7BO的个人专页

好想去日本食海鮮，好掛住日本嘅蠔，燒物 ，同和牛！終於俾我搵到一間喺銅鑼灣嘅日本料理，可以食盡日本嘅美食^^首先打頭炮嘅係-的矢岩蠔（手掌咁大隻）師傅即開生蠔，非常新鮮，蠔身飽滿，入口爽甜，帶輕微嘅海水味 。主食就叫咗set［期間限定］鹿兒島產和牛、生蠔刷刷鍋內容有野菜、生蠔、同入口即溶嘅鹿兒島和牛。鹿兒島和牛嘅脂肪同肉嘅比例差唔多係一比一。放入鍋滾幾秒就可以食。入口唔到幾秒就消失咗，牛脂味非常重，鍾意食和牛嘅食家一定要試吓！平時食十下十下嘅生蠔都好似有肌肉萎縮！未熟之前就手板咁大隻，熟咗之後就鵪鶉蛋咁細隻T.T但係呢隻生蠔，熟咗都一樣咁大隻，一咬落去啲汁就爆出嚟，蠔味極濃，非常好食。見呢間餐廳嘅蠔咁掂，就追加咗半打嘅鐵盒蒸蠔，雖然煮法好簡單，但食落口非常滑，蠔本身又鮮，再加埋清酒嘅甜，好快我就食半打。之後又見到對面枱食串燒，自己又忍唔住叫埋一份🤣有鹽燒雞翼、腎、雞髀肉，蘆筍、牛舌、五花豚腩，仲有蛋汁免治雞肉棒。燒物燒得好脆口，外脆內嫩呢隻生雞蛋嘅味極濃，顏色接近橙色，同雞棒嘅味道好夾。呢間餐廳嘅刺身，燒物，鍋物都做得好好，有太多嘢想試，不過今次太飽，下次我再嚟，試埋佢個明太子蛋卷😍…查看更多

今日過嚟Lohas Park 拎野，先知原來個商場咁大，有溜冰場、有戲院、仲有好多餐廳，都幾正。 我個朋友就介紹我食天后站牛腩，佢話無味精，仲讚佢牛骨湯好正。首先當然要試下佢地嘅招牌啦， 佢有沙腩、坑腩、爽腩、牛腩四款選擇，我就揀咗崩沙腩清湯牛腩撈伊麵，沙腩賣相唔錯，肥、筋、肉分明，肉質軟嫩而不柴，牛骨湯鮮甜唔油。另外叫左份炸雞中翼撈粗，炸翼即炸，要等15分鐘，出到嚟熱焫焫，皮脆肉多汁，好惹味！ 叫到一份腩汁蘿蔔都係$19，真係唔試唔得，仲要都好大碗，蘿蔔清甜無根，煮左好耐，好入味，腍得嚟都有咬口。整體我覺得好抵食，最緊要環境乾淨，CP高！…查看更多

因為疫情關係，我都好耐無出街食飯....日日都想麻辣火鍋，屋企又食唔到。今日終於忍唔住要去食。今日嚟呢間渝味曉宇絕對係有原來，因為鍋底係用牛油做所以特別香，辣椒同花椒嘅味道溶化曬喺牛油入面，比平時食嘅湯底更加濃厚入到去咩都未叫，個樓面姐姐攞咗碗紅棗雪耳糖水過嚟，原來碗糖水係用嚟保護個胃，怕一陣食得太辣會傷胃。所以打之前最好飲咗去先。(老闆好細心)爽口鴨血鴨血做得好滑同好爽，夾埋個牛油麻辣湯一齊食，味道一流。冰鎮鮑魚鮑魚已經係成半熟狀態，所以肉同殼已經分開咗，食嘅時候就方便好多，唔洗落手去拆肉。疫情下食得更加安心。黑豚腩肉一層層又香又爽嘅脂肪，再夾一層層嘅豚肉，食落有唔同嘅層次，食落好滿足安格斯肥牛每一塊都起晒雪花咁，脂肪同肉嘅嘅比例啱啱好，成落完全無渣，加埋麻辣嘅作用，味道仲正。呢個湯底真係唔只係香咁簡單，食到尾嘅時候個嘴都食到紅晒，係夠辣嘅!食辣得嘅朋友值得一試!…查看更多

今日經過間超級巿場行到肉檔嘅時候突然聞到一陣好香嘅燒肉味，原來有間熱石餐廳開咗喺超級市場入面，因為太香啲關係，我好自然就坐底咗。餐廳主要係用熱石將肉慢慢煮熟，所以肉嘅生熟度係由自己決定。餐牌主要都係肉類唔同部位嘅牛肉，黑豚肉， 羊肉，雞肉。廚師話因為雞肉比較難控制嘅關係，所以就幫我煮咗8成先上熱石板。大大塊嘅黃金脆皮雞扒，放喺熱辣辣嘅石板上面，一切開肉汁就開始流出嚟，只需要加少少海鹽就已經好好味。跟餐仲有飯同埋日式麵豉湯，成個餐都係講緊70蚊左右，以食熱石板餐廳嚟計呢間價錢非常抵食物質素又幾好!大家可以試試…查看更多

打邊爐嘅季節又嚟啦，所以我決定開始搵唔同嘅火鍋店，睇吓2019年邊間打邊爐係最正先~開季第一間就去咗北角本色火鍋，裝修都唔錯，有卡位梳化。食物方面湯底都有唔同嘅選擇特別嘅有美人鍋同滷水鍋，今次就試咗個美人鍋先~湯底嘅料都非常唔簡單，入面有成隻烏雞仲有花膠，花膠完全無嗱過，係用真花膠筒~加曬分!另外仲有藥材。蟶子皇 -上枱嘅時候仲郁郁吓，非常新鮮，味道好鮮甜，價錢唔貴抵食。手打蟹籽鮮蝦丸拼墨魚丸-人少少又想食唔同味每樣有3粒幾份量啱啱好，蝦丸同墨丸好彈牙，蝦丸食落有啲卜卜感，因為入面放有大量蟹籽，好味道~鬆脆炸魚皮-份量好大，魚皮炸得好鬆，不過可能炸得太鬆脆嘅關係有啲變得好細塊。竹蔗紅甘筍汁-味道清清地，唔太甜，唔覺有糖精味，打邊爐飲呢杯竹蔗汁可以解解熱氣。…查看更多

想感受英國美食嘅朋友，絕對要試吓呢間餐廳。餐廳裝修以簡約為主，感覺都好輕鬆。首先就食返個帶子南瓜藜麥沙律，爽脆嘅蔬菜加上健康嘅藜麥配埋新鮮帶子，再加上獨特嘅調味令到沙律嘅層次更豐富。要調節生活速度，最好就係座低嘆返杯綠茶latte,綠茶味非常濃厚，泡沫都做得好細滑。黑松露磨菇湯，香濃嘅黑松露加打碎嘅蘑菇配上忌廉，飲落非常綿滑，配上一塊鬆脆嘅餅乾，攞嚟點湯食簡直一流。食英國菜又點可以唔食炸薯條，每條薯條都肥嘟嘟，厚度都適中，所以咬落有種外脆內軟嘅感覺。海鮮墨汁意粉，墨汁平均沾滿咗喺彈牙嘅意粉上面，中間仲有濃濃嘅芝士，配上煎香咗嘅新鮮海鮮，成道菜嘅海鮮味非常之重，我個人認為呢個意粉必食。…查看更多

今日經過銅鑼灣伊利沙伯大廈後街，突然聞到陣陣嘅燒海鮮味道，原來呢道開咗間日式磯燒餐廳。又差唔多食飯嘅時間，所以就入去試吓。麻醬沙律豆腐沙律，新鮮嘅野菜加小蕃茄，加埋中間仲配埋栗米片，令到口感有多一層次。配上帶酸嘅麻醬，都幾開胃。大蝦磯燒-大虎蝦非常大隻，長度比我隻手掌仲要長，燒嘅時候加少少醬油，令味道更鮮味。露荀煙肉牛油燒-呢道菜主要係用焗嘅方式，所以露荀嘅清甜味一啲都冇走失，加上煙肉嘅燻香味同埋牛油味，呢個配搭我個人覺得都唔錯，如果份量大啲就更好。白桃梳打-食磯燒就緊係要配特飲，白桃味香不過又唔會太甜，係夏天消暑嘅恩物。蠔鍋飯-材料有三色椒加上洋蔥，加上大大隻嘅蠔配上味道帶甜的蠔汁，呢個飯真係蠔味十足，份量都有兩碗飯咁多，所以記得留肚食。…查看更多

究竟咩叫真正嘅重慶火鍋?!咪就係成個鍋底由重慶飛到你面前囉～呢間渝人火鍋，正正就係用重慶直送嘅火鍋湯底，所以辣嘅程度同香味都好嗆好多~今日揀咗嘅係鴛鴦鍋一邊係重慶麻辣，另人邊係日本松茸湯底。首先講一講個松茸湯底，湯落冇味精，好清好濃菇味，當一個湯嚟飲係絕對正確。而兩小碟嘅花生都好值得一試，辣味非常之勁，好野味。新鮮白鱔，好彈牙好爽口。寛條木薯粉，食麻辣一定要食呢個木薯粉，痴晒啲麻辣味喺啲粉入面，食到出曬汗咁，真係好滿足~貴妃蚌，爽口，配埋麻辣食可以增加鮮甜味。手打蝦滑，好彈牙蝦嘅味道都比較重。手打墨魚滑，墨魚味道都ok，起膠都做得唔錯。黑糖糍粑，糍粑係店長推介，我個人覺得係必食，咬落外脆又熱辣辣入面又好煙韌，加埋黑糖粉同黑糖醬，下次再嚟要食兩碟。…查看更多

呢一間位於佐敦嘅打邊爐，真係好正!雖然唔太近地鐵，但行遠啲食到咁高質嘅邊爐，絕對係值。首先叫咗碟炸蝦餅，蝦餅非常彈牙中間夾雜咗一粒粒嘅鮮蝦肉，我覺得整得仲好食過啲泰國菜鋪。泰式海蝦刺身，材料用咗海中蝦，肉質彈牙同爽口，加埋蒜蓉辣椒，點埋泰式辣汁，好開胃。食完小食就食正餐啦～醉雞藥膳鍋，份量非常勁，原隻醉雞上枱，酒味好香喔～雞件食落都非常嫩滑。打邊爐一定要食海鮮，我就叫碟北寄貝，隻隻都好肥美，不過唔好滾太耐，肉會變韌。我就大約滾佢一分鐘左右就覺得啱啱好，呢個我非常推介，因為味道好鮮甜，其他地方都比較難食到。…查看更多

聽聞大角嘴有間德國餐廳嘅豬手整得好好食，咁啱今日好想食啲香口野，所以我決定去試一試。附近路面冇劃雙黃線，坐車上落都好方便。店內坐位唔算太多大約坐到20個人左右，所以嚟之前最好打去餐廳問有冇位先。正宗嘅德國豬手，外皮焗到非常之脆，口感係較硬身，而肉質嘅膠質好豐富，配啤酒一流。但係今日要渣車嘅關係...所以飲住杯凍檸茶先。食完隻豬手都唔夠，食多個香蔥芝士焗薯條先，拉絲嘅芝士份量勁多，食夾帶蔥嘅香味，成條肥嘟嘟嘅薯條撩落去，超罪惡，不過勁好味。…查看更多

呢間餐廳真係唔錯又座得舒服，飲返杯白酒先~本身對酒冇咩認識嘅我，都唔知飲咩好嘅時候，老闆就走出嚟，問吓我鍾意飲咩味道嘅酒，佢就介紹咗我飲呢隻，聞落有好香嘅蕃石柳味，果味都好重，好吸引人再飲第二杯。蕃茄沙律，用唔同地方出產嘅蕃茄加水牛芝士，黑醋嘅材料造成。材料好簡單但淨係蕃茄已經有唔同嘅口感，有啲爽口啲，有啲林身 ，原來連營養都會唔一樣，係健康嘅選擇。野菌汁薯蓉焗鴨脾，呢道菜原來花咗好多時間去煮，首先醃製嘅時間，再要慢焗一次，再要高溫再焗，起碼要用一日時間，鴨脾食落完全冇蘇味，外皮好脆，切落去嘅時候肉汁就慢慢滲出嚟，點少少野菌汁就更好。餐廳除咗食物質素高之外，我都幾欣賞老闆對客人嘅態度，會細心講解每一道菜，又會傾下計。傾傾下仲送多杯白酒俾我飲，完全無架子，呢餐飯連我朋友都讚。…查看更多

今日朋友生日，我決定帶佢去一間好正嘅餐廳，同佢食個超蠔生日飯。呢間餐廳嘅位置都算近地鐵站，唔難搵。餐廳坐位都好寛闊，好舒服都好啱同朋友傾吓計。首先就嚟個熱辣辣嘅餐包，入面加咗啲洋蔥，口感帶煙韌。呢間餐廳最出名就係生蠔，所以點都點兩款嚟試吓，南非同愛爾蘭，的確係好新鮮，有好重嘅海水味，亦都好爽口。鮮野菌磨菇忌廉湯每一啖都有好重嘅磨菇味，係一款味道教濃嘅湯，攞嚟點麵包就更加好味。再嚟就係木魚花野菌燒北海道帶子，淡淡嘅炭燒香味，加埋牛油香味同帶子嘅鮮味。必食!炭燒加拿大天然豬鞍，食落一啲都唔鞋口，質感竟然有啲似牛扒，只係用一啲簡單嘅調味就已經好出色，呢間餐廳連扒都做得咁好，抵我再嚟~最後一道就係香蕉拖肥忌廉蛋糕，味道唔太甜，但係拖肥味超濃，係真係一定要食嘅甜品。…查看更多

朋友介紹銅鑼灣V Point內的上海餐館「豫園」，原來係香港米芝蓮2019推介餐廳，今晚同媽咪食飯，老人家都比較喜歡中菜，餐廳又係少鹽少糖食店，就試下啦。餐廳充滿中式風情，牆上都有很多壁畫，意景不錯。最角落位置有大大塊落地玻璃，如果下午飲茶的話，景色應該有分加。 南翔小籠包這裡的小籠包大大件，皮薄多汁，新鮮豬肉加上湯，咬開爆多汁，記得趁熱食！ 賽螃蟹蛋白炒得很香，加一點醋，拌飯一流。蛋白嘅嫩滑程度如能提升一點會更美味。海蜇頭帶有香濃麻油味，加上青瓜，爽脆又有咬口。紹興醉雞賣相特別，好似太空館的半球雞，雞肉滑嫩，酒香但不會酒太濃。 龍鬚鮮魚絲 呢個係店長大力推介菜式，開頭我以為係魷魚絲，原來係切得如龍鬚般幼細的魚肉，好考刀功，走油後，魚肉嫩滑，鮮味保存得很好。 鮮松茸火腿豬腱燉螺頭燉湯鮮甜又健康，螺頭經過三小時熬製，味道更香濃。 …查看更多

呢排成日周圍去唔同嘅餐廳去食omakase, 香港大部分嘅料理都做得好出色，而今之去呢間Uo n俾到我一份新鮮感，因為幾乎每一道菜，都係經大廚用心制作嘅藝術品!煙燻流心蛋，用玫瑰木煙燻嘅流心蛋，視覺攞足100分!蛋味亦都好香濃。鴨胸野菜沙律，野菜爽脆，加埋七味粉味道更開胃。牛油果刺身，初時以為只係牛油果蓉 ，原來入面有金目鯛，黑鯛，三文魚，吞拿魚，仲有小蛋糕嘅刺身盛。估唔到咁有驚喜!銀雪魚桑葉燒，小火爐上面竟然放住一塊桑葉，真係-感到神奇，銀鱈魚食落帶有桑葉香氣，本身油份極重嘅銀鱈魚，加埋酸酸地嘅沙律醬，感覺即時冇咁膩。蒸餾式木魚花海鮮湯，竟然諗到用蒸餾咖啡壺去做一個湯，真係每一道都有驚喜，望住個玻璃波入面嘅湯，倒流上另外一個壺入面，好自癒。呢5款特色壽司，唔單只靚，每一粒都好有驚喜，例如用豆做成嘅皮包住黑松露甜蝦嘅壽司，比起用紫菜，我覺得仲夾，而不得不提嘅鵝肝壽司，用米通作飯上面放嘅鵝肝食落好綿滑就好似朱古力咁滑，必食之作!最後就係牛油沙糖多士 x 綠茶雪糕。牛油香極濃加上燒到脆嘅沙糖，簡單嘅一個甜品，但係就令我非常滿足。今晚我感受到廚師除咗對食物要求高，就連視覺感嘅要求都一樣咁高!…查看更多

今日朋友話喺尖沙咀搵到一間西餐廳，主打食蠔同飲酒嘅地方，所以就試下~餐廳位置都幾隱閉，去到山林道嘅盡頭會見到一條樓梯，行上去就見到。見到枱枱都叫生蠔，仲要大大隻，仲要30幾蚊一隻咁平，就緊係要試吓啦，order兩隻南非蠔再加4隻Grillardeau.真係好大隻，有半隻手板咁大隻，新鮮度都好高。我就比較鍾意食Gillardeau，因為海水味重啲，食落又爽口啲。其實食蠔已經好夠飽，不過點都要叫吓啲熱食，白酒煮蜆，啲蜆都十分大隻，味道比較清，蜆肉嘅鮮味比教突出。最後就緊係要飲返杯提子梳打，呢個地方雖然難搵， 但勝在地方好大，坐得舒服。…查看更多