多多&少少的个人专页

下午茶忽然想食火鍋，即刻諗起鼎王下晝有$328/2位火鍋餐好抵食，已經食過幾次，個餐其實好夠食，因為豆腐同鴨血任添，其他單點食材係唔平嘅，甚至可以拍得住貴價火鍋店，但食材新鮮，白饍、牛小排同去皮雞脾肉好正。可能俾人感覺性價比唔高，每次去都冇乜人，但呢個二人火鍋餐真係抵食的，真心推介。因為店內真係唔多客，服務好好，店員會主動睇睇客人需唔需要添加鴨血同鹵豆腐，鴨血又大件又滑，超好味，小朋友去食都啱，小辣其實唔算辣，只係少少惹味嘅感覺。…查看更多

110分鐘放題，其實真係唔夠時間，已經食第二次，但實在太多好嘢食，大頭蝦超級新鮮，膏多肉鮮。其他推海鮮有鮑魚、生蠔、芝士蒜蠔、蜆、蟶子、魷魚等，全部勁新鮮，尤其鮑魚，新鮮到燒咗一陣，啲鮑魚仲郁架。蠔亦超新鮮，好有蠔味，又夠大隻。蜆亦好大隻，好鮮味。唔好以為海鮮正，啲肉就會唔掂，啲肉竟然都好掂，牛仔骨、牛脷、豬頸肉好好味，搞到都唔知食邊樣先好，飲品選擇又多，以呢個價錢嚟講超級抵食。下次一定會再嚟挑戰過，希望食物水準繼續keep到。…查看更多

親友介紹，抱着大大嘅期望，可惜一入座已經好失望，迫到同後面嗰位椅背貼椅背，冷氣又唔夠，成餐飯食得勁唔舒服。食物一般，燒味燒得好靚，但冇乜味道。小菜好細碟，份量的骰。唯一覺得做得不錯係翠棠豆腐，好滑溜，味道亦做得幾好。另外，有個叉燒幾特別的，喺客人面前搽一層菠蘿醬，再開火槍燒一陣，個叉燒幾好味嘅，肥瘦適中，但其實開火槍炙燒呢一步喺廚房做埋會好啲，因為反正食唔到菠蘿味，但喺個小朋友面前開火槍，始終有一定危險。…查看更多

超級趕時間，見有間雞翼專門店即時同雞翼控囡囡衝入去食幾隻雞翼頂肚，點咗個八件雞翼加芝士條，同小朋友食諗住穩陣啲點蒜香蛋黃醬同BBQ醬，即叫即炸，送嚟嘅雞翼熱辣辣，睇見都流口水，我先試蒜香蛋黃醬嗰款，味道好夾，不過就唔多覺有蒜香，普通蛋黃醬而已，雞翼肉質靚，唔似普通雪藏貨，醃得都好味，值得一讚，差不多成十蚊隻雞中翼係貴嘅，不過有誠意都值回票價啦，囡囡試BBQ醬，一食即刻話辣嘅又酸嘅，我食一件個醬又真係唔好食架喎，嘥咗啲醃得好味嘅雞翼囉~…查看更多

經過幾間珍珠奶奶店，偶爾想同囡囡飲杯珍珠奶茶，本來見老虎頭嗰間咁多人幫襯，都想試吓有乜咁好飲，但趕時間，見呢間唔洗等就試一試啦，囡囡係士多啤梨迷，點咗杯草莓鮮奶，我就點咗好似係佢哋招牌貨嘅黑糖珍珠海鹽鮮奶，盛惠$60，囡囡話佢嗰杯味道一般，冇草莓味，只得奶味，同飲奶冇乜分別，但我飲嗰杯黑糖珍珠海鹽鮮奶呢，真係有驚喜喎，味道醇厚，珍珠有嚼勁，好香好滑，飲得出係誠意之作，一定會再幫襯，希望keep到水準啦！…查看更多

尋晚一家大細嚟試吓呢間咁多好評嘅火鍋店，雖然三百幾蚊位仲要大小同價，但都想試一試，一去到已經坐得勁唔舒服，地方細到呢，算，如果好食都冇所謂，但規矩多多，想食響鈴先，唔好意思，要跟次序上，唔你想幾時食就幾時食，除餐set好嘅嘢完全計錢，計我哋三個人頭，牛肉粒竟然真係俾三小粒，肥牛六片，想食多片，加錢囉，飲品又唔包，成十五蚊罐汽水，過隔離食卜卜蜆煲好過啦，食到一肚氣，唔明點解有食評話乜嘢好大方，自問鍾意周圍試火鍋嘅我，真係未見過三個人食，竟然俾得出三粒細細嘅牛肉粒，同六小片肥牛片，仲要係下價貨嗰隻，都咁小家，出面是但一間二三百蚊嘅任食火鍋都高質大方過呢間嘢，手打肉丸直頭可以用難食嚟形容，毫不彈牙，下次都係去番釣x翁，倫x同旦x食好過，起碼坐又坐得舒服啲，唔洗跟咁多無謂嘅規矩，最重要係人哋嘅食物真係高質過呢間嘢好多好多囉。…查看更多

一家大細假期嚟黃金海岸玩，入咗呢間日本餐廳食high tea，一入去侍應講明下午茶時段只能點下午茶餐，冇乜選擇，有啲想走人，不過因為太攰唔想郁，最後都留番喺度食，點咗啲刺身set同壽司set，再加啲串燒。要讚讚呢度嘅魚生，真係超新鮮，食得出鮮味，蔥花吞拿魚蓉壽司超正，串燒做得亦很好，唔會燒得太乾，尤其係燒雞翼同燒雞軟骨，好食。邊食邊見到燈箱廣告魚生飯好吸引，百拎蚊食到鋪到密密嘅甜蝦魚生飯，可惜下午茶時段冇得食，下次一定會再入嚟試一試。值得一提係呢度環境真係好舒服，呢個價錢環境好，食物掂，算好抵。…查看更多

之前試過隔離嘅火鍋，非常正，今次兩公婆就試試呢個蒸氣海鮮，本來要早早訂座先有得食嘅，今次因為有人放飛機，我哋就好好彩可以唔洗book都食到。唔洗三百蚊位，有足料燉湯，龍蝦，鮑魚，中蝦，蟶子，象拔蚌，大蜆，魷魚腸粉，肉蟹，八寶蒸飯，最後仲要加個燉蛋做甜品，除咗地方比較細，我都諗唔到有乜可以彈。8個海鮮，同上次火鍋一樣超新鮮，點解咁串一定要預早book，因為佢哋真係要預材料，最好味係個龍蝦，最驚喜係個魷魚腸粉，腸粉滑到呢，最鍋心係個蜆，蒸好之後有兩隻唔開殼，個侍應竟然再蒸兩隻俾我哋，超均真。食到八寶蒸飯，食唔落喇，全部包走咁滯，但好好食，尤其係個雞軟骨餅。好戲在後頭，本來趕住唔食個甜品，但侍應叫住我食埋先，嘩，真係好好味，個燉多好有蛋香，甜度又適中，唔食真係走寶。…查看更多

同家人聚聚喺度食晚飯慶祝吓，貪呢度坐得比較舒服，湊住小朋友嘅我，環境同衛生好緊要，呢間酒樓平日同家人嚟飲茶就多，食物質素唔錯，嗰晚叫嘅椒鹽蝦同粉絲蒸蟶子非常惹味，避風塘炒蟹就削啲唔夠入味，隻蔥油雞都好好，又滑又入味，蠔餅有啲驚喜，蠔仔肉都幾大隻又夠鑊氣，其他就普普通通啦，整體不錯.但serve我哋嘅侍應實在超級hardsell，成日話我哋叫嘅嘢包羅萬有，講咗好多次，賣花讚花香，好煩厭，講到唔知點答佢.…查看更多

家人成日想試吓去布袋澳食海鮮，對上一次嚟已經係三年前嘅事，當晚點咗個薑蔥炒蟹，椒鹽瀨尿蝦，椒鹽鮮魷，清蒸海班，豉椒炒蜆加個豆腐海鮮湯呢幾味普通嘢，除咗椒鹽鮮魷同蒸魚做得比較好，其餘幾味真係普通到暈，唔可以話差，但的確出面好多大排檔或者小菜館都做得好過佢，個豆腐湯更加唔抵，咁大碗湯得兩三嚿細細嘅豆腐，實在有啲失望，食完呢餐，冇意欲再山長水遠入嚟lu，最後埋單，更是嚇人，一隻蟹收兩隻蟹錢，冇嚟嘅飯又計埋，唔睇吓單就俾錢真係大鑊.…查看更多

平日好少去香港島，今日去完海洋公園，諗去邊食晚飯，大家想打邊爐，真係第一時間諗起尚鮮個龍皇海鮮鍋底，堅好味，平時好少連湯底都飲埋嘅我，嚟親尚鮮都飲幾碗，連肥女都話好味好味，其餘火鍋料都好正，鱔片，牛肉，海皇餃都正，唯一唔掂嘅係蝦丸，唔知點解次次點呢個都係唔新鮮有臭味，但喺佐敦分店點過蝦丸，好新鮮好好食架喎。另一樣要讚嘅係個洗手間，通常好食嘅火鍋店洗手間都超污糟，呢間個洗手間係好企理，又有bb椅，帶住兩個b嘅我食得好放心。…查看更多

禮拜五去同屋企人喺釣魚翁慶生，去到門口見到有優惠，二百幾蚊有海班兩味加半隻雞，嘩，真係抵到爛喎，仲有另一個餐，又係二百幾蚊，有沙拉明蝦球加一條海班再加一個例牌叉燒，不過只能二選其一，最後揀咗後者，我哋一行七大兩細，加隻鵝，四個小菜，套餐雖平但份量竟然都幾足，搞到最後要打包，佢哋啲鵝真係好好味，皮脆肉嫩，我最like嘅仲係唔會好似深井嗰啲燒鵝咁肥膏大爆炸咁。每樣小菜都唔錯，夠鑊氣料又足，最後埋單每人除開都係兩嚿水，抵食過好多連鎖經營嘅酒樓啦。…查看更多

食過好多次，每次都一定有脆脆朱古力，用料好足，好脆好新鮮好美味，呢度環境好好，有得慢慢坐慢慢嘆雪糕，而且我覺得呢間分店可能人流冇諾士佛臺咁多，所以店員會慢慢咁招待你，杯雪糕都大杯d，價錢一樣，咁梗係來呢間啦。…查看更多

其實我本人覺得「板前」、「和花亭」同「峰壽司」的質素都係差唔多，雖然有時會先入為主偏愛「和花亭」多些。呢間我同多多已經食過兩次喇，三文魚壽司、鰻魚壽司、八爪魚壽司、甜蝦壽司都好新鮮，最正係海膽壽司，好鮮好甜，兩次都好掂，冇話水準不穩定的情況，惟一麻麻係三文魚子壽司，有點腥，冇和花亭咁新鮮，但整體都ok，有機會會再來食過。…查看更多

見到咁多「笑臉」，以為一定係好嘢啦，專登有日山根水遠同多多去試下，點知......好失望﹗因為每樣食物只係得個「大」字，味道其實唔掂，而且衛生環境可以用個「差」字嚟形容，我好鍾意食三文魚，呢度嘅三文魚刺身雖然真係好大件，絕冇欺場，但係口感麻麻，好像食緊件肥豬肉咁，甜蝦刺身算係全晚最好嘅食物，大隻兼鮮甜，而最差嘅都係我嘅三文魚子壽司，嘩...真係好假...腥到嘔，和花亭好食得多，我食咗兩粒魚子之後就冇食喇，埋單時仍然係好完整咁喺度冇人掂，鰻魚壽司都ok，因為係熟嘅試唔出佢新唔新鮮，啲壽司飯唔好食，食淨咗好多，啲豉油嘅味道亦好怪，個炸軟殼蟹都ok，但多多話好鹹喎，um.........全晚最驚喜嘅就係俾我哋飲到好多年冇見過嘅綠寶。要排隊等得耐唔係問題，但係等咁耐，原來質素只係咁，隔離枱對男女睇見我哋唔係幾鍾意啲食有啲奇怪咁，但係我望番佢哋食得咁滋味都覺得有啲奇怪架，不過睇番有啲食家嘅食評就明白到呢啲係需求嘅問題，你想只係滿足個胃嘅話，呢度絕對滿足到你，但如果你真係想食新鮮好味嘅壽司，呢度真係唔得，今日先明白，唔係「大」就得架，唉........…查看更多