weswww的个人专页

今次係悅見試左佢哋嘅四大天王燒賣同招牌燒味三拼，仲有個抹茶豆腐Oreo。先講四大天王燒賣，一籠四款，賣相精緻：臘味糯米煮得軟硬適中，臘味香氣足，傳統味夠。松露蝦豚黑松露味明顯，蝦肉同豬肉混得均勻，幾juicy。帶子豬肉爽口彈牙，鮮甜味突出，幾好食。鮮蝦豬肉最穩陣，蝦肉爽、豬肉滑，皮薄透。整體蒸得好，熱辣辣上枱，無一粒淋，四款各有特色，食完真係覺得抵食。招牌燒味三拼係叉燒、燒鵝、豉油雞。燒鵝皮脆肉嫩，果木香夠；叉燒蜜汁甜鹹啱口，微焦邊香口；豉油雞滑溜入味，雞味濃，凍食都唔會鞋。三樣新鮮熱辣，切得靚，汁醬落得啱。成份配飯食好香。飲品試左重慶森林（抹茶豆腐Oreo）凍凍地好解膩，抹茶味清新，豆腐滑得似布丁，Oreo碎加咗咬口，甜度適中。朋友飲既心想事橙都好似唔錯。餐廳環境光猛舒服，座位唔迫，服務快手。…查看更多

最近想食台灣野，見到希慎有間就同fd係附近行街順便去食。墨汁鹽酥雞炸得超脆口，雞肉仲好嫩。配埋三文魚籽同辣味蛋黃醬個口感好豐富。牛肉麵湯底帶甜，牛腩同牛筋炆得腍，溏心蛋流心，酸菜紅蘿蔔份量多，麵彈牙，一碗食完飲晒好暖胃。個滷肉飯肥瘦均勻，滷汁香濃甜鹹，撈落飯超香口，飯粒唔太濕，一碗好快掃晒。d甜品都好好食。麻薯豆乳芒果雪糕好解膩，芒果新鮮，配埋雪糕好夾；紫米珍珠芋泥好足料，食完好滿足。整體都幾唔錯，幾啱同朋友約埋黎。見到佢仲有好多款小吃，之後有機會一定再黎試。…查看更多

同朋友約打邊爐揀左去馬鞍山牛氣，今次試咗佢哋最貴嘅LV5套餐。湯底揀左牛肉清湯，唔會太淡太濃。一入座冇幾耐就上左一大盤嘢，有成堆唔同款靚肉靚海鮮。和牛油花靚，落湯幾秒就啱食，入口即化，油香夠又唔會太膩。厚切牛舌彈牙，有嚼口，幾好食。海鮮都好新鮮，蝦同帶子夠甜，蟹腳肉厚。自助吧蔬菜款好多好新鮮，好適合解膩。飲品都好多款，有糖無糖既都有。環境乾淨舒服，服務員態度幾好，上菜都快。最特別係佢地既吉祥物出現係唔同角落好好笑。食完甜品除左雪糕仲有棉花糖機可以玩，好適合小朋友大朋友。價錢唔平，但計埋食材質素同種類，性價比算合理。成個用餐體驗好開心，推薦鍾意食和牛同海鮮嘅黎犒勞自己。…查看更多

今次去山見食揀咗佢哋嘅牡丹美人鍋底，湯底有紅棗同花雕等等勁多料，味道好清甜，單獨飲都唔會太油膩，幾滋潤。肉類叫咗好幾款牛同美國黑毛豬，牛肉油花平均，涮十幾秒就啱食，入口軟嫩；黑毛豬薄切，幾秒就熟，肥瘦均勻，唔會太柴。手工蝦滑都好推薦，蝦滑夠彈口。小食有好多款，每份都細細份可以試嗮每款。鹽酥雞真心好食，熱辣辣，外脆內嫩。甜品有芋圓番薯圓加燒仙草，軟糯甜度適中，食完解膩。飲品自助，凍檸茶同烏梅汁任飲，酸甜開胃。蚵仔煎好足料夠味完全唔輸小食店。飲品甜品都好多選擇真係食得好滿足。而家全運會期間，仲會送山見佢地自己既ip熊運動版匙扣，兩款都好得意！…查看更多

係海港城行街想食飯揾到呢間八十里，落地玻璃望出去就係海景超靚，地方大氣氛輕鬆舒適。服務員有禮，點心賣相幾精緻！蘿蔔絲酥餅賣相同橙綠配色幾得意。外層薄脆，一咬開係軟身蘿蔔絲，微甜帶鮮，入口化開，仲有少少肉汁，甜鹹平衡幾特別。松露蝦豚燒賣既松露香飄嗮出黎。皮薄彈牙，蝦同豬肉餡結實，松露碎香得黎唔壓味，少少胡椒提鮮，食落層次分明。椒鹽九肚魚炸得好好，外層椒鹽香辣，魚肉鮮甜多汁，配紅洋蔥圈清爽解油，食幾件都唔會膩。香蔥脆絲和牛和牛粒煎到外焦內嫩，牛味濃，蔥段同脆絲增加口感，醬汁微甜帶蒜香，襯托到和牛油香，食落滿足。整體嚟講，八十里環境靠海坐得舒服，菜式味道穩定，超適合休息放鬆。下次想試多啲主菜。…查看更多

元朗QUE呢間cafe，地方簡簡單單，木枱光線自然，坐低就覺得舒服。今日試咗限定menu兩款菜，幾好食。先試左間八薄切佐京都水菜配土佐啫喱。間八切得薄，入口鮮甜，軟滑唔韌。京都水菜脆卜卜，帶清香，解油膩。土佐啫喱酸甜帶柑橘味，一淋落去即刻提鮮，仲有兩小堆黑魚子，咬落爆汁，口感有趣。整體清新又夠精緻。再試埋燒春雞伴南瓜配羊肚菌汁。春雞燒得皮香肉嫩，唔柴，咬落有汁。南瓜烤到軟糯，天然甜味出晒嚟。羊肚菌汁濃郁，菇香突出，淋落雞肉同南瓜，味道連繫起來，暖笠笠好食。迷迭香一插，香氣更明顯。兩款菜風格唔同，一清一濃，互相平衡。間店服務親切，環境寧靜，啱嗮慢慢食。整體感覺舒服，下次好想試埋甜品！…查看更多