chauwk111's Profile

今日約左朋友黎到佢推介嘅一間台式餐廳“吃什麼”食飯，因為大家都遲到嘅關係，黎到門口已經係下午茶時間，但入面依然坐得幾滿，等左大約5分鐘先入座，睇黎呢間食店真係幾受歡迎。店內嘅環境比較擠逼，我地三個人分到一張小方枱，好在櫈底配有小筲箕畀我地擺背囊。同一般台式食店一樣，用點心紙點野食，所有食物飲品都係單點，冇套餐。野食黎到一半，影張大合照先:)。1. 滷味拼盤拼盤有滷水蛋、海帶同豆腐，個人對呢種涼伴麻麻，味道普通，同埋唔抵食。2. 黑椒蒜味毛豆我本身對毛豆普普通通，但呢道畀到一d驚喜我，通常食毛豆都係食粒豆，而呢道嘅黑椒同蒜味好入味，令我會啜多幾啖豆皮。3. 小雞肉飯（小碗）食左幾啖先記得補相，雞肉嫩、唔鞋口，配埋酸菜一齊食，唔會覺得淡茂茂，份量適中，唔會太少，適合胃小嘅人食。4. 外省牛肉麵（牛肋）同朋友些牙嘅主食之一，好好食嘅牛肉麵，配蕃茄湯，麵條好彈牙、好有咬口；牛肋大大舊，炆得又夠淋，索有湯汁，配搭起黎好好味；除左食麵同牛肋，我地仲飲埋d茄湯，真正嘅全碗清。5. 外省牛肉麵（半筯半肉）第二個牛肉麵，配原味牛腩湯，用料都係咁大舊，牛腩都係炆得好淋，索晒d湯汁，好入味；牛筯有咬口得黎唔會太靭。6. 櫻花蝦高麗菜櫻花蝦乾放落高麗菜一齊炒，高麗菜炒得好爽，冇乜特別。7. 木魚花蛋餅超好食嘅蛋餅，蛋餅上審上燒汁、沙律醬同木魚花，加上蛋餅餡料有青瓜、蟹柳等，口感同味道好豐富。8. 九層塔菜脯蛋最後一道九層塔菜脯蛋，九層塔嘅味道好突出，加上菜脯蛋煎得有鑊氣，唔會令人覺得淡茂茂，十分推介。埋單每人180蚊免加一，除左環境有d逼之外，整體上都冇乜野彈，雖然唔係話道道菜都好出色，但味道質素冇令人失望，有d菜係幾抵食，有d就貴左少少，我覺得都幾啱香港人口味，所以都推介大家黎食。…Read More

同大食朋友健完身，就黎到呢間位於銅鑼灣嘅Dodam Chicken食下午茶。呢間餐廳開喺18樓，窗邊景觀唔錯，但因為我地黎到嘅時候，窗邊位已經坐滿同被人卜左，所以冇得坐。呢度嘅菜單設計幾好，主打菜式都有圖示。1. 韓式炒牛肉粗粉絲第一樣點左個粉麵，粉絲炒得煙靭爽口，有少少甜味；牛肉薄切，口感有d似肥牛，份量適中，可能因為大家都肚餓，所以上枱唔夠3分鐘就已經清晒。2. 韓式海鮮煎餅煎餅香噴噴，餡料好豐富，有蝦、菜甫、蚵仔，配埋個酸酸辣辣嘅醬汁，食落好似台灣蚵仔煎，不過呢碟唔會太鹹，好食好多。3. 雙重芝士麵包辣烤雞呢道芝士烤雞可以話係今日嘅主角，滿滿嘅芝士鋪滿成碟烤雞；中間嘅麵包仲裝有熱辣辣嘅芝士醬；烤雞底下仲有又甜又辣嘅醬汁，拮起一件已經黏滿芝士同甜辣醬嘅烤雞，再浸入麵包芝士醬，咬啖又嫩又滑嘅烤雞肉，芝士同辣醬搞埋一齊，口感豐富又滿足！埋單每人180蚊含加一，雖然貴左少少，但食物質素同個環境絕對值呢個價錢，不論係咪對韓式食品情有獨鍾，都非常推介大家黎食！…Read More

啱啱入冬，同同事黎到大快活食晏，見到推出煲仔飯系列，二話不說決定食個暖笠笠嘅煲仔飯。可能係喺午飯時間差唔多結束，廚房準備緊下午茶餐點嘅關係，大約等左15分鐘先齊餐上枱，執餐姐姐亦都好好人，見我等左咁耐，送左杯可樂畀我飲，即刻甜晒。1. 芝士泡椒雞煲飯打開個煲蓋，熱辣辣嘅水蒸氣撲上臉。淋埋鼓油，賣相真係令人食指大動。芝士拉絲，視覺效果十足；雞肉蒸得算嫩滑，比預期好食；泡椒唔係好辣，好似我呢d唔係太食辣嘅人都食到。食到尾終於食到煲仔飯嘅壓軸 — 飯焦，刮一刮薄薄嘅一底飯焦，煙煙韌韌有鑊氣，好滿足嘅收尾！2. 可樂快樂肥仔水唔係浪得虛名，配埋煲仔飯一齊食，更加係上加！正價49蚊，用左消費券優惠-5蚊，平民飯堂發揮穩定，推介大家過黎試試佢個煲仔飯系列！…Read More

今晚約左朋友放工健身，當然係要食飽飽先上路，就黎到附近嘅時代冰室（大渣狗 對面）食個又抵又好味嘅晚飯。1. 蔥油無骨雞叉燒伴三眼煎蛋飯朋友點嘅切雞叉燒煎蛋飯，燒味份量比一般燒味店多少少，蜜汁叉燒、雞肉嫩滑；三為一體嘅半生熟煎蛋都好有特色，鯨吞三份蛋黃汁好滿足；白飯亦都好大份，能量滿滿嘅燒味飯！2. 板煎雞扒伴3.6牛乳滑蛋蓋飯我點嘅雞扒滑蛋飯，一個好有日式味道嘅蛋蓋飯，大塊拉麵紫菜冚喺面，雞肉上面淋有紫菜碎、沙律醬同燒肉醬，好似日式章魚燒咁，口感豐富，雞扒亦都煎得啱啱好，肉嫩有肉汁；滑蛋份量好多，可以將個飯完全覆蓋，一啖飯一啖蛋，好滿足！埋單每人60蚊免加一，而家午市閒閒地都50蚊起，呢間晚市60蚊包埋餐飲，食飽飽得黎味道又唔差，真係打工仔良心飯堂！…Read More

同朋友健身到一半遇上火警，急急腳走人，見咁啱到左午飯時段，就到朋友推介嘅哈豆台食食晏。觀塘有兩間哈豆，我地今次去果間喺成業工業大廈。聽朋友講，呢間哈豆裝修比較靚，但食物選擇較少。可以見到菜單嘅設計好有心機，有齊食物嘅圖示。1. 五寶什錦醬乾拌麵朋友極力推介、回味無窮嘅乾拌麵。五寶包括牛丸、墨魚丸、魚腐片、肉腸同雞脾肉，另外仲有滷肉碎、滷水蛋、唐菜同豆芽，配埋什錦醬，就好似新年食嘅撈起咁，用料非常多，口感豐富。2. 牛肉拼雞翅滷肉飯我點嘅滷肉飯，個人覺得普普通通，冇乜特別。3. 仙草奶凍跟餐嘅仙草奶凍，牛奶好滑，仙草又夠甜，超高質！埋單每人約85蚊免加一，份量同一般台食一樣，都係偏少，味道不過不失，所以我筧得唔算抵食。…Read More

同朋友人健身後嘅補充能量餐，黎到附近嘅六両三食晏。三人行，每人點左一個主食，另外再點左4個小食大家些牙。1. 蒲燒鯛魚便當我點嘅主食“蒲燒鯛魚便當”，配菜有滷肉蛋、酸蘿白、肉腸片、白菜、小唐菜、豆芽，好豐富。鯛魚煮得夠淋，但唔易散，配埋蒲燒汁一齊食，甜得黎唔覺膩，非常正！其他配菜都唔錯，清清淡淡，平衡返個蒲燒鯛魚嘅甜味，成個飯比預期好食好多。2. 黃金地瓜條(左)  +  紅燒牛腱(右)黃金地瓜炸得好香脆，糝上胡椒粉，加上本身已經有好香嘅蕃薯甜，又甜又惹味，可以話係加強版嘅shakeshake薯條；紅燒牛腱就比預期普通，冇落其他配料，比較淡味，油膩感適中，因為比一般小食貴上一截，所以唔太推介。3. 鹹酥雞鹹酥雞正正發揮，多一種鹹蛋黃味，幾特別，如果係鹹酥雞愛好者，推介一試。4. 切豆干因為有個朋友鍾意食豆乾類台食，所以點左個切豆干，我個人就一般般。埋單每人120蚊免加一，整體食物有水準，大部分小食都係25-40蚊，算抵食，非常推介“蒲燒鯛魚便當”同“黃金地瓜條”。…Read More

今日難得黎大埔揾一個耐冇見嘅朋友，黎到 藍屋 食午飯敍舊。午市餐牌有8個餐，4個意粉、4個飯。1. 餐前沙律細細碗嘅餐前沙律，有粟米粒、椰菜絲、胡蘿白絲配芝麻醬，中規中矩，冇特別。2. 日式柚子忌廉烤雞滑蛋飯我點嘅忌廉烤雞滑蛋飯，個忌廉汁好好味，有d柚子粒，成個汁又滑又甜；烤雞個外皮有少少焦，烤得好有火候，雞肉肉嫩有肉汁；滑蛋炒得滑，配埋白飯同忌廉汁，真係會滑落喉嚨。3. 焗芝士自家肉醬炸雞意粉朋友點嘅芝士肉醬炸雞意粉，上枱嘅時候塊鐵板仲有d滋滋聲。芝士肉醬好開胃，鹹味適中，配埋個乾乾地嘅炒意粉，乾濕互補，好夾；炸雞薄薄地一層米糠粉，炸得香脆，鎖住雞肉汁，雞肉又滑又嫩；炒意粉嘅口感有別平時嘅煮意粉，有咬口、唔會好淋，算係另一種風味。4. 玄米綠茶跟餐嘅玄米綠茶，玄米味比較重，涼涼地，飲落口幾清涼，消暑唔錯。埋單每人60蚊左右，個人覺得Cafe差唔多都係呢個價錢起，食物有質素有水準，幾推介大家去食。…Read More

下晝約左朋友一齊健身，去之前食個靚靚午餐，今次就黎到朋友推介嘅GAC Home。店內擺滿好多唔同嘅手辦同模型，中間仲特登擺左個玻璃櫃展示至愛。餐牌簡單易睇，只有食物同飲品各一張。1. 慢煮加拿大無激素法式豬鞍配日本珍珠米朋友點嘅法式豬鞍珍珠飯，擺盤好整齊，好似分好左四個格仔咁。主菜豬鞍大大塊，煮得啱啱好，實肉肉嫩有肉汁；唐生菜配沙律醬，爽口酸甜好開胃；珍珠飯粒粒分明有咬口；焗蕃茄令我印象最深刻，又甜又多汁，超好食。2. 香煎菲力鯛魚排配日本珍珠米我點嘅煎魚排珍珠飯，主菜魚排煎得好香，魚肉唔會好鬆散，配蕃茄芝士汁，多一層咸芝士味，幾唔錯。除左主菜，其他配菜同以上一樣，所以唔多講，提多次大家，焗蕃茄真係好好好好食。埋單每人110蚊左右免加一，個人覺得呢個價錢做到呢個質素係十分出色。因為係all day menu嘅關係，如果想約朋友食個簡單又好食嘅晚餐，呢間絕對係一個好好嘅選擇。…Read More

今日約左個好耐冇見嘅朋友一齊食下午茶，由黃大仙站出發，行大約15分鍾，黎到大受好評嘅窩子。店內嘅裝修比較簡約，懷舊歐陸風格，色調輕營。餐單都係以輕食為主，有意粉、意飯同窩夫。我同朋友各嗌左一個窩夫，等左大約10分鐘上齊枱。1. 蛋沙律窩夫三文治我喺all day menu點嘅窩夫三文治，非常大份，我諗個份量可以畀女仔做正餐。蛋沙律落左好多蛋黃醬，蛋白切粉，滑得黎好有口感；窩夫就有4大舊，好鬆軟，食完有d濟。整體味道比較淡口，不過都好正常，唔太適合係鐘意食甜嘅朋友。2. 輕型窩夫(焦糖香蕉)朋友喺下午茶點嘅輕型窩夫，有三款口味，朋友揀左焦糖香蕉。呢款下午茶窩夫份量恰到好處，有原條焦糖香蕉、Oreo磨、兩塊窩夫上有一個朱古力雪糕球。焦糖香蕉甜度適中，唔會好溜；窩夫鬆軟；雪糕冰冰涼涼，為温熱嘅窩夫添上多一層口感；Oreo磨碎後口感亦都好新奇，都有豐富口感嘅效果。3. 橙汁跟下午茶餐嘅餐飲，感覺係鮮榨橙汁，唔會好似預製品咁好甜好多糖，反而覺得好清甜，十分可取。埋單每人80蚊含加一，個人覺得價錢有點兒貴，不過食物質素有保證，幾好食，有閒錢可以返食！…Read More

今日跟朋友推介，黎呢間“湯直送”食晏，順便補補湯水。餐枱好乾淨，有紙巾同消毒液畀大家用。午市餐牌有成18款燉湯選擇，每款58-68蚊，然後加10-33蚊可以加配一款飯﹐飯頪都有成12款選擇。等左10分鐘，4盅湯上齊，影個大合照先。1. 南北杏蜜棗菜乾燉豬肺個湯好清甜，用料充足，豬肺爽口。2. 涼瓜黃豆燉唐排飲落有淡淡嘅涼瓜苦，除此都比較水，有好多排骨。3. 棷皇燉去皮雞貴少少果然係比較好味，個湯比較濃，有椰子味得黎再帶少少花膠味；雞肉就少左d，不過都鬆散易入口。4. 冬瓜薏米瑤柱燉唐排個湯又係好清甜，好排骨，肉夠鬆軟，冬瓜多水。5. 迷你咖哩牛腩飯迷你飯個碟比一個手掌大少少，咖喱味香，唔算辣，薯仔同牛腩都炆得好淋。6. 迷你黑椒雞扒飯黑椒汁味道濃，雞扒煎得啱啱好，好嫩滑，食到舔舔脷。埋單每人68-78蚊，講真唔太抵食，但間唔中幫襯下、飲下湯係一個幾好嘅選擇。…Read More

行完山，黎到屯門揾野食，由一位地膽朋友極度推介，帶我地到呢間《屯門小曼谷》食泰國菜。店內嘅裝修比較簡樸，簡樸到令我一度懷疑係咪中左伏餐單都比較簡單，只有文字，冇任何食物圖示。點野食就完全交由我朋友拍板。1. 泰式燒豬頸肉豬頸肉燒得好靚，外熟內嫩，有少少似中式叉燒果種感覺，實肉得黎唔鞋口，配埋個燒肉甜醬，食到舔舔脷！2. 沙嗲串燒一份串燒有6串，有選擇雞肉同豬肉，今次我地就揀左雞豬各3串。串燒新鮮出爐，上到枱温温熱熱，配搭沙嗲醬一齊食，今次係我少有地覺得豬肉好食過雞肉，雞肉比較鬆散，口感似雞胸部位；而豬肉就實肉得黎些少彈牙，好有咬口。3. 椰汁青咖喱(牛肉)食泰國野當然唔少得食泰式咖喱，今次揀左我最鐘意食嘅青咖喱。味道方面充足滿滿嘅椰汁味，用料亦都好充足，好多牛肉。正常發揮，5道菜入面算係比較冇驚喜嘅一道。4. 泰式炸蝦餅十分推介嘅炸蝦餅！上枱熱辣辣，薄薄嘅米糠炸粉包住大大舊嘅蝦肉，食落好軟熟鬆脆，配埋甜辣醬簡直係絕配。5. 泰式炒粉絲炒粉絲亦係好出色，有粉絲、大葱、炒蛋絲、午餐肉條，大葱爽口；午餐肉條有鑊氣(即係有些少焦焦地嘅味)；炒蛋絲同粉絲都有陣甜甜地嘅味，粉絲仲炒得好彈牙，整道菜唔單止口感好豐富，仲唔覺得油膩，非常推介！埋單每人75蚊左右，好食又抵食，非常推介大家黎到屯門一定要過黎試試，不過要注意嘅係屯門都有其他以《小曼谷》命名嘅泰式餐廳，記得睇啱地址啊！…Read More

同朋友做完運動，黎到銅鑼灣嘅龍城冰室醫肚。下晝4點幾，當然係揾揾下午茶餐牌有咩食啦。下午茶有成36款選擇，有多士、三文治、粉麵、港式茶餐，望左一輪決定嗌個平平地嘅自選雙拼粉麵。1. 沙嗲牛肉拼炒滑蛋配米粉睇賣相，比我預期中要頹好多，純粹係一個米粉底，再pak個炒滑蛋同沙嗲牛喺面，冇其他配菜。感受到香港嘅物價有幾高，下午茶畀39蚊食個頹到爆嘅麵。食落口就係咁，唔抱咩期望，正正常常，蛋有蛋味、沙嗲牛有牛味，同埋沙嗲牛真係份量少左d。2. 熱咖啡熱咖啡比較難飲，好苦澀，已經唔係多唔多奶、重唔重咖啡味嘅問題，而係成個味道都唔太啱，真心唔推介大家黎呢間茶記飲咖啡。埋單每人48蚊，對我黎講，已經唔係抵唔抵食嘅問題，用料頹到根本唔值餐牌上嘅價錢，所以唔推介大家黎食。…Read More

今日約左朋友黎到北角食晏，順應朋友推介，黎到呢間地下「食店」MOM Livehouse。聽朋友講，呢間Livehouse下晝經營午市，晚上會化身live music house，邀請樂隊表演。呢度行自助式風格，睇餐牌同點食物要到櫃枱果度做，然後自己攞餐同餐具。1. 咖喱薯仔牛肋條飯大大碗飯，大大兜咖喱，非常足料。咖喱少辣，有椰子味，配白飯一齊食非常夾；薯仔同牛肋條都炆得好冧，牛肋條更加係好嫩口。2. 熱咖啡熱咖啡就水左d，好淡咖啡味，唔太推介。3. 超巨雞脾糖心蛋肉燥飯朋友極推介！真係成塊面咁大舊雞脾，而且煮得好嫩，d肉唔太鬆，食落啱啱好又有肉汁；糖心蛋又係好出色，見左朋友啜晒個蛋黃汁，搞到我心思思想食埋一份；不過個肉燥飯就差少少，比較乾同瘦。4. 南瓜湯朋友揀左飲餐湯，今日餐湯係南瓜湯。個湯色水幾靚，飲落比較淡，不過都算有南手瓜味，不過不失。埋單每人54蚊，就晏晝食飯黎講，CP值算高，環境又幾特色，行過路過不坊過黎食餐飯。…Read More

瓏門雖然而家剩返一間尖沙咀店，但都算係一間幾唔錯嘅早午餐食店。之前同附近工作嘅朋友約食午飯，黎左呢間位於金馬倫道嘅瓏門冰室。睇睇餐牌，好多選擇，望落有平有貴咁，但其實佢嘅食物都係比正常茶記貴。因為午市都多人幫襯，人手又比較少，睇得出餐枱唔係話好乾淨，但值得一讚嘅係有齊消毒液同餐紙畀客人自己清潔對手同枱。1. 瓏門極上牛肉飯上枱第一個反應係覺得份量比預期少，明明唔係焗飯，但用個焗飯兜裝，而個焗飯兜又比普通茶記細一個碼。不過，食落口係好味嘅。牛肉嘅比例比白飯多，食落就好似食緊日式牛丼咁，d牛煮得啱啱好，唔爛，有燒汁味。2. 茶走呢杯茶走做得好出色，煉奶同紅茶嘅比例好好，唔會太甜太溜，亦都好滑好香！埋單每人58蚊，個人覺得呢個份量同個價錢唔太成正比，有少少偏貴左，但又唔覺得食材比較好，如果價錢平返少少，將會係一間好好嘅港式餐廳。…Read More

話說之前譚仔推出期間限定嘅芫茜米線，就同同事食晏試試佢。1. 香茜皮蛋脆肉鯇魚湯米線（+芫茜山）身為芫茜愛好者嘅我特登加多3蚊要座芫茜山，加埋落碗麵，d芫茜多到見唔到其他食材。食呢碗麵一定要食左芫茜先，芫茜浸耐左會縮同冇咁爽口。另外，皮蛋同脆魚鯇都多份量，冇偷工減料，皮蛋好出色，咸度適中，食完唔會覺得有痰卡喺喉嚨；脆魚鯇煮得啱啱好，爽口實肉，有水準。2. 土匪雞翼同同事一齊些牙左份土匪雞翼，一如以往，辣得黎有些少胡椒味，炸得啱啱好，惹味香口。埋單每人55蚊，眾所周知，譚仔親民抵食，呢次香茜米線有出色發揮，芫茜愛好者必試之選！…Read More