食唯先的个人专页

落咗8號波,返工前去碰吓運氣睇吓佢有冇開舖. 點知去到有2個銅鑼灣中心,又冇招牌. 喺迷惘緊既時候,遇到管理員叔叔. 但係佢居然唔知abc cake喺邊,(記得上面既食家話喺Jenny Bakery 隔離)後來問佢Jenny Bakery 既位置先揾到. 一去到我已經話要豆漿蛋糕. 老闆好nice咁請我試豆漿,知我第一次幫襯仲請我試豆漿蛋糕tim.(其他舖頭通常只會請你試你冇買既嘢):)豆漿蛋糕: 豆漿味好淡,食落似蛋白蒸蛋糕. 唔油膩,好鬆軟,感覺清新. 不知不覺食哂一條:)豆漿: 好香濃既豆味,唔會過甜.但同普通黃豆味唔同.唔知係咪有機黃豆呢? 不過$20支就貴咗d.眉豆糕: 大大粒眉豆,豆夠淋.好味~:)芝麻糕: 好爽口,好有芝麻味.…查看更多

打緊3號波既中午,見冇乜人唔駛排隊咪買杯綠茶奶蓋試吓. 先呷一啖奶蓋,奶味唔重.有d鹹味.但係搞混之後就唔覺有奶味,咪就係一杯普通既珍珠綠茶. 珍珠亦唔特別彈牙. $14大大杯,飲咗半杯已經好飽.好彩唔駛排隊,如果唔係就真係浪費時間.…查看更多

熱愛咖啡同沙律既我睇完雜誌即時趁午餐時間過黎. 點知店員話而家暫時未有沙律供應:( 唯有買件cake同espresso take away.但店主話咖啡最好即飲,所以就喺stand bar度飲咗杯咖啡先,件cake就take away.$10 既espresso: 好抵,雖然唔識分佢正唔正宗.但卻係我飲過最易入口既,同真係做到掛杯既效果.不過雜誌話佢哋會喺你飲之前送上蒸餾水等你清下味蕾先,但今次就無law.(可能我之前話要take away啦~)青檸撻: 口感都幾糼滑,但青擰味就唔分明. 海棉蛋糕亦太薄,唔夠鬆軟,唔留意都差d發覺唔到. 批底就幾香脆,唔漏.講真店員既效率都真係幾慢,認真要改善一下.…查看更多

魚子醬多士: 雖然魚子醬既quality應該唔算好好,但加埋脆脆既多士同牛油又好match. 中和咗魚子醬既鹹味.反而北海道牛奶咖啡就無乜特別,可能係凍飲既關係,唔係好飲到牛奶味.下次要試吓熱飲先~服務唔特別殷勤但都唔算差.因為睇完上面既comment(話好差),所以完餐後當waitress收哂d嘢只剩抺完嘴既紙巾同抺過手既消毒棉既時候,心想都係自己帶走掉啦.點知waitress走埋黎話:[小姐幫你呀!] 即刻加分.haha~…查看更多

之前買過禮盒裝曲奇以烏龍茶味最好味.牛油味唔會過重,好清新.鳳梨酥同藍莓酥都幾好,唔漏.藍莓芝士條都ok,但唔特別好味.今次見佢芝士蛋糕出多咗味,重要係細size,啱哂我呢d鍾意試新嘢既人.合桃咖啡: 好味,咖啡味濃郁.加埋合桃好有口感.玫瑰味:一般,唔係好食到玫瑰味.:)芝麻味:都ok,幾香.…查看更多

之前喺度search唔到,所以到而家先寫. 因為太差,所以過咗咁耐都記得寫.一直都以為大坑既食店質數會好d,點知....呢度只係得熟食,選擇又少,少得黎又唔精...唉.....鰻魚蛋卷:熱既.蛋還可以,唔嚡. 但鰻魚超腥,所以結果只係食咗d蛋....牛肉飯: 同吉野家嗰d冇咩分別.....沙律: 咪就係一碟生既菜law....好在價錢唔算貴,2個人埋單都係17x…查看更多

睇咗雜誌介紹專誠過黎買. 行咗兩個圈都揾唔到,原來佢只係佔某茶飲店既一角. 好多人排隊但都係買飲品既. 負責沖調既係後生仔,收錢同PACK既係個伯伯. 都幾忙,但伯伯服務態度好好,好有禮貌. 不過糖果個LIST最好改善一下.因為得相睇無話係乜味,所以都係靠估,求其買幾個款.食落其實都差唔多,酸酸甜甜食唔出係乜味. 不過個人覺得都係太甜.…查看更多

幾個月前睇到<新假期>介紹,今日過開荃灣所以特登黎試吓.意式雲呢拿奶凍: 餐牌上全部都加咗生果($21起),感覺好似怪怪地.又怕生果會蓋過雲呢拿味,所以order咗個無生果既($20). 真係食到好明顯既雲呢拿味.質感好滑,有d似燉奶但再實d.榴槤班戟: 個皮好有蛋味又唔會太厚.由於係即煎既關係所以唔夠凍(個人鍾意凍d).榴槤同cream既比例適中,.不過可能而家榴槤唔係當造,味道唔夠濃. $22兩件大大件,如果有半份就更好喇(因為得一個人食).…查看更多

見雜誌介紹呢間獲有歐盟認證既濾水機同製冰機,冰既密度較高,溶化速度比一般既冰慢,延緩沖淡飲品既時間.香芋榛果丁丁係香芋奶加埋台灣入口既榛果丁丁(即係混合雲呢嗱同榛子味既椰果).店員一整好,個賣相同雜誌一樣,但係可能封口封得唔好(我見佢倒轉個杯,之後又撕開個封口直接將杯飲品倒落第二個杯度.之後再封口先俾我).所以到我手嗰杯係無哂d泡既:(.一拎上手d冰已經溶咗好多變得好細粒(又話無咁快溶既?!).香芋奶好稀無乜奶既質感,似香芋水多d.香芋味亦好淡:(.椰果只係食到甜味,食唔到榛子味....…查看更多

好耐無幫襯大班,今朝心血來潮去買早餐. 見到以前無見過既芝士乳酪包,仲要特價$4.5(原價$6),即買!暧笠笠,大大個.個皮係鮮奶球咁,有幾粒朱古力粒.頭兩啖咬開見到裡面好少涵,有d失望....點知食落去,d乳酪好有芝士味,質地杰杰哋.好rich...好滑! 連埋個皮一齊食啱啱好,唔會漏. 食到尾都keep住有乳酪,好好味…查看更多

點咗雜誌上介紹既<灰姑娘>材料包括日本南瓜雪花冰底,玫瑰花蜜,紅豆,寶石珍珠,三色蒟蒻.唔係好食到南瓜味,反而食到有淡淡既奶味.口感軟綿有d似雪糕得黎但又食到一絲絲冰既感覺.玫瑰花味好馥陏,超甜,加埋落d刨冰度食就啱啱好.原粒紅豆好有口感.寶石珍珠其實係七彩顏色既珍珠,繽紛奪目.仲好彈牙唔黏口.埋單既時候同好nice既老闆娘傾咗幾句. 原來佢哋所有既刨冰都加咗奶(證實我既味蕾無出錯).因為唔加奶d冰太硬刨唔到. 八卦既我仲問老闆娘南瓜係唔係真係日本返既,老闆娘好老實話係購自city super既日本南瓜. 佢話可能呢排唔當做所以味道淡d(因為佢哋係無加香精既:)).ps.唔知係咪因為灰姑娘坐南瓜車,所以用上南瓜冰底呢?! 好有意境既甜品:)…查看更多

吉之島做緊台灣節有好多台灣食品做緊特價.見到銅鑼燒$25有兩個,買咗北海道牛奶味同芒果味.擺咗室溫一陣先食,個皮好鬆軟又唔會濕澾澾.牛奶味好香濃;芒果味則較清甜,如果芒果味再濃d仲好.裡面既紅豆味道分明,仲有粒粒紅豆tim.…查看更多

據聞經常要排隊,但今晚去到得一半人客唔駛等. 簡陋懷舊既餐廳但侍應卻係後生仔女,服務都算ok.餐包: 夠熱,鬆軟,但牛油唔夠濃.羅宋湯: 酸酸哋,微辣,都幾開胃.蘇格蘭牛扒: 侍應話即係肉眼. 黑椒汁唔辣唔會嗆喉. order咗7成熟,上枱時得6成左右. 食咗兩啖就變咗7成熟,呢點都幾細心.最可惜既係塊扒冇牛味. 薯條有薯味,都好脆.熱華田: 叫咗熱朱古力但變咗熱華田(可能因為隔離枱嗌凍華田啦). 不過反正都係差唔多既嘢,所以冇要求換.不過錯有錯着,華田同奶既比例啱啱好.唔會太奶又唔會太甜,冇加糖都好好飲.…查看更多

今日去旅遊展順道去試吓馳名既蛋撻同咖啡. 兩點幾去到,一坐低伙記掀開餐牌介紹茶餐有d乜. 但係得一款. 當我掀去第二頁想睇吓有咩其他嘢食,佢又幫我掀返去嗰頁叫我嗌嗰個餐.熱咖啡(冇加糖): 微酸,奶味較重.都幾滑,但對我而言再濃d會更好.蛋撻(另加):夠熱, 酥皮香脆,唔會油淋淋. 蛋既部分偏甜.:(牛油餐包: 夠軟但唔鬆,無牛油味.食落口只係一堆甜既粉團. (但遲嚟既表妹話佢嗰個有牛油味,個邊仲有d脆tim.唔通食包都要睇彩數?!):(煎蛋同腸仔: 我嗰個煎穿咗變咗熟蛋(表妹嗰個係流蛋).多油到可以當鏡照.沙嗲牛麵: 呢個最好味. 沙嗲味好香濃唔會一味死辣,牛肉好爽口(雖然係梳打粉既功勞).饞嘴既我走既時候買多包曲奇: 好鬆脆,清香既牛油味唔會過濃,甜度亦好適中.$18大大包,好抵買.…查看更多

每次經過都見到好多人排隊,一直都想試吓. 今日一個人去即刻有位唔駛等.叫咗味玉拉麵: 先嚐一口湯底, 好濃郁但有點過鹹. 拉麵夠彈牙,但第一口有鹼水味(可能未入味既關係),浸咗一陣就冇. 豬肉粒好嚡口.:(溏心蛋最好味,蛋黃入口即溶,好香蛋味.…查看更多