哭泣的森林的個人專頁

原汁牛筋麵  $55  落單後不足3分鐘，牛筋麵已經以迅雷不及掩耳既速度上枱，咁短時間連杯麵都未淥好，小王就已經煮好一碗牛筋麵，令人佩服食店既效率，仲快過快餐店，又或者係因為前期準備工夫做得足？牛筋麵既賣相非常普通，店員用匙羹盛著帶辣的酸菜擱在碗邊。碗中大約有5塊大小不一的牛筋，食落也是軟硬不一，有啲牛筋腍到入口即溶，有啲好似橡筋咁有嚼勁，味道清淡無乜牛味。麵底方面可選粗麵或幼麵，圖中為幼麵，3分鐘上得枱既麵條食落竟然偏軟，令人遐想。值得一讚既係，呢碗來自高雄既湯底味道與港式茶記或粉麵店食到既腩汁湯底截然不同，入口有一陣香濃的藥材味道，其中以八角和當歸最為突出，以中藥湯底配合牛筋麵，充滿寶島風味。 台式炸醬麵  $45  炸醬麵以一隻的骰既小碗裝住，粗身既麵條帶點厚度，食落煙韌似刀削麵。炸醬(正常)偏甜，欠缺了濃郁既鹹香，食客要用少少既炸醬送一兜白灼麵，需要良好既分配能力，否則後半部份只能品嚐麵條既麥香。作伴既青瓜絲食落清新爽口，為單調的醬+麵帶來色彩，亦令炸醬更清淡。  :)滷豬大腸  $40  一共有9段豬大腸，如圖所見，脂肪釀滿了大腸，食落只有咸味而無滷水味，即使點汁亦難以遮蓋自身既「原味」。因為上枱時已經係室溫，食左一兩舊，碟底既汁已經被一層霜白既油脂冰封，又唔敢請店員翻熱，情何以堪？  …查看更多

Dinner Set A  $1591) 溫泉蛋巴馬火腿沙律   新鮮沙律菜覆蓋著滑捋捋的溫泉蛋，一片人情咁薄既巴馬火腿輕輕鋪响蔬菜面頭，作為晚餐既前菜甚為合適，味道正常。 :)2) 香芒三文魚焗飯 焗飯外表顏色吸引，醬汁表面焗至金黃，碟邊還有硬硬的飯焦。淡黃色既不知名醬汁貌似忌廉汁，金黃色既芒果肉帶微酸，粉橙色既三文魚碎乾柴烈火，三者互相配合得恰到好處，唔會搶走對方既風味，因為根本就無味！ 可能大廚近排奉行健康飲食之道，為左食客既身體健康，一於低糖低鹽走味精，煮出食材既天然真味。3) 是日甜品品種：半件西餅?形狀：四方形味道：微甜疑問：呢半件西餅值得用一隻大少少既碟仔盛載，因為呢個布甸兜仔根本容不下佢四隻角，匙羹一舀便將蛋糕仔壓落兜底，唔好睇。 韓式卡邦尼年糕  $98 配料：濃濃醬汁、韓式年糕、洋蔥絲、香菇片、煙肉絲，表面灑上微脆既煙肉碎雖然年糕既內心仲係實的的，但有好多配菜夾埋一齊食，總比以上的無味飯易入口。醬汁好香好濃，洋蔥絲清新爽甜，加上惹味既煙肉絲同煙肉粒，令人食完一啖又一啖。(盛載小鍋的墊底木板久經歷練，用到甩皮甩漆，辛苦哂！) 附上以下餐牌作理想與現實的對比：…查看更多

　　機緣巧合要去理工大學，順路去試下好評如潮既時新漢堡包，7:30PM去到食客不多，有好多位，order完都只係等左幾分鐘就有得食。　　　　　雙層芝士蛋漢堡包+沙律醬 $18　　漢堡扒鮮嫩多汁，食得出厚切洋蔥，味道幾好。塊蛋係普通厚身煎蛋，蛋白幾滑溜，但蛋黃熟透，少少蛋汁都無，同過往食評相差甚遠。沙律汁好稀，味道唔出，有汁果一啖就好味，無汁就好寡。底部既芝士被餡料慶到半溶，夾埋漢堡扒又幾滋味！　　　　薯條 $8　　金黃色既波浪型粗薯條外貌的確幾吸引，但食落去，凍既？聖牛！薯條表面唔平均咁痴住幾粒鹽，無鹽果D淡而無味，要點茄汁先勉強吞到。表皮又厚又韌，中間D薯仔肉呈實心既白色，生勾勾，好似食緊生薯仔咁。乾柴烈火，懷疑放左好耐同炸得唔夠火喉，實在太令人失望！　　　　步出時新，大惑不解：究竟有乜咁好食啫？　　　　…查看更多

　自出自入，自己搵位坐，自己搵人招呼，服務十分周到。4時入座，全場得幾檯客，侍應們仍然忙到甩轆。$58/位午市牛肉火煱，加一後$64/位。　　上枱先有兩碟牛肉，每碟六大片，呈鮮紅色，貌似幾新鮮，幾香牛肉味，有嚼頭。　　自助醬料，芝麻汁做主打。　　$0追加豬肉，隻豬唔知食咩大，淨係長肥膏唔長肉，食完真係家肥屋潤。本來叫加多一碟牛肉，大佬黎左豬肉，由理佢照食，之後想叫返多碟牛肉，侍應姐姐話呢個價淨係可以追加一碟。事後諗：點解淨係加得一碟？如果以每位計，我兩位起碼都可以追加兩碟掛？　　任食配菜有廿幾種，魚蛋、魚片、腸仔、獅子狗、金菇、冬菇、雞脾菇、豆腐、豆卜、蕃茄，仲有林林總總既蔬菜。　　主食有麵、白飯同炒飯，炒飯色水好吸引，有雞蛋同甘荀粒，但飯粒林bat bat，一D口感都無。旁邊仲有一大鍋「咖哩牛肉」，啲咖哩汁又咸又杰，煲內面頭果層已經乾涸，起左一層啡色腐竹。噢，說好的牛肉呢？呃人既，全部都係偽裝牛肉既魚片，偶爾食到兩粒肉碎，又鞋又韌。　　雪糕呢，一個冰櫃放住四桶雪糕，個桶寫住Häagen-Dazs，味道有拖肥(好似)、芒果、雲尼拿同得返水尾既草莓曲奇。拖肥甜到漏，芒果酸到牙軟，雲尼拿有藥水味，草莓曲奇味道清新，口感豐富。可惜想食既味道都欠奉，心有不甘，問侍應會否補給，佢o係我最後果5分鐘捧左桶新既出黎，仲要係朱古力味，心中大喜！伸手去舀，舀唔郁既？九牛二虎先刮到少少表皮，堅係硬過條命！　…查看更多

　　皮蛋肉碎粥 $5.8咸到以為點左咸蛋咸瘦肉粥，幸好粥水夠綿，料頭充足，間唔中食下都幾抒情。　　　臘味蒸蘿蔔糕 $8.8個名少左個「味」字，又唔夠霸氣，應該叫分子臘味味蒸蘿蔔糕。一上枱已經震攝人心，油水充足之餘，淨係食到臘味既油膱，但實體既臘味就一粒都見唔到，難度食緊分子料理？　　　鮮竹牛肉球(小) $10.8牛肉球本身無咩問題，仲幾嫩滑，不過配埋D疑似喼汁就真係正，淡中帶酸，苦得黎澀，簡直糟蹋左舊牛肉！　　　炸兩腸粉 $12.8份量幾對眼，腸粉都幾軟滑，但係炸兩林既，好彩D角落頭仲有少少脆。　　　鴛鴦燒賣皇(優) $13.6係我見識少，又一廂情願以為係傳統著黃色衫果款燒賣，點知黎到只係兩舊赤裸裸、肥騰騰既肉團，分別頂住舊冬菇同豬肚。咬落去肥瘦分明，即刻口甜舌滑，把口「啷」 過油。肚餓既朋友記得點呢樣點心，食一粒已經夠滯。　…查看更多

友人與鴻哥一見鍾情，藕斷絲連，食過翻尋味，係都要帶我去見識下鴻哥既威力。係佢威迫利誘之下，滿心期待，去到同鴻哥只有一面之緣，疑似鴻哥的人正轉身離去，撇下鴻嫂坐陣。　　　　　　　　落單後等左幾分鐘，即叫即製新鮮熱辣既格仔餅即刻送上，拎上手已經知唔野少。格仔餅既厚度比食開果D最少厚一倍，火候控制得恰到好處，外層金黃鬆脆，內裡香軟纏綿，外脆內軟，不甜不膩，落足蛋漿，充滿層次感，好似食緊脆皮蛋糕，食完餅餅身心都好充實，做人都踏實D。　　　　　原味格仔餅 $15成兩寸厚既餅餅好有睇頭，一啖咬落去，餅肉綿厚，沙糖清甜，配合花生醬的香醇相得益彰，溫暖既觸感叫人纏綿至死。但說好的煉奶呢？完全食唔出煉奶既香甜，實在美中不足。　　朱古力格仔餅 $16朱古力味一食就被原味比下去，開頭一廂情願以為成塊餅都係朱古力味，原來只係原味餅底加少少朱古力醬同花生，我恨我天真。朱古力醬唔夠香濃，味淡且帶苦味，感覺好乾好杰，情願買排朱古力就咁食好過，仲要比原味貴$1，真係唔知有咩賣點呢？　　　　友人如獲至寶，如癡如醉，如狼似虎，如入無人之境。不消幾分鐘已經將大餅吞噬，差D連紙袋都唔放過。我就喜歡慢慢細味鴻嫂造餅時既心境，享受每一個格仔帶來既歡愉。假如有緣再會，我希望鴻哥親手整雞蛋仔俾我食！ 　　…查看更多

見到咁多好評慕名而來，雪糕店以Milk命名，初到貴境一於試下牛奶味，但為左另一隻味猶豫左好耐，見到口味不多，想食既生薑同榴槤都欠奉，石榴味下午已經售罄，最後揀左牛奶味、芝士味、士多啤梨味同芒果味。　　　　　　　　牛奶味+芝士味雙球雪糕筒　$28雙球+$1甜筒=$29牛奶味未如理想中香濃，好清淡，食多幾啖麻木左都已經食唔出奶味，要食返啖另一隻味先再食得出牛奶味。芝士味幾特別，但都係略嫌淡左D。雪糕溶得好快，一拎上手就開始溶，商場行左陣已經變奶昔。兩款口味都少甜，心理上好過點。　　　　　　士多啤梨味+芒果味雙球雪糕筒　$28雙球+$1甜筒=$29而另外兩款生果味雪糕比較甜。士多啤梨味雪糕有幾點細細粒疑似果肉，味道有D假，純粹甜味，欠缺水果既清新自然。芒果係相對黎講最好味，軟滑清甜，散發淡淡芒果清香。　雪糕筒無任何香味，得個脆字，令人失望。　總括而言，價錢偏貴，份量一般，質量平平，有選擇都唔會再幫趁。　兩位阿姐可能忙到踢哂腳，服務好到呢，叫佢幾次先聽到，櫃枱又俾好多強國人圍住哂，俾錢都要排除萬難。　　　　…查看更多

今次幫趁純粹自願上麥當當Marketing既檔，令我有點好奇究竟佢乜野＿＿賣乜野包，究竟有幾意想不到咁WOW？雖然網上劣評如潮，但耳聽三分假，食過先至真，就算唔好食都可以維持生命，一鼓作氣去請左佢地位超級隊長出黎！　超級隊長漢堡 MightyRanger $25.4Xtra 芥末黃瓜醬Xtra 煙肉黑椒醬　愛醬既我，連食麥當當都要叫多醬。打開個紙盒，果然無呃細路，D醬多到滿瀉，面頭塊包都跣走。揭開第一層包，濃烈的洋蔥味撲鼻而來，洋蔥包香軟可口，新鮮既厚切生洋蔥混合芥末黃瓜醬，洋蔥雪白肉厚，爽脆但好辣同唔甜，個人接受唔到咁濃烈既辣洋蔥。洋蔥下有兩大片香脆煙肉條，咬落脆卜卜，唔會一啖就扯哂成條出黎。「突破性被夾著」又「大受歡迎的金黃香脆薯餅」被氾濫既醬汁浸林左，好彩薯餅既邊仍然脆身，件薯餅同早餐果塊一模一樣，好似無乜心思喎，將佢變埋圓形會體貼D。恰到好處的芥末醬將配搭獨特的餡料大膽而巧妙地融合，襯托出豐富口感和無限創意的漢堡包。　繼續探索超級將軍既底蘊，下層係聲稱「鮮嫩多汁的足3両牛肉」，但麥當當D牛肉幾時「鮮嫩多汁」過？我估係佢開始賣漢堡包之前......雖然所謂既牛肉不值一提，橙黃色既車打芝士齋睇已經非常吸引，夾埋底層香辣惹味既煙肉黑椒風味醬，又幾過癮喎！　逐層細味完之後，係時候一啖過從全新角度迎接對味蕾既衝擊，兩種風味醬汁環抱剛柔兼備既餡料，耐人尋味，口感奇妙，風情萬種卻不失內涵，實在令人甘拜超級隊長既雄風！　洋蔥圈拍住隊長上既仲有7件洋蔥圈，份量偏少，仲要逼人加大套餐。見到個個一樣樣既洋蔥圈真係WOW出聲，感覺好似食物模型咁，一樣Size，一樣顏色，一樣凍冰冰，而且食唔出洋蔥味，不禁懷疑係真定假，唯一優點只係夠脆。　銅鑼灣鋪果然貴過其他分店好多喎！！…查看更多

$99 二人於皇子印度餐廳享用七道菜晚餐，米芝蓮推介廚師 (價值 $375)間餐廳既位置又隱閉又難搵，搵左幾個字先去到，餐廳唔大，得六張枱，似乎係一家三口印度人開既，坐低果陣有另外兩枱客，食到一半已經得返我地。如果唔係見到有團購講到咁吸引－－「米芝蓮推介廚師」，點都唔會黎到咁隔攝搵食，價錢仲要唔吸引，$99兩位，額外要按原價收取加一服務費$37.5，共$137。可能期望太高，有點兒失望而回，希望唔係因為團購收平左所以將貨就價啦！:(　　是日餐湯 2客　Today's Soup x2第一次飲呢種味道既湯，飲完都唔知係咩湯，入面有蒜頭粒，味道似蒜蓉包碎溝奶粉，平時極少浪費食物，但今次只係飲左一半。　　香料胡椒餅 2客　Papadam x2紙咁薄既一塊烤餅捲成一個圓錐形，餅面見到有黑芝麻/胡椒，食落脆到好似薯片，越食越辣，辣到我放棄左。　　雜菜沙律 1客　Cachumber Salad x1無汁無醬，純粹幾片青瓜同椰菜放埋一齊，再加D黑胡椒，一D都唔好食。:(　　皇牌牛油咖哩 1客 (牛/羊/雞)　Mixed Meat Curry with Butter x1 (Beef/Lamb/Chicken)佢一揣上台，我心諗：嘩，唔係掛，咁「大碟」既！隻兜仔只係大過湯碗少少，份量同碗湯差唔多，size請參考下面烤餅張相。大約有六舊肉，牛羊雞都有D，再加兩舊薯仔，份量只夠淺嘗。入口味道一般，又唔香又唔惹味，可能食慣娘惹咖哩，覺得茶餐廳既咖哩牛腩飯仲好味。　　串燒雞 1客 / 炭燒無骨魚 1客　Chicken Tikka x1 / Fish Tikka x1選了炭燒無骨魚，個名好新奇有趣，即管試下，原來係三片仔魚柳，厚度只有M記魚柳包既魚柳既一半，魚柳既邊皮燒到有點燶，上台果陣熱辣辣出哂煙，魚柳表面脆卜卜，黃色既魚肉又林又削，但無咖哩味，得個咸字。:(　　咖哩時蔬 1客　Vegetable Curry x1咖哩煮豆角、蕃茄、青椒、西蘭花同紅蘿蔔，平平無奇，無咩特別。　　無限任食烤餅　Unlimited Naan烤餅熱辣辣，好厚好煙韌，用刀叉都切唔開，一份有三塊，應該係一整塊烤餅切開，食完一份再添食，等左5分鐘先上，都係熱烘烘的，值得一讚。　　甜品 2客　Dessert x2估佢唔到，甜品係兩粒燒菠蘿，相中所見菠蘿粒既四周都被燒焦，要切走D燶焦先食得，燒完既菠蘿香甜多汁，可惜好韌同有根，少D牙力都𡁻唔爛呀！　　雖然食物味道不外如是，但要讚下餐廳既誠實作風。抬頭望下室內環境，駭見酒櫃放左四瓶疑似化工飲料原料，真係相當有可疑！　　…查看更多

9點去到，等位等左十五分鐘，入座時候人已經唔多，俾左個6人卡位我地，坐得好舒服。D服務真係好到呢，鋪仔細細，但就好似望黎望去都望唔到我隻手咁。同枱教我個策略：舉手唔可以慢慢舉，要極速向上伸直隻手，等佢地錯覺有野飛埋身，就會本能反應望過黎。豬軟骨湯烏冬 $42豬軟骨四舊，個樣似牛筋，煮得好林，都算入味奶白色既湯無豬骨味，公仔麵D湯包仲好味過佢D麵無味，湯又淡，要飲好多湯黎送麵，想叫職員加湯，但係佢話要加錢:(牛肉咖哩烏冬 配 白色膠索帶 $5X (Voided)烏冬面頭隨便放左幾片肥牛，夾雜住D牛肉碎屑咖哩汁唔辣，杰撻撻好似糊仔咁烏冬還可以，都係一條條完整既白色膠索帶 $此刻無價真係好味在後頭，食到最後竟然驚見半截束電線用果D白色膠索帶，點解我認得出係索帶 因為食正索帶個頭!大廚用心打造，夾上黎仲滴緊汁...肯定好入味喇！ 唔知索帶條屍既其他部份去左邊個客碗麵度呢？ 我問經理咩黎，佢話拎入廚房確認下先，之後走出黎話唔好意思，會幫我地取消呢個咖哩烏冬。危險食肆，不可一不可再！…查看更多

入到大堂寒風陣陣，坐低後食客疏落，服務員更加罕見，十足十荒島一樣，打邊爐俾佢收走左個煲蓋，想拎返？無問題，好似嗌SOS咁，佢地就會聽到架喇！火煱 (位位$98全包)張火煱料點菜單都好多野食，有魚蛋啦，燒賣啦，韌過樹皮既豬皮啦，豆卜啦，豆腐啦，一煮即散既魚皮咪搞啦，仲有一系列既丸：豬肉丸，墨魚丸，牛肉丸，黑椒牛肉丸，唔願意承認佢係龍蝦丸既蟹柳丸，下刪十項。係咪好多野食呢？　睇見到覺得物超所值。D火煱料黎得又快又足點10樣火煱料，佢開心既話會黎5樣，佢唔開心你等到湯底乾哂都未到，講錯，唔係未到，係永遠都唔會到，如果你係有耐心有詩意既話，即管繼續幻想呢d不切實際既盼望！如果唔夠喉既話，可以俾多少少錢，叫d好野食喎！炸魚皮 ($9)雞子 ($28)啤酒 ($10)**另叫佳餚要加一食到一半個肚已經唔舒服，我唔會屈係佢d食物唔新鮮令到我肚痛，唔會記得好大隻蒼蠅嬲住d生菜趕極都唔走，又唔會話佢d冷氣太勁令到我起哂雞皮打冷震好想走，亦都唔會怪佢地服務態度差搞到我唔想再黎。…查看更多

要食好野除了要付出錢之外，有時候還要等待，特別係呢間咁出名既堂記！而且又迫又難等位，10:10pm落單，等到10:50pm先有野食。豬潤燒鴨腸($19)豬潤大塊對眼，又香又新鮮，而且又爽又脆有口感。燒鴨都好甘香，唔太肥。最高難度係d腸粉皮，薄得黎爽滑，晶瑩剔透，皮薄餡靚。牛肉魚片腸($18)味道略淡，牛肉嫩滑，魚片爽甜。魚片瘦肉粥($18)粥底綿，魚片脆，但有骨（我怕骨），可惜瘦肉較少。兩位埋單共$55可惜份量少了點，幾啖就無左，一次過點多幾碟都無問題，如果點唔夠，唔夠喉再點既話，又要等半個鐘以上先有得食嚕！…查看更多

親切的服務態度本應記一功，但不能太妨礙食客自主，我地為燒鵝而來，當我地想點全隻燒鵝，被強烈阻撓 全隻燒鵝 $420燒鵝皮唔脆，問侍應，侍應話佢地賣點唔係皮脆，而係肉質新鮮同肉汁，但我唔覺有幾新鮮，一點鵝味都無，又唔香，肉又”鞋”又韌，你俾舊「燒鵝」我食，問我係咩肉，我都食唔出係鴨定係鵝定係其他！對得獎店的美譽十分失望。:(如是我見，侍應和刀手會對客人不公，如果你係外國人/遊客/熟客/老闆，你碟燒鵝會靚同大碟好多！ 豉油雞半隻 $140薄肉既地方太咸，厚肉既地方無味，一食就食得出係雪藏雞，又霉又無嚼頭，情願食街市d燒味飯盒:(比較值得講下既係碟薑葱，唔係用油浸哂d薑葱 叉燒拼海蜇 $160呢碟真係令人真的憤怒了！相片3所見，成碟都係燒燶既黑焦，圍哂邊，俾哂d頭頭尾尾，食左幾舊，全瘦叉燒，凍冰冰，而且又係又”鞋”又韌，越食越唔對路，就算係頭頭尾尾都唔緊要，街市買d叉燒都起碼會幫你飛左d燶焦先丫，佢唔會，照上，啖啖都"火羅"味問第一個女侍應，佢話：唔係好燶丫，咁先香呀問第二個男侍應，即刻幫我地換過碟，換完呢碟就正喇，仲係暖笠笠，肥瘦適中，d肉又香又有肉汁，而且無燶焦，燒得岩岩好，唔換就俾佢搵左笨！ 皮蛋酸薑 $7.5/份叫左兩份，每份得半隻皮蛋同兩細片酸薑　宜家d薑真係矜貴，估唔到d酸薑夠酸夠辣，都幾好:)D皮蛋就真係正，糖心的，個黃又軟又滑，d蛋白晶瑩剔透，好靚呀！ 茶位 $10壺茶又係唔知點，d茶葉碎濕濕，差唔多係粉狀喇！又有d葉仔浮o係面，d水又唔夠熱，咁基本都做到咁差四位埋單$852.5恕我直言，對「得獎店」之名極其懷疑，名不副實，虛有其名！…查看更多

先要讚下客員的服務態度，有求必應，賓至如歸！在這年頭裡，很難遇到這樣的熱情。Cheese Hamburger 芝士牛肉漢堡 ($25)牛肉扒有種特別香味，新鮮，肉汁豐富，但肉扒以外沒有特別過包之處。醬汁太少，店長解釋說太多醬汁的話會溢出，不便入口。Mustard Chicken Burger 芥末雞扒漢堡 ($18)雞扒普通，與茶餐廳貨色無異，汁少，洋蔥辣。焗薯皮 ($18)共5件，SIZE一般，肉醬芝士略嫌太少，無咩味道，但新鮮熱辣，即叫即製可加分。炸薯格 (跟餐+$7)WOW! 一黎到急不及待拈起一塊，超級鮮炸，熱得燙口外皮香脆，薯肉鬆軟，外脆內軟的口感令我難以自拔。加上茄汁任斟，正呀，岩哂我呢種汁怪。（後記：步出店門舌頭開始又熱又漲，熱氣感覺持續了兩天，怪自己忍不了口，剛炸起就放入口）…查看更多

中午到上環覓食行過見到生記有條長龍人排我又排清湯牛腩牛筋麵 ($28) & 清湯牛筋牛肚麵 ($28)清是清淡是淡幾件牛筋腩寥寥可數牛腩淡得無味牛筋淡得像白灼滑潺潺的動物筋腱在口中有點嘔心淡而無味的清　有什麼意思我還是喜歡濃濃的牛腩湯底和入味的牛腩香煎魚餅 ($10)魚肉彈牙　表面香脆而且有肉汁可惜像人情紙咁薄十蚊三張我覺得不值…查看更多