Sally Poon的个人专页

見到茶木的春日限定蚵仔四色麵賣相好吸引，昨天食晏就去試試。等了20分鐘左右，有位了。點了蚵仔四色麵，煎餃子和涷仙草奶茶。蚵仔四色麵是濃湯，小妹我最愛喝濃湯，而且有一陣胡椒粉味，除四色麵外，有菜同乾蝦仔，真的不錯。我本身有鼻敏感，喝了胡椒湯，怪怪的會感覺舒暢了。煎餃子不是煎得脆脆的那種，而是乾得來軟熟的，我比較喜歡這樣。只是點的醬比較一般，面頭還有厚厚一層油，不太吸引。仙草奶茶，不過不失，茶味還可以。已經很飽了，要不然我還想試一試甜品蛋糕。下次來一定要試著。…查看更多

放工去APM一田，經過Mochi Sweets，見到有期間限定的櫻花米糍，就買左6件嘅禮盒。我揀左櫻花、芒果乳酪、抺茶紅豆慕絲、柚子果粒慕思及抺茶。櫻花味一般，柚子味好出，芒果味好食，抺茶味就穩穩陣陣咁ok嘅。…查看更多

周日下午去尖沙咀買嘢，行到又攰又盛，想坐底食吓野抖吓。去咗新港中心地庫嘅味千。呢間味千坐入去堂食要收加一，係出面坐就唔洗，但太攰又想靜靜地，揀坐入面卡位。點咗味千拉麵，餃子，再加西瓜汁。呢間味千只有果汁供應。拉麵隻糖心蛋都ok嘅，麵一般喇，不過不失咁。餃子都ok嘅，呢個價錢可以接受囉。其實真係無乜服務，下次可坐外面免收加一。…查看更多

今日下午兩點來到尖沙咀K11附近，走入K11，睇吓有咩食，見到呢間霞小飛，有啲熟面口，之前好似係叫霞飛嘅。小妹我兩年前喺K11對面大廈返工，間唔時都幫趁吓，lunch叫外賣食㗎。咁就入咗去喇，雖然轉咗名，但午市套餐同兩年前一樣，有我鍾意嘅三鮮湯年糕、香菇素餃，我再叫多個蝦餃同高力豆沙。三鮮湯年糕啲湯好濃味，年糕幾滑有咬口，素餃乾身，咬開有香味，蝦餃好爽，高力豆沙唔喺太大個，食落剛剛好。杯蕎麥茶都幾好飲。…查看更多

今日返半day，又黎公司附近嘅茶木食晏。今日超lucky ，唔洗等好耐就有位。叫咗個招牌牛肉麵，花枝餅同仙草奶茶。牛肉麵湯依然濃郁好味，只係其中一件牛肉好䞚，趙很久都食不到。花枝餅等咗好耐，成碗麵都食完哂都未黎。終於有喇，剛炸起，好熱，有點彈，好味嘅。點個醬呢就差咗少少喇。仙草奶茶，味道ok嘅。我比較鍾意飲台式奶茶，附近東廣場有間哩渴賣台式奶茶都唔錯嘅。座嘅環境舒服，下次黎要食蠔仔粥先得😋。…查看更多

今日天氣仍然寒冷，朝早起身個頭暈陀陀，有點耳水不平衡。食晏諗住食碗粥，就去咗一粥麵。叫咗碗皮蛋瘦肉粥，但淨一碗粥又好似唔夠，叫多個蘿蔔糕。等咗好耐，仲意為漏單，問女店員佢先話煎緊要等陣，點解俾錢買飛時唔早講要時間要即整等等，又再繼續等，又過咗一陣，問男店員仲要等幾耐，佢直頭無理我，😡😡😡究竟係咩態度！終於有啦拎咗返屋企，打開個蘿蔔糕，燶咗嘅... 原來等勁耐就係等呢個燶咗嘅蘿蔔糕😡😡😡皮蛋瘦肉粥加蘿蔔糕要40元，唔係平嘅囖，仲食再一肚氣。😡😡😡碗粥就一般咁啦！…查看更多

琴日喺我2017最後嘅半day工作天，lunch想食日本嘢，去咗公司附近嘅APM 一杯。一個人坐BAR枱唔洗等。BAR個位都幾闊落👍。點咗個SET E 雜錦壽司配迷你烏冬，凍奶茶，加多個芝士年糕。壽司好新鮮，烏冬幾煙勒，最特別係芝士年糕，本人去食日本菜，都會必定試試芝士年糕嘅，而呢個芝士年糕外面係用紫菜包住，將佢摺埋成個放入口，有紫菜嘅香同煙勒，個心嘅芝士年糕又唔會太漏，好好味😋。其實原本無諗住寫食評嘅，所以食咗一個影個相，原本應該是4個嘅。其他無影到。…查看更多

行咗幾間朱古力店，都係呢間個聖誕星給引我多d，感覺有活力又盛。原本想買牛奶朱古力，嘩，咁快就賣晒喇。咁就揀咗白蘭地酒試吓。我本身都飲得酒嘅，紅酒、威士忌咁，但白蘭地無飲過，好辣咁，唔敢試。試咗一粒，入口感覺似青葡萄，然後有少少甘甘地，呢隻味我覺得ok喎，酒味唔太重，朱古力都ok唔會太甜。1盒有5粒，份量唔太多，啱啱好。用嚟做聖誕裝飾又靚靚～…查看更多

今日去呢間食晏，約1點鐘，1個人不用等位。叫咗白神山沾麵，煎餃子。沾麵隻糖心蛋好正，外層有點彈，內裡係糖心，一口咬落有蛋黃咇出。湯好濃但味剛好不太咸。餃子🥟都好正。聽聞呢個麵屋湯餃子好正，不過今日好想食煎餃。唯有下次再試。…查看更多

今日去左茶木食晏。星期六返半Day，順路行去APM行一陣睇下聖誕禮物，約2pm去到茶木，人不算太多，等左大約15分鐘。點了紅燒牛肉麵和黑糖珍珠奶茶（少甜）。座位OK舒服。牛肉麵湯濃，好稔好滑，紅蘿蔔都好稔，加左芫茜好香；珍珠係細粒的，叫咗少甜，似乎淡咗，下次不用少甜了。個麵真係好好味！…查看更多

因為這間唐記係我家樓下，最近最方便，回家前買了1個奶黃包及2個紅豆包。收了$19.5。我用八達通比錢，是收了$19.5的。因為剛買完東西，兩手都拎滿東西，店員比包我時沒法看清楚，回家發現只有1個奶黃及1個紅豆，少了1個包。😡😡已不是第1次了，昨天中午買嘢亦比少1個包我。這間店是新開的，時常中午就沒這款沒那款食品。😡😡我之前幫趁開啟田商場那間店，幾年了，從沒一次執漏食品的。這間新店怎麼攪的。…查看更多

呢幾日返工做嘢，返到屋企溫書，真係超悶！ 今日放工去食啲精緻嘅蛋糕，順便舒一口悶氣吧。 文獻常記載甜點可以令人增加快樂指數，於我，有時都是一條指定的快樂公式。揀Agnes b因為上次去過有太好的回憶，蛋糕精緻美味，坐得舒適柔閑，好寫意；而且上次只試了3款蛋糕，其他的都未品嚐。到達店子，冷清清的，店子沒有食客。剛埋到放蛋糕的櫃度睇了一睇，就有店員姐姐叫小妹拎個catalog睇吓，小妹就回答“我係度食，望一望睇吓要邊款”，心想成間店只得我一個，應該唔會阻到人啦。今次揀咗Aurore，Chloe同Jasmine，另外要了杯凍檸茶少冰添。當小妹再回頭留意，果個店員姐姐將啲蛋糕放咗入外賣紙盒內。吓！ 一來言猶在耳，啱啱先話唔需要catalog堂食喎，咁快唔記得，又無其他客，究竟有冇留意人哋講嘅說話，飲食係服務行業，服務好重要。小妹都有啲朋友講完幾次嘅說話都冇用個心去裝載，令小妹有啲心灰意冷，久而久之，就變成極陌生的所謂朋友。言歸正傳，就算唔記得，你都問聲小妹想係度食還是外賣，問都無問，就好趕咁入落外賣盒，真是有點欠缺尊重 。連快餐店都會問聲嗱，點解好似高檔一啲嘅Agnes b嘅服務會如此。即刻叫住店員姐姐話佢知小妹堂食，佢先將蛋糕改放在碟上。 凍檸茶少冰 ($38)真係絕對少冰，幾乎想搵粒冰都冇果隻。犀利啦！！ 茶味一般啦。 Chloe ($30)朱古力海綿蛋糕，面上有一粒榛子，這兒每款蛋糕都有Agnes b嘅招牌朱古力係面。味道遠不及賣相好，味道一般，朱古力味不夠濃，蛋糕是海綿那種，不夠滑，個餅底又太硬。 Aurore ($30)朱古力mousse蛋糕，外形同Chloe如出一轍，半球體，雖說是mousse蛋糕，但一點都不夠滑，裡面有一啲香橙啫喱，橙味太淡，一般。 Jasmine ($30)茉莉蛋糕，係3件蛋糕當中最好嘅一個。不是mousse蛋糕，但比剛才嘅Aurore更滑。蛋糕本身不太甜，小妹就食不出茉莉味道。上面銀白色的醬比蛋糕還要甜。估不到這個賣相相對樸素一點的，反而味道最好，只差點點茉莉味就perfect。 難怪常聽人說，看東西不可只看表面嗱。 成餐打從服務以至食物都令小妹大失所望。 會否試埋其他款色，都會不過會揀另一間店子如時代廣場那間再試。…查看更多

是日放工趕往APM買東西，跟住快快脆脆食個飯返屋企睇埋啲書。無法啦，很久以前已知讀書考試絕不能恃住自己有啲小聰明就以為可以憢幸過關，世上真的是沒有免費的午餐呢。趕時間最好就是食快餐。這兒的Food Court嚟過好多次都見到幾多人食這間店子的漢堡，今日就試這個啦。Rice Burger印象中從未試過，就要個海鲜Rice Burger ($22)，薯餅都幾吸引，要埋；原來薯餅可以加汽水成一個餐的 ($19)。淨價錢嚟講比較貴。海鲜Rice Burger : 味道都不錯，飯不會太腍，但始終用日本米本身已有點點腍口的感覺；雜錦海鲜粒已炸過，加上獨特嘅野味醬料，不錯。炸薯餅，size同平時爆炸頭叔叔果間啲大細差不多，最大分別是裡面啲薯蓉有青豆粒，粟米粒咁，加上有楜椒粉等調味料，味道幾特別。雖然就貴咗啲，炸薯餅加汽水要成19蚊，但味道都有啲功課交。整體以快餐嚟講都算係咁啦，幾好嘅一餐。…查看更多

今日放工小妹打算自我獎勵一下，到文華食最愛甜品。踏入文華大堂心情開始超興奮，極期待享受陣間嘅美好時光。很久沒來過，店裡依然是這樣吸引，太多甜品款色，每件都精緻得像藝術一般，不，確實是一件藝術甜品，配合四周氣氛，真像到了甜品藝術館呢。印象中未試過堂食，今次就來個堂食慢慢品嚐甜品及感受四周氣氛。小妹想了良久，最後揀了American Cheesecake，Chocolate Mousse，Chocolate Brownie同Mango Tart。另加飲品Iced Latte with Cream。雖然要了4件蛋糕，但這兒蛋糕比一般嘅細件，加細碼絕對不會太heavy。American Cheesecake ($35)必食嘅至愛芝士蛋糕，有時面上嘅裝飾會金薄，今次係朱古力片。依然是濃厚細滑嘅芝士味，濃滑嘅程度好似是食緊原裝整片芝士一樣，芝士味道微甜帶極少嘅咸味。大口吃下可能會有少少溜嘅感覺，建議好似小妹咁，細細匙慢慢食，不覺溜之餘還可品嚐其真味。至愛果然是至愛，Excellent!!!Chocolate Mousse ($35)面上是用超薄長幅朱古力捲成嘅玫瑰花，薄嘅程度似鉛筆刨用後留下嘅鉛筆皮咁，花下是超級滑嘅朱古力Mousse，底底是軟身勁濃味嘅朱古力醬，層次由薄到厚，稍淡至勁濃味。Great!!Chocolate Brownie ($35)不知是否Brownie都是外表粗糙的呢，可能同有核桃，果仁質感硬淨有關，這兒嘅Brownie在中間界開一半的簡單款色，雖然硬硬的，口感不錯，又有濃郁嘅朱古力味，最特別是內藏一個軟心朱古力，一軟一硬好特出。表面硬淨，內含一顆溫柔嘅心。Wonderful!!Mango Tart ($35)面上的芒果是加工過用來做甜點的，缺乏了鮮果的味道。中間嘅Cream很滑好夠味，撻底不會焗得過火，都幾幼滑，若果焗耐一點，香一些會更吸引。Fairly Good!Iced Latte with Cream ($72)小妹幾鍾意這兒嘅咖啡味道，香得來不會太strong，Latte本身已經幾滑，小妹仲要加Cream，變咗超級滑。成Set上嘅餐具如裝奶及糖水嘅器皿都甚優雅，配合甜品及四周氣氛。Good!!小妹留意到有不少放工嘅朋友嚟到想買心愛嘅款式，不得要領時果種失落嘅樣子，真係身同感受；但亦悄悄地興幸能品嘗到心頭好，能寫意地暢遊滋味空間，已經是最大最大的獎勵了！！…查看更多

係呢個商場逛了一會，想吃點甜品，這兒 Food Court 只有這一間甜品店，不是很情願地叫了個是日甜品套餐，小妹還記得幾個星期前試過這兒嘅甜點，只是一般已矣。芒果糯米加檸檬意米水 ($27)芒果糯米是糯米包着整片芒果肉，外面沾了椰絲，糯米都幾軟綿綿的，不太“痴”牙，芒果肉不酸帶點甜味，幾OK。檸檬意米水，意米本身沒甚麼味，可以說幾淡，聰明地加上檸檬令飲品有味道得來又不會太強烈，不錯。可惜係意米不太腍，小妹很久以前都試過用意米煲糖水，意米要先浸一段時間水，然後再煮多些少時間才會腍的，若果連意米都做到腍的話，腍腍滑滑的，這杯凍飲就好正啦。不過整體都比小妹上次試時好好多，希望再過一段時間再試，會更上一樓層啦！…查看更多