Arcs的个人专页

晏晝係灣仔行到球場嗰面，又落雨又嗡悶，見到呢間段純貞有連埋日出茶太，就決定去食餐台灣野，順手飲杯手搖飲料。入到去睇嗰menu，先發現原來佢仲有賣一款叫梅汁芒果嫩雞胸拌冷麵，聽落都好似酸酸甜甜好開胃咁，所以就嗌一個黎試試佢。另外再叫左一份台式拼盤小食，野飲就嗌左一杯西瓜特飲。等緊野食望下鋪頭入面D裝修，整體都係用木/竹系既感覺設計，俾人感覺都係明亮舒服既，而且地方都乾淨企理。過左15分鐘左右Order就已經出齊，都算幾快下，咁試左嗰小食拼盤先，份量正正常常，豆腐、菇都有4,5舊，都滷得幾入味，隻溏心蛋好好味。試埋豌麵，望落嗰賣相好清新，上面既芒果係新鮮芒果黎，食落香不過唔係好甜，仲有一舊細蕃茄有用梅汁先浸過，有多一陣梅香味，塊雞胸應該係用慢煮，咬落去唔會嚡口都Juicy，連埋嗰汁食唔錯，嗰麵同嗰汁幾夾，少少酸甜好開胃，我覺得如果之後天氣再熱D再食一豌咁既冷麵會好啱。…查看更多

經過荃灣，突然好想食台灣嘢，醒起有呢間段純貞牛肉麵，就又嚟食個晏啦。1點7去到門口，都仲係一堆人排緊，問返職員先知道，原來要係跟規定坐得一半位，變左有枱都唔放得人，咁無計唯有等一陣啦。好彩都算快，等左十幾分鐘就入得，唔想等太耐下次真係要早D嚟。排緊隊嗰時，已經見到門口嗰Menu有D變化，精簡左少少，變成主食只有賣麵類，上次見到唯一既炒飯冇左(本身想點嚟試下)今次就想嗌D熱門以外既，一開始點拌麵，結果話要過兩日先有，紅燒湯底上次又試左，咁就叫另一個推介既燉濃湯雞麵。問左員工呢個配細麵好，就跟佢嚟嗌，點知最大驚喜係到嘢食好快上枱，都有跟一小碟酸菜開胃，先試湯底，相當鮮甜既雞湯，亦都做得好清，麵底掛湯效果幾好，結果食埋我連湯都飲晒。一碗會跟一件雞件同一隻雞脾，都煮得幾嫩，不過比起牛肉麵既肉量就少DD。台灣菜緊係要嗌返嗰常見小食，鹽酥雞啦。份量唔嘢少，有8大塊，炸得外脆內軟，夠Juicy，調味都夠正宗。飲品就叫左金橘蜂蜜綠茶上枱就一壺跟隻杯咁上，一壺可以斟到兩杯，茶味啱啱好，唔會太澀，金橘味都好出，反而係蜂蜜味淡左D。…查看更多

之前係Youtube見到有人拍左呢間新開嘅餐廳，條片影到D嘢食賣相唔錯，咁啱做嘢經開荃灣，索性就嚟試試佢。張相係我食完出嚟嗰時影嘅，我去到1點20分左右，已經有幾個人排緊隊，估唔到我食完出嚟2點反而條隊仲長左睇到嗰menu，主打就係一堆牛肉麵既選擇，有紅燒、茄湯、麻辣蒜味，亦有D嘢食係冇牛既選項，仲有一款炒飯。小食、小菜就更係有唔少，而飲品就正常選擇。咁當然一場嚟到又未食過，緊係嗌佢寫必點既牛三寶麵啦，一碗就有齊牛腱心、牛肚同牛筋，而佢麵底都有揀手工麵定細麵，我就揀左細麵。我食量比較大，所以就另外加左一份紅油抄手同一杯胚芽珍珠奶茶。嗌完等食就周圍望下啦，鋪內裝潢走簡潔現代mix古典味路線，防疫關係張檯面左右都加左一塊屏風。上面就掛左一幅類似簡介嘅字畫，寫到嗰湯底加左好多牛大骨、中藥材及香料，用左好耐時間先熬到出嚟，講到我嘅期望都大左唔少先嚟左杯嘢飲，味道正正常常，茶香奶香都有，不過我略嫌珍珠偏淋身，唔夠Q彈。話咁快碗麵都到埋，隨麵仲跟左一小碟酸菜。 一上檯緊係先呷一啖湯， 湯底唔錯，果然係香醇濃郁，我食完都幾乎飲晒嗰湯。三寶就每樣都有兩件，牛腱心相當大件啖啖肉，非常之軟嫩入味，一咬就化開。牛筋亦煮得十分軟稔，反而當日嘅牛肚都煮到有D稔，好易咬，但係我自己會鍾意有D咬口嘅多D。揀左細麵係有少少失策，細麵易食嗦嗦聲，但係幼身麵質令成碗咬口都偏稔，下次嚟食記得紅燒湯一定要配手工粗麵，細麵留返俾燉雞麵啦。估唔到酸菜都係一大驚喜，咸咸酸酸相當入味，當你食麵食到有少少膩，食兩啖立即中和返，仲會有D提味，的確冇俾錯。最後嗰紅油抄手都嚟埋，一份有7粒，隻隻都夠大粒飽滿好靚仔，上面有豆芽菜同花生增加口感，而醬嘅味道更是香辣濃郁，過癮惹味，食到我個頭都有D汗出，正。…查看更多