陳儀興飯店 (嘉悅)

禁左晚市堂食之後，相信唔少人都被逼留係屋企叫外賣，但食嚟食去都係啲茶記外賣真係好悶，咁岩見到將軍澳南嘅陳儀興飯店都有推外賣，於是就買嚟試下。

叫左條元朗黃油烏頭王，一份澄海鹵水鵝同蒜香骨，賣相都唔錯，仲好細心咁附上好多醬料，同堂食一樣咁。

黃油烏頭係凍烏頭，好似魚飯咁嘅食法，魚肉味道鮮甜結實，油香十足。

鹵水鵝件份量唔少，醬汁好香但唔太咸，鵝肉嘅肉質有彈性，肉味好香。

蒜香骨好香口，炸得好脆，排骨有肉汁，炸蒜好多，好岩送飯。

整體味道唔錯，就算外賣都有水準，係屋企都可以打到冷，唔錯！