雲漢居士的个人专页

團購2人餐，為免人多，選擇同夫人食早場6點鐘！今晚餐湯為青豆白湯，普普通通。頭盤雞翼同沙律二選一，要左沙律，佢落紅酒醋，幾特別，但係醋不夠酸，份量亦唔多，芝士味淡，應該可以改善一下。主菜選了牛尾意粉同豬肋骨，牛尾意粉超讚，份量味道都做得好，豬肋骨太瘦無肉，伴菜薯角反更出色。甜品，超級迷你版朱古力蛋糕同紐約芝士餅，賣相只係讓我覺得佢好寒酸，大舊些少就唔失禮啦，朱古力一件好味，芝士餅就差少少。飲品選了即磨咖啡同朱古力咖啡，餐飲來說係超值，平時黎飲杯咖啡都唔錯！除食物都要睇埋服務同裝修，服務就真係幾好，而裝修都幾好情調架，同朋友仔黎談下心都係一個很好的選擇！對本居士同夫人而言，份量價錢（團購價）尚算合理，不過，若以正價而言，價錢都幾唔平民，不可以成日黎食囉！…查看更多

用了團購，試試半自助餐，前菜甜品任食再加一碗麵。由於以前食過，看過食評都覺得，只要平日食就應該ok，今天放假咪同居士夫人去囉！點知……12:15pm去到，成個場無人，只有一班早我10秒到場的一圍人，坐下後我便表明是享用半自助餐的，員工竟然話，出面擺放的食物不可享用，他們會安排「三碟」前菜給我……嘩！我即刻問，什麽叫做“前菜甜品任食”呢？可能佢地想分開半自助餐同全自助餐，所以安排半自助餐的人，由員工上三碟前菜了事，但這個安排極有問題，就係因為佢地把前菜同甜品，連同湯、飯、熱勲等食物一齊放，做成混亂係佢地自己攪出黎……結果嘈完一輪，一位擬似領班的員工，就帶領我，話俾我知邊D食得邊D唔食得，簡單些，凍的食物為“前菜及甜品”，再加一項熱食“紅豆沙”，就是我和夫人今天可以享用的自助食物！講翻食物，基本上係好味的，前菜今天有八款，大部份係菜，另有醉雞、五香牛肉、鹵豆腐等等，同佢宣傳單最大分別係無左海哲同雞絲粉皮，其實八個前菜都幾好味，尤其醉雞及鹵豆腐可以推介俾大家；跟住上主食，分別有排骨湯麵同雲吞擔擔麵，排骨乾身但無味道，賣相好唔肥膩，師父其實做得好好，只係調味方面要再調一調，湯麵大碗，湯清甜，麵彈牙好味，但擔擔麵就唔得，雲吞好淋味道唔好，擔擔醬味道淡，成碗麵都唔好食，我只吃了所有雲吞及半碗麵就放棄了；最後輪到甜品，基本上係六款食物，有西瓜、蜜瓜、桂花糕、芝麻酥、好豆沙及杏仁豆腐，兩款瓜正常，杏仁豆腐我跟夫人都唔食無評價，芝麻酥普通，食了一件便無再取，好豆沙淡，又係兩人分享一碗算了，只有桂花糕食了很多，桂花夠味，糕都好企身，不會一夾就散，可推薦，還有送了熱豆漿，豆漿味係古老味道，但隱隱感到唔新鮮同埋好淡。眼見坐係度兩粒鐘，加埋唔知有無10枱客，大部份都係用團購埋單，真係唔知佢地仲可以捱幾耐，服務唔係話差，食物質素唔高但都可以接受，安排係混亂，正價係定得幾高，但真係食完一次都唔係咁有意慾想食第二次的時候，希望佢地再諗諗，除了用團購吊命外，還有什麼可以做得更好，至少唔好寫住自助任食時，竟然會同客人講唔准出去攞，俾三碟你食咋！正價78加一就真係貴左少少，若團購38加原價加一都還可接受的。另外就係師父幾健康，好多食物味道偏淡，淡到變得無咁好味。…查看更多

居士太太休息唔煮飯，帶她去一下居士單身時代久不久幫襯的舊舖（老舖）。八九十年代的裝潢，小小舖放了數張圓枱，2個人去，撘枱係必然的，前面煮粉麵同煲仔飯，後面就水吧同炒粉麵，老闆同師父們都好有經驗（上晒年紀啦！哈）。這個時代舖頭食物尚算經濟，晚間快餐（一飯一飲）都係31蚊，煲仔飯大部份35蚊，粉麵都係21蚊啫，算抵食，而且份量幾多，我見旁邊猛男先生要左個快餐（豬手飯），飯同餸分開上，碟飯該有2碗以上的份量，而餸亦多，唔會搵大量菜墊底，至於對手一對小情侶，叫了一碗粉加一個煲仔飯，煲仔飯的餸好多，味道雖然不詳，但至少俾人感覺到誠意同貨真價實先！講翻居士啦，由於不太餓（七點半左右），我和太太點了傳統牛雜河同埋魚旦粉，兩碗麵份量都好足，牛雜乾淨少脂肪，且河粉都好得，唔會淋晒，魚旦魚片就一般，但奇怪的發現一粒墨丸在其中？多謝師父加餸！墨丸好味有咬口，可惜個湯底就淡了點，下次都要加腩汁先得。是次食完，太太話雖然古舊且地方不太舒適，她希望下次可以再試其他食物。這家舖在時代變遷中亦迄立觀塘多年，希望老闆繼續經營，且保留這種風味！…查看更多

其實做得團購，都係想SELL下自己間舖，等多d人認識同幫襯，點解又攪到咁呢？居士買了團購，一向不去港島開飯，見又話攞什麼奬，又話幾咁好味，咪上當囉！首先來個電話奇談，原本諗住訂中午，佢話full，咁不如2點，又話無位，咁5點啦，又話驚7點交枱怕我地食唔切，咁都就夠期又唔會點過海，5點咪5點囉，佢地真係好多生意做唔切咁，點知4點半上到去，嘩！有兩枱客喎，一枱室內一枱室外，又幾full喎！一坐底二話不說同廚房講“兩個粉”，咁我當然問團購話可以二選一喎！佢話宜家無雞得意粉，跟住免你多問雞咁腳走左，佢連水都仲未俾我地架！！！等15分鐘，沙律登場，少之又少，味道尚可接受，又等15分鐘，意粉上，嘩！白汁意粉，都無其他評家的餸？火腿絲倒有幾條，磨菇？妄想！而且份量奇少，連居士夫人個bb胃都食得晒，好明顯廚房佬唔係好想開爐煮的感覺，味道十分之一般，居士免免強強吞下後，侍應先生火速收晒餐具碗碟，跟住上飲品，好似無左d野喎！佢無預備送甜品俾我地，咁當然要出聲問下啦，佢話做緊，跟住攞返兩隻叉出黎，又等10分鐘，諗住係之前評家的泡芙，點知……登登登登，來了四塊4cm長x3.5cm濶x0.5cm厚的「莎莉蛋糕」，上面仲有廚房野性加點浪漫的劃上幾條朱古力醬汁，30秒都唔洗就KO左佢地啦，成果餐飯除左等45分鐘，食左10分鐘囉……真係攪鬼！$38？真係搶錢，又無雞又無泡芙又無服務又話無位，同間舖名好襯，真係“共搶黨”食堂！仲要居士兩人各浪費來回二十幾蚊車費………有興趣不妨試試！…查看更多

唉！朋友推介，加上之前食評，又加上開飯有優惠券，咪去試試囉，點知………中計！加了價，用埋優惠券都要$151一個人，可能居士遇人不熟，朋友又話好味好多野食，我入到去一眼望落去，真係好難想像，“好多野食”點都無可能用在這間餐廳算，有魚生，得兩款，任你幾鐘意食魚生，你都無可能食成粒鐘掛；有翡翠螺，但係質素很差，半數以上有沙；有沙律，全部係平價菜，無桃和菠蘿；熱食有8盤，無樣好食，旁邊一枱有位阿姐，佢笑笑口同佢朋友講，話佢煮仲好食；雪糕係大家推介的MOVEPICK，但我覺得味道好淡，不過這個是個人口味問題，雪糕係無問題的，仲有4種味道；甜品不提也罷，無樣好食，連簡單的啫喱都可以做得唔好食，而有評家話的曲奇，好奇怪，同坊間話好味的曲奇完全唱反調，鬆散！難以形容的甜味！若要我講有咩野食多過一轉………我諗會係咖喱角吧！埋單每位151……有點肉痛，居士覺得100都唔值！唯一係服務唔錯囉。…查看更多

太太有團購優惠，60元一位就有個任食午餐，基本上係無左日本菜啫，可接受！由於已訂位，一去到就可以就坐，但第一輪點選的菜等了超過15分鐘，可能廚房師父未上力，或者個鍋未燒熱掛，不過第一輪過後就好好多，接著入的ORDER紙，10分鐘內都可以到，而且無漏單，反而成日俾多我添，可能食左其他枱的點菜，大家記得寫枱號寫得清楚些吧！服務OK，換碟換得好密，但係傳菜的人就麻麻，成日飛碟，或者將碟菜放在枱邊就走左去！講完服務，都要講下食物質素，基本味道可接受，炸物多了點，煮物油了點，由於全枱不吃辣，辣物不詳，可推介的會係蔗蝦、雞絲粉皮、湯河同埋咸檸水，似乎東南亞菜式比中式菜做得好，以60元來說，絕對叫超值，好多中價菜館都未必有佢咁好食。最後都想表揚當日換碟那位小姐，佢好勤力，而且主動同客人講下野，問下客人夠唔夠食，抵讚。另外，希望店舖改善一下佢個甜品櫃，放正係大門，但攞甜品的櫃門卻在客戶坐位後面，攞甜品極不方便，而且有時仲撞到其他客人，好唔好意思嘛。…查看更多

唉！居士收山後第二篇食評，無他，只有太正同太差先至可以令我再出手嘛！可惜今次又係一個“差”，仲送埋“激氣”添！恆隆等錢洗，大優惠旗下商場食店，於是咪膽粗粗咁去試下囉，這家食店早前食評好壞參半，不過我又直係幾鍾意食石頭飯嘛，一試無妨的心態下，中左招！侍應好多，但係有點分工混亂，只見佢地走來走去，剛到的時候，侍應A俾左張等位飛仔我，唔夠1分鐘阿侍應B又做翻同一動作……入到佢坐好，叫了兩個石頭飯，我一邊等，一邊跟雲太太閒話家常，誰知閒話了半句鐘，眼見對面一對由有得食到埋單，兩碗石頭飯仍音訊全無，驚訝之際，坐對面的一對跟我講，等半個鐘好平常咋！吓！半個鐘喎！洗米放入電飯煲的話，咩野都煮熟啦，何況用舊石呢！問侍應，佢話製作中，結果前前後後差不多四十五分鐘終於現身……本人為鰻魚石頭飯，侍應怕撈飯時弄爛鰻，感覺到她好有心機好小心咁撈勻俾我，不過，就係佢咁小心，我第一口的鰻魚係……涼涼地的，吓！石頭飯喎！應該係佢條鰻魚燒左一段日子，由於怕大力撈飯會整爛魚肉，故出現了在面層的魚未能及時吸取飯和石頭鍋的熱力便要出場……而另一問題是………唔好食，飯太稔，味道極之唔夠味，即係淡啊！雲太太選了魷魚，而太太怕肥在撈野時無落麻油，結果佢碗飯更難食……淡而無味啊，而且餸菜已混在一起，食不到什麼材料，加上飯底好稔，韓國飯無咁稔架嗎！拿拿臨時晒走左，在雲太太旁細語到，半價都好難叫我再幫趁，雲太太最頂唔住係佢地九十幾人在店裡忙忙碌碌的卻好似唔知自己做緊咩野，就算再有優惠都難以幫趁！…查看更多

真係好耐都無寫食評，點知重出江湖就“中招”！之前的食評實在太detail啦！居士都有點擔心，點知馬上有朋友叫到話有間新自助餐在灣仔！88蚊好抵！咁咪去試下囉！原來係半自助餐，88蚊只包部份食物，另加錢食主菜，點解宣傳單張和侍應完全唔講，有點被騙入局咁！既然朋友一番誠意想食，算數，食物ok的話都原諒佢，點知！講返食物！居士選了至貴的羊架拼鵝肝作主菜，羊架夠大件，絕對夠飽，生熟控制得幾好，不過就勁油同埋無味道，連雪味或者鮮味都食唔出……完全講唔出好食定唔好食！而鵝肝更嚇人，雖然居士不是鵝肝專家，但係佢真係整得好難食，碰一碰塊鵝肝就散晒，點解鵝肝會散開呢，可能居士太暴力？又或者其實食緊免治鵝肝掛！加上一浸油，以及跟羊架一樣的毫無味道！這道以往食評者食出的味道完全感受唔到！另外去返自助部份，份量的ok的，不停的補給，但味道就真係麻麻，首先兩款湯，意大利菜湯淡而無味，磨菇忌廉湯好似麥皮咁？莫名奇妙！特色飲品有三款，就係奶昔、奶昔同埋奶昔！三款不同味的奶昔，惜居士唔好昔，又怕佢飽肚，咁即係有等如無！甜品又係咪，除了啫喱迷你菓撻外，蛋糕就係有芝士蛋糕、芝士蛋糕同埋芝士蛋糕！芝士蛋糕上一個放cream，一個放莓，另一個咩野都唔放純蛋糕上場！好彩居士食芝士蛋糕啫，雖然唔係咁好食，都好過無野食嘛！熱葷都算有，咪炒飯同意粉囉！仲有脆槳厚過食物的炸物，本來以為有驚喜的在中段時間推出菠蘿司華力腸串燒，但係條腸的肉質係“梅”的，吞不下嚥啊！食左菠蘿放棄了司華力腸……無奈。至於前人推介的自助沙律吧！算合格吧！四款已撈好的沙律加數款菜，設有大盤讓你自行撈沙律。而凍食則有蝦、龍蝦仔、螺及青口，蝦就正常不過接近一半係“梅”的，龍蝦仔ok不過好快無得補給，居士都係食左兩隻咋，螺都ok，而且供應都足，不過四成有沙，係好多沙，真係睇你彩數啦，而青口就難食得很，好似放過夜幾日咁！本居士多謝朋友相約食飯，但係下次都係搵間好質素少少，亦希望這所食店早點作改善，否則好快就玩完！…查看更多

始終食粥不會常幫襯！在這區來説，這家算是很好了！好明顯！老闆係以前粥舖人來的，對粥和腸粉等食物都非常熟識，而且有點保持以往舊粥舖的味道，佢的粥比名牌連鎖店的較淡和較稀﹐而且配料較「粗」，就是舊式粥店的味道！腸粉做得唔錯！又是比較「粗」的！對本居士來說，粥和腸粉該是這樣的！至於炒麵等其他食品，本居士亦沒有幫襯過喎！雖然經常小貓三兩隻，但這家舖的口味，對於現時人人食得多名牌連鎖店的影響下，本居士承認不是個個覺得好味，但希望他們可以繼續維持著！讓我多一間食店可以選擇！…查看更多

嘩！新年前，本居士當然為了辦年貨而四出奔波，碰巧路過三河屋！喔！得一對情侶等位喎！居士二話不說的便拉著友人排隊醫肚先！等了20分鐘便有位了（問過朋友，話我算快喎！）。由於等的時侯已看過餐牌和其他客人選了什麼菜，就選了三樣嗱嗱聲醫完肚繼續辦埋未辦的年貨！(1) 鰻魚飯：極力推介！好大條又好肥美，而且製作得很好！好好味！可能對某些人用說會比較少汁，但我覺得剛剛好！本居士一粒飯都同佢食晒！在天寒地凍下吃這個鰻魚飯實在感到很滿足！(2) 餃子拉麵：拉麵很爽！湯底就一般，沒什麼特別好味！餃子不俗，若另上會好過放落湯裡！友人吃得較慢，吃到最後一隻餃子時已變得無咁好味了！(3) 雜錦天婦羅：蝦加菜，兩種都做得出色，脆槳做得很好，味覺不會覺得很多油，食落去甘脆可口，友人怕熱氣也主動食了很多！蝦很爽很新鮮，好好味！菜亦處理得很好！居士食的該是茄子和南瓜！時間關係及看到舖外排長龍等開飯，居士不消半小時便走人了！的確，環境淺窄是一個很重要的問題，既然現在市況如此，該趁機擴大盤生意吧！…查看更多

一响這家的煎釀三寶屬於好味之選，可能對手實在太差勁了！但煎炸野始終不可多吃，所以都會一兩個月先幫襯一次，但最近一次幫襯！佢地的味道唔同左，雖然賣相一樣，但魚肉味道和炸的火喉不同，可能成本加左，魚肉無以前咁好食和彈牙，火喉亦差左，其中一件青椒屬“緊緊熟”和“唔熟”之間！可能慳油慳時間早些炸起上枱掛！而且阿姐好慳，次次叫佢俾多少少醬汁都唔多願意……本居士會再俾機會佢的，始 終都唔係經常幫襯，可能剛剛一次中招啫，但若下次仍無有改善！…查看更多

由於不想食飯（太飽），又覺得食粥又唔夠飽……食碗麵吧！路過該處，其實舖頭同大街有段距離，遠睇基本上睇唔到佢招牌寫咩，但係知道係食店囉！結果八掛行去門口睇，真係食店來的，咪試下囉！居士和友人選了兩款麵！“天下第一”和“牛腩茄湯米線”！天下第一！個名勁到！其實係用一種叫“重慶酸辣粉”做主食，綠色透明粉像啫喱！配以多種配菜如花生、炸菜、莞茜等，彈牙好味！辣度加選大細，唔錯！牛腩茄湯米線！牛腩像日式的，無肥肉而較清淡，女仕該會歡喜！茄湯好味！帶點點酸辣實在美味！而且兩碗粉份量都好足，不用加小食/小菜都好夠飽！基本上佢仲有好多招牌菜，相信日後會再試，希望佢地可以繼續keep住！仲有，老闆娘很好人，佢唔會因為你只叫食又不叫野飲就不招待或不高興，知道我地第一次食都叫我地慢慢揀！…查看更多

！咁都學人做車仔麵！配菜選擇其實不多，18蚊三餸就算係幾吸引，但係d餸麻麻地，老實說真係唔係咁好味！若唔肚餓真係食唔晒成碗，但睇左佢價錢同份量……俾你合格吧！都係糧尾手緊之選吧！食得太多佢的車仔麵，就越懷念以前推車仔屋村車仔麵囉！…查看更多

本居士十份喜愛鮮椰汁！路過此店多次都差些少想幫襯！結果都不理大家的評語而忍唔住買左杯試下……唉！佢就真係放晒d椰子啊！架生啊出黎！但係佢的椰子汁，好明顯椰子成份超低，主要成份係水同埋糖槳！有加椰奶蓋住糖水味，但技巧太差了！求奇找間糖水舖的椰汁西米露的椰汁都好味過佢啦！明白落糖水同椰奶係好普遍的事情，但係請加重鮮椰子成份，碎冰亦不要咁大粒，否則好難維持啊！…查看更多

大良八記！名牌糖水舖！新店去捧場都好應該！點知……老牌店當然叫老餅糖水，就叫了四個試試！合桃糊，不太甜不太“傑”，做得最好的一個！桑記生蛋茶，茶味濃，不過蓮子生而硬，隻蛋都好硬！薑汁湯丸，薑汁OK，湯丸就粉皮多了點，不夠甜！渣咋，嘩！咩野味！仲以為自己叫左雜豆撈水？結果3比1！這家老字號都係算啦！…查看更多