kazimama的个人专页

最近經常打風，放工決定唔煮飯買外賣回家，口淡淡於是選了呢間川菜做晚餐。主菜之前，我點了兩份串燒，分別是：半肥黃牛肉串及玉米小串，小朋友見到心心眼，做頭盤啱晒。點咗三個晚餐，分別會跟小食、涼菜及白飯，外賣餐盒都係粉紅色，包裝擺放整齊，回家將外賣盒取出，食物完全冇滲出。海鮮麻辣燙：清新藤椒湯 $88任選三款葷菜及素菜，我選了嫩牛肉、牛柏葉及青口，再配上土豆片、脆魔芋絲及海帶。嫩牛肉肉質順滑，牛柏葉爽脆，青口大隻沒有沙。配料種類繁多包括花椒、八角及辣椒🌶️，入面還有薯粉吸收晒醬汁。麻辣燙可選寬薯粉條、米線、出前一丁或手打麵。酸甜清新蕃茄魚餐$128用新鮮鱸魚，配上蕃茄及其他配料一起燉煮，魚肉厚實唔會煮到爛晒，味道酸甜，小朋友最愛。秘醬口水雞餐 $118辣度選了免辣，小朋友可以食多幾件，雞件份量多，雞肉好嫩滑，配埋雞肉上面嘅秘製醬汁，水準之作，下次試埋佢嘅辣。是日涼菜：香辣土豆絲及涼拌萵筍絲是日小食：香炸脆奶外層炸得香脆，包住入面暖暖嫩滑嘅香濃牛奶，食完大滿足。…查看更多

大熱天時35度，帶住小朋友活動完之後，身水身汗，見到附近有元朗冰室，一於入去醫肚。餐廳嘅裝修主要以黃色為主，感覺精神有活力。打開餐牌，有很多不同嘅選擇，由一般茶餐廳嘅食品，到小朋友喜愛嘅菜式都有，正值下午茶時間，我哋一於試多幾款一齊食。咖喱牛肉意粉牛肉嫩滑彈牙，意粉啖啖掛上香濃嘅咖喱汁，咖喱汁唔算辣，大人小朋友都食到。招牌厚豬扒上枱發現塊豬扒size大過我隻手, 唔單止大，還要是厚厚的。入口香脆啖啖肉，滿滿嘅肉汁，香氣四溢。素菜pizza配薯條是日pizza是素菜口味，上碟時小朋友見到已經心心眼😍，我哋一人一塊，食落有驚喜。批底香脆，配上三色椒及菠蘿，香甜爽口，小朋友食唔夠。和風雞肉披薩 小朋友要encore 🍕, 試埋佢嘅和風雞肉披薩。全個pizza有八件，雞肉配上和風醬，加埋脆脆嘅餅底，一人一件好快又食晒。冰室一口西多士一口西多士外脆內軟，配瀑布煉奶及朱古力醬喺面，切好晒一粒粒size剛剛好，小朋友食到舔舔脷，如果多啲朱古力醬仲正。禾味燒BB鴿外觀色澤光亮，散發着脆皮香氣，入口皮薄肉嫩，配上淮鹽，提升乳鴿口感層次。沙嗲牛肉包嫩滑彈牙嘅牛肉，配上香濃嘅沙嗲醬，再放入剛焗好香脆嘅熱狗包內，入口沙嗲醬滿滿的近乎爆出嚟，夾埋熱狗包吃剛剛好，口感大滿足。鹹魚雞粒炒飯炒飯夠乾身，粒粒分明，配上爆香咗嘅鹹魚粒及雞粒，每一啖都有唔同嘅口感，層次分明，一人一碗好快又K.O. 哂照燒汁鰻魚丼小朋友想食鰻魚，煎香嘅鰻魚面上鋪上厚厚嘅鰻魚汁，香滑綿綿，配上海帶、粟米及配菜，大家表示食完飽飽。總括而言，價錢大眾化，性價比高；夏天熱熱，坐得舒適。小朋友最鍾意食佢個比蕯，絕對係厚切豬扒以外嘅另一小驚喜。…查看更多

由於掛念日本嘅感覺強烈，但計劃出發帶來嘅忐忑亦唔少，所以久不久都要食一啲比較正宗嘅日式美食等自己可以平衡少少。 今日同朋友搵到一間位於尖沙咀，走關西風嘅壽喜燒和牛專門店，見價錢可接受，決定一試。我同朋友分別各點咗一個餐，一人一鍋，套餐包括前菜、野菜盛盒、和牛、蘭王蛋、日本米飯或讚岐烏冬及甜品。枱上有指示介紹正宗嘅壽喜燒食法，店員亦非常有耐性地講解及示範食法，務求用最正宗嘅方法食到和牛的高光一刻。精品赤身壽喜燒套餐 120g $168赤身油花較少，入口肉味較濃，濃濃和牛肉香，淺嘗和牛之選。朋友追加40g赤身$38，性價比高。日本黑毛和牛牛板腱壽喜燒套餐（大盛）180g $258我見poster介紹呢種係「日本和牛黃金1%稀有肉」，每日限量18份。上碟時霜降紋理細緻平均，顏色較粉紅，滿滿嘅雪花，入口食到肉本身的柔軟及少少爽口，燒好放入蘭王蛋漿一齊食，口感層次分明。甜品：蕨餅沒有死甜，係嗰種入口唔會黏住喉嚨，淡淡清新嘅感覺，係正宗日本蕨餅嘅味道。日本白桃汁梳打 $28Sapporo 生啤$48總括而言，記掛住日本嘅我，食完呢個壽喜燒感到大滿足；價錢親民，肉嘅質素唔錯。埋單時見到憑收據可於一個月內七折購買外賣和牛，又可以俾個機會自己喺屋企encore和牛再食餐好。…查看更多

今日經過尖沙咀天星碼頭，一向鍾意試佢唔同口味嘅雞蛋仔，雞蛋仔香從遠處撲鼻，一於買返底雞蛋仔返去俾小朋友當小食吃。今次試咗「白玉麻糬雞蛋仔」，一如以往，雞蛋仔外層香脆，入面嘅麻糬軟糯得來唔會太甜，麻糬平均地分布在每一粒嘅雞蛋仔入面，大人小朋友都like. 另外，我叫咗杯凍鮮奶咖啡，咖啡香濃，配上純滑嘅鮮奶，配上雞蛋仔一齊食啱晒。作為簡單嘅街頭小食，每次嘅體驗都唔會令人失望，難怪連續多年獲得米芝蓮推介。…查看更多

小朋友開始放暑假了，帶住佢哋搵地方醫肚，嚟到荃灣荃新天地發現內地人氣重慶麵店- 遇見小麵，雖然要排隊等位，決定試吓。醒神陽光番茄麵小朋友唔食得辣，試咗佢嘅陽光番茄麵，酸酸嘅番茄香，加上彈牙嫩滑嘅麵條。原味酥脆雞排酥脆雞排外面脆卜卜，咬落口肉質鮮嫩唔太油膩，小朋友好快食晒。蔥油拌麵拌麵除了蔥油以外，還放滿不同配料，撈勻所有配料同麵一起一起吃，第一啖食到香濃蔥油味，之後食到其他配料，口感層次豐富。秘製脆皮半隻雞外層皮脆，咬落口雞肉嫩滑，每一啖都係脆口與嫩滑之間，性價比高。琥珀冰粉開頭以為會係好死甜嘅啫喱類甜品，點知食落口淡淡桂花香，冰粉彈牙爽口，配上淡花奶，每一啖都流連在香濃與絲滑之間，令我一試難忘。爆漿豆腐串（2 串）豆腐串配上微辣香料，啱晒鍾意食炸豆腐嘅我。安格斯牛肉串 （3 串）牛肉肉質鮮嫩，配上調味粉香口惹味。澳洲羔羊羊肉串 （3 串）羊肉串羊臊味唔太重，小朋友都食到津津有味。凍檸檬茶，檸檬味為主，唔會太甜，食完濃味嘢飲番杯檸檬茶醒神晒。總括而言，食物份量足，性價比高，唔使特登北上，近近哋落樓下都可以好抵食。…查看更多

最近做嘢壓力大，收工想大吃大喝，最後揀咗呢間專食雞翼嘅Wingman, 入到去座位唔算多，但平日下午已經九成滿，好在朋友有book枱，坐到最後一張二人枱。我見佢嘅雞翼係用歐盟認證走地雞，不含抗生素，咁就嗌咗個「雞全部都係雞」嘅拼盤，包24隻雞翼四款口味+兩款配菜。（$398）雞翼我哋就試咗兩款乾身+兩款濕身有醬的:泰式酸辣醬雞翼 （濕款）面頭放滿炸蒜加埋醬汁，酸甜味重，慢慢會少少辣。水牛城醬雞翼 （濕款）扁頭有紅紅嘅醬汁，入口滿佈Tabasco嘅酸辣味，啖啖肉加醬汁，重口味之選。黑椒檸檬雞翼 （乾款）乾款嘅雞翼，主要想食到雞翼皮的香脆。另外，在雞翼表面灑上檸檬汁，清新嘅檸檬同黑椒香走埋一齊，清新唔油膩。蜂蜜Wasabi雞翼（乾款）用蜜糖燒嘅雞翼，面頭再放上Wasabi，咬一啖食到Wasabi嘅攻鼻，同蜂蜜嘅香甜，唔會太辣唔會太甜。小食：爆谷雞除咗試佢哋嘅雞翼，我哋想試埋其他雞款，爆谷雞係穩陣之選，雞肉都係外脆內軟，再配埋甜酸醬，我同朋友勁快K.O.晒。小食：Halloumi 芝士咬落口香脆，亦食到芝士本身嘅鹹味，配上車厘茄同石榴粒，中和咗炸物的熱氣，值得一試。瘋狂食完一輪雞翼之後，我哋嗌咗兩杯清新解渴嘅凍飲，飲完感覺係爽~ Lemonade $50蔓越莓青檸梳打 $60我同朋友全程勁專注咁食雞翼，一隻接一隻，沒有太多交流。呢個餐嘅份量夠晒二人享用，雞翼除咗多款式之外，雞嘅肉質亦唔錯，食完大家都覺得好滿足。…查看更多

餐廳主要以傳統台式裝修為主，門口有個火車郵筒，勁似去到九份十分火車站咁嘅場景。咁啱餐廳做緊以台灣澎湖為主題嘅「澎湖遊」，會再有多啲特色台灣地道小食可以選，湯底就可以加錢揀古早藥膳牛骨湯。鍾情台灣小食嘅我，一於入去試試。我哋揀咗level 4特選澳洲和牛海鮮120分鐘吃到飽套餐，有成74款選擇，湯底就揀咗鴛鴦湯底，分別係養生藥膳雞湯湯底及椰子雞湯底。養生藥膳雞湯底材料有當歸、枸杞、人蔘及紅棗等，味道濃郁，補身一流。另外椰子雞湯底加入椰青水及片片椰子🥥，雞肉清甜嫩滑，感覺冇咁熱氣。澳洲和牛肩胛肉眼開我嘅至愛，放入湯底熨四至五秒食得，肉質嫩滑，牛香味濃。其他牛主要有幾種：封門牛柳、卡樂beef(牛五花)、牛扑肉及牛小排。海鮮方面，選擇亦好多，我特別點咗鮑魚、海參、墨魚滑、澎湖蝦滑、大蝦、鯇魚片及花膠等。打邊爐材料方面，一般嘅丸及蔬菜都有，我覺得較特別嘅係竹笙配蝦滑及響鈴魚子蝦滑卷，出邊比較少見，個人較喜愛麻辣鴨血。熟食區選擇繁多，包括台式滷肉飯、台式烤腸、茶葉蛋、咖喱角、滷水豆腐、麵線、澎湖海鮮粥及炒飯等。除咗熟食區，鍾情台式小吃嘅我點了多款台式小食，即叫即做，例如蚵仔煎、蔥抓餅、鹽酥雞塊、一口生煎包、荔枝蝦球、鵝肝醬多士、芝麻蝦多士、金沙蝦球及黑糖豆腐花等。當中，我特別喜歡澎湖海鮮粥，足料之餘入面好多蚵仔，粥煲得綿綿的，誠意之選。食完埋單，原來唔同嘅Level套餐可以得到唔同嘅代幣去玩夾公仔，食飽飽有得玩，最後夾到小匙扣一個。店員仲俾咗一張明信片我哋，入落佢哋呢個郵箱可以幫我哋寄俾朋友，成個體驗唔止飲食咁簡單，充滿着種種台灣風情。…查看更多

今日與同事經過旺角做嘢，午餐想食pizza，見到呢間餐廳嘅lunch Menu選擇都多，決定試試。餐廳裝修走美式風格，牆壁掛上大電視播住K-Pop，聽住啲歌能量返晒嚟。我哋分別點咗一個午餐及一客單點pizza。午餐隨主菜跟Home Made Iced Tea以外，可以加錢點飲品、餐湯及小食。餐湯韓式嘅豆腐海帶湯及Home Made Iced Tea明太鮮蝦海帶意粉 Myeongran (Pollock Roe) Prawn Pasta蝦夠爽口唔會太韌，與辣辣地嘅明太子醬及紫菜碎、洋蔥、西蘭花及杏鮑菇撈埋一齊食，Creamy得來啖啖都食到明太子，層次感豐富。瑪格麗特比薩 🍕Margherita Pizza (Large)單點咗個Pizza share食，由於同事係Pizza控，佢話食pizza一定要揀最傳統嗰隻，傳統Pizza最考功夫見真章。佢哋嘅水牛芝士形狀呈粒粒四方形，配上新鮮嘅車厘茄及大量火箭菜，口感香脆清爽，食得出佢嘅烘焙麵粉香，果然對得住佢個名。小食加咗炸蠔，有三隻，炸得夠脆口，唔算太油，不過不失。Peach Lime Iced Tea同事點咗呢杯特飲，好香水果味，但唔會太甜，整體感覺淡淡清新，配Pizza意粉一流。熱咖啡食韓國嘢可以飲到熱咖啡☕️對於唔飲咖啡唔得嘅我，簡直係驚喜，咖啡質素亦夠穩陣。整體食物水平不錯，座位寬敞舒適，員工亦友善跟得足，差好個靚電，繼續努力工作。…查看更多

今日天氣寒冷，我和朋友在銅鑼灣想吃日式熱食，最後揀咗呢間，主要見佢午餐無限時，可以食到下午三點餐廳落場時間。裝修主要以現代日式風格為主，簡約時尚。我和朋友各點了一個午餐，午餐包咗前菜、野菜盛盒、烏冬或白飯、飲品及甜品。前菜有章魚沙律、昆布鯖魚卷及魚湯豆腐；章魚沙律章魚粒粒爽口，昆布鯖魚卷比較少見，近似日式做法，魚湯豆腐夠滑。鹿兒島產黑毛和牛配’極‘黃金鰹魚湯底 $189鰹魚湯呈金黃色，清甜得來好有魚香味，將大大塊的黑毛和牛放入湯內，和牛雪花分布均勻，入口牛味香濃，鰹魚湯底唔會搶咗牛嘅味道，反而提升咗整體嘅鮮味。配上日本米飯🍚，飽飽滿足。壽喜燒日本國產牛配烏冬 $169店員會幫我哋先放壽喜燒汁入鍋內，壽喜燒明顯鮮甜味道突出。雖然係國產牛，但佢嘅雪花紋亦不少，入口油脂飽滿，夾埋壽喜燒汁食啖啖都係享受。另外，烏冬亦煙靭有咬口，食完成個人暖笠笠。飲品：荔枝紅茶及檸檬紅茶兩款飲品均沒有加冰，飲到香濃嘅紅茶味，荔枝及檸檬香最啱食完熱食中和一下。甜品：焙茶味雪糕放題，食到有茶香，唔會太甜。總括而言，環境寬敞開陽，店員有禮，食物質素唔錯。…查看更多

今日涼風秋送，我同朋友都想食啲熱嘢保暖，嚟到又一城，決定試吓米芝蓮推薦的呢間拉麵店。店內的裝修有少少殿堂華麗的感覺，我哋坐咗喺卡位，座位寬闊，枱與枱之間有一段距離。牛肝菌醬油鵝肝雞湯拉麵 $148呢款拉麵做緊期間限定，我見佢有我鍾意食嘅鵝肝，又有鵝肝，又有雞湯底做拉麵🍜，一於試試。食拉麵第一件事要先飲啖湯底，湯底由濃雞湯及魚湯一起熬製而成，有魚甜香及鮮雞味。夾起鵝肝咬一啖，煎得香口嫩滑，配上雞胸及牛肝菌，口感有多個層次。麵條有小麥嘅味道，面嘅質地屬於有咬口。四季金氣泡玄米茶 $28飲到淡淡嘅玄米茶味，亦都有淡淡嘅甜味，加埋氣泡水，食完拉麵飲爽晒。慢煮醬汁安格斯牛飯$188上碟時配上沙律、前菜及蜆汁湯，珍米飯上面放上片片的安格斯牛肉，中間放上一隻生雞蛋，賣相精緻。牛肉入口即溶，配上醬汁口感香濃，攪勻生雞蛋食，啖啖牛肉掛上香滑嘅蛋漿。前菜係關東煮，蜆汁湯內有大大隻蜆連殼，清甜開胃。總括而言，餐廳坐得舒服，食物比我嘅感覺係貴精不貴多，食完呢餐成個人暖暖的。…查看更多

我同老公好耐無食火鍋，難得今日有機會二人撐枱腳，秋高氣爽最好食自助火鍋。近近地喺如心廣場，出咗荃灣西鐵站沿天橋行大概4分鐘即到。我哋點了level 4 澳洲穀飼黑安格斯牛+SRF美國極黑牛放題+海鮮放題，任飲任食兩小時，見佢咁啱做特價每位$298，一於試吓。兩個人坐卡位，枱面夠闊夠大，唔使驚點太多冇位放😂😂。有六款湯底俾我哋揀，最後我揀咗免費升級的北海道蛤蜊魚湯，清清地可以食到餸菜嘅鮮味。自助枱分熱食及未熟食物區，選擇多且擺放整潔，調味醬區域亦有多款醬料可供選擇。我比較欣賞佢有本地水耕菜專區，支持本地農作之餘，又可食到新鮮嘅蔬菜。熱食區我較欣賞他的關東煮🍢，蔬菜魚卷的味道很清新，魚卷入口浸滿了關東煮嘅湯底香味，而且軟熟唔會太硬。未開始點菜之前，店員攞咗一盤海鮮及魚生給我們先淺嘗，試完之後可以再繼續追加。大海蝦、帆立貝、青口、蝦滑、魷魚，花膠及挪威三文魚刺身。我特別欣賞佢嘅花膠，大大條入口軟熟且彈牙。主角澳洲糓飼安格斯牛出場，油花紋路分明，放入火鍋滾大約10秒8秒即食，牛則嫩滑，入口即溶。SRF美國極黑牛, 油花較安格斯牛少，入口牛肉口感較緊致。煙肉焗蠔入面有煙肉及滿滿嘅芝士，蠔入口彈牙，香口之選。吞拿魚魚生飯一啖吞拿魚一啖飯，淺嘗魚生飯之選。大雪櫃入面除咗有飲品仲有甜品，芝士蛋糕及泡芙等，仲有自製軟雪糕，我揀咗低糖牛奶味，仲加咗個無花果乾落雪糕度。另外，想highlight嘅係佢哋有湯圓作為甜品火鍋嘅選擇，有兩款味道包括花生及芝麻，粒粒獨立包裝。一餐入面食到咁多唔同種類嘅食物，超級大滿足。…查看更多

星期五老公生日，決定同佢食返餐好，他一向喜歡吃日本嘢，決定book公司附近圓方呢間日式料理，訂枱時職員告知餐廳嘅開放時間為星期一至五，good fit。入面嘅裝修富日式且舉時尚感，我哋兩個人坐咗一張闊落嘅四人梳化位，舒適得來空間感十足。見佢晚市做緊$588二人套餐，一於試吓。小食（六選一）脆炸單骨雞翼配辛子明太子醬單骨雞翼炸得脆口，入面肉質仍然保持到鮮嫩，點埋明太子醬，開胃之選。燒物（四選二）燒明太子意瓜串翠玉瓜上面佈滿明太子醬，咬落口有明太子嘅Creamy，又有翠玉瓜嘅爽脆，呢個配搭唔錯。燒牛舌串 （+$18）日式料理嘅水準，好多時可以反映喺佢哋嘅燒物上面，燒牛舌串外面脆，咬落肉質香嫩得來軟身Juicy. 主菜（八選一）嚴選刺身盛，配野菜烏冬（+$98）慶生食日本嘢，點少得刺身。刺身嘅質素亦可以直接反映餐廳嘅水準，刺身盛包括有：三文魚、吞拿魚、油甘魚、牡丹蝦及帆立貝，全部厚切得嚟夠新鮮，帆立貝絕對係我哋至愛，大粒得來夠鮮嫩；再配埋野菜烏冬一齊食，烏冬彈牙，野菜及湯底鮮甜。壽司塔可（五選二）壽司塔可算係餐廳比較特色之選，我哋分別點咗辣味三文魚壽司塔可及海膽壽司塔可🌮, 以taco及壽司嘅概念，出面熱天婦羅包住壽司及滿滿嘅餡料，外層爽脆，內層材料新鮮，口感層次豐富。見係老公生日，特意加$88試海膽壽司taco，海膽係新鮮嘅，無令我哋失望。松葉蟹肉海鮮茶碗蒸（追加$48）既然食得日本嘢，試埋佢嘅松葉蟹肉。絲絲嘅蟹肉，配上嫩滑嘅燉蛋，一碗天然無添加嘅茶碗蒸絕對係舒緩味覺嘅良方。甜品（五選一）本身我鍾意抹茶，老公鍾意食提拉米蘇，自然揀咗抹茶提拉米蘇盒子配糖漬紅豆。抹茶提拉米蘇入面有香綿嘅紅豆，啖啖絲滑。特飲：香桃富士梳打（+$38）杯嘅上面以蘋果片及薰衣草作裝飾，香桃梳打顏色有少少似香檳，飲落非常清新，亦不失美感。鮮奶咖啡（+$18）總括而言，座位環境舒適，服務員有禮貌，菜式有創意，食材亦夠新鮮，整個體驗良好，老公表示滿意呢餐生日飯。…查看更多

今日放假，想喺荔枝角區嘆下午茶☕️。朋友介紹去新開嘅83瓊林街，是由兩座好似雙子塔咁組成嘅甲級商廈。連住商廈，有好多新開食肆，我哋入咗去一間西式咖啡店試試。墨西哥芝士餡餅🥙材料有芝士、雞肉及牛油果🥑，旁邊仲有沙律菜。餡餅焗得好香，外邊咬落脆口，食到入面滿滿嘅牛油果及芝士，加埋嫩滑嘅雞肉，口感大滿足。法式多士配碎蛋、牛油果莎莎及烤雞沙律一式三件嘅法式多士有三種味道，身為牛油果控的我表示，原來烤雞沙律同埋碎蛋都出色。即磨咖啡要試咖啡店嘅咖啡水準，通常我都唔會飲拿鐵或者朱古力咖啡等，直接飲佢嘅即磨咖啡☕️，再加埋咖啡cream，入口有烘焙嘅味道，飲落絲滑順口，食個下午茶再跟杯咖啡，性價比高。今日悠悠閒閒食到個高質下午茶，即刻開心晒。…查看更多

今天爸爸約吃飯，我們在沙田新城市廣場走着，最後選了這間菜館。這裏嘅佈置及員工嘅制服也很有特色，有一點魚港風味。店員為我們遞上鴨屎香茶，小小甘苦味，隔一陣仍然有餘香，消膩醒神。每枱都會跟埋餐前小吃紅糖番薯餅，咬落出面脆脆的，入面煙韌得來有好清香嘅番薯甜味，無估到餐前小吃都頗有心思。金獎鹵鵝拼盤 $128原來佢哋嘅鹵鵝得過金獎，呢個鹵鵝拼盤有滷糖心蛋、鵝肉、鵝血、鵝翼及掌。我最愛佢嘅鹵糖心蛋，香滑甜蜜。爸爸則喜歡佢嘅滷肉及鵝頸。南澳蠔仔烙 $98上碟時形狀像pizza，預切咗四大塊。店員話係地道南澳做法，加入木薯粉，外面香脆，內裏煙韌，加埋大大粒蠔仔，層次豐富。番薯餅香煎金鯧魚 $128金槍魚煎到脆脆，但不會有油膩的感覺。魚肉亦出奇地嫩滑，魚骨不多，店員話原來呢味亦係得獎菜。海鮮砂鍋粥 $98大鍋海鮮粥底加入蝦、花甲及蠔仔一齊煮。幾款海鮮亦鮮香，我特別喜愛花甲，大大粒亦清洗乾淨，清甜彈牙。另外，砂鍋粥配上納豆醬可供調味。潮汕七樣菜 $68由七種不同種類嘅菜組成，配上清湯底，食完好舒服。店員的服務態度很親切，不時為我們介紹菜。這餐爸爸表示滿意，他最愛鹵鵝肉，我則最愛香煎金鯧魚。…查看更多

今日工人姐姐休息，起身已經係晏晝一點，我即刻跑落樓下間波仔入貨醫肚。「波仔」，我細個時已經有幫襯過，嗰時主要以飯及意粉為主。我發現現在嘅食物種類多咗好多，連至愛嘅甜品都有。咖喱牛腩飯細個時記得波仔的咖喱牛腩飯最經典，咖喱味香濃，辣味點到即止，牛腩鬆軟，入口即溶。燒雞髀原汁煲飯燒雞髀啖啖肉之餘，肉質亦嫩滑，雞髀的燒汁滲了落飯內，穩陣之選。芝士泡菜雞粒炒飯我自己鍾意食泡菜，貪佢夠惹味。飯盒叮熱後，芝士溶落泡菜及炒飯裏面，再配埋雞粒一齊食，層次豐富。驚喜嘅係，芝士還可以拉絲。水晶蝦餃一盒六粒，蝦餃唔算細隻，簡單一餐都有點心蝦餃吃。花生醬西多士飯後甜品，店員建議用氣炸鍋煮口感最佳，切開兩邊，花生醬慢慢流出，配埋西多士一齊食，性價比頗高。星期日，一家人輕鬆搞掂兩餐，多咗出嚟嘅時間就可以做自己想做嘅事。…查看更多