蜥蜴的个人专页

還記得以前香港剛有薩莉亞，每碟價錢都很抵，可以叫好多款。今日和朋友來旺角找到呢間居酒屋，每款菜式同樣好抵，好耐未試過叫咁多款野食。位置好近信和，同朋友行完就食嘢。好有日本裝修風格嘅環境，每檯客傾計都唔覺嘈。天氣凍冰冰要叫個窩黎暖下位，牛肉豆腐窩。牛肉好鮮甜，豆腐超滑，索曬d汁。仲有芋絲同大蒜。睇返價錢，唔洗60蚊呢個三文魚加州卷可以話全晚性價比最高，60蚊度有6舊咁多，三文魚肉好鮮甜，撈埋d沙律醬同加州卷配料比一般三文魚壽司嘅味道有更多層次。食開左鮮魚一份加州卷唔夠喉，再叫一碗特盛魚生飯，好多款魚生，每款質素都唔錯撈埋蟹子就連白飯都好惹味。醫肚之選嘅咖喱豬扒飯。咖喱香甜暖胃，飯粒飽滿。豬扒肉質同肉汁都優秀。醫完肚但仲有好多嘢傾，開始食d香口嘢，墨魚咀表面酥脆裡面鮮甜。好適合傾計食。因為價錢相宜，又叫左一份炸雞。肉質好嫩滑彈牙。完食照，2個人食咗六款嘢，非常滿足…查看更多

黎到上水返工幾個月，朋友又喺古洞開工，想約食飯但都好難揀餐廳，因為上水抵食嘅鋪頭都收得好早，朋友又鍾意食拉麵之類嘅日本嘢。好彩搵到呢間餐廳，舒服好坐，食品質素同性價比都幾高。六點幾就完全天黑嘅上水，有幾分晨咁早就天黑嘅日本嘅感覺xd鋪頭好乾淨企理，播住舒服嘅日本歌。職員都好年青有活力同禮貌。食物方面主打拉麵，但實際上咩都有，好似居酒屋。我點左黑蒜豚骨湯底拉麵，朋友就原味豚骨。再加玉子燒同雞軟骨。湯底嘅豚骨鮮味好突出，黑蒜味亦同豚骨味好夾，增加少少刺激又唔削減果份甜味。麵好爽口，而且有爽脆嘅木耳絲增加口感。原味都同樣OK叉燒半肥瘦，唔會只係一舊煲湯豬肉咁鞋颯颯。而且有烤過，食落更加香口。溏心蛋又係高質，蛋黃有酒味。小食都好有心機，玉子燒夠甜夠滑，而且面頭好多木魚絲，用鹹香味吊玉子嘅鮮甜出嚟，值得一讚。雞軟骨就係高cp之選，幾十蚊夠大兜，又爽脆又香口。吹水送飯一流。完食圖，朋友連湯都飲埋，我剩低一啖，太飽了上水有呢類餐廳真係增添唔少色彩，喺度返工返學都有更多選擇。…查看更多

新界東一向係我最鍾意嘅地區，感覺空氣都比其他區清新。今日OT到七點幾決定搵間好餐廳補償一下自己。喺openrice搵到大圍呢間豬屋日本料理，夜晚嘅大圍比九龍黑一d，路燈同民居嘅燈光唔太光，涼涼地行得好舒服。喺田心村雲疊花園入面。平時食嘢唔係商場就係繁忙嘅市區，呢個僻靜環境真係好有新鮮感，但其實又唔係行好遠。門口都有唔少食客同外賣員等候。坐低即刻有熱茶同掃碼落單。落完單欣賞一下店內充滿日本文化符號嘅裝飾，美食就送到。我點左名古屋便當，山形海膽壽司同生薑蜜。因為最近d牙有d敏感唔想食太多凍嘢例如刺身/壽司。飲嘢都只可以飲熱嘢，呢度用左隔層杯，揸上手唔會熱親。薑味恰到好處，唔太辣，整體又唔會太甜，解渴又暖胃。雖然海膽壽司都係生冷嘢，但辛苦成日，偷雞一舊唔過分啦非常濃郁又滑嘅海膽，幾年冇食過大閘蟹，呢一啖有大閘蟹蟹膏嘅風味。便當送到！好豐富！炸雞皮脆肉嫩，炸皮包住肉汁，鹹鹹地，點沙律醬好開胃。鰻魚鮮甜又軟，啱曬我呢個冇牙佬。食舊鰻魚加一啖飯，油脂滲入飯入面，1+1大於2嘅升級享受。仲有非常鮮甜有魚味嘅日式圓蔥魚餅，同沙律醬都好夾。便當嘅好處就係多配搭。唔同組合撞出唔同化學反應。分量充足而且多汁嘅咖喱飯。咖喱甜度同鹹度控制得好好，就算多汁少飯都唔會漏。多出嚟嘅飯可以送其他配菜。本來應該食埋d椰菜，不過實在太飽，好抵食。食完又可以行返條鄉村小路散步回程，比黎嘅時候多左一份滿足…查看更多

呢輪嘅防疫限制令到好多餐廳都唔開，遇到開嘅餐廳已經好彩，遇到好食嘅餐廳更講求緣分，今次真係緣分到，比我遇到呢間回味再三嘅泰式西餐廳。餐廳喺山林道嘅樓上鋪，以前喺附近返工都周不時喺山林道食嘢，印象係尖沙咀價錢合理，質素偏高，對於唔少呢邊嘅寫字樓打工仔黎講都係好好嘅選擇。今次呢間格調高檔少少，但價錢都係喺合理範圍，對比返個質素，係好值得。西餐嘅風格，店入面環境舒適乾淨。因為喺商廈高層，有開揚窗口，可以極目遠望西九龍靚景同晴朗天空。本來寫開食評都係介紹食物為主，但今次我絕對要將個重點放喺飲品度。素來我都熱愛奶茶，早幾年飲到照到細細粒腎石（好彩後尾佢自己甩左）。呢間嘅泰式奶茶真係我飲過嘅奶茶入面最推薦。睇到個杯入面一粒粒嘅嘢係咪好有趣？開頭以為係葡提子黎，但原來係茶冰。保持冰凍又唔會沖淡佢嘅茶味。比起一般凍奶茶或者太x嘅冰鎮奶茶都更有心思同美觀。每一啖奶茶由頭到尾都咁順滑香濃。泰奶過往嘅印象係偏甜，但呢杯唔單只冇特別甜，而且凍飲都有非常香嘅茶味。絕對推薦同朋友慢慢傾計慢慢歎。餐牌有套餐，加錢配冬陰功或其他湯，黎得泰式西餐廳就試下冬陰功。非常足料，有蝦、有三文魚肉，同各種香料蘑菇。海鮮令湯入口好鮮甜，飲得出唔係味精溝水。而且辣度好適合一般人，對舌頭有少少刺激，但唔會辣到痛。辣辣地飲返啖奶茶潤喉，絕配。主菜係牛扒，有好多配菜。個汁係黑松露醬，好香，講起黎粉麵飯同薯條我都試過黑松露醬配，牛扒真係第一次。有剩嘅汁點埋配菜，好香濃。舊薯仔表皮煎得好脆，好有以前讀U食開嘅焗薯感覺，好懷念。牛扒五成熟啱啱好，嫩得黎有咬口，牛味同油脂都較豐富，就算黑松露醬嘅味道濃烈都冇完全蓋曬。同醬汁好夾，啖啖肉，正。成個餐最正係每食一樣嘢都有好味嘅奶茶送，串連成個餐成為一個好完善嘅用餐體驗。而且最抵嘅一點係，跟餐只係21蚊……必定要再飲。…查看更多

過年前行花市久違地黎到太子，花園街呢邊嘅面貌都變左好多。但都有新嘅鋪頭好似新嘅花咁開放。個人對中式粉麵都幾有好感，見呢度乾淨企理，又有套餐配搭好似茶餐廳咁樣，就坐低試下。環境好乾淨企理，檯面玻璃可以照鏡。有唔同嘅套餐選擇，如果單拼就可以有油菜、雙拼就會跟飲品。食完嘢唔飲返杯茶/咖啡硬係爭D嘢的，所以叫左一個雙拼套餐，雲吞拼牛腩，有奶茶。再加碟油菜只係加多9蚊。雲吞牛腩麵黎到。雲吞好大粒又夠飽滿，牛腩都肥瘦相間係精心揀選。中式粉麵我都係鍾意呢種麵，夠爽口，湯底都夠味，唔係淡茂茂/味精水。雲吞皮非常滑溜，咬開餡料好飽滿，蝦同肉比例均勻，有蝦嘅鮮味亦有豬肉嘅香甜肉汁。蝦係好完整唔係融融爛爛果種，而且食完一d蝦殼都冇。牛腩大大塊，肥瘦相間咬落去即刻feel到牛脂嘅香味。而且鬆軟之餘保留牛肉鮮味，吸滿湯底更加入味。油菜有切開葉同框（莖）嘅部分菜心嘅框先係正嘢，高質嘅框唔可以太淋，要有爽脆嘅口感，點少少蠔油，係一種中式粉麵餐嘅獨有風味。粉麵餐廳嘅奶茶估唔到都夠優質，茶味好香，唔加糖都好順喉，飲完喉嚨好舒服，又提神。一邊食一邊都聽到店員同食客打招呼、介紹食品，又好落力執檯，上食物又客氣，好有街坊情懷。可以有下次嘅餐廳。…查看更多

麻煩的病毒又殺到來香港，又沒有晚市堂食了，加上整個星期都要上夜班，趁今天早收食返夠本。在旺角多數都是食放題燒肉/邊爐，今天轉下口味食日本料理。以前光顧過青衣的分店，印象很好。開到來旺角看看有什麼變化。環境企理左，座位也舒適了，很寬敞和乾淨。而且改了掃碼落單，很有效率的方法。日本料理要食嘅當然係刺身。講真食過咁多款刺身魚類/貝類我都係最鍾意三文魚，所以叫個三文魚腩。果然不錯，肥美得來咬到裡面有結實爽脆的口感，三文魚獨特的鮮甜味道當然少不了。整塊都很滑溜，一點渣都沒有。再來北海道生蠔，尺寸不小。一口滑下去，慢慢咀嚼，蠔味在口腔擴散，差點想食埋朋友那隻。食了兩款新鮮的冷盤來吃一點溫暖的東西，咖喱飯是很好的選擇。咖喱汁和牛肉的香味好夾，而且天氣轉涼再加上吃了刺身，日式咖喱剛好起暖胃作用。這間有埋串燒食，肉類吃得夠多，今天就試試蒜燒茄子，很考技巧的一款燒物。也都燒得很不錯，整體燒得熟和入味，入口軟綿綿。用來送飯一流。連皮都能輕易分開，可以一截截地吃。再叫個甜品，芝士蛋糕。外表雖然平平無奇，但有多層的構造，有濃郁的芝士味和綿滑口感，也有蛋糕的鬆軟。不知道要多久後才能再吃堂食了，理所當然的事情也得來不易，要好好珍惜。…查看更多

自從上次一日一餐食左放題之後每日繼續壓縮食嘢嘅時間黎提高斷食效率，今日堅持到3點半食第一餐，黎到旺角食新記冰室。喺網上睇圖片已經好吸引，今日食過覺得絕對係抵食而且優質。店入面裝修採用懷舊風格，同旺角內街食肆嘅環境又好夾。睇到折凳嘅時候心裡面不禁響起薛家燕嘅名台詞“好折凳！”雖然呢度出名芝士撈麵，但減澱粉嘅我都好快搵到適合嘅食物，就係全日早餐，睇過只有豬仔包屬於澱粉類，而且價錢都比西式餐廳平一截，升級紅豆冰都只係加12蚊。黎得冰室唔試下紅豆冰點有氣氛，奶茶紅豆冰好大杯，紅豆超多，插敘一下食完個餐再食曬D紅豆係超級飽。當初以為係貼地親切形象會比較多糖，點知飲落去奶茶係冇糖，只有奶味同清香嘅茶味，甜味黎自紅豆嘅天然糖分，好健康。全日早餐上碟——唔止價錢公道，份量仲令我驚喜。特別擺隻手落去構圖內對比。未落到檯已經聞到呢浸我最愛嘅黑松露醬石油氣味。急不及待試一啖，蛋好滑。黑松露醬令到每啖都保持味道嘅新鮮感，一大份炒蛋食完都冇滯嘅感覺。健康蔬果組成嘅沙律，份量又係多到可以share。仲有兩片清新多汁嘅番茄。食左一陣豬仔包送到，好軟熟，外層保留到鬆脆，奶油都即搽，冇滲曬入去影響口感。食物份量多種類都多，質素亦好高，呢個茄汁豆係我食過少有暖嘅。食曬D蔬菜後開始食肉似乎健康D。先食皮脆肉嫩嘅腸，唔小心睇漏左佢，比腸仔遮住仲有三片鹹香肥美嘅煙肉。最後係雞扒，雖然食完其他食物已經隔左好耐，咬到表皮仍然香脆。肉嫩多汁，而且有少少一咬即開嘅筋位，口感更加豐富。完食照。食完呢個77蚊嘅全日早餐，竟然比早幾日食左幾百蚊串燒更飽，而且味道一D都唔求其。又一次達成一日一餐嘅挑戰~…查看更多

上星期Annual Dinner竟然比我抽中左3獎，咁多年黎都係攞安慰獎嘅我梗係開心到要大肆慶祝一番。天氣涼涼地想食串燒，又唔想有油煙味同坐喺街，同事介紹原來有酒店餐廳嘅串燒專門店，仲好近公司。行上呢條好有港產片氣氛嘅斜坡就到。一黎到已經好Full，多數都係女士/情侶。環境非常唔錯，裝修高貴、門面乾淨，除低口罩都聞唔到油煙味。坐低即刻有前菜上枱，同送一支手工啤。平時唔捨得都好少飲手工啤，今次可以歎返夠本。飲落果然同普通啤酒好唔同，好香，與其話係果味，更似第一次食香印提子果種花味。串燒種類好多，肉類、菜同海鮮都有，同朋友慢慢揀再分享大家嘅飲食喜好都係令人舒暢嘅用膳體驗。見到之前喺居酒屋食過嘅熒光魷魚，呢度仲配芝士，係一個有趣嘅配搭。加埋呢款芝士嘅配搭真係升華唔少。淡口嘅芝士中和熒光魷魚嘅天然海水鹹味，又吸收到魷魚嘅鮮味，兩種食材都夠滑，第一款食物已經勁滿足。第一串係燒原隻南非鮑魚，雖然店內空氣清新，但上到檯燒烤嘅香氣都係撲面而來。鮑魚好彈牙，保留到一D汁，因為肉厚唔易乾，可以配埋醬汁黎食。右邊係好惹味嘅BBQ醬，左邊係健康嘅海鹽，吊一吊味，味道更豐富。特別鍾意食內臟嘅我自然係點左雞腎同豬腸。雞腎爽口結實，有水準。豬腸更勝一籌，燒得香脆之餘，保留豬腸特有嘅風味，而且咬落口溫度剛好嘅油脂走曬出黎。食得多肉都要食返D菜平衡下。曾經聽串燒檔老闆話燒蔬菜係好費心嘅一件事，要不停掃水，先可以令菜唔燒乾。呢兩串日本大蔥同白菌都燒得夠香夠熟之餘又保留到蔬菜嘅鮮甜。 左邊係爽脆彈牙嘅白鱔，同豬腸一樣咬落去有香滑油脂，超適合我呢種生酮飲食嘅人。食得開心，要愛我啤酒，今次叫Asahi，好大杯。仲有羊架都係高質之作。肉汁豐富，肉質鮮嫩，絕對唔會好似某掛名黃店放題_皇水產嘅鬆肉粉羊架一樣，天淵之別。仲有錫紙包住可以用手拿住食，夠曬滋味。餐牌見到獨有嘅燒免治雞軟骨，上枱仲附送一隻蛋，打成蛋醬蘸落去食令味道更加豐富。啖啖肉之餘又有軟骨嘅爽脆，口感同味道一齊滿足。呢度真係好多特色食物，不愧係酒店，信玄餅係我成日見到朋友打卡又一直冇機會食嘅嘢。水旺旺嘅餅，淨係睇已經靚，食落口同期望中一樣又滋潤又滑，甜度亦唔會太高。難得豪一次，雖然奢侈少少，但環境優雅，食物質素無可挑剔，都令我享受到應有嘅體驗。…查看更多

工作忙遲了食飯，三點幾先得閒，決定食飽D和食好D，又來永光中心發掘下嘢食。戒緊澱粉，所以搵到呢間餐廳，鋸個扒。入到黎裝修佈置都有優雅西餐廳嘅特式，燈光柔和，座位寬敞，而且有一D植物擺設。店員好親切問咁遲食lunch嘅，再遞上餐牌，一睇，一份扒餐都只係70蚊。叫左一份西冷牛扒，想睇下呢個性價比嘅牛係咩質素、再叫個沙律有多D菜。呢排戒澱粉，叫嘢就有好多要求，要薯菜又要走薯、沙律又要少汁，店員都全部Mark低而且照做。服務態度非常之好。餐湯先到，好足料，有牛尾粒喺裡面，咬落有牛脂嘅香味。煙三文魚沙律。蔬菜嘅青綠同三文魚嘅橙色加埋好靚。有煙肉、好味得黎又係優質生酮食物。煙三文魚好滑，有D鹹香，配清新嘅蔬菜食口感同味道都好豐富。食完好開胃。輪到塊扒上枱，很不錯，70蚊的價錢有咁大塊。醬汁同扒都放喺鐵板加熱，保持溫度，有木柄防止灼到手，這家餐廳選用的餐具也很有心思。薯菜真是走了薯。切了邊緣的一小塊，火候剛好按要求的5成，曾經太多次吃到過老的牛扒（特別是現時流行的石燒牛扒，是我自己不會控制），這塊特別讓我開心切開中間也是火候剛好，嫩滑之餘也不會有血水。send相比朋友睇都話塊扒靚仔。餐飲凍檸茶，杯好像有2層的設計。有一層空氣隔開不會整濕手和不會拿上去太凍，這裡的餐具真是很抵讃。慢慢歎的時間都來了不少客人，大家都很熟絡地坐下點餐，下午茶時間還有這樣的人流證明餐廳是高質的。講真相比茶餐廳或某些西餐廳，這個價錢、服務和環境都優勝不少。…查看更多

好多時放工都會上西九行返轉，貪佢多小商戶，新穎貨品層出不窮，成日都會買到鍾意嘅嘢可以減下壓。佢八樓嘅美食廣場都有同樣效果，食物選擇多，好多時有驚喜，今日呢間新開漢堡店同樣帶到驚喜比我。之前美食廣場好似冇乜賣漢堡包嘅鋪頭，有與別不同嘅選擇今次梗係要試下。睇餐牌雖然簡潔，但都有D流行嘅配搭（其實係我自己鍾意食），例如黑松露同煙肉。好自然就點左黑松露芝士雞堡+芝士煙肉薯條（餐飲忌廉）。因為即叫即製，要等10~15分鐘，剛好可以落7樓蘋果商場行一圈。行完一圈返上黎已經準備好，睇份量同賣相都幾吸引。而且新鮮整好，熱力揮發令黑松露醬嘅獨特香味同煙肉芝士嘅鹹香味更加突出，鑚入我個鼻度。下午茶時間好易搵位。我習慣係食薯條先。一攞起，就surprise到，勁大Pat芝士，而且唔係表面一浸，係滲埋入去中間，沾滿每條薯條。芝士味濃郁到好似食緊Pizza，薯條亦炸得好香脆。再加埋煙肉，口感同味道都大大提升。輪到漢堡包，配料同醬汁都豐富充足，塊雞扒又厚又大，突出左個包嘅圓周範圍。咬落去可以感受到雞扒嘅鮮嫩，配埋醬汁同配料嘅天然味道，漢堡就係要咁，一啖享受曬唔同食材混合嘅化學反應。值得一提係漢堡嘅味道同薯條嘅味道截然不同，因為人係有嗅覺疲勞，同一種味聞得多會覺得越黎越淡，但食完一啖漢堡再食返薯條，果陣pizza咁突出嘅香味又出返黎。呢個配搭真係有心思。食材份量真係比得好大方，可以將薯條點落黑松露醬食。一份薯條絕對夠2個人食。全程用手食（絕對有清潔乾淨對手），食完先發現篤漢堡條竹籤可以用黎吉薯條XD食住漢堡同薯條，飲啖忌廉潤一潤喉嚨，就算平時唔多飲汽水都樂於破戒一次。完食，好環保嘅設計。美中不足係飲品選擇唔多，希望日後會有多D飲品。…查看更多

尖沙咀加拿芬道一帶是購物天堂同寫字樓密集的區域，返工收工或者行街shopping攰攰地都好需要一杯咖啡黎提神。唔想飲Start_uck嘅話呢間就係一個優質選擇。喺尖咀返左工幾年，發現呢頭嘅Cafe數量係唔多嘅，尤其係我接受唔到連鎖店。行經門口已經聞到好香嘅咖啡味，仲聽到我鍾意嘅廣東話流行音樂。餓餓地就一於食埋個下午茶再歎杯咖啡。叫左一份All day breakfast 配 Cappuccino. 全部都係即叫即整，等待嘅時間一邊聽住音樂，一邊可以聽/聞到廚房處理食材嘅動靜。可見每樣食物都精心處理。上來的份量相當豐富，見到每樣配料都有2份。咖啡亦都好香。除左粟米，都合乎我No Carb嘅飲食習慣。沙律菜新鮮爽口，最重要係夠乾淨。仲有好別緻嘅車釐茄雕刻伴碟，好似比卡超有閃電形嘅尾巴。配合埋靚靚嘅拉花，非常適合打卡。BTW我都好想學拉花。煎得恰當嘅番茄，保留鮮嫩嘅汁，又有煎煮嘅香味。炒得香滑嘅炒蛋，有蘑菇增加口感，即使好大份食完都唔會覺得滯。皮脆肉嫩嘅腸，肉質好結實。充滿肉汁同鹹香嘅漢堡，配咖啡一流。（筆者而家嘅習慣係咖啡要配鹹味食物）配料咁多，當然要試下組合黎食，用烤得爽脆嘅麵包承托起黎，再Sip埋塊煙肉入去，一啖就有齊唔同口味唔同感覺。咖啡係無糖，可以感受原本嘅風味，因為奶泡夠多夠滑，唔會有酸味，好易入口，一杯都意猶未盡。連車釐茄都食埋，留低一隻本來係耳仔嘅部分，而家變左天元突破眼鏡~…查看更多

天氣轉涼，皮膚的觸覺勾起了2年前最後一次去日本旅行的記憶，很想吃日本菜。放工時搜尋到原來平時上班路上經常看到的八海山招牌正正是一家日本人飯堂式的正宗日本料理餐廳，試完後果然十分滿意。進到餐廳，店員用日文親切地歡迎。店長對我一個孤獨的肥宅竟然會光顧很感興趣，原來這裡一向是日本人預約形式或介紹形式訂座的。還好我在動畫和遊戲學到幾句日文，表達了我很想吃正宗日本菜，店長便親切地接待了我。坐下便有熱茶和溫暖的毛巾，還有爽口鮮甜的前菜帶子裙邊。Menu的選擇非常多，驚喜發現有Omakase，因為什麼都想食，索性不自選，交給店長發辦。先來一支招牌清酒“八海山”，店長介紹是新瀉縣出品，那裡水和米都很優質。非常醇滑清香的一款酒，很易入口，酒味恰到好處，不會有刺激的感覺。雖然是冰凍的，但喝到喉嚨和肚子裡都很溫暖。而且每次喝完一杯都會有店員來斟酒，服務非常好。後來聽在日本當酒類買手的朋友說，這支在日本也很受歡迎，性價比很高。看到店長為我寫菜式時用上日文寫，更加感受到那種正宗日本餐廳的面貌，我特別拜託他給我拍下來XD第一道菜是熒光魷魚。即是上面下單紙的ほたるいか。懷疑自己前世是海豹之類的動物，自小就很喜歡吃魷魚。這個新鮮魷魚充滿海水的鮮味和鹹香，又有刺身軟滑的口感，咬下去裡面的汁液爆發出來。送酒一流。我是絕對不浪費食物的人，正宗日本料理正正是幾乎全盤都能吃的。配菜的海帶和魷魚放在一個茶匙上一口吃下去，增添了爽脆的口感。接下來的一道是Menu都沒有的特製菜式 白子酢。是鱈魚的睪丸。打邊爐都很愛雞子的筆者當然毫不抗拒。這道菜還是讓我特別回憶起日本味道的菜式。白子入口滑溜、清甜，霑一點特式日本酢，整個在日本吃東西的味覺記憶便湧了上來。配菜還有木耳、青瓜及很像四葉草的菜。霑著酢吃，特別有風味。慢慢品嘗味道的同時已經上了豐富的菜式，拍一張合照。接著是金鯛刺身。這份金鯛刺身高質得讓我第一次覺得魚是這麼好吃的。不但肉質結實，味道鮮甜，咬下去又滑溜無渣。再加上一點點火槍的燒灼，增添一點香烤的味道和把油脂逼出來。即使不加調味，也有豐富滿足的味覺享受。店長跟我分享，海產都是前一天從日本空運到港，絕對有信心足夠新鮮。有五片而且厚身，也可以配一點即磨山葵（有天然的顆粒、沒有化學刺激味）。配菜的柚子配蘿蔔也很開胃，蘿蔔爽口，沒有那種草青味。再來是刺身沙律。刺身丼、蟹子沙律那些我們經常食，這個刺身沙律則是相當特別，而且很適合我這目前減澱粉質的飲食習慣。刺身的種類和份量都非常多，每塊都新鮮爽口。沙律用了類似日本酢的泡菜汁調味，比一般的沙律醬沒那麼甜而且健康，更加特顯刺身和蔬菜的原味道。店長說這個份量是正常Order的一半，看了Menu只需95元，實在很抵食。吃了幾道菜，都已經很滿足，店長看我吃得滋味，再給我上一個南蠻炸雞（本來他說還可以來個主食，我在戒澱粉質而且已經夠飽就留待下次了）。這個雞端上來那浸油香，是比我在任何地方吃過的油炸食物都更加香，讓我忍不住索了很多次。一口咬下去，完全感覺到和那浸油香對稱的美味，很明顯是新鮮的油炸出來，同時肉汁被鎖在滑嫩的雞肉，鹹香鮮甜，配一口酒，好幸福的感覺。飯後還有甜品，完滿總結這個回到香港人第二家鄉——日本一般的用餐體驗。在我細味的同時陸續有其他客人來臨，不少都是日本顧客帶來的，果然是日本人的飯堂。聽到有家庭的小朋友說“好好食！好好食！”相信小孩的味覺絕不會誇張。由於疫情未能到日本的話，來這家餐廳一定有方法重拾在日本享受正宗料理的感動。…查看更多

深水埗給人的印象都是熱鬧和繁忙，但其實有一個很寧靜和舒服的地方，就是嘉頓後面，順寧道這裡。是很多人放狗和偷閒的地方。今天天氣有點涼，又不曬，沒塞車早了回到深水埗，有點時間就沒去平時吃的餐廳來這邊散下步。還發現了不錯的食店。主要是賣漢堡的，有些新鮮的搭配如軟殼蟹和五花腩。沒有堂食但走一小段路就到了風景明媚而且有座位的公園。買了一個套餐，有漢堡和汽水。現在這個時間途人也很少，正好享受悠閒的下午茶。公園步道的兩旁有石凳，還有剛好可以擺放食物的扶手位，在開揚寧靜的地方吃東西比在室內吃舒暢多了。既然人少少，又是吃漢堡，當然就用手拿了。漢堡的Size很好，厚度是剛好能一口咬下，又份量十足。我選的是牛肉漢堡，牛肉很多汁，牛味充滿整個包。麵包的部分也很香。牛肉沒有用上很多調味料，保留原汁原味，芝士的鹹香剛好能把牛肉味道提升。其他配料也很豐富，有生菜、番茄和較少見的洋蔥。須知洋蔥和牛肉真是絕配，很驚喜的配搭。還有清涼的可樂。雖然是肥宅餐，但這邊很適合散步，應該能平衡不少。吃得開心就好。…查看更多

當年睇完乾物妹某一集海老名同學自己一個去食燒肉之後就好難忘。但咁多年黎燒肉都係同班fd一齊燒，今次就有機會模仿海老名同學咁樣自私歎燒肉。裝修同佈置都好有日本風格。行到門口已經聞到陣陣肉同酒香。一個人一個爐，坐得好舒服，檯面都夠闊擺曬D嘢食。當然都可以同朋友把酒言歡。對面檯就有一班興高采烈嘅哥哥仔。有圍裙提供，唔會整污糟衣物。衛生方面加分。點左個A餐，六品燒肉盛合，就係六種唔同嘅肉類/部位。好豐富，新鮮嘅肉質令我急不及待開始燒起黎。不過都影返張全個餐嘅相先。會跟沙律、面矢湯，同最重要（動畫都有提到的）白飯！燒肉嘅精髓係新鮮燒起會有豐富嘅肉汁同油脂，用白飯索左佢絕對係升華美味嘅食法。而人類都係鍾意澱粉質的（原則上我戒緊，今次久違地破戒一次）爐嘅形狀好得意，拱起來但都好猛火力，燒起黎好快有得食。而筆者非常自豪嘅係對燒肉係好有心得。例如燒到幾時需要反轉，咩時間係熟得可以入口，都控制得好好。爐嘅邊圍有好多洋蔥同紅蘿蔔，自從喺某間牛肉烏冬鋪食過洋蔥牛肉之後就迷上左同肉類一齊煮嘅洋蔥，好欣賞呢個設計。剛才嘅係牛舌，好爽脆。然後係雪花超靚嘅牛肉片，仲有少少紅色就可以夾起。牛脂香到會直接鑚入鼻腔。相比之下豬香味較少，但味道鮮甜，各有特色。有新疆串燒那種孜然粉提供，更加提升風味。羊肉有獨特嘅香味，口感同牛相近，脂肪比較少，適合愛好羊味嘅朋友。雞肉，嫩滑多汁彈牙。完食照。特別一提調味嘅醬汁都好出色，每款都可以喺唔同方向提高肉類嘅味道同口感，尤其係切碎嘅洋蔥，索埋肉汁後就咁食都正。…查看更多

早排喺電視睇到古天樂受訪，佢話自己已經斷食左好多年，每日只係食一餐。見到佢咁有型搞到我都想試下，但正常飲食一日三餐，縮做一餐嘅話可能要食得豐富D，所以就食放題。有幾個月時間冇食放題了，對上一次係食某間掛名所謂黃店嘅帝_水產，質素低到絕不會再光顧。今次揀返穩陣嘅極尚大喜屋，Lunch時間只係188蚊加一。而家轉左用電子落單，唔洗再舉住疊點餐紙舉到手軟又漏單又環保，好！   多左好多自助形式嘅食物同飲品選擇。越黎越似Buffet。飲品櫃加埋甜品櫃嘅各種選擇多到好似便利店咁。而且Lunch時間嘅優惠價可以歎清酒，真心唔錯（好彩我下晝唔洗開工）。電子落單好快有食物上枱。原則上我唔太會喺放題食壽司，但呢幾款特別新奇，有海膽、我最鍾意嘅黑松露、而且有蝦多士。每件細細舊，唔會食到好飽，但味道又幾出，黑松露又好香，值得消費Quota一試。呢個鮑魚仔壽司都係有創意製作。鮑魚好彈牙，雖然配搭似係一個碟頭飯，但食落唔錯。放題必食嘅刺身，新鮮係基本。特別推薦象拔蚌刺身，鮮甜爽口。就算我唔係特別好刺身都encore左幾次。一品料理系列，因為多數係一客客咁落單，我得一個人就叫D份量可以控制嘅，扇貝煮得唔錯。帶子部分冇過火，好嫩滑。扇貝最正嘅粉絲都索足鮮味嘅汁，配埋蒜蓉好惹味。食放題我都係最鍾意燒物，呢度各種串燒都好有質素。蒲燒鰻魚，燒得香口，保持肉汁肥美，咬落去有肉汁同油脂散發出黎，食左三碟。牛舌，肉質彈牙爽脆，滴埋檸檬汁加多份清新感覺。送酒一流。柴魚幹，同清酒呢個配搭真係好chill，好慶幸下晝唔洗開工。燒羊架，大大啖肉。基本上肉類串燒都好新鮮，點解講新鮮？因為之前那間所謂黃店X王水產所有肉類都唔新鮮，冇肉味唔特止，仲用鬆肉粉整到入口即融，呢邊對比起黎高質百倍。炸物由於我唔好天婦羅，淨係叫左幾轉榴蓮炸彈。咬開入面滿滿嘅香噴噴榴蓮醬，完全可以留喺味覺記憶裡面好耐。仲有好多甜品揀，自家制嘅都有。188有咁多選擇同高質，係抵食嘅。結果果日飽到夜晚冇食飯，成功實現一日一餐（一次）…查看更多