍋，起初真的有點抗拒， 因為無論餐廳嘅地點及裝橫， 真的對它沒有什麼期望， 直至侍應第一碟手切牛肉擺上枱， 令我另眼相看。把牛肉放進番茄清湯碌兩碌， 肉質嫩口，肉味香濃， 我們五個人很快便把一整碟吃光， 在來的手打四寶丸及脆肉鯇亦非常新鮮。 炸魚皮異常香脆，一點油益味也沒有！ 後加的一碟芫茜，30蚊，大大碟， 吸收牛肉湯的精華，十分惹味！總結這餐，5個人消費了 845元，真的超值，難怪我看到樓上的師兄說每逢打邊爐必定諗起老坑火鍋。…查看更多

因為已搬了家，已經超過十年沒有幫襯， 今早再去食車仔麵，食味風味人情味依舊一樣， 三十年如一！大腸夠火侯，魷魚惹味， 蘿蔔、豬皮入味， 還有只此一家的螺肉， 配上一碟幼麵底，一碟粗麵底和一碟腸粉底， 還有一開四的奶醬多， 搽上的是粗粒花生醬， 真的好像時光倒流30年！ 雖然四個人食一頓早餐花上$204，但我還是覺得物超所值！…查看更多

今晚剛剛在marina食完一餐豐富嘅情人節晚餐, 原先只是抱著一試無防的心態訂位, 因為小女 明天要上學,故只能夠在家附近慶祝！但今晚無論餐廳環境、播放歌曲、侍應服務及食物質素都令人有意外驚喜， 肉眼扒超水準, 有高級扒房的質素, 生蠔新鮮肥美, 栗子忌廉湯在外面很少吃到, 甜品tiramisu甜度適中,由於今晚是特別日子, 所以顧客都要 order餐廳的set dinner 但由於小女不吃生蠔，故特別要求侍應可否煮一份黑松露意大利飯給她，侍應十分爽快地答應 ,而這個飯亦做得十分出色！最後 埋單 一千二百蚊三個人， 十分超值，仲送多兩支玫瑰花，拎返屋企慳返唔少！…查看更多