FionaLui10的个人专页

中國人不嬲都鐘意飲茶，要隨時可以飲杯茶，食番1盅2件，依嫁一啲都唔難。但要係有啲質素嘅就有啲難喇。之前有朋友提過佐敦就有一間高質點心專門店，今日就過黎試下。簡單嘅門面，店面積不大，有點擠迫。晚飯時間，未夠7點已坐無虛席。一坐低，我地都急不及待點咗嘢食先。晶瑩鮮蝦餃、原隻鮮蝦燒賣蝦餃皮薄得晶瑩剔透，包住大大隻鮮蝦，口感彈牙。燒賣比蝦餃更勝一籌，肉質唔散，上面加上鮮蝦，好鮮甜彈牙。蜜汁叉燒腸 皮唔算厚，餡料豐富，味道正常，無太大驚喜。松露菜苗餃本身菜苗餃味道偏清淡，加咗松露，帶出咗本身食材嘅鮮味。沙律明蝦角新鮮熱辣上台，外層炸得份外香脆，內裡則大大隻蝦。呢個無得輸！鮮蝦腐皮卷香口腐皮卷，略嫌餡料偏少。欖仁馬拉糕大小朋友必食之選！超香超鬆軟，食完要買多件返屋企俾小朋友食。呢度仲有盅頭飯、燉湯、甜品，款式好多。所有點心都係即叫即整，雖然落單後等候時間會比較長，但可以食到咁正嘅點心，絶對值得等多陣。…查看更多

山長水遠特登過海去接放工，順便補祝番父親節。近近地，揀咗位於蘇豪東嘅Como Italian Restaurant & Bar ，一間有格調嘅意大利餐廳。餐廳環境舒服寧靜，啱晒我地呢啲忙裡偷閒，想安靜拍下拖食餐飯嘅人。頭盤 - 芝士焗生蠔🦪 & 白酒汁燴蜆焗生蠔一放上枱已經聞到微微嘅海水味，食落去啖啖肉，加埋芝士喺上面，味道更出眾。燴蜆都一樣好新鮮，用白酒燴更帶出佢嘅鮮味。餐湯 - 鮮蜆湯(無為意叫咗2道蜆😅)🥣另一種味道嘅蜆，配上新鮮蕃茄煲嘅濃湯，鮮味不減，更帶點甜味。主菜1 - 龍蝦燴扁意粉🍝原隻龍蝦仔🦞，啖啖蝦肉蝦膏，配上爽滑Q彈嘅扁意粉，包肚感十足。主菜2 - 四季芝士薄餅 🍕 用咗4種不同芝士嘅脆底pizza，當中仲用咗藍芝士，令呢個pizza嘅味道大大提升，每啖都有香濃而帶有少少煙燻咸嘅芝士。主菜3 - 烤肉眼扒配忌廉磨菇汁(350g)🥩7成熟嘅肉眼扒，表面煎到香脆，切開肉質軟嫩，肉味香濃夠juicy。表面加咗少少鹽巴已經好夠味，唔需要再點磨菇汁。伴菜薯蓉好香牛油味，口感軟滑。甜品 - 自家製意大利芝士蛋糕🍰再飽都一定要食嘅傳統意大利甜品，咖啡、甜酒、芝士嘅份量剛剛好，口感細滑，層次分明豐富。呢度樣樣都好好味，Pizza 同Tiramisu 特別出色，絶對可以encore！…查看更多

食燒肉好多時都係去連所式，再唔係就食Teppanyaki。今日俾我揾到間燒肉小店，一於試下質素如何先！主打食日本和牛的’阿久根和牛立燒店‘，一入門口就望晒成間舖，得10多個位，裝修走日本小店木系風格。Menu有好多不同部位嘅牛選擇，仲寫明每個部位嘅肉質同油脂比例，等客人選擇自己喜歡嘅部位。最後，我哋叫咗”風味和牛定食，再加幾款特別想試嘅部位如三角肋肉、A5和牛肉眼。呢度嘅牛全部都用上日本A4、A5級和牛，油脂分佈多而平均，牛味濃郁，肉質嫩軟，輕輕燒至半熟已達至入口即溶的效果。絶對不比高質的Teppanyaki遜色。除咗晚飯食燒肉，呢度亦好適合同知己把酒談歡。大大小小有很多不同種類嘅日本啤酒、清酒，同佐酒小食可以選擇，仲要無時間限制！等我下次約埋啲朋友黎先。…查看更多

疫情又再緊張，晚市又再暫停，咁唯有晏就出去揾好嘢食啦！今日去開土瓜灣，就順便去隔離嘅九龍城食埋個lunch先返去。咁次黎咗呢間性價比高嘅小店食All Day Breakfast。呢度嘅All Day Breakfast 有幾款，有普通英式的、素食的、Egg Benedict 的同signature 嘅龍蝦 “超級All Day Breakfast”。如果入面個別食材唔啱口味，唔緊要，呢度仲有自選嘅All Day Breakfast, 食材任你配撘。今次揀咗自選All Day Breakfast，咗點松露炒蛋、炒雜菌、牛油果同扒蕃茄，另特定配上沙律菜、焗豆、牛油粟米。食材好新鮮，炒蛋好香滑，雜菌同粟米都唔太油，牛油果熟度剛剛好，好creamy。雖然只係選4款食物，但配埋指定3樣配菜，女士們一定夠飽！另外，仲點咗份雙層芝士安格斯牛肉漢堡配薯條。賣相普通但味道十足，牛肉超juicy, 牛味香濃。仲配熱忌廉湯、沙律同咖啡。呢區咁多好嘢食，要留得住客人又吸引到新客，真的不易。不過The Yell - Owl 嘅食物選擇好多，相信好多人都要黎多幾次先可以試晒佢嘅熱賣items。…查看更多

終於開喇！青衣終於有間高質素嘅台式飲品喇！太開心了！以後突然想飲嘢，唔駛再去咁遠了 。返屋企途中，見到臻•茶終於開咗，當然要試下啦！今日試咗多多•油油果同芝士•桃桃。多多•油油果係由益力多同新鮮牛油果調配出黎。因益力多偏甜，我選咗少甜，出黎味道覺得剛好，唔太甜。冰打得好碎，加上creamy嘅牛油果，入口好順滑，微微嘅牛油果味，感覺清新，唔似飲沙冰。芝士•桃桃係香桃沙冰配上柔滑香濃嘅芝士奶蓋。用咗鮮香桃做沙冰，有少少桃肉碎，增加咗口感，而冰同樣打得好碎。少甜加上桃嘅甜味，再配上微咸嘅岩鹽芝士奶蓋，味道䢔度好處。…查看更多

早2日朋友介紹呢間好好味嘅飯團店，雖然地點離公司有點距離，但真係好想試下，今日就特別過黎買午餐。小店位於尖東，科學館後面條街，店舖裝修清新簡約，類似日本櫻花主題，只有3、4個坐位，可以邊等邊打個卡先。呢度主打媽媽在家自製飯團的味道，飯全是用上健康嘅紫米糙米飯，更覺健康。我哋叫咗兩個飯團share，一個係signature嘅芝士鰻魚飯團，另一個係芝麻八爪魚飯團。飯團份量好大（等於出面嘅日式飯團兩個嘅份量），材料好多，除主材料，仲有青瓜、肉鬆同海苔脆鬆，好有口感，再配上沙律醬汁，一絶！另外，叫咗自家手作飲品-紫薯玫瑰露同燒仙草奶茶。前者幾特別，淡淡的紫薯味及玫瑰花香，唔太甜，好健康嘅特飲。後者茶味唔算濃，燒仙草係仙草凍，有微微好似炭燒味的。飲品全部本身已少甜，自己可再選半/微/走甜。…查看更多

由細到大都好鍾意食沙嗲牛肉麵，依嫁坊間有好多沙嗲煲仔牛肉麵，但一路都未有機會去試。今日特登嚟呢度試吓佢好出名嘅特濃沙嗲煲仔麵，睇吓同平時嘅茶記沙嗲牛肉麵有啲咩唔同先！一入座感覺只係普通嘅街坊茶餐廳，座位只有二十多個較逼夾，但係呢度嘅服務好好，見我哋坐得迫，（有人走）主動問我哋需唔需要換卡位。呢樣嘢絕對值得加分。我地叫咗兩個”真.沙嗲煲仔麵”，一個係沙嗲牛肉，另一個係沙嗲米粉配雞扒。以煲仔上嘅沙嗲麵一放低就見到㷫烚烚，剛滾起拎出黎咁樣，香濃嘅沙嗲醬撲鼻沙嗲牛肉麵麵質偏稔，麵條好入味，入口沙嗲味十分香濃。牛肉係用新鮮牛肉整嘅，份量多且肉稔，好滑，完全冇筋或者咬不開嘅感覺。味道一流，絕對值得一試。米粉相對更容易吸晒沙嗲汁，味道好香濃，啖啖都係沙嗲味，每條米粉都好似掛住粒粒花生及沙嗲醬汁。亦都因為米粉比較朔水，所以沙嗲湯會偏少。而雞扒就正常貨色，會建議選擇牛肉。果然同一般茶記嘅沙嗲牛好唔同，分量多啲、夠濃味、牛肉多1倍。沙嗲牛愛好者一定會再黎食。…查看更多

疫情再次嚴峻，政府剛宣佈過2日無晚市，即刻忙到癲，電話不斷的改/取消booking。忙咗成日，當然要慰勞下自己啦，所以第二日放假一於去食好西😋太耐無食日本燒肉喇，所以今次揀咗黎”八歌仙”食燒肉放題。呢度有3種價錢套餐選擇，我地就揀咗日本和牛燒肉套餐。除咗燒肉，同時間仲可以食埋火鍋添。我地就揀咗鏗魚昆布湯同麻辣豬骨湯湯底。呢度嘅日本和牛都幾真材實料，賣相不錯，雪花分佈平均濃密。午市有4款不同位置嘅A5和牛提供，厚度適中，入口即溶，牛味突出，油脂香而不膩，絕對能媲美日本地道的燒肉店。火鍋嘅和牛片都相當出色，薄薄一片，但牛味十足。同樣有多個部位可供選擇。另外，我地都叫咗啲澳洲和牛試下，兩者相比，澳和牛肉味同樣香濃但較有口感。套餐仲包咗1客刺身併盤，有三文魚及魚腩、北寄貝、帶子、八爪魚同墨魚。刺身十分新鮮，無雪藏味，有驚喜。另外，仲有不同嘅燒肉同火鍋配料、熟食如天婦羅、炸物、一品料理、壽司卷物等俾你任叫。每樣叫少少已經好飽，整體每樣食物都不錯。無得去食地道日本燒肉，依嫁喺香港都可以黎呢度頂住癮先。🤣…查看更多

朱古力係一樣大人小朋友都好鍾意嘅食物。而朱古力嘅名牌Godiva，更係一眾女仕們嘅至愛。依嫁Hotel Icon 嘅The Green就推出咗以Godiva朱古力做主題嘅 甜蜜獻禮下午茶。限時2小時嘅下午茶有鹹點同Godiva特色朱古力甜點，以黑膠唱盤造型登場，好特別好靚好型😍鹹點分別有傳統英式鬆餅（配奶油忌廉及士多啤梨果醬)、煙三文魚伴三文魚子、impossible他他、朱古力脆皮鴨肝慕絲伴黑魚子、甜煆血色瑪利同辣肉腸橄欖串。甜點分別有酒漬櫻桃黑朱古力、伯爵茶黑朱古力慕絲、檸檬馬鞭草覆盆子馬卡龍、Godiva朱古力同自家製榛果朱古力朱古力配鴨肝黑魚子，配撘特別，但未必每個人都接受到。馬卡龍有少少過甜；酒漬櫻桃黑朱古力入面真係有一粒小櫻桃，酒味淡薄。另外，仲可以任食Godiva黑/白朱古力軟雪糕、士多啤梨朱古力同mini吞拿魚/火雞三文治。Godiva朱古力真係名不虛傳，不同款式嘅朱古力都充滿香濃嘅朱古力味，不只是甜，還有微微的苦澀味。如果係Godiva朱古力愛好者，值得去試下喔！…查看更多

天氣涼涼地，最啱打邊爐！今晚同同事去咗公司附近嘅”養心殿”打下邊邊😜我地一行6人，被安排坐較入嘅位置，長身6人枱，用中國風嘅木分隔開，仿如自己包箱般，私隱度幾高。不過，整體感覺有些迫，每張枱相隔位置不多。我地點咗鴛鴦鍋（麻辣同養生），手切肥牛、雪花肥牛、響鈴、手工丸併盤、蝦丸、准山麵、嘉美雞、有機玉米、生菜同-A菜。另外，仲點咗幾樣熟食，有墨魚餅、酸菜魚同炸雞軟骨。大部分食物都正常水準，反而酸菜魚同炸雞軟骨有少少驚喜！酸菜魚魚塊夠多，好滑，唔腥，好入味，下面仲有好多寬粉。而炸雞軟骨好香脆，做餐前小食最好不過。記得以前醬料比較多選擇，但依嫁只有基本的豉油、生熟蒜、蔥、辣椒、花生、芝麻，連一般打邊爐必有嘅花生醬、沙茶醬之類嘅醬料全部都冇。呢方面可能要改善下！…查看更多

難得入到西貢，當然要試吓名不虛傳嘅咖啡店” Little Cove Expresso”啦!行晒成個西貢，呢間係其中一間裝修同環境都比較舒服嘅餐廳。平時呢間大排長龍，今日weekend我哋下晝三點幾先過嚟，好彩只係等咗大概10分鐘就有位喇！排隊期間已經聞到好香，一坐低，我哋就急不及待去order佢幾款signature items。Green Brunch - 啱晒素食人仕，酸種麵包多士上面配有大量西蘭花苗同8成熟嘅水波蛋，伴有牛油果同南瓜蓉。切開水波蛋只有少量蛋黃流出，菜苗好爽嫩，牛油果蓉上面有少少nuts, 配撘好match。多士外脆但中間好軟熟，吸收左菜苗嘅油同蛋黃漿，好好味。Pull Pork Benedict - 酸種麵包多士上面有大量用中東香料調味過嘅豬仔肉，再加上hollandaise sauce 同蛋汁，你超惹味。Topping有少少青蘋果絲，中和番整體味道，好有層次。Beef Ragu Paradelle - 香濃牛肩肉闊條麵，牛肉好juicy, 闊條麵好彈牙，配上新鮮蕃茄做醬汁，好味到連小朋友都食唔停口！French Toast - 必點美食！賣相好靚好吸引！麵包外脆內軟，加上蜜糖漿同開心果碎，好香肉桂味，微甜，口感豐富。配咖啡一流！至於飲品，我地叫咗Flat White, Matcha Latte 同 Chocolate。咖啡比較特別，咖啡味偏酸而淡，一般咖啡店比較少有。環境chill, 食物賣相同味道都不俗，打卡一流，難怪咁受歡迎。…查看更多

難得有時間同好朋友聚下，當然要揾間坐得舒服，嘢食又好味嘅餐廳啦！今次選擇黎The Mussels, 環境好cozy，感覺像去了法國的海邊cafe，可以好寫意地享受美食，同朋友暢談一番。呢度主打食青口同各種特色歐陸菜，我地就叫咗French Blue Mussels in traditional style, Mussels Linguine, Scallop & Tuna Tartare and Flank Steak.Scallop & Tuna Tartare - 好開胃嘅appetizer！以Tuna做主角，伴有帆立貝粒、青瓜、牛油果同蟹籽，配上開胃嘅醬汁，好清新。French Blue Mussels - classic嘅白酒青口，好新鮮，青口嘅鮮甜味突出。另配有粗薯條，鮮炸香脆，令人食唔停口。Mussels Linguine - 新鮮蕃茄青口意粉，入口感覺好fresh, 微酸嘅蕃茄醬汁配上青口嘅鮮味，別有一番味道。Flank Steak - 選用US Prime 牛腹部分，肉味香濃，肉質軟腍，配上獨有的醬汁，味道特別。整體不論環境、食物都好好，係一個好適合同朋友、知己相聚嘅地方。…查看更多

因為好想知道此店有幾滋補，好少出旺角嘅我今晚就黎試下呢度出名嘅滋補鍋。不要被地點外圍嚇親，入到店係舒適的簡約中國風，寬敞光明嘅環境，尚算舒服。地方不算十分大，但都有2個包間，注重私隱嘅朋友可以唔駛擔心。一坐低當然要先揀選呢度最出名嘅湯底。我們就揀選了鴛鴦鍋（尚膳養顏美人鍋+滋潤魚雲烏雞鍋）。之後，再點了份細的手切肥牛、響鈴、四色餃子併盤、四色手工丸拼盤、蛋餃、蔬菜併盤。一開始已經兩款湯底都各飲一碗，試清楚味道。😋呢度嘅湯底十分出色，尚膳養顏美人鍋入面有好足料嘅藥材加上有大量嘅桃膠，十分適合女士享用。另外的滋潤魚雲烏雞鍋都好足料，有半隻雞再加四至五舊龍躉魚，湯底好香濃嘅魚味，十分滋補，大人細路都好啱飲。呢度嘅食材都好高質，首先手切肥牛非常優質，入口軟熟，好香牛肉味，性價比高。其次係佢哋嘅自家製餃子同手工丸，十分出色。自家製餃子分別有鮮蝦菜肉餃、豬肉韭菜餃、鳳城雲吞、水餃。而四式丸分別有黑松露蝦丸、黃金墨魚丸、芝心牛肉丸、梅菜豬肉丸。款款都好好味，叫併盤就可以一次試足幾個味。響鈴都係自家製作，新鮮炸起，特別香脆。最後蛋餃同蔬菜拼盤就正常水準。整體而言，食物質素十分高。絶對可以encore!! 下次要約多幾個朋友一齊黎，叫多幾款不同食物試下！…查看更多

今日突然好想食台式火鍋，因為即慶關係，好多地方都已經full booking, 最後選擇walk in 凑凑火鍋。已經係第三次黎，個人好喜歡它古色古香嘅環境設計，好有特色。餐廳空間十分寬敞，不會覺得逼迫。唯獨燈光稍為過於昏暗。今次叫咗2人餐，可選2款湯底，其中一款當然要選麻辣鍋啦(咁先夠台味🤣)。套餐包括肥牛、豚肉或烏雞卷、企鵝丸或芝士魚丸、皇帝菜或蒿萵、油炸鬼條或寬麵條。另送，小杯沙冰同梅子果凍啫喱。一分錢 一分貨，總括食物質素不錯，keep到水準，食物新鮮，湯底香濃好味！但套餐份量不算多，我們另點了響鈴、牛肩胛肉、特價$1鮮菌海鮮滑。整體用餐經驗不錯，其中一間勝價比算高的火鍋店，質素有保證。一定會再次光顧！…查看更多

花果飄零係一間穩世嘅茶品店，主打以不同茶葉立即沖泡，再加入不同味道混合成一杯健康嘅茶飲。小小茶店，配置了幾部泡茶、蒸煮茶葉的器具，看似很專業。選擇也挺多，有signature嘅花果茶，其他果茶有蘋果、柑桔、柚子。仲有不同嘅花茶如菊花、玫瑰花、茉莉花等。當然亦有大家喜愛嘅奶蓋茶同珍珠奶茶。今次我就買咗芝士泡沫系列嘅菊花龍井茶同冷泡茶。芝士菊花龍井茶，茶味香濃突出，走甜都唔會有任何苦澀味，加上清新嘅菊花同濃厚嘅芝士泡沫，整體層次分明，好夾。呢款冷泡茶係用羅漢果、雪梨干、無花果等煲出黎，無加人工糖，味道清甜，有啲似涼茶，係養生嘅選擇。…查看更多