Boomchatchat的個人專頁

2年前食過印象好好冇問題既，咁今日接阿女放學，咁耐冇去食過就去幫襯吓啦，但今日同阿女去食真係差咗好多好唔掂。我叫燒肉油雞飯，燒肉皮唔脆仲要好靭既，唔好話口感差連鹹味都無，好似食緊紙皮咁，仲有燒肉下面層肥豬肉啲肥膏多過肉，啲肉有蟹有冇汁，油雞又冇乜肉又瘦又乾身又冇油，肉仲要好嚡，我懷疑擺咗好耐咁。阿女叫左叉燒煎蛋飯，叉燒食落冇咩汁又係好乾身，隻蛋仲要全熟又係冇蛋汁。總括嚟講，瀝源街市$28燒味飯嘅質素好過佢。希望佢睇到我嘅留言，可以改善下啦，知燒味有陣時好彩數，咁啱斬定啲頭頭尾尾俾我就會好差，但可唔可以平均啲唔好全部都咁差呀。…查看更多

我地一家四口，二大一小一BB行完花市，見就腳就入去試一試。我地叫左一碗龍蝦湯海鮮拉麵，一份黑豚肉鐵板炒麪同和牛漢堡。呢個價錢，說真期望不會太高，不過食落都對得住個價錢。拉麵最重要個湯，個湯味不夠，但麵可接受。炒麵就俾兩小朋友食，他們沒有投訴重話OK好味。和牛漢堡就我太太叫既，佢都無投訴，都話食落對得住個價錢。食到咁上下有人走黎問我地食物既意見，我都俾左意見佢，佢話原來可以叫個湯濃D，不過落單張紙無得選擇。佢仲話嚟緊又有新野食。員工服務質素很好，成個過程我都睇到佢哋有講有笑好開心。相信有一個好好既老細(希望係)，好既員工唔易搵，希望老細們好好珍惜。我好小出食評，但呢間食店俾我既感覺係想做好佢，雖然食物唔算好出息，但食落又唔係差，眼見有人落評勁差，又要平又要人地有米之蓮既質素，真係搵食艱難。相信呢間店會越做越好，我一定支持。…查看更多

呢間野，開張已經食到而家，最近呢幾年越黎越唔好食，今日再嚟食，但係忍唔住要寫返篇野黎提醒大家，真係非常難食。今日係叫左個海南雞飯，豬扒撈檬，同埋泰式蝦餅。首先豬扒撈檬嚟到，一睇話個樣就已經唔想食，塊豬扒嘅外皮見到好厚好厚，乾爭爭，又鞋颯颯，啲檬粉係好大碟，但係硬骨骨黐埋一舊舊。跟住泰式蝦餅嚟到，呢個就真係恐怖啦，望落去應該返炸咗超過10次，佢求其將中間切開變兩塊出黎，一夾上黎就見到啲油由內到外咁滴出嚟。之後嚟海南雞飯，呢碟就勉強叫做可以接受，雖然佢啲雞肉都係鞋颯颯，飯又乾爭爭，但係都叫做有啲味，總括來講，其實都係唔好味，我哋3個人冇辦法食得晒。影左相俾大家睇睇，等大家自己判斷。…查看更多

是咁的，今日同老婆和外父入左去深井探大姐姐，食完飯就去左發記食甜品啦。好耐未入過黎食，我本身都唔多好甜品，不過之前黎食過覺得都唔差，就叫左個豆腐花芝麻糊，我老婆就叫紅豆沙同芒果班戟。好啦，我地等左一陣，見到一碗*浪*下*浪*下既野咁放低左，紅卜卜成碗水咁（心諗唔係咁水呀嘛！😨），呢碗「紅豆水」沙都唔沙下，重要溝水，紅豆同水比例係1：8，用匙羹盛起見到一層水係面，甜都唔甜下😡。好啦，之後到芒果班戟出場啦。咦？點解得兩舊既？我記得以前有四舊架，唔同我記錯？食第一舊味同口感都無咩變都ok，但食第二舊，哇，咁多渣既😒，咩而家租金貴到連渣都當係食材黎用？紅豆沙係咁咦煲下再溝水就算。至於個豆腐花芝麻糊，情況同紅豆沙一樣，我都唔再重覆了。總之今晚過後，發記甜品拜拜，唔會再見。😡😡😡…查看更多