siukeikei的个人专页

又是成年無來過, 自從無養魚後, 甚少出來這區, 次次行到亞加老街就掉頭, 今天專誠到始創中心取電視解碼器, 路經... 當然然幫襯啦...菠蘿油, 加熱奶茶, $27, 唔貴吖..., 最緊要好食就得了, 菠蘿脆面, 無問題, 滿意, 麵包軟熟度, 也合格有餘, 係塊鮮牛油... 就愈來愈細, 老闆真係好關心客人既健康, 唔落咁大塊牛油, 怕客人脂肪和膽固醇超標..., 老闆...真係用心良苦.... , 唔記得影杯奶茶... 奶茶好正!每次嚟親金華, 都見到阿姐不停咁清潔..., 而阿姐一枝掃把產過來, 我就要不停咁縮腳..., 真係...., 呢樣先係金華既獨有技藝..., 唔好怪我多心, 我成日都懷疑..係老闆叫阿姐掃多幾次地, 尤其是掃果D 食完又唔肯離開既客... 哈哈哈哈....話口未完..., 阿姐甲 掃完地, 阿姐乙和阿姐丙...就出動拖地了.....  金華員工真係好勤力!…查看更多

因位置關係, 初開業時, 常來幫襯, 但搬了後, 不太方便, 已經兩年無來, 今天探朋友, 未夠鐘, 再到訪.午飯時間, 想搵個好位坐一坐, 我估... Starbucks 都未必搵到, 幸好...這店不做午餐, 專做咖啡, 收貴一點沒問題, 最緊要貨真價實.一杯最普通的意式咖啡, 比想像中平, 只是$26, 咖啡味道絕對一等一級數, 唯一不合個人口味, 是微微帶酸, 有人喜歡這種咖啡出來的酸味, 尤其是某些高級貨, 酸味更重些少, 只付廿六元, 坐了一小時, 我都有些少不好意思... 哈哈...…查看更多

這店已開業一年多, 長期少客, 未見過其滿座, 希望能涯得下去吧... 定價中下, 盅頭飯, 只$27, 一般的點心店, 起碼都$30起, 如果旺角區, 分分鐘要$32以上, 此店平了10%左右.蝦餃, 可以只叫兩粒, $16, 即$8/一粒, 賣相不差, 唯一是其中一隻邊位摺得不夠好, 但味道和口感都有水準, 蝦餃...千萬不要上檯就夾來入咀, 要等一兩分鐘, 太熱時的蝦餃皮, 很易爛開, 蝦餃皮煙韌度剛好, 不粉, 彈牙中帶軟, 而且還有些少蝦味, 些少而已, 但這些少蝦味, 已經勝過很多街外點心店, 那一丁點的西蘭花, 可以留下來送飯... 哈哈...鳳爪排骨飯, $27, 食過幾次, 那件鳳爪, 一次比一次醜樣, 幸好不影響味道, 但排骨就愈來愈多肥膏, 還記得早期來的時候, 排骨飯內的排骨, 大多數都是一字排切出來的, 現在的肥多過瘦, 又是那些骨邊肉, 差了很多, 但幸好, 白飯保持水準, 粒粒分明, 沒有太濕, 也沒有一舊舊, 撈些豉油攪一下, 無餸都可以食兩碗.…查看更多

新店, 開業兩個幾月, 今天才得閒一試, 下午茶時間, 人影都唔多隻... 老闆向我們推銷午餐的蒸魚, 可惜午間時段不想lun骨....友人的 辣肉燥撈麵 ($38), 據聞...唔係好辣, 麵身質地也算好, 彈牙不淋, 肉燥份量夠多.跟撈麵送的一碗湯, 味道也不差, 至於有無味精, 我飲唔出, 唔知, 待高手報告.跟餐的一杯凍咖啡走甜, 比很多茶餐廳的"走甜凍啡"做得好, 夠啡味, 奶味剛剛好. 本來叫酸辣汁雞扒飯, 但店員話..."酸辣汁無出好耐喇..!" 頂! 無出就唔好印係MENU啦!! 退而求其次, 要了另一款...辣肉醬爽肉飯($43), 其實即是 豬頸肉飯, 肉燥一樣的多, 白飯合格, 無爛不算太淋, 但熱度不足, 這是常規... 間間茶記的白飯都唔夠熱的, 這間已經算交足功課, 但豬頸肉無煎過, 應該是用水煮的, 欠香口.…查看更多

次次經過都有條長龍排隊, 今天不知攪甚麼鬼, 只有三、四人在店外等候, 又見店內未坐滿, 友人又好想食, 於是... 等了3分鐘便有位了.餐牌推薦項目: Signature Pancakes, 第一項: Strawberry ($88), 下午茶, 吹水時段, 大家各自一杯飲品, 甜點...一件就夠了.友人選了西茶, 口味是蘋果薄荷, 我聽目個名...就唔想飲了..., 搵暈成本餐牌, 都無我最喜歡既奶類飲品, 退而求其次, 點了其中一款Detox Water特飲. Detox Water有三款, 三款同樣價錢 ($68), 這是其中一款, 名為: Tropical (Pineapple, Pear, Apple), 六十八蚊的這杯.... 所謂 "天然維他命水", 市面也有人稱Detox Water 為: "排毒水", 一聽個名, 你就知搵老襯啦..., 味道??? 浸了生果的水, 飲一啖, 接近無味, 好似係高級餐廳提供的清水, 加咗片檸檬, 再試那些生果..., 真係太神奇了, 連果堆生果, 都係無味道既...., 頂! 都唔知係嘜家伙飲品, 六十八蚊, 飲杯咁既嘢.... 天呀!!!!!!!友人的Apple Mint Tea, 就正常得多了, 話晒都係一杯茶吖! 笑死我了....等了十多分鐘, 甜品上檯, 心情當堂平伏了許多...., 賣相真係正喎, 呢D就真係目到個樣就想食啦, 士多啤梨的口感十分好, 但味道唔算十分香和新鮮, 甚麼是香和新鮮?? 你去Citysuper 買盒國泰航空包裝的日本士多啤梨, 就會知啦..., Pan Cake也軟熟, 但只是麥記水準, 做得最好的是夾在中間的Cream, 的確比Italian Tomato 的cream, 更軟滑.臨走才發現, 原來有Latte 特飲供應... 潮......!…查看更多

平日的晚上, 已經在周圍打了兩個圈, 還未知想吃甚麼...., 忽然發現此間...印度不似印度... 尼泊爾不似尼泊爾...的餐廳, 向內望..., 一個人都無, 門面的鐵閘還拉了些少下來..., 認真夠攪嘢, 自己一人, 無所謂, 一肯夠擔試!天氣轉熱, 行唔夠廿分鐘就出汗, 點都要啤一啤, 三款Draught, 都是最貴的Stella吧...傳統Stella杯, 入口....,  感覺唔係十分好凍.. 坐近門口, 有事... 可以隨時走人... 哈哈哈...看完餐牌, 一大堆不同食物, 才發現餐飲的第一頁是套餐, 唔太記得幾多錢, 大概五十多元吧..., 咖哩雞, 配飯, 有炒菜伴碟, 還有一碗不知名的配料, 應該係印度人最愛的豆類食品.整體味道不差, 咖哩味道不濃, 但成日聽D印度人講, 印度唔係稱呼咖哩, 而係"香料", 所以咖哩唔似香港咖哩味, 也屬正常吧, 白飯好過很多香港茶記, 起碼無爛頭爛角, 又無痴埋一舊舊, 但唔夠熱..., 不過...香港都無邊間茶記D白飯係夠熱吧....…查看更多

自小已經在廟街食開煲仔飯, 人人去四季, 我就最鍾意去興記, 其實兩間無太大分別, 最緊要係時間, 最好係5時至5時半前去到, 煲出嚟既白飯係最靚既, 點解 ??? 唔知道..., 食開就係咁, 次次6時後的飯身, 都係太濕兼一舊舊.各位大人, 請看一看報紙介紹的圖片....下...的"臘腸排骨煲仔飯"價格, 係港幣$23, 今天幾多??? 係五十蚊! 其實都只係十多年間, 升了一倍, 十年...., 樓價好似都無一倍喎...食煲仔飯必有之飲料: 啤酒, 興記不同四季, 四季出名好多, 生意也勁好多, 連最賺錢既飲料都唔做, 前幾年還有非酒精飲品出售, 近年直情唔好賣飲品, 你要飲就自己買入去. 但興記生意不夠好, 連啤酒都有賣, 我好懷疑其酒牌....., 上檯, 打開, 臘腸排骨煲仔飯, 出白煙是正常吧, 半條臘腸, 對我而言, 算足夠, 無益既食物, 少少就好了, 排骨屬一字排切開, 粒粒大小相約, 有人可能嫌少, 但又係果句, 對我而言, 夠送飯了.  此店供應"鐵匙更", 對於食飯焦來說, 好重要, 當然..., 也要煮得好飯焦才有用. 平心而論, 煲仔飯的質素, 未算很好, 太乾身, 排骨肉質又偏淋, 好似煲湯骨一樣, 但平民食肆, 也都算合格吧...附上餐牌, $48-$60, 與四季的價格差不多.…查看更多

一直去開佐敦店的大窩口火鍋, 但食得多都厭..., 今次應同事要求, 去旺角店, 上網睇一月睇食評, 有23個, 好正常..., 如果閣下唔知我講咩..., 那你一定係一位十分天真的消費者, 現在的食評實在太多假嘢, 開業不夠三個月, 又或者, 開業很久, 但無端端在某段時間內, 有大量食評, 都係九成九係免費試食啦..., 只要睇一睇那些出晒名的餐廳, 例如澳牛、佳佳、又或心攞了米之蓮的食肆, 這些店肯定不會叫人寫食評, 所以每個月最多也不過是十多編食評, 這就是最正常, 那些不正常的, 尤其是有某幾位殿堂級食家的食評 (唔該佢地唔好再影D單據, 就以為可以証明唔係試食啦, 好低能囉...) , 更加唔使諗, 九成九係試食食評!  (希望編輯唔好Ban咗我, 我其實係幫緊你個網站)今天早收工, 打電話去問, 5:30pm有無位? (因為每次上6:30後上佐敦店都一定滿座), 店員的口吻, 與佐敦店差不多, 愛理不理, 通常.... 這些就稱為"名店"囉, 好似係你求佢比你幫襯咁... 真係大恩大德...5:15pm到達, 有窗口位, 雖然寫明, 只可以食兩個半小時, 但店員對我們講, 7pm要埋單, 即係只有1小時45分, 其實無問題, 我們次次打邊爐都係一個半鐘食完走人, 但提醒各位, 千企唔好同所謂的"名店"討價還價, 棧你激氣, 如果你覺得消費者有權利, 那...你應該唔好幫襯, 所以, 用腳投票就最好架喇!! 當然..., 消費者如我, 通常犯賤..., 君不見澳牛和九記, 日日鬧, 天天還是一條長龍排門口.....火鍋配料, 一張紙睇晒, 共三組, 對我們而言, 夠食啦!皮蛋莞爾湯底, 一個價錢的任食火鍋, 唔使去研究湯底有幾有水準了吧...., 只要味精唔好太多, 已經心滿意足了...先攪掂碗私家調味料, 個人口味, 最緊要辣椒、蔥花和豉油.其實檯面好多位, 但友人係要將桶啤酒放檯底..., 三罐 "ASAHI" 只需$26, 還有冰桶用, 算平了.又是另一種"個人口味", 打邊爐, 一定食蔬菜類先, 第一, 蔬菜類, 容易消化, 就好似近年有人提倡, 先食生果後食飯的理論一樣, 而第二就是, 食完肉類, 太飽就食唔到菜了. 但...你問我, 菜係最平的食材, 咁咪....好唔抵囉??? 係呀..., 好唔抵架..., 你咁怕蝕底, 快D食多D貴嘢啦... , 食飽D, 食埋明天個三餐份量, 應該更抵.... 油麥菜好靚, 條條爽脆, 無暗淤色.無墨魚味道既"墨魚丸"和食唔出有軟骨既"雞軟骨丸", 但墨魚丸都好彈口, 雞軟骨丸都好有雞肉的質感..., 希望大家都收貨啦..., 白鱔片, 絕對係有鱔肉的口感, 當然都係無鱔既味道, 牛肉超乎預期水準, 任食火鍋中, 不是數一數二, 都也算數三了, 質感與味道都滿意, 魚頭無腥味, 算交到功課了. 餐紙上寫"生猛海蝦", 上檯時的模樣, 完全唔覺生猛, 但肉質都唔差, 彈牙又不會霉, 唯無嘜蝦味... 但這是行內正常吧..., 再講一次, 這是任食放題火鍋..., 唔好以為自己去咗高級火鍋店, please! 脆肉鯇魚, 總結口感: 韌多過脆, 味道: 應該係有魚味.... 哈哈哈...唔知點解, 友人叫了這碟"帆立貝", 公司樓下超市有即食包裝, 唔應該用嚟打邊爐囉....有我最喜歡食既鮮蝦滑, 還有我最憎食既鮮鯪魚滑, 我都免強食了一件鯪魚滑, 好彩, 又係無嘜鯪魚味的鯪魚滑, 最啱我呢類憎食鯪魚既人, by the way...., 兩款都夠晒彈牙...餐紙上寫"黑松露水餃", 但...sorry...., 我真係食唔出有黑松露味道, 不過唔緊要..., 任食放題, 你落D唔知咩嘢來頭既所謂黑松露, 我就寧可食最原始傳統既口味款式喇, 水餃的確做得好, 木耳和肉配撘得宜, 少少爽口, 我們還落了兩次單.炸魚皮, 不夠新鮮, 已經韌咗, 好心餐廳就換過隻真空保鮮盒啦...南瓜片, 好軟熟, 好甜我們6:45分便食完, 走人, 當時只有坐得五分一滿. 雖然食材都是一般貨色, 但整體都已經好過很多其他任食火鍋店, 尤其是食物的口感, 全部都合格水準以上, 當全世界都做得差時, 而你做我好少少, 就已經發達啦....…查看更多

天氣時冷時熱, 今天又熱到30度, 坐低, 唔使睇餐牌, 即來一枝凍啤, 三十二蚊, 十分合理價.有套餐, 啱晒懶人如我, 二人..., 唔使揀, 貴廿多元, B餐的大邊烤魚 ($232)套餐包了一大碗生菜鮮魚湯, 生菜夠新鮮, 條條爽口, 魚湯也好味...套餐內還有另一款小食, 涼伴青瓜, 大量蒜粒碎, 好香, 味道小小鹹, 沒有加醋, 少了一份酸味, 更啱晒同檯友人.另加了一碟"蒜泥白肉", 十分精美, 白肉切片, 中等大小, 還放了一片青瓜片才卷起來, 表面加了大量調味的蒜蓉, 大片白肉, 轉眼唔夠三分鐘食清光.烤魚上檯, 要了酸辣豆角味道, 小辣, 這味款, 比純香辣的款色開胃很多, 還加了豆角, 有咬口, 魚身煎過, 魚皮變得煙韌有咬口, 浸過酸辣湯汁的魚肉, 好味又提神.…查看更多

灣景中心一樓的幾間高級西餐, 這間要算是最平了, 未試過晚餐, 但午餐的紐西蘭肉眼扒, 只是$119, 我估... 落翻去駱克道那些港式西餐廳也未有找到.店內十分大, 但酒吧格局, 暗燈薰影..., 午市套餐, 可以優惠價$30, 要一杯自家製啤酒, 看餐牌, 有Golden mushroom Pilsner 和 Victory Ale, 通常的Pilsner 好淺色, 偏金黃,  這杯應該係Ale...., 唔覺太高的酒精度, 麥味算重.同事的磨菇湯, 是攪拌機打磨菇蓉的水準, 但份量不夠, 導致略為希了一點.Creek Salad, 用的是本港最平價的茶餐廳火腿, 真係吖...., 青瓜好爽好新鮮, 有幾粒Feta cheese, 算係夠creek喇吧....葡式辣醬烤無骨雞腿 ($95), 同事不愛食牛, 選了這件無骨雞, 睇佢只食晒薯條和西蘭花, 那件無骨雞肉, 只食了四份一左右..., 聽佢講..., 好似屋企比貓貓食果件雞肉咁鞋喎... 哈哈哈....炭燒紐西蘭肉眼扒 ($119), 上檯時個樣就夠好了, 但我最憎食薯蓉, 真係....天呀!!! 點解唔係薯條架!?!?!  要medium 熟度, 最後出來的是medium well, 幸好不是醃到軟綿綿的港式牛扒, 入口食落仍然有水準. 甜品是一件2cm X 2cm 的 膠膠質感小蛋糕, 同事咬了個角位一啖, 便放棄了..., 我??? 知慳識廉麻, 梗食晒!!好驚訝, 竟然不是機製即磨咖啡, 但味道都不差, 好過麥記少少... 哈哈...…查看更多

庇利金街上半段, 即是近柯士甸道的一段, 甚少食肆, 這間新開不足一個月的茶餐廳, 初時只有炸雞脾和西多士的下午茶, 過了兩星期, 可能發現跟本沒有太多生意, 唯有加多三、四款炒粉麵飯. 今天下午茶, 要了乾炒牛河 ($38)上檯時, 打了個突, 好細的小碟...., 其實份量不算太細, 但那隻小碟...., 賣相太小家喇..., 河粉炒得水準尚可, 但牛肉都是一般茶記的海綿牛肉, 已被醃得軟綿綿, 完全沒有了原始牛肉的質感.凍奶茶, 少甜...., 又是一般茶記的水準, 少甜.... 自然會少埋茶味和奶味... 也是常識吧....這是隔幾天再來的下午茶: 生炒牛肉飯, 也是三十八元, 包熱飲. 炒飯 才能看到廚師功力, 這碟炒飯炒得偏濕, 雖然未算痴埋一舊舊, 但稱得上有火喉, 加上...又是海綿牛肉, 比那碟乾炒牛河差得多.向店員要"辣椒油", 竟然給我一枝tabasco....., 有驚喜....., 可惜唔啱我... 哈哈哈..., 中式炒粉麵飯, 就算唔係紅辣椒醬, 都來一枝辣椒油吖....., 點會係Tabasco架.... (對唔住Tabasco fans... sorry!)…查看更多

最憎就係食Pizza Hut那種半件都會飽死人的厚批, 好彩香港還有Pizza Express, 其實, 還有另一間, 就是California pizza, 都唔錯, 可惜 California pizza 無海景..., 縱使Pizza Express, 都只有海運大廈店才有半截海景可以望下, so..., 半截就半截啦... 都好過K11果間, 半截都無....近期Pizza Express 與本土啤酒公司合作, 推出套餐優惠, American Hottest + 啤酒, 價錢為$198, 原價$82的啤酒, 以套餐價, 相減後, 啤酒即是 $45...., 貴唔貴...? 無錯, 重算係貴! 但上次行過中環, 見到某店賣緊門神啤酒, 好似都要$40/枝..., 超市式啤酒店都要四十蚊, 海景餐廳收四十五, 算抵飲啦...., 至於這牌子的所謂手工啤, 是否物有所值, 就真係見仁見智了. so...., 咁樣樣, 講得出"手工啤"呢個名, 就明係"略水"架啦.... 哈哈哈...要了一款名為: Kitchen God (灶君), 第一口, 真係有一種咖啡香味, 但蜂蜜味道就.... 我嘗不出, 要搵高手...., 原價係八十蚊一枝, 雖然跟餐就四十五蚊, 但都係有些少伏味....我都係比較鍾意白酒送Pizza, 來一杯 Sauvignon Blanc $62, 新世界貨, New Zealand 的 Marlborough, 果香強烈, 但偏甜, 我最怕甜度高, 留翻比老友... American Hottest 至尊美國辣口味 $153, 餐牌寫: Pepperoni + Salami...., 唔...., Pepperoni 同 Salami.... 唔係一樣既咩???? 老友話, 美國同意大利喎..., 唔...., 味道夠辣, 餅底乾中有脆, 脆中有軟, 我好喜歡... 最後來多一客 Parmesan and Mushroom Dip ($78), 用白蘑菇, 加入parmesan dip 和 parsley, 放芝士烤焗, 味道偏淡, 入口還留些少爽脆口感...…查看更多

尖沙咀河內道, 自從起好了對面的新酒店和商場後, 就多人到痴線. 好耐無到這裡, 今天探舊同事, 順便下午茶.看見門口介紹, 店內餐牌又再看見, 聚香雞..., 好似係推介名物, 既然講到咁好, 就叫一碟啦...., 兩個人, 例牌 $88. 上檯時模樣, 以例牌來說, 份量滿意, 雞皮偏啞黃色, 不算太精神, 但食落無問題, 無太印象深刻的雞味, 沒有雞皮與雞肉中間層啫利, 肉質軟但偏淋.餐牌上寫明: 配三款醬汁(口水醬、沙薑醬、薑蓉), 但最終只跟了一碟薑蓉, 唔多滿意囉, 雞... 已經唔算出眾, 餐牌寫著的醬汁, 又孤寒, 比少兩種, 真係.... 唉...!老友叫了碟特價炒飯, $38 連飲品.炒得差過屋企位工人姐姐, 幸好也不至於一舊舊, 加上夠細碟, 都比老友一路鬧一路食晒... 哈哈...自由行區域, 都係好難搵到好嘢食, 以後都係去翻內街搵食好過...…查看更多

近排多行加連威, 少行金馬倫道, 原來開了間高級牛腩麵茶記, 孤寒同事話... "咁Q貴, 一定唔會幫襯!" 我就話, 咁Q貴, 一定去幫襯, 睇你係未值咁貴, 如果唔好....哈!哈! 哈!.....開張時, 還有明星坐陣.... 咁巴閉..., 唔知係未杜德偉有份既呢?? (曲線要講明... 哈哈...)菜心 $22, 講到食油菜, 我一定會與佐敦麥文記比一比, 此碟菜心, 灼得耐咗少少, 偏淋, 但菜心的質素好, 麥文記的菜心$20, 這店貴了兩蚊, ok 啦...!跟餐的熱檸茶, 同事話: 無問題, OK!我要的牛腩河, 定價為$58, 無得跟餐, 即飲品要另收原價, 比一般餐廳的牛腩河, 較為細碗, 牛腩的賣相, 的確不錯, 牛肉部份, 望落新鮮, 件件牛肉的中間都有牛根類的條紋, 未食已經估到, 應該又淋又彈牙, 食落... 又真係夠淋, 彈牙方面, 比預期中略遜, 但都十分好味. 河粉不是市面最薄的款式, 有些少厚度, 口感有韌度, 整體而言, 除了略為細碗, 扣了些分, 尚有七十五分. 同事的墨魚/魚蛋雙併麵, 只$32, 還有一杯熱飲, 相對而言, 優惠很多. 至於味道和口感...., 同事評語: 竟然有件蘿蔔, 有些少驚訝... 哈哈...下午茶時間, 全店牛麵都無套餐, 五十八元的一碗牛腩麵, 雖然交足功課, 但實在太高價, 附近的店, 平均大約三十五元一碗, 如果這店的定價是四十九, 我仍然會給笑臉...…查看更多

編輯大大, 下文....我已經cut咗個 "頂"字喇, 唔該晒! 發現妹記又再開翻係尖沙咀, 但唔係地庫, 而係樓上鋪, 樓下兩層係健身中心, 全面封鎖樓梯, 即係...就算你有腳力, 都唔可以行上去, 一定要坐電梯. 平日的晚上, 八時左右, 一半客都無, 重覆多次: 係平日, 一半客都無!!! 而且只係兩位, 又講多一次: 2位(2個人), 朋友未到, 門口侍應... 竟然也要求 等齊先才可以入座,  @xyz...!! 當堂負面印象...., 無咩嘢必要, 唔會再上嚟, 無謂阻住貴店搵大錢啦....特色飛林廁紙筒, 如果80年個代, 應該一睇就記得, 當時有24和36張, 讀書時代, 唔多錢, 通常買24張. 攪形象, 唔慳得, 玻璃水杯都要印埋公司名.所謂的戰鬥碗, 碗雪得夠凍, 友人不好酒, 我又只是飲半枝, 平平地, 哈爾濱, 味道十分淡, 當水飲, OK呀!炸豬手 $68, 與佐敦白加士街的軍記比較, 這店做得好好多, 外層炸粉夠脆, 炸得足時間, 香口十足, 還有南乳醬, 蘸一些用來送飯...最正!這碟類似金銀蛋白菜的餸, 是老友落單, 後來在餐牌上搵唔到, 唔記得價格, 味道比想中要濃, 有蕃茄味道, 少少酸, 合我心水, 但老友記話偏鹹, 真是各有各口味..., 客觀而言, 材料足, 算底食.這煲飛天通菜, 上錯檯, 眼見賣相了得, 老友即時同侍應講, 如果無人要, 我地要埋, 點知 隔離 再隔離 張檯應了頭..., 無偈啦...白飯, 唔夠熱...係全行常識, 無得投訴, 但質感略濕, 偏淋, 唔合我意.薯仔炒安格斯牛柳粒 $128, 賣相好, 但味道和口感都不合格, 薯仔太乾太硬, 打"獻"太多.其實...是否"安格斯"... 真的不大問題, 最差係牛柳粒中間太生, 又韌, 食淨半碟, 失望囉..... 這店..., 食物質素一半半, 不懂變通的攞座位安排, 相信只是公司的賺到盡政策, 與員工服務水準無關, 是實上, 服務我們這檯的年青侍應, 都十分有禮, 態度良好.…查看更多