美佛s的个人专页

星期六休息日，突然間好想食涼皮，平時買開太子某間出名涼皮店，不過難得放假當然唔想去咁遠，但屋企附近兩間涼皮店真係唔好食，於是上openrice search 下附近仲有邊度有，最後search 到大埔呢間，仲要有巴士直達，二話不說即去。 店舖外觀俾人感覺好舒服、乾淨，同左右兩邊檔口好似兩個世界咁，除左涼皮之外，仲有賣餃子、滷味、蒸飯、飲品、大地魚粉等等，最吸引既係佢地仲有急凍真空包裝既滷味，買黎放喺冰箱隨時有得食。 烤醬鴨肉涼拌粉皮食涼皮最驚D涼皮好厚身一舊舊好鞋口，好彩呢度既涼皮夠滑而且有彈性，每一塊涼皮都沾上烤醬，鴨肉份量好多，配上新鮮既青瓜絲同京蔥絲，每一啖好似食緊片皮鴨咁，真係好正。 蝦滷豬手特登買多盒豬手夜晚加餸，呢度既滷水汁同平時出去食既滷水汁唔同，係比較溫和既滷水汁，唔會好鹹，而且滷水汁好香，一盒蝦滷豬手切開左一片片，放到滿滿，擺得好靚仔，呢個份量呢個價錢都真係好抵食，豬皮好彈牙，豬手肥瘦均衡，入晒味夠晒淋，好好味。 蟹黃·豚一盒十隻，連一小盒菜脯，手工餃子，餃皮用甘筍汁整，餡係豚肉加蟹黃，餃子煎得好脆身，餃皮少少厚身，質感煙韌，即叫即整既關係所以要等大約10分鐘，熱辣辣。 凍奶茶買任何食品可用半價加配飲品，天氣太熱，買左杯凍奶茶飲，等車期間忍唔住飲左一啖，因為好好飲，未返到屋企已經飲左大半杯，手工拉茶，茶夠香濃而且入口滑溜，正，呢個真係意外既驚喜。…查看更多

好多時放工後都會去買煎釀三寶、碗仔翅、腸粉黎食，一路都覺得幾好食，今次突然好想食韭菜豬紅、燒賣同腸粉，於是用apps預先買定外賣拎返屋企食啦！當我返到屋企開黎食嘅時候，先發現碗韭菜豬紅得豬紅無韭菜，但返到屋企又唔想落返去，於是食左碗淨豬紅，講真，真係好失望，我去拎外賣嗰時一個人都無，無可能因為忙而整漏，唔通呢排韭菜貴？ 另外啲燒賣都唔係太好食，好多粉，而腸粉啲花生醬同甜醬都好稀，豉油都亦比較少，食腸粉最重要嘅精髓係啲醬，如果啲醬杰身返啲會好啲囉！不過啲腸粉係滑嘅！我諗我下次都係食返煎釀三寶同碗仔翅算啦！…查看更多

早幾日放工經過沙田搭火車，竟然俾我發現到有一間新開嘅韓國外賣店，雖然店舖細細，但都有好多野賣，例如泡菜、飯卷、炸雞、涼拌菜、拌飯等等。平時我好鍾意食泡菜，要食到新鮮整出嚟嘅泡菜當然要去賣韓國嘢嘅舖頭，住新界嘅我每次都要出去旺角或者尖沙咀買，而家沙田開左間，對我黎講真係好方便，諗起都好興奮。因為家中泡菜未食完嘅關係，今次淨係買左盒炸雞返屋企加餸，佢地有3個size 選擇，我揀左medium size，睇個樣已經好吸引，估唔到入面都有成10件咁多，而且佢炸粉唔厚，雞肉juice 唔會乾爭爭，味道唔錯啱我口味，絕對可以encore，下次買埋泡菜試下先。…查看更多

每年聖誕節都係簡簡單單叫Pizza 食，食得多都真係會悶，所以今次第一次叫到會喺屋企食聖誕大餐！呢間小店我之前去堂食食過一次，食物水準真心掂，而且大廚係前5星酒店獲獎西廚，但個價錢真係令我好驚喜！🍛芝士鮮茄菠蘿焗豬扒飯大廚用上新鮮菠蘿同細細粒嘅蕃茄，豬扒好入味，再加上大量芝士鋪喺面，超惹味！🍝黑松露野菌卡邦尼意粉好香好香，本身唔係好好黑松露，但大廚真係煮得好好食，意粉唔會煮到好淋，最後我食左兩大碗。😆🐔聖誕烤雞好驚喜，隻雞烤得啱啱好，好juicy，連雞胸都好滑。🍖醬燒美式豬仔骨豬仔骨好入味，骨肉分離好容易食到，另外有個汁跟，個汁酸酸甜甜，可以中和肉類嘅油膩感，家人激讚夠細心。👍🏻🍗蜜糖烤雞翼🦀香煎馬里蟹餅🥧雜菜咖哩酥🫕周打蜆湯另外仲有🍮焦糖燉蛋同🍵啫喱杯，不過食晒先記得未影相🤣總括黎講，到會嘅食物份量足有餘，係多到食唔哂，第二日仲食緊🙈，而且真係堅好味唔係講笑；一開始我以為叫到會嘅話，食物拎到返屋企會凍左，但我地拎嘅時候真係熱辣辣，真係好正！今次到會嘅食物，我最鍾意係豬仔骨、黑松露野菌卡邦尼意粉、烤雞同芝士鮮茄菠蘿焗豬扒飯，誠意推介，會繼續支持小店！👍🏻…查看更多

酒樓裝修華麗光猛， 座位好舒適同埋唔會坐得好迫。入座前經理幫我地量體溫，入座後另一經理拎左一大盆啱啱煲好既滾水俾我地洗碗筷，令我地在疫情底下都可以食得比較放心，呢方面真係做得好貼心。餐前小食係黑白木耳，第一次食白木耳，同黑木耳一樣都係好爽口，味道酸酸地，有少少wasabi 味係幾開胃幾好食。朋友拍板叫左一個紅燒煲仔翅(足三兩)，呢個原價$388，而家只係$188，真係震撼價黎，份量十足，翅係一梳梳可以用筷子夾起，再配上少量芽菜，食落唔會膩，好抵食。再黎係元貝桃脂燉螺頭，睇個樣好似平平無奇咁，但其實飲落口係好清甜，絕對唔係味精湯，$128 位上，雖然我地叫左一碗，但份量足夠兩人飲。招牌白胡椒蟹，一上菜已經聞到好香既胡椒味，上到檯仲吸引，經理將啲醬汁倒喺側邊，由於係煎pan上，所以好似鐵板咁會炸炸聲，而且我地無諗過隻蟹會成隻手咁大，$468絕對係抵食，肉質結實彈牙，因為用胡椒煮既關係，隻蟹係好夠辣，但又食得出佢既鮮，真係好好味!! 最後一個菜係魚香茄子海參煲，好惹味，送飯一流，可惜我地已經好飽，無叫到飯，茄子煮到好入味，海參好彈牙，而且份量好多，我地都食到一口接一口。今餐我同朋友都非常滿意，無論佢地既服務、環境、食物質素都一流，絕對係五星級!! …查看更多

太和同大埔食肆多不勝數，朋友都係新界人，所以去返新界食就最方便，而且食肆選擇多，好多都卧虎藏龍，中伏機率比較細。話明串燒酒場，當然有串燒有酒啦，呢度既串燒選擇非常多，花多眼亂，我同朋友都諗左一陣先決定到，因為好多都想食，串燒因為係即叫即燒，所以order完串燒就叫杯啤酒同朋友一路傾一路等，我叫左杯Samuel Adams，我覺得好啱女仔飲，因為苦味唔太出，幾順滑，易入口，適合一啲想飲酒但又唔受得苦既人。其實都唔係等左好耐，傾到咁上下啲串燒就陸續上檯，我好鍾意佢地用木板上，因為賣相好靚，我地叫左椒鹽鮮白鱔串、招牌茄子燒、燒芝士年糕、燒羊架、鹽燒牛舌心、香蔥燒半殼扇貝、燒菠蘿、玉子燒、炸拉絲水牛芝士條同日本一口番薯仔燒。唔係講笑，真係樣樣野都好好味，尤其是鹽燒鮮白鱔串、招牌茄子燒、燒芝士年糕、燒羊架，呢幾樣係必叫，白鱔好厚肉，好juice，而塊皮就燒到脆卜卜; 原條茄子勁大條，連埋大量蒜同蔥一齊食係好惹味; 燒芝士年糕外面燒到乾身，煙煙韌韌，入面既芝士就軟綿綿，口感一流; 羊架完全唔韌，少少羊羶味，啖啖肉，唔駛點醬都好夠味。總括黎講，餐廳環境幾舒服，座位夠寬敞，坐得幾舒服，真係可以坐到個人好relax; 價錢方面又唔貴，因為食物質素都真係幾好，同朋友開心gathering或者屋企聚餐都幾好，當晚仲見到有小朋友既家庭黎食添。…查看更多

而家疫情雖然仲未完，但放假都真係想出外走走，於是出左去黃大仙搵男朋友行街，夜晚再去九龍城食泰菜，九龍城食泰菜既舖真係有好多選擇，最後男朋友帶左我去呢間金蘭花食，因為佢之前食過覺得幾好食。一坐低，男朋友已經order一客蒜蓉法國麵包，之後再叫一客乾炒貴刁同燒牛肉。蒜蓉法國麵包好好食，金黃色好香，外脆內軟，熱辣辣脆卜卜，份量仲好多而且大件; 乾炒貴刁，真係乾炒，唔會炒到油淋淋，味道亦幾好味，蔬菜都炒得好好，唔會炒到淋晒; 燒牛肉，呢度既牛肉係燒得啱啱好，唔會燒到過熟令到牛肉鞋口，佢係燒到仲有好靚既粉紅色但又唔會有血水，而且份量真係好多，好抵食，我地兩個人食三碟餸都已經食到好飽好滿足。…查看更多

一如以往，樓上Cafe都係有board game同card game玩，但自己一個人又點玩呢，好彩呢度有個書架，擺左好多本唔同地方既旅遊書，咁我就梗係拎本黎止渴啦，話晒今年應該都有排冇得去旅行㗎麻！近排天氣唔好，好鬼朝濕，搞到啲皮膚差晒，濕毒既野都避免食，於是叫左個烤雞蘑菇闊條麵，個人口味關係，我好鍾意食意粉，呢個汁整得好creamy，好順滑，而啲雞肉整得唔會好鞋口，唔錯，而且雞肉、蘑菇同闊條麵既份量都唔少，另外杯咖啡都唔錯，好順滑，個拉花都算整得唔錯。今餐食到我好飽好滿足，食完仲可以慢慢坐，慢慢睇旅遊書眼睛去旅行。…查看更多

今日放假，同朋友出省去銅鑼灣食呢間日本居酒屋，間鋪既選擇都幾多下，最後我就叫左個照燒雞扒定食，然後再叫多個鰻魚青瓜卷同朋友一齊share。定食包括茶碗蒸，飯一碗，又有湯同小菜兩個，甘啱我嗰日行完街比較餓，呢個份量係好足，好夠飽。講返正題先，照燒雞扒定食都唔錯，雖然喺日式野食黎講係比較常見既，但係呢間居酒屋都做得幾好食，醬汁濃而不咸，帶有少少照燒醬既甜味，雞扒肉嫩得黎又有少少汁，唔會整到太老，切的一口分量啱啱好比你一啖飯、一啖肉咁配搭黎食。小菜方面我就比較鍾意毛豆，外面灑有少少調味料，少少咸咸地，味道啱啱好； 另外個茶碗蒸都吾錯，滑滑嫩嫩，而且仲熱辣辣，好味。至於碟鰻魚青瓜卷，我覺得還可以，飯裡面都有鰻魚醬呢個配搭確實係幾好，卷上面既紫色菜睇落去幾得意，睇得出呢間居酒屋有用心裝飾佢哋既食物，睇落好好睇、好靚。總括黎講都幾驚喜，叫一個比較大眾化既定食，但係食到有佢哋特色既味道，下次再黎想要試試剌身或者呢度好出名既牛舌。…查看更多

放工後去左馬鞍山搵我家姐一齊食飯，家姐話有間新餐廳係食海南雞同喇沙好好味話要帶我去食，一去到，哦~Mee…lemongrass，呢間我之前喺上水食過啦! 上次係食數量有限既波士頓龍蝦喇沙，又好味又抵食，咁今次就食海南雞啦!! 馬鞍山呢間店環境唔錯，樓底高，坐得好舒服，而且食物選擇真係好多，我地睇完menu，就決定叫一個無骨海南雞喇沙、一個Mee小食拼盤同一個芒果糯米飯。無骨海南雞喇沙，喇沙係由米粉加油麵組成，份量都幾多，配料有豆卜同半隻蛋，湯底濃郁惹味，充滿陣陣椰香，入口幾順滑，一啖接一啖，至於無骨海南雞雖然係雞胸，但肉質嫩滑，啖啖肉，份量都好多，唔錯。Mee小食拼盤，包括蝦餅 x2、串燒 (雞及牛) x2、雞翼 x2、春卷 x2 同無骨鳳爪，menu寫住每售出一客，佢地就會捐$10比基督教香港信義會社會服務部，喺食既同時又可以做善事，值得加分同支持! 呢個拼盤真係唔係講笑，份量真係好夠而且好好味，我個人最鍾意係蝦餅同春卷，蝦餅整得幾好，幾彈牙; 而春卷就熱辣辣好鬆脆，真係好味！芒果糯米飯個賣相都幾吸晴，用一隻形狀好似拖鞋咁既碟裝住，"鞋頭" 係粒粒芒果，"鞋面" 有一隻碟仔裝住濃濃既椰漿，"鞋尾" 就有四件外貌好似壽司咁既芒果糯米飯，雖然芒果唔算好甜，但味道都幾清，配埋微微暖又煙韌既糯米飯真係好滿足。順帶一題，店既另一邊有台式飲品賣，而且仲做緊promotion，買一杯可以減8蚊，又或者買一送一，真係超抵。…查看更多

近排因為武肺既關係，真係好少約朋友出街食飯，無見朋友咁耐終於近近地約出黎食野，最後決定四個女仔食韓燒，諗住呢段時間應該無咩人出街食，點知都幾多人幫襯。餐廳環境好有韓國風味，而且仲有幾部電視一路播住k-pop MV 氣氛好好。坐低無幾耐就黎左條五花腩，我初初見到咁多肥肉真係好驚，但燒完之後啲油出晒嚟，食落口係唔會覺得肥膩而且仲好好食，可惜我掛住食唔記得影相。再嚟就係主角，呢個拼盤有齊唔同國家既牛包括A4黑毛和牛肩肉、A4黑毛和牛三角腩、澳洲和牛脷、澳洲和牛下腩、封門柳、鹿兒島牛柳粒、加拿大牛排骨、無骨牛肋肉、美國牛小排，埋單每人三百蚊唔駛就食到咁多牛其實都真係幾抵食，而且牛味幾濃，唔係cheap cheap牛，雪花紋都好平均所以入口好淋好正。韓式炸雞新鮮炸起熱辣辣，少辣，咬落口仲好juicy，肉質係好滑好好味。而韓式炸醬麵係我朋友叫既，佢話味道唔錯。另外我叫左個傳統石鍋飯，因為我一定要食啲飯落肚所以叫左呢個，呢個有驚喜，飯黎到時係好足料，有少少辣，飯夠熱好好味好滿足。整體黎講，呢度既牛好有水準，連生菜都好新鮮，除左牛，最欣賞係個石鍋飯同炸雞，因為真係好好味。…查看更多

今日同兩個姐妹黎到呢間食越南菜既小店食晚飯，店舖裝修得好有越南特色，而且店員好有禮貌，特別係有個後生仔好好笑容，而且價錢整體都好合理好親民。軟殼蟹紙米卷($52)，呢個好正，要重點推介！外層米紙煙煙韌韌，包住檬粉、甘筍絲、青瓜絲、生菜、九層塔，仲有大大隻熱辣辣既軟殼蟹，一啖咬落去係好豐富好好食，四件包到脹卜卜，大大件好抵食，必點!!手打炸蝦餅($78)，有六大件，新鮮炸起熱辣辣，炸到金黃香脆，而且蝦肉爽口彈牙，正!香葉肉碎生菜包($68)   一籃生菜，份量好多而且每塊都好大塊而且係好新鮮，肉碎炒到好乾身唔會油膩，幾惹味但辣味唔會好勁，正!馬拉盞炒通菜($52)，通菜唔老，份量多，幾惹味。 香葉馬拉盞炒花甲($88)，好大碟，蜆肉份量多，都幾肥，第一次食用馬拉盞炒既花甲，好特別。蝦頭膏海鮮炒飯($48)，又係好大碟，海鮮份量多，炒飯好夠味，幾好食。鮮椰青($27)，夠冰凍，好好味，唔會淡，正!!  …查看更多

三個女人一個墟，又係時候聚一聚，今次近近地去屋企附近食，咁就唔駛趕住返屋企，可以慢慢食慢慢傾啦!朋友P話一定要食炸銀絲卷、雞絲粉皮同豆沙鍋餅，朋友A話要食三鮮湯年糕同蒜蓉炒豆苗，我就梗係揀我最鍾意食既小籠包、紅油抄手同重慶酸菜魚片啦!三個女人放工後都好肚餓，炸銀絲卷一黎到我地就急不及待夾黎食，熱辣辣好好味，外面炸到金黃色脆卜卜，裡面就超鬆軟一絲絲咁，連埋煉奶一齊食真係絕配。我點既紅油抄手餡料飽滿，個汁夠麻夠辣，如果叫碗白飯都一定食晒，哈哈! 至於雞絲粉皮個花生醬偏杰，好濃厚，食得濃味既應該會鍾意食。招牌小籠包係必食，熱辣辣，皮薄多汁，內餡肉味香濃。重慶酸菜魚片入面放左好多粉絲，酸係足夠，但我覺得可以再辣少少，可能我比較食得辣，最驚喜係魚片好爽脆，而且份量都唔少，又好味又抵食! 朋友點既蒜蓉炒本地豆苗同三鮮湯年糕都唔錯，湯年糕好煙韌，湯底都好鮮甜，我最後飲左兩碗。其實我地食到呢到已經好飽，但我地最後都要叫埋豆沙鍋餅食，熱辣辣脆卜卜，豆沙餡唔會過甜，味道唔錯。總括黎講，今餐食物質素唔錯，而且坐得舒服，同朋友可以一路慢慢食慢慢傾。…查看更多

家姐見我上兩個禮拜食放題食得咁開心，於是要我陪佢食多次，但佢揀左另一間食，不過都好，因為我未食過呢間放題。我同我家姐都超鍾意食日本野，我地去到坐低第一件事當然係即刻叫刺身食啦，刺身都幾有驚喜，我個人好驚食刺身唔夠凍，但佢呢度既刺身好新鮮而且夠凍，最好食係甜蝦、三文魚同帶子，而且啲刺身都幾厚切，帶子唔算超大粒但都係完整一粒。另外呢度啲壽司同手卷都唔差，師傅整到細細件，我覺得咁樣好好，因為細細件容易食而且可以食多幾款，淨係刺身同壽司我同家姐都order左幾轉，食到好滿足。熱食我地都叫左一部份包括熱辣辣新鮮炸起既天婦羅炸蝦、厚身啖啖肉好惹味既羊架、超甜超多汁既燒菠蘿、好滑好厚肉既燒銀鱈魚，口感好嫩滑好香口既炸蟹蓋，最後仲要食埋個牛乳廣島蠔鍋。整體黎講，服務唔錯，店員做野快手而且好幸運地全晚無漏單，食物質素都唔錯，而且選擇都唔少，我同家姐都食得好飽好滿足。…查看更多

我發覺自從黃埔開咗一間主打芋頭既飲品店之後，搞到我成日都心絲絲想買黎飲，因為上次飲完佢個芋頭櫻櫻西米露真心覺得好正，啲芋頭蓉真係好滑。今次我買左芋霸布能，個名好特別，問左店員，原來入面啲料超豐富，有芋頭蓉、豆腐布甸、芋頭珍珠，再用上豆奶製成，如果本身對奶類製品係有敏感既話，呢杯用豆奶整既就啱晒。店員即叫即整，只係等左幾分鐘就拎得，仲溫馨提示一定要攪勻先好飲，值得一讚！新鮮整好當然要即刻品嚐啦，一如以往芋頭蓉整得非常之滑溜，另外仲保留少量顆粒，令每一啖既芋頭蓉除左滑溜之外仲有啲咬口，豆腐布甸又係整得好滑，我係第一次飲布甸，味道唔會太甜，好夾，芋頭珍珠唔會過硬，呢杯飲品口感好豐富，好有層次感。值得一提既係店員好熱情，好友善，而且好好笑容，比起其他連鎖店冷冰冰嘅面孔，呢度多左一份親切感。…查看更多