美艷三姑的个人专页

下午要到九龍城工作，諗來諗去都冇idea食乜，都係行番去熟悉嘅洋一，其實都有半年以上冇去囉！照舊有日本綜藝節目睇，兩個熟口熟面嘅服務員及一個待客十年如一極具性格的事頭婆(我諗係呱！)。都有啲親切感嘅，因為有啲嘢唔變係好嘅，如人事方面，都已經接受佢哋嘅有性格招待，畢竟我已經幫襯超過十二年。以前舊舖好細，二人枱一條走廊放四張，其他為大party枱，大party為八人啦！多啲人都坐唔落，以前天氣凍時食個烏冬鍋，已十分滿足，也許當時年紀小。以前食物種類冇現在咁多，至愛係牛肉麵、海鮮燒餅、烏冬鍋，百吃不厭，每星期都去至少一次。今日食返，冇咗以前嘅感覺，牛肉麵的麵變得硬，牛肉不再有彈性，碗麵我竟然食唔哂！？係唔係師傅心情欠佳定其他原因呢？我並唔係惡意批評，我只不過係有啲關心佢哋啫。只係出自真心啫，話哂都係叫做有感情吖！然而，我諗自己仲係活在過去.....其實，有啲嘢變咗就係變咗，人哋洗唔洗同你解釋呀？又或人哋都唔需要你嘅關心。我變得老套了。如果你有同感的話就送你Asha的360degrees...We still live in yesterdayMany today they waste awaybut nevertheless it's never lateSee the time have changedI thought you knew that this world will never ever wait for you....…查看更多

講起去深水埗劉森記食麵之前，肥仔同我哋去綠林食甜品，佢話食過幾次都ok，就走去試吓。嘩！十一點多去到，仍然爆場，睇落ok喎！我自己點咗燉奶同榴槤班戟，小茶羹一落燉奶面，較硬，冇嗰種一吉即破嘅感党，食過一口，不夠滑但仍有奶香，整體感覺一般。榴槤班戟聞落好香，吉落去雪白嘅甜忌廉首先彈出，再見到淡黄色的榴槤，忍唔住要食一啖先，皮薄，榴槤蓉尚算鮮甜，但食到尾榴槤嘅甜味已被甜忌廉蓋過，最後一口榴槤竟然是微酸！可能榴槤未合時，到五月品質可能會較佳，只收$16，可算食得過。價格便宜選擇繁多，下次再試一啲較合心意嘅糖水。我都相信眾多食客嘅食評，咁多個"笑"，等我比心機刨吓有關綠林嘅食評先。…查看更多

放工後肥仔去深水埗綠林後覺得肚餓，叫佢介紹啲嘢食，佢指咗我哋去桂林街一帶揾食，話有一間食蝦籽麵好出名，但又唔記得叫乜名，我哋揾吓揾吓就揾到嚟。我哋分別叫咗云吞蝦籽撈麵及淨蝦籽撈麵，麵彈牙爽口，撈麵嘅豉油較淡口，並沒搶去蝦籽的咸香，十分夾，云吞雖得3粒，但有少食多滋味的感覺，而且頗為爽口，若加多少少豬肉會更鮮。試想若給你10粒難吃不堪的垃圾云吞都只是收你同樣$28，你會選擇誰家的云吞蝦籽撈？我肚子quota有限，當然我會選只得3粒美味云吞那一家- 劉森記。整個吃的過程都十分流輰，加上服務員的良好態度，令人吃得開心。步出店子，與老公散步回家，一路上，口裏仍留着蝦籽的餘香，令我倆回味不已，在整個歸途上亦感到幸福和滿足。令食客得到如斯感覺，這才是食店最大的使命。…查看更多

好彩有coupon啫！否則真係揼到砰砰聲！！！Anyway，都多C小姐嘅coupon。本人唔係好識飲咖啡，但同老公有飲咖啡嘅習慣，起床兩個鐘內要飲杯so call"自家製"熱黑咖啡(其實係"自"已"家"裏按"制"嘅全自动咖啡機而已！)，加埋咖啡糖一包，糖唔攪得好徹底，快飲，飲到底嗰啖最甜最正，嗰日就精神哂.....Sorry，話題離咗九丈遠，只不過分享吓啫！講番Pacific coffee 先！早上11時去到，人不多，有sofa位坐，舒服，有陽光，開心。坐落一陣後，攞住兩張free coffee coupon叫咗兩杯黑啡，齋飲太寒酸，咪買多件萍果卷。對住杯咖啡，覺得唔多對勁，少少燶味，唔聞咁多，飲嘞，唔知係咪本人對咖啡認識膚淺，唔知嗰啲係燶味定係炭燒味！只不過叫一杯普通咖啡，斷估唔會比杯炭燒你咁筍呱？！又燶又酸，冇咖啡嘅應有香味同甘味，只不過係杯有啲怪味嘅black water!都係飲唔哂！唔想嘥嘢都唔得。都係返屋企噤制啦！Huh Huh！…查看更多

食川居食咗有八、九年，由舊址洗衣街食到現址，對佢十分有感情亦十分愛戴。嗰時食米綫都唔係咁普及，覺得煙煙un un好得意，咁就鐘意咗，都係因為川居。以前四眼仔老細成日看舖，而家少見咗，可能因為有分店關係，好事嚟嘅！好鐘意燜湯湯底，別處難尋，好濃味，我諗應該落咗多款香料泡製，加埋配料新鮮，米綫份量多，食得好滿足。其他湯底都試過，如清湯、沙嗲、酸辣，而酸辣都幾好，夠哂酸，諗起嚟啲口水都喺牙骹滲出嚟，加埋啲炸醬、菇類已經夠豐富。有食客話可能因為通漲，啲料少咗，係，你如果keep住每星期有去街市，唔好多，一星期一、兩次，啲食物係不斷加價，開間舖唔淨止計食材價格，如舖租、人工、水電等都有加冇減，所以都明白配料份量可能會少咗！ok啦！可以接受啦！最正最抵食時段當然係下午茶啦！卄蚊鬆啲已經有交易，份量雖比正常時段細，但都可以食飽，又食到燜湯經已心滿意足。仲有抵讚嘅係裝修後間舖唔同哂！醒晨哂！…查看更多

有雜誌寫過，人多？預料中事。其實我都係睇到專訪先去幫襯。一共幫襯咗三次。我哋第一次叫兩個馳名嘅牛腩飯，一客跟薄餅，一客跟飯，跟飯正啲，可以撈到啲汁，啲汁咁正，洋葱好多，一於唔好嘥，啲汁係稀嘅，但去過重慶大廈嗰啲都係稀稀哋嘅，所以一啲都唔出奇。幾夠味吖！第二次叫牛腩同魚，啲腩一樣咁稔咁好味，啲魚係鯧魚，好腥吓，都係食牛腩好啲。第三次叫牛腩飯外賣，坐喺屋企自自在在食最好味！…查看更多

放假同老公出街食飯，決定去一休，因為兩星期前去過食咗啲壽司同特價三文魚刺身，都覺得ok好食，雖然唔係咁好坐，但都冇諗住坐好耐，是但啦！食完就走囉，所以決定再去。今次叫咗豆腐牛肉窩、三文魚明太子沙律、三色魚生飯、2份特價三文魚刺身。下次再去嘅話都係叫壽司及魚生最穩陣，事關個窩認真唔掂，啲肥牛肥到我從來冇見過，啲肥油浦哂喺面，根本冇可能食到，食咗啲豆腐後都冇再食過。老公食魚生飯，個碗係大，飯係多，但要好味至得！啲飯醋味不足，飯身太濕，粢吓粢吓咁，好彩啲魚生仲可以。沙律個樣太求其，是但將兩塊生菜放喺底，on top有啲青瓜絲、明太子、三文魚切粒、蟹籽，啲菜嘅size太大，究竟有冇諗過客人放唔放到落口，咬三四啖先可以食哂一片菜葉，啲沙律醬味唔夠酸同香，除咗食到成咀白哂外，食完都唔党食完沙律咁。最好都係啲特價三文魚刺身。的確係好多人去，好逼人，但上菜唔算耐，都係食完就走嘞！都會再去，不過唔會再叫其他食物，都係淨食魚生同壽司lu！…查看更多

無疑係幾好味嘅！啲泰國姐姐好好人，咪咪笑，唔會好似對面"小X谷"啲阿姐烘燶面包- 黑口黑面。又平，食得開心。推介：辣椒膏炒蜆- 好香椰汁味，靈魂在於乾葱起鑊加埋金不換嗰陣獨特香味，啲汁勁正，大蜆反而變咗綠葉。辣度可以接受，蜆不多。醃粉絲沙律- 勁多辣椒、乾葱、西芹等香菜，撈埋啲海鮮、肉碎，而粉絲索哂啲酸辣汁，非常惹味。都幾辣，嗜辣嘅我都辣到聲。酸酸辣辣好醒胃。燒雞全翼- 燒得夠乾身，但啲肉仍然juicy，不要點泰式雞醬，點泰式海鮮汁就哂香！以上三寶我次次都點，2人用，食完啲粉絲都夠哂飽。唯一欠佳就係味精多，有時要飲多兩杯冰飲。呢招係咪佢哋嘅策略呢？咁就不得而知嘞！*同意之前食客之批評- 燒牛肉太嚡，太硬。…查看更多

農曆年尾有friend生日，我同老公提議去鳳城啦！事関老公好鐘意食乳豬，趁機提議一下啦！所有朋友都話ok，嗰個星期六，我哋兩公婆滿懷高興咁親身走上去訂位，走過去收銀台隔離個counter喥訂定星期一嘅位，我明知道年尾多人團年，提早三日訂定就冇問題啦！個叔叔話ok啦！訂咗8:00，本想訂埋蟹鉗但已經不接受order因為手頭上嘅訂單太多，明嘅！年尾嘛！三日後，行去先攞位，諗住坐落等friend啦！點知上去姐姐話揾唔到我個booking，叫我哋等吓啦，好快就有人埋單，老公大為不悅，事關我哋親身走去訂位，叔叔又有寫低我哋名同電話，分明將我哋嘅八人枱比咗其他客人啦！同姐姐再講都話好快好快，又話：你睇！人哋都係訂咗位咪一樣要等.......但我個point係你話我冇booking嘛！攪到鬼咁興！嬲死人呀！！！！一個一個friend漸漸來到！等咗30分鐘都係企喺度，見到幫我哋落booking嘅叔叔閃咗去！好叻仔！咁點啫？！咪又繼續等囉！一共等咗45分鐘，同之前留言嘅食客都差唔多！現在呢一刻我都有番啲安慰，因為I am not alone!都有人同我咁惨！喺度呆等囉！係！嘢食冇令一衆朋友失望，大家仲因為等得耐而叫咗好多嘢，食得飽飽亦冇因為齋等而影响咗心情，傾得好開心，八個請一個，埋單，都係每位$200。走嘞！咦？好似當我哋九個人透明咁，冇侍應望過我哋亦冇一聲"多謝"，咁最少都"bye bye"吖！冇喎！我諗我哋幫趁金額太少，最衰我哋比tips太少啦！我哋應該先檢討吓自己先，係咪呢？鳳城酒家？！…查看更多

嗜吃cheese cake的Monica介紹了唐三樓給我，話係有心之作，話點都試吓啦！上到去見cake的選擇不多，有兩款，明解，小店嘛！點了各一款Cake- New York Cheese Cake & Mango Cheese Cake。先吃Mango，嘩！好香好滑，事關芝士味不太重，不會搶去芒果的香味，3月份芒果開始當造，特別甜！而吃此cake的感党好似吃布丁一樣滑。十分愛！飲杯蓮花茶後，傾陣，再吃New York，好濃好結實，用义一吉亦不見鬆散，最怕食到啲散收收嘅所謂Cheese Cake，不知吃到麵粉還是吃到少得可憐的cream cheese!但唐記(唐三樓)真的沒令我們失望，亦籍此機會讚一下老Mon！果然好介紹！跟cake還有唧花曲奇數片，鬆化，吃罷不覺油膩。應鬆的鬆，不應鬆的不鬆，抵讚！加油！該晚傾埋啲八婆事，傾了兩小時才收檔，老Mon是會員，價錢平一點，埋單兼付tips都只是$110，她介紹我免費入會，下次自己來便收會員價，正合我呢啲女人仔心意！除了口淡淡想食糖水外，上"唐記"吃件homemade cake飲壼香茶，聽吓Bosanova，又是另一不錯的選擇。…查看更多