Concon Concon的个人专页

今日同朋友趁著一田購物優惠日還未結束，去咗大埔開心shopping，捧著幾袋戰利品，朋友就話食埋晚飯至返屋企，於是我哋就去咗附近一間茶餐廳——「金記冰室」坐低慢慢食。冰室門口擺放了餐牌及易拉架來介紹店內食物，整齊美觀，客人可一目瞭然。其中每天不同款式的防疫老火靚湯非常吸引，確實適合工作忙碌而無暇煲湯的上班一族。踏進店內，店員即上前招呼及量體溫，而客人需展示手腕內側，據店員說可順道檢查客人有否戴電子手環，看來頗細心，有別於一般食肆的做法。亦因應限聚令關係，店內座位均以膠板或透明膠來分隔，確保客人吃得安心又舒適。最後朋友點了香港情懷精選之「煎蛋豬扒飯」，而我因為下午茶吃多了，故此就選吃「吉列豬扒配沙律」，另外再加兩杯飲品—「芒果凍頂烏龍冷泡茶」和「凍檸檬茶」。「吉列豬扒配沙律」  $50吉列豬扒大大塊，色澤金黃，酥脆香口惹味，外脆內軟，肉質不會又乾又硬。沙律以薯仔及雜果拌成，比例剛好，而沙律味道酸酸甜甜，很開胃，還伴有番茄和生菜，賣相不錯，如果薯仔能再烚淋一點就更佳。「煎蛋豬扒飯配豉油汁」  $48香港情懷精選系列均設有多款醬汁以供選擇，除了豉油汁外，還可選配鮮茄汁、黑椒汁或燒汁。香煎豬扒厚薄適中，帶少許肥膏，肉質軟腍，非常惹味，加上兩隻脆邊雞蛋和鹹中帶點甜的豉油來拌飯，朋友食到唔停口。「芒果凍頂烏龍冷泡茶」  $14 （跟餐配）朋友喜歡新嘗試，於是點了新出的「芒果凍頂烏龍冷泡茶」來試，以高身杯盛載，內有一個茶包，賣相不錯，朋友話綠茶味幾清甜，但芒果味稍淡，若能加幾粒芒果肉的話，不但增加口感，味道亦會更佳。「凍檸檬茶」   $12 （跟餐配）少甜少冰的凍檸檬茶就比較合我口味，茶味適中，不會太濃和帶苦味，甜度也剛好，飯後喝一杯，確實不錯。最後，朋友意猶未盡，佢話今日shopping消耗大，想食個甜品再補充吓。「金粒西多配雪糕」   $38將西多士切成小小的立方體，一口一件，粒粒炸得金黃色，沾滿蛋香，外脆內軟，蘸煉奶或配以雪糕一起吃，一冷一熱，口感豐富，為今餐劃上圓滿的句號，很滿足的一餐。總括來講，餐廳食物有質素，價錢合理，座位空間尚算寬敞，難怪朋友已成為熟客。而且最近店內新增了自助電子落單，客人可利用枱上入數紙的QR code登入網站下單，衛生又環保。介面清晰，操作簡易，而且內置多款不同選擇，如少甜、少冰、少油、少鹽、多豉油、熟蛋、走蔥⋯⋯等，方便客人按個人口味喜好剔選，個人認為非常貼心，值得一讚。…查看更多

早前去完新加坡旅行，對星洲美食總是念念不忘，今日碰巧和朋友經過銅鑼灣皇室堡，朋友話『天天海南雞飯』在香港的首間店舖好像就在附近，於是立即觸動了我的為食神經，快快上 Open Rice 查一查，果然近在咫尺，就決定去會一會這間過江龍啦。餐廳近門口處設有一列吧枱，內裏環境優雅寧靜，樓底頗高，以藍黑色調為主，設計頗有格調。餐牌上除了有招牌海南雞外，還有很多創新菜式，朋友嗜辣，就加點了兩款帶辣的小菜來試。【天天海南雞】 $158［例］＋【天天石鍋雞飯】$48標榜跟足新加坡總店的做法而炮製的海南雞，皮薄無肥膏，嫩滑鮮味，已去骨，咬落啖啖肉，肉質軟腍，沒有雞腥味，配埋淋在雞肉上的醬汁一起吃，味道更加提鮮。另外再跟三款不同風味的獨特醬汁，分別有稠身香醇的新加坡黑豉油，薑蓉及秘製辣醬，朋友就喜歡味道帶點酸甜及清新檸香的秘製辣醬，很惹味，吃到舔舔脷，果然不負招牌菜的盛名。雞飯以石鍋盛載，可保持溫度令米飯不易乾硬，粒粒分明充滿雞湯香味，不油膩，好吃。【蒜泥黑豚】  $88以肥瘦均勻又薄切的黑豚肉卷住青瓜條，配上麻辣蒜泥汁，既吃到肉的鮮味，又有爽脆清新的青瓜味，還有蒜香味和麻辣味，再加上點點芝麻香味，口感非常豐富有層次，好味又醒胃，可說是蒜泥白肉的升級版，值得一試。【水煮和牛】  $148和牛片油花平均細緻，不會太油膩，肉質嫩滑，肉味濃，再加上吸收了麻辣水煮汁精華的青瓜、芋絲和雜菌，絕對是送飯的一個好小菜，朋友愛吃辣，讚不絕口。【百香茉莉】 $38 和 【超級果茶】 $42超級果茶名副其實有勁多水果，有紅蘋果，青蘋果，桔仔，西瓜，草莓，青檸，檸檬和橙，再配合碧螺春綠茶調製，果香味十足，加上淡淡回甘的茶味，非常好飲。至於朋友的百香茉莉就只有百香果和碧螺春綠茶，味道比較單純啲，都好清新。飯後飲番杯果茶，感覺很舒服。總括來說，『天天海南雞飯』連同三間新加坡米芝蓮街坊食店『老街坊』、『超好麵』及『五十年代』，一店四舖，無論飯、麵、飲品都做到極高質素，食材用料新鮮。今餐很滿意，朋友應記一功，以後若再懷念星加坡美食時，又有一個解饞好去處了。…查看更多

多年不見的舊同學剛從外國回來，約我在紅磡嘉里酒店見面敘舊。見面後由她引領到酒店旁的一間西餐廳 “bong”  ，她說昨天來過，覺得環境不錯，夠寧靜，最適合傾偈，所以今天特意和我再來。餐廳有一排落地玻璃，光綫充足，景觀開陽，可眺望紅磡碼頭，有海景view，餐桌之間空間闊落，感覺舒適。原來餐廳主打「韓式熟成牛排」，在香港自設廠房，用牛肉本身的天然酵素在120天裏熟成，讓肉質嫩滑多汁。餐牌上 Set Lunch 有三款選擇，我哋就選了中價嘅 Business Lunch，既可以試吓餐廳出名嘅牛扒，又可以有 Sorbet 同 Dessert，最適合我哋兩個慢慢食慢慢傾。🔸Business Lunch🔸【Sweet Pumpkin Cream Soup】金黃色的南瓜湯濃稠適中，易入口，味道清新，有淡淡忌廉香，又滑又好喝。麵包外脆內軟，有麥片和紅莓，很有口感。【 Green Salad with Orange 】沙律有3顆合桃、橙肉和少量生菜，另有以乳酪調製的沙律醬汁，味道頗特別。【 Dry-aged Sirloin Steak (150g) 】150g 熟成牛扒肉味濃，肉質細緻、唔韌，選了 medium well，廚師控制火候時間好，不會過熟，仍見有粉嫩肉色，很合我口味，果然出色。有六款醬料提供，很講究，計有忌廉黑椒汁、芥辣、酸瓜、喜馬拉雅山鹽、岩鹽及紫菜鹽，供客人隨意配搭，試勻後，個人還是覺得配喜馬拉雅山鹽和岩鹽味道最夾。伴碟有焗薯和烤蔬菜，如露筍、茄子、翠玉瓜和蕃茄等，豐富又新鮮。【 Sorbet 】紅桑子雪芭，味道酸酸甜甜，既能幫助消化，又可刺激食慾，侍應生哥哥話用作清一清剛才牛扒的濃烈味道，然後才吃下一道菜式——意粉。【 Today’s Pasta 】蘑菇意粉味道頗濃，有橄欖油香，蘑茹索咗醬汁後很入味，很香甜，份量雖然是小份，但吃到最後一道菜已經很飽了，所以份量是非常適中呢！【 Dessert 】是日甜品係日式芝士蛋糕，質感綿密，鬆軟香滑，芝味清甜，不錯。【Coffee or Tea 】凍檸檬茶係我嘅至愛，飯後飲番杯，舒暢又滿足。最後，這個午餐足足食咗差不多三個鐘頭，我哋兩個一邊食一邊傾，食得比較慢，而侍應生就站在遠處好有耐性及禮貌地等待我哋食完，才過來收碟及遞上另一道菜式，服務態度非常好，值得一讚。👍整體來講，餐廳食物質素高，味道好，環境優雅，離開餐廳時還見到太陽開始西下，原來有海景外，更可以欣賞到黃昏日落美景，咁有情調，下個月 Honey 生日，一於同佢嚟撐枱腳。…查看更多

早前聽朋友講過大埔有間正宗川味麵店，食物不錯，價錢亦親民，趁著今日入大埔買花泥，一於走去試一試。店舖位於海寶花園，門前擺放一個大餐牌介紹各類食物。店內環境光猛整潔，藍白色調為主，設有多排卡座，而牆上也掛有不少關於食物嘅介紹，佈置頗有特色。餐牌上除了米線外，還可選擇扭紋薯粉，淮山麵，亦可配麻辣湯、蕃茄湯、酸菜湯或清湯，適合各口味客人，而且仲有飯類及一些風味小吃和炸物。最後我就點了百味酸菜魚扭紋薯粉和麻辣豬耳來試。【百味酸菜魚配扭紋薯粉】 $56  湯底味道濃郁，酸酸地、辣味不重，據店家講，這款酸菜魚湯底是自家農場秘製，無添加的，果然係清甜好味。酸菜唔會太酸，十分開胃，魚柳份量頗多，鮮味嫩滑，無骨啖啖肉，好吃。第一次食扭紋薯粉，口感頗特別，有咬口又彈牙，值得一試。【麻辣豬耳】 $27帶麻辣味嘅豬耳非常爽脆，而且充滿麻香味，份量亦好多，十分超值扺食。【荔枝椰果紅茶】 （跟餐加 $16）飯後再加上一杯有荔枝清香及Q彈椰果嘅紅茶作終結，簡直perfect。整體來說，百味川用料新鮮，食物份量足，味道多元化，性價比高，朋友果然好介紹。…查看更多

今日陪個friend去尖沙咀 The One 睇衫，行完就孖住佢一齊落咗去底層逛一逛，已經很久沒有買平靚正的 $12 文具，開心掃貨之後，朋友就話電梯旁呢間拉麵店在網上有不少好評，於是我哋就入咗去試下。店舖裝修很簡潔，木造的餐桌椅，實而不華，十來張枱，約提供三十多個座位。餐牌亦非常簡單，食物選擇只有兩款拉麵，加 $30轉套餐的話，可選一款小食之外，湯麵還會多一隻日本半熟蛋，於是我哋就決定叫兩個套餐。『別天神套餐』  $105即是豚骨湯麵加隻日本半熟蛋，配料有木耳絲、蔥粒、紫菜及兩塊咬落肉質軟腍又微焦嘅叉燒。豬骨濃湯純正，奶白色嘅湯底味道香濃，喝後感覺應該無落味精，很鮮味，店家話係用壓力煲長時間熬製而成。幼身拉麵有咬口，煮麵時間控制好，質感彈牙有嚼勁，份量亦很足夠。加埋蛋味香濃嘅日本半熟蛋，軟滑嘅蛋白和流心嘅蛋黃令整碗麵更加豐富。假如喜歡較濃味的話，亦可依指引自行調製特濃或特辣口味，而我只是加了點蒜蓉就已經很惹味了。『蝦味噌套餐』  $115朋友嘅蝦味噌豚骨湯麵一樣咁出色，配料就有日本半熟蛋、紫菜、粟米、兩塊叉燒及一大堆櫻花蝦，湯底充滿濃郁嘅蝦味，好鮮甜，令味噌豚骨湯味道更有層次，麵身同樣彈牙有咬口。朋友喜歡辣，就依法調製了特辣口味，佢仲話啲辣芽菜夠惹味，很合口胃喎。兩款小食分別是小龍蝦蟹子沙律及餃子。『小龍蝦蟹子沙律』雖然細細份，但滿滿都是龍蝦肉，爽口彈牙，加埋味道鮮香的蟹子，更加提鮮，而且還附上幾片紫菜，用嚟包住沙律一齊食，又脆又香，非常美味。『餃子』餃子共有四隻，外皮薄，肉餡的調味做得不錯，吃時還有肉汁，不會太乾，底部煎得尚算香脆。兩款小食可說是各有特色，但個人就認為小龍蝦蟹子沙律小勝。整體來講，店家雖然只有兩款拉麵和兩款小食供客人選擇，但食物都頗有水準，正所謂『貴精不貴多』，廚師能夠專注做好每件出品，就是我們消費者所期望得到的。…查看更多

今天陪朋友到西九龍入境事務處辦理護照續期，時間未到，便在附近找地方醫肚，金巴利道有間茶餐廳以前曾去過，諗住行去嘅時候，朋友突然想起有同事推薦呢間『圓山台灣料理』，話母親節來飲茶，食物質素唔錯，於是我哋就決定去試一試。『圓山台灣料理』不是地舖，需要上樓梯到一樓，內裏裝潢跟港式茶樓差不多，入口位置有一排大水缸養着海鮮，樓底不算很高，但雅緻舒適，光猛整潔。點心選擇頗多，有台灣地道小食、即拉腸粉、煎炸點心、各式鹹甜美點等，還提供午市點心套餐和商務套餐，但我哋兩個都比較喜歡吃點心，所以最後揀了多款精美點心。【懷舊水晶蝦餃】一籠有五隻大小適中的蝦餃，薄薄的蝦餃皮呈半透明，晶凝通透，蝦肉爽口彈牙，鮮甜美味，可說是皮薄餡靚，不錯。【招牌雪影叉燒包】叫得做招牌，當然唔失禮，以小竹籃盛載，一客三個，新鮮、熱騰騰，外皮焗得非常鬆脆可口，叉燒包軟腍有彈性，餡料嘅蜜餞叉燒，醬汁濃郁惹味，果然好介紹。【黃金蒜香蝦春卷】炸成金黃色的春卷，皮薄鬆脆，蝦肉新鮮，肉質爽，蝦味香，大大件，用料足。【香葱牛栢葉】已有一段時間沒有吃這款點心了，因為坊間很多酒樓賣的是沙爹牛栢葉，個人認為味道太濃，以薑葱蒸的做法來處理，會比較鮮味及能去除牛栢葉的腥膻味，牛栢葉非常爽脆可口。【鮑汁花生鳳爪】鳳爪和花生都炆得好入味，入口軟腍，膠質豐富，而且鮑汁不會過鹹，我哋食到舔舔脷。【台灣花雕醉鴿】朋友話第一次食花雕醉乳鴿，佢覺得比醉雞更好食，因為鴿肉比雞肉結實，肉味較濃，咬落更有口感，嫩滑嘅乳鴿肉充滿花雕酒香，皮香肉嫩，很滋味。【小倉紅豆椰汁糕】椰汁糕充滿椰香味，質感Q彈，配上煮得軟硬適中又大大粒嘅紅豆，口感香滑清涼，甜而不膩，個人覺得『圓山台灣料理』的點心頗有水準，味道好，即叫即做，在尖沙咀區來說，價錢親民，絕對是飲茶的好地方，下次有機會的話，要約埋班friend來試埋啲小菜添。…查看更多

祟光百貨週年大減價確實吸引，今日一於做個乖乖女陪媽咪去掃貨，順道帶佢食好西，補祝上星期的母親節。早前聽朋友說在銅鑼灣開平道的Cubus有間吃日本菜的餐廳，用料非常新鮮，而且午餐時段性價比較高，值得一試。位於Cubus七樓的『玄鮨』，近入口處有一排半梳化座位及以磨砂玻璃間成的廂房，而遠處則有吧枱，環境優雅簡約，空間感足，開揚通透。Menu很簡單，共有十款Lunch Set 選擇，價錢由 $300 - $520不等，最後我們點了 Sashimi Lunch 同 Deluxe Chirashi 兩款餐。點餐後，侍應先送來以小碗盛載的小食，是兩塊先炸後醃再配以洋蔥醬汁，味道酸酸甜甜的魚，很開胃。Deluxe Chirashi （$360） 包括有味噌湯、茶碗蒸和刺身丼。味噌湯—味道鮮甜，不會過鹹，蜆肉亦頗肥美。茶碗蒸—蛋味香濃，味道鮮美，口感細膩軟滑，材料豐富。豪華什錦丼—刺身種類多，五顏六色的新鮮刺身，有三文魚籽、海膽、大拖羅、油甘魚、蝦蛄、帆立貝、牡丹蝦等等，全部都好新鮮，果然豪華。其中厚切拖羅，油脂豐富，食落軟綿綿，入口慢慢溶化，油香四溢。另外要讚的是海膽，味道很鮮甜，一點都唔腥。此外，牡丹蝦肉質細綿爽口，質感嫩滑，鮮甜甘香，很新鮮。Sashimi Lunch （$330）媽咪這個午餐都好豐富，有味噌湯、漬物、白飯及一盤刺身。漬物—醃蘿蔔和薑，味道酸酸地，媽咪話可以增加食慾。刺身盤有甜蝦、象拔蚌、魷魚、拖羅、鯛魚、針魚和鰹魚等，顏色繽紛，各款刺身都好新鮮，質素很高。其中比較特別的是：鰹魚—蘸酸汁吃，不是配wasabi豉油，魚味很鮮甜。拖羅—比較厚身，呈小立方，很肥美，油脂豐富，少筋，入口即溶化，味道甘甜，齒頰留香。針魚—魚味清淡，肉質嫩滑新鮮，是時令魚，不是經常有。套餐還有一杯咖啡或甜品，媽咪和我都選擇了「抺茶奶凍」，奶凍好creamy，質感滑不溜口，抺茶香味濃郁，微甜，以這個甜品作為今餐的終結，實在太完美了。總括來說，玄鮨食材好新鮮，環境又舒適寧靜，怪不得連續幾年得到米芝蓮推介，媽咪對今餐很滿意，仲讚我安排得好，我哋吃飽飽再孖住去shopping，簡直係大滿足。…查看更多

今日約左朋友去尖沙咀The One睇戲，未夠鐘就係附近行下，順便食埋個晚餐，朋友突然醒起間好餐廳，話帶我去蒲下，原來係去莆田黎個「蟶霸之夜」。餐牌話蟶子係來自莆田哆頭村，當地世代養蟶子，有600幾年歷史，而且哆頭村海水鹽分比其他地區高，所以蟶子食起嚟格外鮮甜。今次有8款煮法，只係$198，就可以任選2款菜式，當然試試佢啦！我地揀左蒜蓉蒸蟶子同冰爽酒糟蟶子，另外加多幾個餸。莆田扁肉湯 $19/位一開始當然唔少得呢個扁肉湯，經典福建菜，個湯肉味濃，紫菜味香，扁肉餃子細細粒好精緻，食落皮薄好滑，幾抵食。冰浸苦瓜 $49本來都有d怕苦瓜苦，但見到好多人推薦，有驚喜，就叫黎試下！果然係幾特別，苦瓜薄薄一片，師父刀工確實不錯，點一點個蜜糖水食，真係無左個苦味，食到尾有少少回甘，好味道。口感好爽脆，冰涼感覺，夏天好適合，消暑一流。蒜蓉蒸蟶子數量都幾多，一碟有超過10隻，開邊蒸啖啖都食蒜蓉，肉質肥美鮮甜，好新鮮，加埋d豉油，濕濕地，有d汁，食落唔會乾身，好味！冰爽酒糟蟶子呢一味係冷盤，第一啖食落口覺得酒味有d濃，但越食越想食，蟶子嘅鮮甜味慢慢出黎，個口感有d爽脆，咬落會爆汁，有趣。莆田荔枝肉 $89 荔枝肉並唔係因為用荔枝煮而命名，係因為每粒肉都似新鮮荔枝咁飽滿圓潤而得名。食落口感其實有d似咕嚕肉，一個肉質確係唔錯，比較爽口，啖啖肉，酸酸甜甜，幾開胃。興化炒米粉 $86呢個米粉朋友每次都點，因為只有莆田先食得到。米粉白如雪、細如絲，同一般米粉唔同，米香味濃，口感煙韌，配上多種配料，包括蝦、花生、紫菜、咸肉、元貝、蜆肉、蛋、菜、冬菇等燜炒，啖啖都唔同配料，好豐富。總括黎講，莆田菜式味道同用料都好好，哆頭蟶節嘅菜式幾有特色，估唔到原來蟶子都有咁多種不同煮法，下次叫多幾個朋友去試埋其餘6款蟶子，睇下有無驚喜先！ …查看更多

最近經過太和附近，見到一間新開業不久主打新加坡及馬來西亞菜的餐廳－「果子 Life Café」，今日終於有時間約埋朋友來試一試。餐廳裝修簡約，傢具以淺木色為主，環境寬敞乾淨，光線柔和，我們被安排坐卡位，舒適闊落。餐廳食物主要以星馬菜為主，有麵、飯、小菜、沙律及小食等多款選擇，還有一些特式飲品，我哋就點咗兩個飯及小食來試。［小食］【白雲酸辣鳳爪】  $28共有8件的無骨鳳爪爽口彈牙，味道酸酸地不太辣，好開胃，切成小件更方便女士們的小口。【小食拼盤】 $59 有南乳雞翼、香脆吉列蝦、香辣魚餅、絲網春卷各2件，即叫即炸香噴噴，魚餅彈牙，好重香茅味，吉列蝦和絲網春卷都好酥脆，南乳雞翼鹹香味濃，惹味可口。［主食］【肉骨茶飯】 $62朋友話肉骨茶帶點馬來西亞風味，有淡淡藥材味，不算濃，味道亦不會太鹹，較易入口。排骨軟腍，筋腱位有嚼勁，而豆卜就吸收咗湯的鮮味，仲有雞蛋和油炸鬼，食得好滿足喎！【香茅豬扒椰漿飯】$58豬扒切成小件，份量頗足，煎至金黃色，香口入味，鬆軟有肉汁，椰漿飯充滿椰香，帶點黏糯，加太陽蛋的蛋汁一起吃，很滋味，而最欣賞的是那些香脆又鹹鹹地的小魚乾，非常惹味。［飲品］【青檸香橙梳打】 $24青檸帶有清新的香氣與檸檬的酸味，加上香橙的鮮甜，味道幾夾，酸酸甜甜，作為飯後飲品，不錯的選擇。【鮮檸檬茶】 $18個人比較喜歡喝凍檸檬茶，因為酸甜可口又生津止渴，這裏的茶味不會太濃，甜度較淡（叫了少甜），且有較重的檸檬香味，頗合口味。總括而言，餐廳環境舒適，服務員有禮貌，食物質素和味道都有水準，價錢經濟實惠，更免收加一，是一個在大埔區吃星馬菜的不錯地方。…查看更多

今日和朋友去咗尖沙咀行街，行到攰想搵個地方坐低醫肚及休息，經過海防道見到一間居酒屋，我哋就上咗去試。居酒屋裝潢以木材為主調，一般和式格局，座位不算太多，但空間幾寬敞。餐牌選擇很多，爐邊燒、即肴酒肴、板長料理和主食，應有盡有，我和朋友點了其中幾款試試。先來兩個前菜，沙律菜配日式芝麻醬，開胃、好味道，驚喜的是還伴有海蜇，爽口彈牙，好有口感。接着兩個冷盤小食－【鮟鱇魚肝】質感非常軟滑鮮甜，充滿魚油香，完全無腥味，配酸汁吃，可中和油膩感，一口一片，回味無窮。【芥末山藥秋葵】山藥和秋葵都是健康食材，帶有特殊黏液，涼拌吃爽脆黏滑，加少許芥末吃，味道辛辣，口感更豐富。然後是熱食－【燒舞茸茶壺海鮮湯】茶壺雖然細細，但湯料和湯水都很足，有蜆、蝦、日本魚片、元貝、銀杏等，清甜鮮味，幾好。【博多明太子玉子燒】鹹鮮惹味的明太子被微甜的蛋卷包着，賣相金黃柔軟，口感軟彈，鹹甜味道相夾，是一個美味的組合，個人認為很值得試。【清酒煮蜆】蜆的份量頗多，蜆肉飽滿鮮甜，但個人覺得酒味稍淡，可以濃些會更香。【海の幸地獄鍋燒稻庭烏冬】主食我哋揀咗海鮮烏冬，海鮮材料豐富，有青口、蝦、蜆各兩隻外，還有帶子和元貝。海鮮湯鮮甜美味，而稻庭烏冬麵身偏幼扁平，口感滑溜，加埋湯汁一起吃，好入味！跟鍋有兩款醬，分別係芝麻醬和辣海鮮醬，可按口味拌醬吃，要幾辣有幾辣，如果唔吃辣的話，都可以好似我咁撈芝麻醬，一樣咁惹味。整體來說，環境舒適，食材幾新鮮，加上侍應勤快，服務好，不錯不錯。…查看更多

與朋友在油麻地百老匯電影中心睇完戲，行出彌敦道想搵個地方舒舒服服坐低吃個晚餐，朋友就話附近有間西餐廳，早前曾吃過，價錢唔貴，食物好味，包我滿意。餐廳位於 CASA Deluxe Hotel 一樓，有一列玻璃窗可看到彌敦道街景，感覺頗開揚，裝修簡潔平實，環境舒適。餐牌選擇很多，但朋友和我都喜歡點套餐，有餐湯、麵包、主菜及飲品，感覺完美啲，而且不用花精神去考慮，所以我們就點了兩個晚餐，分別是「香蒜白酒蜆意大利粉」和「黑松露野菌意大利飯」。【南瓜湯＋蒜香法式包】南瓜湯金黃香濃，口感軟綿，味道清甜香滑，南瓜含有豐富的胡蘿蔔素、維他命B1、B2、C以及食物纖維，美味又健康。跟香脆的牛油蒜蓉法包一起吃，很惹味。【香蒜白酒蜆意大利粉】     $138朋友話蜆肉鮮甜，無腥味，份量頗多，意粉充滿蒜香，有淡淡白酒香，還加入紅黃椒和沙律菜，增加口感之餘，令顏色更鮮豔悅目。【黑松露野菌意大利飯】   $148意大利飯上面放有很多碎芝士片，芝味香濃，飯粒被濃濃的醬汁所包圍，入囗好creamy，軟硬度適中，煙煙韌韌有嚼勁，黑松露味非常濃郁，菇片很多，味道好，有水準。【紅桑子草莓茶】花茶味酸酸甜甜，有淡淡果香，開胃生津，飯後喝，很適合。【凍檸檬茶】飯後喝一杯微酸少甜的檸檬茶已成習慣，可以幫助消化，這裏的茶味和甜度都很合口味。要完美，當然要食埋甜品至perfect，加 $28-38就可以。【西班牙玉桂條伴雪糕】   加 $38甜品即叫即做，新鮮熱辣，這款吉事棒，又被稱為西班牙小油條，外脆內軟，面層灑上玉桂糖粉及朱古力醬，再配上雲呢拿雪糕，口感層次豐富，美味。【朱古力心太軟雪糕】    加 $38個人十分喜歡朱古力，所以心太軟是必選甜品之一，像熔岩一樣的朱古力漿味道不會過甜，朱古力味濃郁，配以雪糕，一冷一熱，絕對不能錯過。整體來說，餐廳食物質素好，性價比高，環境寧靜，能與朋友輕鬆悠閒地共晉晚餐，過了一個愉快的晚上。…查看更多

早前同事介紹了一間在太子站附近的西餐廳，話餐廳食物美味，性價比高，今日終於有機會約埋朋友一起去試試。出咗地鐵站，步行兩三分鐘就到，交通非常方便。餐廳利用吊燈作裝飾，燈光柔和，加上樓底比較高，感覺較寬敞，環境優雅舒適，還有悅耳的英文歌曲伴着進餐，很有氣氛，令人有一種優閒輕鬆的感覺，很適合三五知己聚餐聊天。晚餐有豬、牛、羊、魚、蝦等多款選擇，包括前菜、主菜、甜品及飲品，我們就各自按喜愛的口味點了兩個晚餐。前菜：「海鮮酥皮小盒・龍蝦菠菜湯・煙燻吞拿魚」。三小款賣相精緻，海鮮酥皮小盒酥皮鬆化香脆，醬汁creamy有鮮味。龍蝦菠菜湯以小杯盛載，綠色液體看來不像龍蝦湯，但喝後就感到有濃濃的龍蝦味，很好喝。最後的煙燻吞拿魚，味道鹹鹹地，除了煙燻味，還有黑胡椒味，不錯。主菜：「開心果果仁烤羊鞍」羊鞍鋪滿開心果果仁香草醬，賣相非常吸引，朋友選了七成熟，肉質juicy軟滑，以一整塊羊鞍上碟，可切開四小件，好抵食。主菜：「煙燻加拿大穀飼豬鞍扒・忌廉薯蓉・蘋果汁」我的豬鞍扒也很有水準，全熟的煙燻豬鞍扒帶點焦香味，肉質依然嫰滑，軟腍有肉汁，既不肥膩，亦不嚡口，且有淡淡的煙燻香味，配上酸酸甜甜的蘋果汁，味道很夾，還有香滑的忌廉薯蓉，很惹味。甜品：「心太軟」朱古力甜品一直是我的至愛，心太軟上枱時溫度微熱，一切開就有像熔岩一樣的朱古力漿流出，外層有少許脆，而且味道不會過甜，朱古力味濃郁，很是不錯。飲品：「小野菊杞子茶」花茶一大壺，色澤明潤鮮亮，味道清香，不會太甜，潤喉舒服。菊花清肝明目，杞子滋補肝腎，有明目護眼功效，最適合經常用電腦的我。「洛神花蘋果蜜」朋友點了一杯冷飲，洛神花本身味道有點酸，加入蘋果蜜中和酸味，酸中帶甜，甜中帶酸，朋友話很好喝，而且冰塊亦很特別，內裏閃著藍光，是塑膠製，不會溶，不會沖淡飲品味道，想得頗周到。整體來說，今餐每道食物都很有水準，很美味，加上做得出色的甜品，我們吃得非常滿足，以後又多一個聚腳點了。…查看更多

今日朋友約咗我去E-max星影匯睇戲，第一次嚟國際展貿中心，唔係太熟路，好彩朋友預先教我係九龍灣搭免費shuttle bus去，交通尚算方便。到達時見有時間就在商場逛逛，發現二樓有「食街」，便上去看看順道醫肚。「食街」內食肆雲集，眼前被一個經典漫畫人物－「老夫子」吸引，原來這裏有一間老夫子主題餐廳，老夫子漫畫雖然不太熟悉，但都想一睹那些漫畫人物，懷舊一番。餐廳佔地頗大，座位寬敞，裝修亦見特色，尤其是牆壁上兩位漫畫靈魂人物－老夫子及大蕃薯，繪畫得維肖維妙，最適合老夫子迷緬懷、拍照兼打卡。本來趕得及吃個簡單嘅下午茶，但看到餐牌推介無骨海南雞飯又心思思，好啦！豁出去，吃個大滿足。「無骨海南雞配油飯」可以加＄10轉雞髀，當然食豪啲啦。微辣嘅涼拌青瓜做前菜，滋味好開胃。雞湯配上白蘿蔔，清甜唔油膩，味道不會太鹹。海南雞份量足，大大件，食落無骨啖啖肉，雞肉嫩滑唔嚡口，雞皮爽口，脂肪唔多，配埋黑芝麻一起吃，咬落有口感。雞油飯大大碗，味道OK，唔會太油，幾好！隨飯跟兩款醬汁，分別係黑豉油同酸辣醬，黑豉油好有星加坡風味，味濃帶甜，而酸辣醬則蒜香味突出，個人十分喜歡，兩種醬撈飯同配雞食都好惹味。跟餐會送熱飲，但我就加錢叫咗杯「凍金桔青檸」，鹹鹹酸酸，開胃生津，餐廳不吝嗇，味道濃濃，好夠味，用上高杯盛載，更顯高格。整體來說，食物質素唔錯，價格相宜，坐得舒服之餘，還有老夫子主題曲伴著吃，輕歌妙韻，今餐選對了。…查看更多

假期前已經聽同事講過大埔有一間懷舊冰室，內裏有一幅頗有特色以電影海報為題的壁畫，於是今日就約埋同事去看一看！冰室始於一九五九年，裝潢以藍綠色和白色為主色調。店內懷舊大壁畫非常搶眼，上網查知原來是老闆請了兩位專畫邵氏年代電影海報的老師傅繪製，而亂世佳人更是當年賣座經典電影之一。餐牌都幾多選擇，款式多樣化，屬茶餐廳大路菜式，適合各口味人士。看見很多食評都推介這裏的懷舊美食，我地就決定跟隊試試吧！『生炸招牌大雞髀配薯條 』（$40）大大隻有手掌咁大嘅雞髀，新鮮炸起，外皮金黃色，脆卜卜，同事話食落完全唔覺油膩，而且外脆內嫩，雞髀炸前已調味，味道醃得剛好，吃到少許鹹香味，肥美厚肉，嫩滑多汁，一點雪味都沒有，非常好吃！配埋沾上茄汁嘅香脆薯條，簡直就係大滿足！『生煎洋蔥大豬扒飯』（$52）見到碟飯真係要「嘩」一聲，因為飯面嗰兩件大大嘅豬扒，係完全遮蓋晒啲白飯。有骨嘅豬扒，厚薄適中，帶少許肥膏，肉質軟腍，非常惹味，洋蔥絲炒得夠熟，沒有生澀味，又香又鮮甜，再配上沾有豬扒油香嘅白飯，又係一上佳美食，食到唔停口。至於飲品方面，我哋叫咗凍檸檬茶（$20）和萬芳招牌紅豆冰（$26）。『萬芳招牌紅豆冰』講得係招牌飲品，當然係無欺場，花奶和紅豆嘅比例差不多係1:1，紅豆粒粒分明，大大粒，煮得啱啱好，軟硬度適中，咬落煙韌軟糯，而且甜度剛剛好，飲落唔會太甜，加埋頗有特色嘅三角錐體碎冰柱，一啖有齊紅豆與碎冰粒的口感，與一般坊間大大塊冰粒嘅紅豆冰不可一概而論。整體來講食物質素好，價錢經濟實惠，兩個人吃得飽飽都不用 $150，侍應服務都不錯，絕對是值得再次安哥。…查看更多

朋友新年假期會同家人去旅行，想買番個新喼，於是今日就陪佢去咗旺角一間樓上舖度睇，睇完都唔太啱心水，無收穫，既然滿足唔到購物慾，我地就索性搵好西滿足吓食慾。在朋友帶路之下，去咗創興廣場四樓嘅『德家日式燒肉店』，呢度有火鍋放題和燒肉放題，因為上星期剛吃完火鍋，今日就揀燒肉放題來試試。因為時候尚早，被安排坐到卡位，環境寬敞舒適，而且發覺枱面和座椅都好乾淨，無乜油漬，最怕平日一些燒肉店嘅座椅黐𥹉𥹉，坐得唔自在。店內有兩款半放題選擇，朋友係食肉獸，海鮮就麻麻地，所以就揀咗＄238一位嘅『牛肉盛燒肉半放題』，送五款特選牛肉及燒蠔盛盒，還有數十款肉類蔬菜等，有兩小時任飲任食，一定吃得滿足。一大排飲品櫃，各式汽水飲品應有盡有，還有啤酒、咖啡、熱飲或室溫飲品都一應俱全，非常貼心，搵到我至愛的綠茶，清涼解熱，最啱配燒物。取飲品時，還發現店內供應多款冷盤、漬物、溫泉蛋、沙律、水果、雪糕、甜品⋯⋯等，要一一嚐遍，可能要多來幾次了。『五款特選牛肉』有牛舌、牛胸腹、一口牛、牛肋肉及牛脊肉。牛肉新鮮，色澤紅潤，肉質肥美，油花分佈平均。牛味濃郁，無雪味，肉質軟腍唔韌，有肉汁；牛舌有嚼勁，彈牙爽口，加點黑胡椒或沾點味道帶甜嘅醬汁都好惹味。至於五花肉、雞翼和羊扒都不錯，朋友話尤其是羊扒，因為事先用黑椒調好味，所以烤熟後羊肉變得更加香口。燒蠔盛盒每人一隻，蠔肉肥美鮮味，如果可以多一隻就更好了。另外我地仲點咗帆立貝和多春魚，兩者都有水準，新鮮味美，無腥味。蔬菜都有好多選擇，個人認為比較出色的首推『迷你甜薯』和『金菠蘿』。小紫薯用一個細細嘅錫紙盒盛載，裏面放上牛油，烤起來牛油香氣四溢，小紫薯熟後香甜軟糯，又帶少許牛油嘅鹹味，口感好有層次。新鮮菠蘿營養豐富，又可幫助消化，經過微烤後，更香更甜更易入口，真係不妨食多幾片。Mövenpick和Häagen-Dazs各有三款口味可供選擇，埋單時侍應會畀客人剔選，有我至愛嘅士多啤梨味，正！吃飽飽，又有美味嘅雪糕做甜品，今餐真係perfect！…查看更多