食唔停口的个人专页

母親節選咗嚟呢度剧扒（鉄板加$10，但因為我唔鐘意有油煙冇加錢叫）可能八點比較晚，落單時待應已經告知冇薯菜，唯有選意粉，等待時八卦望下鄰座食緊碟生果沙律配什菜，估佢都應該係叫扒餐，之後待應有通知西冷冇曬，咁就換咗肉眼，餐湯係一碗紅色只有酸味的湯，我唔肯定佢係羅宋湯定係咩，冇油，好清，唔知係冇貨賣加水加醋再出餐定點？之後來頭盤，原來係什果生沙律，唔係罐頭什果，仲加咗椰果添，可能冇曬什菜，份沙律好大碟，呢個時候待應通知冇曬意粉，咁唯有改曬配白飯，首先上的是什扒配卡邦尼汁，目測都正常，再來份T骨配牛肝菌汁，大大件味道唔錯，白飯份量都好多呀！呢個時候待應又通知肉眼冇香芒汁，咁又改埋做牛肝菌汁啦！之後最後一份扒都上了，肉眼味道都唔錯！不過飲品係唔包響餐度要半價收費！…查看更多

新開張幫襯過一次，買了小丸子和大板燒，都係小丸子吸引好多，熱辣辣，外脆內軟，下午茶最佳選擇，即叫即做，係等得耐啲（約15分鐘）以前一直出旺角吃日船，最近去了，水準下降咗好多，以後來呢度就食到好味小丸子…查看更多

之前來過食下午茶（燒鵝，鵝油撈粗，义燒煎蛋飯，加個生菜冬菇，好味又扺食，今次晚飯一行三人，一坐低已經送三碗例湯，然叫咗兩人餐，麻辣手撕雞，醬豬手，涼拌雲耳，灼菜芯，鹽焗雞腎，再加碟义燒燒鵝飯，麻辣手撕雞幾惹味，鹽焗雞腎我覺得淡味咗啲，醬豬手都可以（可能我食嘢比較重口味）反而我係最欣賞個涼拌雲耳，帶點酸味好醒胃，义燒同燒鵝依然好好味，燒鵝皮係好脆，仲有點煙燻香味，最主要醃鵝的調味和香科好足（唔知點解現在主打燒鵝的餐廳係醃唔夠味，皮亦唔脆）呢間我食一次已經愛上了（似返细個時吃的味道呀)…查看更多

聽咗昵間響大埔好有歴史，年頭知佢響觀塘開分店，一路都冇經過，今天去海濱公園行完，諗住經過駿運去買啲燒賣粉果，原來休星期日嘅，行到巧明街先醒起粉果佬好像開響附近，就搵下佢試試，原來座大廈好新，入口都易搵，店內企理乾淨，有個玻璃房見到姐姐搓皮包粉果，緊見冇咩人，就買咗$20/10粒燒賣，$12/3粉果，立即試下先，燒賣好實冇魚肉味（7仔好食過佢），粉果細細隻啱女人食，味道尚可，皮簿，如果唔係經過都應該唔會有下次…查看更多

星期五，亞女學校假期，打同佢去離島行下食下，見有成三年冇入長洲，之前又見有介紹呢間粥店嘅片，就打算八點一早入來（因為佢收12點），來到十點，見有幾枱客，我當然要點我的例牌：艇仔粥，炸両，亞姐話佢哋冇炸両只有油炸鬼同腸粉，咁我就點了油炸鬼，個女叫肉丸粥，首先來了艇仔，我比亞女食先，佢即話好好味（佢平時唔食粥架，我都好奇怪）然油炸鬼，肉丸粥，都到了，油炸鬼正常啦，因炸起已一段時間，味道唔係特別突出，脆度亦唔覺有，普通啦！肉丸比較實，彈牙嘅，唔似自己打？粥底真係綿同香，有甜味，唔太咸，冇味精，似屋企人用心熬煮比家人食咁，然我女比返碗艇仔粥我，用料新鮮，料份量都多，有魚片絲（呢個原來係艇仔粥𩆜魂）魷魚，豬皮，因為打算響𡷊上再食下其他小食，所以堂食就食住呢啲，見佢切比客人啲鬆糕好鬆軟，我小時候食過印象中有啤酒味，小甜，我唔係咁鐘意，但見到咁靚又想試下，陳皮紅豆糕又似幾特別，就買咗呢兩糕又一件打包走，落船食，鬆糕真係好軟彈，但我真係唔鐘意呢個味道（可能食慣馬拉糕）陳皮紅豆糕，真係好香陳皮，多紅豆，係好味嘅！質地偏實（我唔知紅豆糕係咪要實先好味，定應該似馬豆糕偏軟嘅呢？）…查看更多

7-8年前響牛頭角返工，每次食晏都係去附近茶記，貴又唔太好食，有次行遠啲，見到牛下有熟食中心，入去睇下先，見到鑑記粥品，見天氣熱覺得食咗會仲熱，而且粥，腸粉，都早餐食啱啲（之後有去食過，佢都好味又經濟，好像之前已經寫過食評）之後見八記，有好多人叫碟頭飯，炒粉麵，我也見人叫咗碟越式米紙卷（正確叫春卷定粉卷？），炸雞翼（呢個佢冇寫出店面的）越式粉卷都仲有張相片掛出來，當時係夏天，唔太我點了酸辣湯雲吞同越式米紙卷，雲吞係正宗上海菜肉雲吞，大大隻，多菜多肉，啲肉又唔會嚡（有時去啲上海店食的雲吞都冇咁好味）酸辣湯夠酸夠刺激，個湯的稀稠度啱啱好，其實就咁食呢碗嘢已經夠飽，但我冇改錯網名嘅，食唔停口，咁樣我點會滿足，食埋越式紙米卷先得，包都大大碌，裡面有生菜大蝦，金不換，蘸埋個紅椒蒜蓉酸汁，非常清涼消暑，之後我都仲有再去試上海排骨粗炒，（好有鑊氣，調味又好，因為總覺得佢有秘制調味，外面食唔到呢隻味）乾炒牛河，炸雞翼，西多士，檸茶，奶茶都唔錯，不過呢幾年見佢的食物淡味咗，同少油咗（可能遷就返少油少鹽的飲食文化）香味係差咗少少，不過都唔會令我唔再嚟嘅！因為不是街坊，我要去開淘大先會尊登行來呢度食！…查看更多

嚟呢頭上堂，響呢度搵下嘢食，見到呢間粥店，舊式裝修，應該好有歷史吧？叫咗碗及弟粥，炸兩，粥夠綿，又夠味，內有豬膶，豬肚，豬腸，肉丸，豬膶夠滑，豬肚爽軟，豬腸粉香，肉丸應該是現成貨，如果肉丸用肉碎自己打就完美嘞！炸兩的油炸鬼夠脆，腸粉夠爽滑，加麻醬，甜醬，麻芝好好味！我家附近只有一間連首飾粥麵店，食到懷疑人生，去度呢啲舊區小店先可以食到真功夫，希望繼續留傳呀！我回家第一時間同我仔講，而家仲可以食到呢啲味道，叫佢去開呢頭要試下（因為試過買炸兩俾佢，因為車程要成45分鐘，返到屋企浸林左）…查看更多

食咗有一段時間了，之前冇來試食評，見呢排有時間就補返，某個星期六中午，因小孩上完興趣班就帶佢去駱駝漆搵嘢食，而家啲細佬仔真係幾識享受，話要坐得舒服先入去食，因為有好幾家店是有背或冇背木椅（有部份食店的食物我係想試架，但係見平時唔係咁多帶佢出街食就比佢楝下啦）佢經過呢間見有卡位梳化坐，我又見食物都合小孩食就入去試下，小孩叫了炸雞定食，我叫了生薑豚肉定食，先吃椰菜沙律，份量算多，味道係正常的沙律醬啦，味噌湯都ok，但炸雞啖啖肉，炸得適中有肉汁，好味，生薑豚肉飯也不錯，仲有餐飲，我叫了熱㗎啡，小孩叫了凍檸茶，吃完飽飽的，食完又可以坐一陣休息一下，因為孩子上完興趣班都有點倦，比佢輕鬆下食下好味道的東西，休息下都好，見店內開始多人，我都埋單走人了，唔記得有冇加一，不過員工唔會刻意打散找續，似乎冇意思收貼士，但是我都比咗小小貼士的，因為服務都唔錯！…查看更多

見到食評吸引來食紅燒牛肉麵，一個人來見到手午餐是套餐形式包一份小食同飲品$79 ，本來只是想試牛肉麵，但係好似冇單叫咁，可能其他時段單叫都係$79，午餐送小食已經係優惠？小食叫了麻辣涼拌什菇，熱紅棗圆肉茶，先來一豉油碟大小的涼拌什菇，冇咩麻辣味，菇似水烚，味道也淡，因為汁料也是水水的，失望！紅燒牛肉麵湯底唔夠濃冇咩茄膏味，但湯底係唔味精的算可以，牛肉質地也唔差，麵質就普通，冇嚼口，再來杯水杯份量的圓肉茶，原全冇味，飲唔到紅棗圓肉味，好淡，係指咪煲好再溝水？試過一次便夠，冇回頭！咁嘅價錢食呢啲會失望，如果$50一碗牛肉麵就可以考慮，但似乎係要$79/一碗，唔值！…查看更多

任食兩小時$168/位，全包，仲有藍妹啤酒任飲，呢個價錢冇咩要求，訂咗兩位7:30，入座時話會計時間，見朋友未到就坐響門口的等候區等一等，齊人才入座，坐低見到有幾枱，有冰桶裝住飲品，似乎好多都為啤酒而來，落單唔見有飲品欄，問咗職員，原來要自己去大雪櫃自取，咁就仲方便我可以冇限量添加，又唔會煩到樓面，不過我見有冰桶，但冇冰水或冰塊提供，然後問問侍應，佢叫我先取回座位，佢會將冰塊送到，果然佢都好快送到過嚟，先吃雞煲，配菜香料夠香，雞件亦夠乾身香口，可能見我得兩位，用咗鴛鴦煱上，另一邊已經有火煱湯底（我哋要中麻辣）由於雞煲個邊冇咩汁，開住個細火都好怕會燶，極速食完，啲雞就加水打邊爐了，限送的活蝦新鮮好味，配料選擇唔太多，但如果要兩個人食勻所有款式都真係會有難度，最後坐到差唔多十點，見佢哋都開始收拾，我哋又食得飽飽，就走人了，總結坐得舒服，服務又好，可以再來，唔知雞煲有冇得添加呢？我最鐘意都係個雞煲非常惹味…查看更多

早兩年食完，冇時間寫食評，今日得閒就補寫番，話說冬天某夜帶亞女上完堂經過，見到呢間店宵夜時段長期響街上坐満客人，好多都叫煲仔飯，我又好耐冇食過，天寒地凍入去食返個暖下先，入去坐得都好迫，不過明白唔坐迫啲，佢哋難追收入，叫咗個滑雞臘腸煲飯飯，一個蠔餅，先來蠔餅，厚粉唔鬆脆又多油，味道又唔咸，又冇芫茜香味，要點魚露先食得到，但由於太油，最後食唔晒，到煲仔飯到，冇飯焦香味，雞件亦唔夠味，加煲仔飯豉油，但係豉油又係冇味，埋單要成兩佰幾，真係又貴又唔好食，唔明點解咁多人坐響街邊食（可能貪方便吸煙同埋佢收得夜）可能觀塘冇咩呢類打冷食店，變相佢水準差都依然多客…查看更多

第一次太早到，店員話只有早餐，我見只是一般茶記西式，冇試，今次較正12點到，叫了一碗喇沙，一杯榴連白咖啡，喇沙0k，湯底不是特別濃郁，飲品我覺得榴連好似唔多夾咖啡..因為呢只開星期一至五，仲要收3:15，唔係要尊登請假都來唔到吃，所以叫咗大細腳撈麵和豬皮外賣，回家等亞仔放學做下午茶，大細腳好入味，豉油汁都好好味，略嫌多油，豬皮又係好好味，可以呢兩個配搭比較油膩，亞仔覺得有點膩，所以評價唔高（但我自己就覺得好好味）…查看更多

亞仔上網找了另一家台湾食店，但個間的位置較遠，見到呢度近下車位置，而且商場新，就來試下，裝修唔錯，因為人唔算多，坐得都算舒服和靜，看菜單剔食品，叫咗肉燥板條，大腸麵線，燒茄子，豬蝴蝶腩，墨汁香腸，共五款，我以為各人一碗主食加三款配菜應該好飽，先來碗大腸麵線，碗是一手拿得曬的飯碗，眼見得兩片簿切大腸，味道淡而偏甜，再來板條，味道比麵綫好，但食量一樣少，再來是墨汁香腸，亜仔香普通台灣香腸一様只是黑色罷了，豬蝴蝶腩爽有咬口，燒茄子冇咩味，好差（我以前響另一家吃的是有醬汁煮過的，我喜歡呢款茄子）仔要追加魯肉飯及一杯熱桂花胎菊，魯肉飯偏甜，但味道唔錯，我覺得最惹味好吃是呢個…查看更多

今日過晒午餐時間仲未吃飯，本來想去格離go go舒服坐食下午茶，但一個人又趕時間，見開咗呢間，因之前響淘大分店吃過海南雞飯，味道0k，見呢間舖細細快餐式，但求快吃，也猶豫肉骨茶与元蹄選邊款好，最後叫了一份鹵水元蹄飯下午茶餐30元，店員打包好曬比我（原來冇堂吃架？）我走去搵個位坐，打開外買盒，只見元蹄炆到爛碎，心想外表都唔重要了，希望味道好，飯好熱，個鹵水汁唔香，味淡，而且汁少唔夠撈個飯，我初時以為下午茶餐有杯熱茶，原來冇，碗飯也沒有加一條菜，我知30元唔應該咁多嘢要比到我，但真係覺得我響屋企吃格夜餸配白飯都好味過佢，還好我沒叫正常餐份量，吃下午茶餐試試佢，慳返＄10…查看更多

第一次吃叫咗個麻辣魚腩米線，湯底濃郁，魚腩夠入味，夠辣夠過引，直覺認為麻辣燙應該合口味，似返深圳街邊檔的勁度，第二次吃酸辣粉，感覺已經冇第一次咁大驚喜，但依舊心內仲想比多次機會佢，祈待它的麻辣燙，到第三次去，今次真係點麻辣燙了，點知，麻辣燙的湯底好淡，就因為最後一次嚐過麻辣燙後，我已經對呢間食店冇留戀感，講真價格已經比第一次貴咗，份量少咗，而且裝修環境，衞生，待應比我感覺都唔吸引吧！我覺得呢個價錢我仲有好多選擇，可以坐間舒服，食完身上冇油煙味的食店呢…查看更多