chickpeaholic的个人专页

- 好早已經聽聞觀塘有私房中菜食，於是就同朋友一試夠竟！- 榮哥廚房私房菜店鋪，裝修睇落樸實無華，但其實係臥虎藏龍。店鋪入面有好多榮哥既獎項，真係不容小覷！- 今次既私房菜已經訂好哂菜單，我地只係乖乖地等食就得啦！- 小食率先黎到，第一道係榮哥自家甜酸齋同日本枝豆。個甜酸齋味道唔會好似出面咁得個甜或者酸味，反而恰到好處。枝豆不嬲都係過口癮之選，鹽水浸，無得輸！- 前菜總共有三樣：本地水耕沙律菜伴芝麻醬、雙色墨魚仔同茶燻流心蛋伴黑魚子醬配厚切茄子。- 賣相黎講，佢地真係睇落好精緻，仲各有特色！本地水耕沙律菜伴芝麻醬🥬，師傅刨左青瓜薄片黎包住水耕沙律菜，加上甜甜地既車厘茄同芝麻醬，非常清新！而雙色墨魚仔🐙就有原味同韓式辣味，前者有芝麻同麻油香，後者就有韓式醬味道，彈牙得黎又爽口。而茶燻流心蛋伴黑魚子醬配厚切茄子🍆，食落就有濃郁既流心蛋黃加上茶葉燻香，配上炸茄子同醬汁，勁夾！- 之後既慢煮海黃花配普寧豆醬伴黑魚子🐠同樣新奇，係意想不到既組合。慢煮海黃花上面有黑魚子同普寧豆醬，食落鹹香又嫩滑。- 然後兩款老火湯就跟著上，包括有原盅燉哈密瓜螺頭黑毛豚肉湯🍈同原盅燉川貝陳皮海底椰鱷魚肉湯🥥🐊。- 兩款係唔同層次同組合既味道，一甜一鹹。哈密瓜螺頭黑毛豚肉湯飲落好清甜滋潤，估唔到水果都可以煲湯！呢款湯除左有哈密瓜同螺頭，仲有黑毛豚肉排骨🐷，有肉味但唔油膩，湯渣都食埋。- 而川貝陳皮海底椰鱷魚肉湯就帶有川貝、陳皮同海底椰味道，加上鱷魚肉，絕對真材實料，絕無味精！- 跟住蝦球水芙蓉🦐🪷，係上湯蒸蛋配蝦球。食落清淡，仲勁滑溜，絕對係養顏菜式。- 蜜椒比利時杜洛克St.Louis橄欖豬肋骨，係一道中西合璧既菜式。除左食落有蜜糖既香味之外，仲焦焦脆脆，有肉汁又Juicy，齒頰留香！- 跟住食既招牌茶王燻雞，係全日焦點之一！炸雞皮食落好薄好香脆，連茶葉都食得，茶葉清香味配雞油，非常解膩！- 素菜方面，魚湯有機時令鮮蔬，食落簡單，但其實不平凡。因為菜係好嫩既，淋上鮮魚上湯，大人小朋友都鐘意。- 估唔到主食仲有他鄉炒米絲，即24個月西班牙黑毛豬火腿配福建莆田米粉！呢款米粉係用極幼既米絲、蛋絲、西班牙黑毛豬火腿絲、酸甜蘿蔔絲同甘筍絲製成，食落乾爽，條條分明，仲要唔斷，盡顯功架！- 最後，畫龍點睛既有時令薑湯湯圓，薑湯好辣，飲完驅寒暖笠笠，芝麻湯圓皮薄餡靚！…查看更多

同朋友去將軍澳海旁嘅Donki買嘢，順便食個晚飯嘅餐廳，行經你而家主打串燒嘅餐廳，門口一聞到吸引嘅串燒香氣，就忍唔住行咗入去。:)先嗌咗個蒜蓉烤茄子、蒜蓉粉絲烤扇貝、烤BB露筍，再叫兩杯飲品，檸檬紅茶、雜莓乳酪奶昔，同朋友食住邊慢慢傾。雜莓乳酪奶昔非常濃厚，飲落酸酸甜甜好開胃。茄子同蒜蓉粉絲烤扇貝，都好香蒜味，茄子外層燒得好香，帶子非常鮮甜爽口，一定要試下。其他嘅串燒味道都唔錯，配埋店家提供嘅辣粉真係好惹味。跟住嗌咗個烤牛舌、小牛肉5 串同Q彈小鮮肉，小鮮肉個名好特別，原來係豬頸肉，入口非常鮮嫩香脆，牛舌都好爽口，燒牛肉就夠嫩。大漠烤羊肉排上枱夠曬熱辣辣，表面鋪滿孜然粉同其他特製嘅香料， 羊肉肥美，值得一試。將軍澳海邊嚟講，人均大約$300，質素都唔錯 ，而且環境舒服，同朋友食串燒傾偈，都幾有風味。…查看更多

疫情差不多3年，已經好耐冇去過旅行。而且最近香港都開咗好多各式各樣的台灣餐廳。今次咁啱經過將軍澳嘅台式火鍋店，香味從遠處已經聞到，就打算一嚐究竟。我哋係嚟食晚餐，所以就各自點咗一個火鍋。呢間餐飯主打好多唔同口味嘅小火鍋，同埋係一人一鍋，咁就可以試好多唔同口味之餘又夠衛生。而今次我哋就叫咗招牌臭臭鍋同日式味增鍋，可以揀配飯定粉絲。 呢2款小火鍋嘅風味都好唔同。招牌臭臭鍋係餐廳推薦嘅小火鍋，入面嘅食材亦有好多。比較特別嘅就係火鍋入面有臭豆腐、鴨血、滷大腸同貢丸，都係一啲要喺台式火鍋店先食到嘅嘢。整體湯底食落非常香濃，係重口味人士必選。而且主要配牛肉，加上蘸醬一流。:)而日式味增鍋相對上就比較清淡，但就更食得出食材的味道。鍋物入面係以好多唔同嘅蔬菜為主，配上大大片嘅豚肉。整體嘅湯底同食材都冇咁油膩，可以連埋湯一齊飲都得。我哋亦加點咗台灣小香腸、炸魚皮、牛肉片同花螺。全部額外點嘅食物都好大份，完全唔驚食唔飽。咁食火鍋當然唔少得嘅就係飲品啦！飲品方面都幾多選擇，尤其有唔少嘅台式飲品。叫咗杯芝士涷頂烏龍同荔枝紅玉。芝士涷頂烏龍有好厚嘅芝士奶蓋，而茶就比較解膩，好適合食火鍋。荔枝紅玉則比較甜同有好香嘅荔枝味。作為台式火鍋店嚟講，質素都算幾好。而且食物嘅份量都偏多，唔使食放題都已經好滿足。不過餐廳位置相對較遠，要揾多少少路。…查看更多

今日經過將軍澳廣場， 見到呢一間新開嘅馬祖，主打台式藥膳火鍋放題。湯底都有好多款選擇，價錢唔貴， 我哋選擇左一個$223嘅Prime Grade牛肩胛肉放題套餐，有Prime Grade牛肩胛肉、西班牙無激素豬肉片，同自取嘅台灣沙茶牛肉、雞腿肉、魚柳。自取區仲有好多款甜品飲品同埋丸類蔬菜等等， 非常豐富。首先我哋選擇左椰子雞湯底及麻辣鴨血湯底，湯底透着香濃嘅藥膳味道，椰子清甜，麻辣鴨血就好足料，有唔少鴨血係湯底入邊。一落完單，兩碟牛兩碟豬好快上枱，Prime Grade牛肩胛肉，牛味香濃，肉質鮮嫩。西班牙無激素豬肉片好有驚喜，肉質Q彈，肉味鮮甜，而且脂肪比例剛剛好。自取區都有唔少嘅台式丸類同台灣腸，最特別嘅係有墨魚台灣腸同芫荽燒賣，選擇好豐富。我比較鍾意嘅係墨魚台灣腸味道好香，感覺好特別。甜品區同飲品區都有好多款，尤其雪糕嘅選擇非常多，仲有平時放題比較少有嘅口味，食多幾杯雪糕都回番本。整齊價錢唔貴，食物質素唔錯，選擇方面都好豐富，性價比幾高。…查看更多

同朋友食lunch，佢話想食燒肉，見呢間位於寶琳、主打和牛燒肉嘅餐廳都幾吸引，門口仲有大大隻牛候擺設，同凍肉雪櫃，擺滿吸引嘅和牛，睇到門面都胃口大開，一於去試下。一入到去都見唔少客人食放題，不過我食唔到太多野，就決定同朋友食套餐，一齊都叫左6種嘅日本黑毛和牛定食。外面就有個自助區，有多款沙律菜同飲品，仲有特別嘅茶飲同果汁。日本黑毛和牛定食一上檯都好吸引，有多款部位如和牛三筋、三角腹肉、牛肋肉、西冷、里脊肉等等。每片都油花十足，入口即溶。尤其和牛三筋同西冷，肥美得嚟，入口好多肉汁。:)三角腹肉同牛肋肉就比較有肉香味，簡單加鹽已經好好食。套餐仲包埋飯、味噌湯同酸酸甜甜嘅楊枝甘露慕絲甜品，今餐都食得幾滿足。…查看更多

今日經過寶琳新都城，咁啱見到呢間新開嘅餃子店，雖然係平日嘅晏晝，但都有唔少食客，餐牌上見到有好多款唔同嘅餃子，望落都幾吸引，所以就同朋友一齊去試下。:)我哋分別叫咗完元貝餃同松茸餃，兩款都叫咗煎餃，不過松茸餃就跟埋碗狀元九鼎湯，即係粉葛鯪魚鯽魚湯，飲落一啲味精都冇，非常有屋企嘅感覺。元貝餃煎得好香口，入口好多肉汁，入面有一啲金菇，都幾有咬口，亦帶有貝香，都幾特別。:)至於松茸餃就好有菇菌香味，味道好濃郁，再配上秘製醬料，食落都幾惹味。另外我哋仲叫咗個重慶鮮肉雲吞，雲吞嘅皮非常之薄，每一啖一粒咁，食得相當滿足。:)小食方面都唔錯，黃金原味皮蛋賣相好精緻，加上醬料一齊食，感覺好開胃。我就比較鍾意呢一個唐芹拌豆筋， 非常清新，我本身係一個唔鍾意食西芹嘅人，但呢一個小食味道相當唔錯，令人一啖接一啖咁食晒。…查看更多

朋友係潮州人，自從無左晚市堂食，都少咗出街食打冷，最近見到又社交平台有唔少人推介旺角呢間陳儀興尚潮樓，好似幾正咁，於是就拉埋我去試吓。朋友預先訂咗兩份手工菜，富貴石榴蟹賣相非常精緻，好似食緊西餐咁，用上蛋白皮包住蟹肉、蝦膠、豬肉等嘅餡料，充滿蟹肉嘅鮮味，加上清淡嘅蛋白湯汁，口感豐富得來，好有層次。打冷又點可以唔食滷水嘢呢？我哋叫咗一份鵝三寶，有鵝肉、鵝肝、鵝腸，底下仲有啲豆腐，滷水汁好香，但唔會太咸，最令我驚訝嘅係鵝肝入口即溶，好似食緊棉花糖咁，估唔到鵝肝可以有呢個質感，真係難以形容，鵝腸都好爽口，鵝肉肥美十足，三款都好入味。至於呢個豆醬煮海魚，用嘅係黃花魚，魚肉肥美有黃油，加上薑蔥同豆醬一齊煮，味道好鮮，有咸香。至於蝦棗併粿肉都好特別，兩款都炸得好香口，脆卜卜咁，粿肉係豬肉餡，味道有少少甜味，第一次食感覺好新奇。蝦棗就好彈牙，味道好香。:)另外天熱嘅關係店員都推介我哋飲薏米水，清甜得來，仲有去濕嘅功效，唔錯。而且味道唔會太甜，感覺啱啱好。整體來講食物質素都好好，而且環境舒服，感覺有啲古色古香，咁樣食精緻嘅中菜都係一種享受。…查看更多

禁左晚市堂食之後，相信唔少人都被逼留係屋企叫外賣，但食嚟食去都係啲茶記外賣真係好悶，咁岩見到將軍澳南嘅陳儀興飯店都有推外賣，於是就買嚟試下。叫左條元朗黃油烏頭王，一份澄海鹵水鵝同蒜香骨，賣相都唔錯，仲好細心咁附上好多醬料，同堂食一樣咁。:)黃油烏頭係凍烏頭，好似魚飯咁嘅食法，魚肉味道鮮甜結實，油香十足。鹵水鵝件份量唔少，醬汁好香但唔太咸，鵝肉嘅肉質有彈性，肉味好香。蒜香骨好香口，炸得好脆，排骨有肉汁，炸蒜好多，好岩送飯。整體味道唔錯，就算外賣都有水準，係屋企都可以打到冷，唔錯！…查看更多

新一年又係時候食好啲開心下，好在係停晚市之前都食到啲好野，今次朋友約我去尖沙咀呢間焱丸水產，環境好似日本嘅居酒屋咁，好有旅行Feel，真係好掛住日本。首先叫啲小食同飲品， 我就叫左白桃梳打，朋友就叫左Highball。味道都唔錯，尤其係白桃梳打，桃味好香，有唔少嘅白桃果肉。麻醬蕃茄豆腐沙律，主角嘅蕃茄好甜好清新，加上麻醬豆腐同羅馬生菜，非常開胃。辣味豆腐外脆內軟，炸得真係好香口，好惹味。炸蓮藕片好脆，切到好薄，好似食薯片咁。食極都停唔到， 送酒真係一流。刺身三盛分別有三文魚、帶子、油甘魚，仲叫左份甜蝦刺身，甜蝦都幾大隻，肉質爽口，三文魚刺身都幾厚，充滿魚油甘香，帶子味道好甜。壽司盛合都好豐富，有鯛魚、油甘魚、北寄貝、大蝦、同我最愛嘅海膽同三文魚子，海膽好Creamy，鯛魚清爽，油甘魚口感肥美。之後就留番個肚食我鍾意嘅甲羅燒，店員好細心咁幫我哋用爐火燒香。甲羅燒分別叫左黑松露口味同蟹味噌，兩款都好甘香，加上脆卜卜蟹籽，好正。跟住我哋仲叫咗個鮑魚殼燒，鮑魚好新鮮，上檯時仲識郁，店員只係加左簡單嘅醬油調味去燒，帶出鮑魚嘅鮮味，味道好鮮甜爽口。雖然有排都無得去日本，但同朋友食下日本料理都幾開心！…查看更多

約左朋友交收兼食飯，佢話帶我去食啲好野，原來係主打馬來西亞嘅蝦麵同喇沙嘅小店，雖然有排未有得去旅行，但都過下口癮試下！一坐低，店員就提供Qr code 方便客人手機落單。我就叫左湯底係辣味蝦湯嘅蝦肉肉片麵，揀左摻摻，有油麵加米粉，一次食到兩款口味，個湯底有好濃嘅蝦味，非常足料，仲有唔少蝦肉同豬肉片，細心嘅係蝦肉無殼，仲有好吸味嘅豆卜，正呀！朋友就食咖喱喇沙湯底嘅海鮮麵，都好惹味，湯底好香，仲有唔少海鮮，例如青口、蝦肉、魷魚，仲加左魚片同蟹柳，加埋摻摻嘅食法都幾唔錯。馬拉雞拼盤，有4川沙嗲雞肉串串燒同4 隻雞翼，雞串燒用雞髀肉，啖啖肉，沙嗲好多花生碎，口感好豐富，雞翼都幾香口，入口脆卜卜。白胡椒肉骨茶配油條，有好多件大排骨，好大啖肉，肉骨茶湯底幾香。最後仲叫左凍飲，分別係冰糖薏米水同青檸梳打，都好清新，呢餐食得幾滿意。…查看更多

同朋友去到K11睇戲，睇戲前打算醫肚，去到呢間主打川菜嘅鄧記，裝修不錯，坐得幾舒服咁，仲有窗邊位可以欣賞維港景色。可惜天氣比較凍，加上窗邊位已被預訂，只好留待下次。:)餐牌上非常豐富，真係花多眼亂，一於叫套餐，可以食多幾款，滿足貪心嘅胃口。醬香桃仁，食落香口酥脆，仲有濃郁醬香，帶有甜味，忍唔住越食越多。夫妻肺片，牛肚同牛展都好爽口，帶有少少麻辣，涼拌嘅醬汁恰到好處。陳醋黑木耳，醋香甜甜酸酸好開胃，黑木耳爽口得嚟好滑。鮮椒海鮮滙，非常有驚喜，用左八爪魚仔、帶子、蝦仁拌蔬菜，食落少少辣但海鮮好爽口，好鮮味，非常開胃。淮杞響螺燉老雞，湯燉得好清但好香，飲落好滋潤，雞一啲都唔油。宮保蝦球，椒麻香同辣椒嘅辣味剛好，蝦球好大粒，爽口彈牙，辣得過癮。水煮桂魚，店家用上桂花魚片加薯粉水煮，魚肉同薯粉都吸收左香辣味，好香嘅辣椒同花椒，魚片肉質滑嫩，好惹味，辣得嚟好過癮。四川辣子雞，廚師將雞肉切粒，混合大量炸左嘅乾辣油椒及腰果， 整得非常香口，辛辣刺激，雞肉炸得好脆，非常唔錯。乾鍋手撕包菜，今餐相對清新嘅菜，但炒得好有鑊氣，吸收曬醬汁，幾香！:)豬腸綿陽米粉，豬腸預先滷好，入味得嚟好淋，側邊嘅配菜同米粉吸收曬湯汁，味道少少辣但好影入口，唔太食得辣嘅人都會鐘意。紅糖糍粑，整成一條條咁炸起，賣相好精緻，入口外脆內軟，食落好驚喜，味道唔會太甜，黑糖味好香， 女仔會好鐘意食。人均5百蚊左右，但環境同食物味道都好好，值得再食。…查看更多

今日收工同朋友去到銅鑼灣嘅呢間蟹仙食海鮮蒸氣鍋，難得一見嘅仲要係食生日飯，一於就食盡佢。叫左個$438嘅尊貴海鮮套餐，有9款海鮮，有龍蝦又有2款蟹，仲有好多海鮮，越南嘅虎蝦、台灣九孔鮑魚、韓國蠔、月亮貝、紐西蘭青口等，真係非常豐富。平日晚上都有唔少客人，不過地方都幾大，坐得都舒服，唔會逼。而且店員仲主動幫我哋蒸餐具消毒，感覺乾淨衛生。拼盤一上檯已經好興奮，賣相好吸引！店員仲幫我地蒸海鮮，而且每款海鮮都有介紹，仲幫我地計時蒸。比較鐘意月亮貝同青口，海水味好濃，鮮甜爽口，同平時食既好唔同。越南嘅虎蝦都好鮮甜，大大隻啖啖肉，好多蝦膏。鮑魚口感彈牙，韓國蠔好肥美。是日重點當然係饅頭蟹同爆膏嘅奄仔蟹，饅頭蟹主要係食鮮味，肉唔多但就清甜，不過賣相好可愛。奄仔蟹爆曬膏，食落非常甘香，肉質結實啖啖肉，好滿足！食埋蔬菜同用海鮮蒸完嘅水煮成嘅粥底，粥底好有鮮甜海鮮味，真係食得好飽。最後椰汁燉官燕，官燕好足料，女士食好養顏。價錢人均4百幾，但就食到啲咁靚新鮮嘅海鮮，非常開心。…查看更多

天氣凍凍地，好多時都會想打邊爐，不過有時打邊爐又比較肥膩，蒸氣鍋都係一個唔錯嘅選擇。今日同朋友去到九龍城嘅呢間蟹仙食海鮮蒸氣鍋，一人一個399套餐，又有蟹又有龍蝦，仲有好多款海鮮，非常豐富。呢晚嘅客人都幾多，都需要喺門口排一陣隊，不過都算好快有位坐，而且一坐低店員就好快幫我哋消毒餐具，感覺好乾淨。:)海鮮拼盤亦都好快上枱，每款海鮮都非常吸引，又有鮑魚、刀貝、元貝、青口等。另一盤嘅拼盤就有膏蟹、澳洲龍蝦同琵琶蝦，原先應該有饅頭蟹，但由於今日冇饅頭蟹，就轉咗做琵琶蝦，感覺賺咗添！因為琵琶蝦好食之餘，出邊仲賣得好貴，用呢個價錢食到，抵食！店員幫手蒸海鮮嘅時候，都有溫馨提示每款海鮮嘅食法，尤其是青口唔可以加醬油，果然一試後，青口海水味十足，非常鮮甜，同一般嘅青口有好大分別。至於元貝都好鮮甜，而且清理得好乾淨。:)刀貝口感彈牙，虎蝦亦好有彈性，而且仲有蝦膏。至於主角當然唔可以忽略膏蟹同琵琶蝦，前者嘅高非常甘香，蟹肉結實，琵琶蝦就主要係食鮮味，入口香甜。龍蝦就啖啖肉，食到好滿足！食到咁上下仲有啲蔬菜同用海鮮精華煮嘅粥底，粥底吸收晒海鮮味，忍唔住食多幾碗。最後仲有個椰汁燉官燕做甜品，好香嘅椰汁味， 官燕份量都好多，夠晒足料。今餐食得好飽好滿足，最緊要係材料新鮮，用呢個價錢食到啲靚嘢，非常值得。…查看更多

今日收工經過波仔，諗住買定啲飯麵甜品，放係屋企個雪櫃，方便肚餓叮完就食得。點知咁啱見到佢推廣緊素食月，出咗幾樣新產品，就買嚟試下。今次買咗個葡汁雜菜飯、黑松露蘑菇意粉同藜麥花椰菜飯，仲要最後都叫咗個最近好興嘅北海道牛奶芝士卷蛋！本身對黑松露情有獨鍾，見親有關黑松露嘅產品都會想試，而今次都唔例外。所以買咗個黑松露蘑菇意粉，估唔到比想像中更有黑松露味，蘑菇亦好多。藜麥花椰菜飯同葡汁雜菜飯望落去同埋食落去都感覺好健康，但係又唔會話好清淡，葡汁雜菜飯個醬汁好好撈飯，香口惹味，藜麥花椰菜飯都好有驚喜，估唔到椰菜花扮米飯都幾似，食落嘅口感就偏濕，但健康得嚟又唔會好dry 咁，值得一試。而最特別嘅莫過於個北海道牛奶芝士卷蛋，甜而不膩。蛋糕個質感鬆軟，唔會話好乾，芝士味好香，連怕甜嘅屋企人都忍唔住食多幾件。…查看更多

呢日朋友生日話好想食小菜，加上佢本人好鐘意食蟹，於是大家就決定嚟到銅鑼灣嘅橋底辣蟹食飯。一嚟到當然要叫蟹啦，而孖寶嘅價錢就比較抵，$48x就有招牌菜辣蟹一隻，再加條清蒸沙巴斑仔，都幾抵食。:)橋底辣蟹一上檯，大家就忍唔住即刻起筷，炸蒜鋪滿蟹身，非常吸引，蟹肉結實鮮甜，食落咸香惹味，加上少少辣，食到舔舔脷。清蒸沙巴斑都好鮮味，簡單用醬油同蔥絲調味，魚肉蒸得好嫩好滑，味道同火喉都剛剛好。橋底小炒皇亦好香口，有蝦乾、銀魚仔、韭菜、菜莆、腰果等，好有鑊氣，香濃惹味，撈飯食一流。食到咁上下仲有糖水送，傳統嘅綠豆沙簡單但好味，煲得好杰好足料，真係食到好飽好滿足。…查看更多