Remmik_kk的个人专页

係咁多間牧羊少年裏面，最鍾意都係葵青劇院呢一間嘅設計。天氣好嘅時候，可以坐喺出面感受下清幽嘅環境，有時又可以坐喺入面，聽住音樂同朋友隨心傾吓計。今日同朋友坐咗喺室內，入面裝修好文青。有啲旅遊書同postcard，燈光比較昏暗，但係每一處嘅設計得好有心思。我叫咗個窩夫食。朋友就叫咗一份小食拼盤。然後我再嗌左伯爵茶。牧羊少年嘅食物一直都好有質素，窩夫脆脆地，加上綠茶雪糕味道剛剛好。士多啤梨都好新鮮。朋友鍾意窩夫加cream，我個人就唔係咁鍾意食cream。 朋友嘅小食拼盤就係炸嘢比較多，有炸薯條，同埋如果冇記錯好似係炸墨魚丸，朋友都覺得滿足…查看更多

平時經過見到佢外邊有啲花花草草，有時會有人攞住個結他喺度彈，已經覺得呢間野好文青，最近終於有機會試吓呢間餐廳。呢日我係去食晚餐，嗌咗一個芝士焗豬扒飯，佢仲有一個沙律同埋餐湯。然後我再嗌多左個薰衣草茶，打算食飽飯之後一路睇書一路飲茶，可以坐多一陣。餐廳比較細，平時夜晚都唔覺得佢好多人，可能嗰日咁啱週末，就比較多人，冇出現我想像中個種可以安靜睇書食飯嘅環境。我坐咗係側邊比較高嘅bar枱。服務員遞左支水比我，之後就上咗沙律同埋餐湯。個沙律好清甜有生菜粟米同埋蕃茄仔。之後就食咗個芝士焗豬扒飯。成個飯好好食，豬扒好大塊，味道唔會太鹹，口感也不會好好un，飯底係用番茄醬炒過嘅，甜甜地。因為已經食咗沙律同埋飲咗湯，最後個飯我係食淨左四份一。最後薰衣草茶其實冇咩特別。比較特別係佢個茶壺可以禁上禁落，然後壓啲茶味出嚟。最後成個晚餐用咗差不多$120，食物嘅質素加上餐廳嘅環境，呢個價錢都算係公道。希望下次有機會再去嘅時候唔會咁多人，可以文青一下～…查看更多

因為屋企冇咩空間嘅緣故，一直都希望搵到啲舒服可以坐一日嘅工作空間。最近都嚟咗metime幾次，每次黎通常都係嗌杯嘢飲，或者食少少野加杯野飲，平均$50坐足一日。我特別欣賞metime係一個比較寬敞嘅工作空間，枱同枱之間唔會太近，亦有叉電位support用電子產品。店舖入面有啲board game可以玩，有啲書可以睇，口渴亦可以自己攞水飲，洗手間整潔乾淨，學生仲有九折優惠。食物方面，同負責人了解過，佢哋希望呢度係一個共享空間，所以提供嘅食物款式唔會太多。我個人認為佢哋嘅食物都比較簡單，冇刻意搞好多花款整到好複雜，但係作為一個工作空間，可以喺度食一餐半餐，都係唔錯嘅選擇。飲品方面，佢哋嘅茶同咖啡都幾好飲，咖啡會有拉花，幾有心思。其中一日食咗vege all day breakfast，有茄汁豆，半個牛油果，炒雜菌，少少沙律菜，多司同埋一隻煎蛋。擺得幾靚，落單之後大概15分鐘就有得食。另外仲半價叫左一杯Earl grey tea，refill左三四次都仲有茶香。希望大家多多支持呢啲工廠區嘅小店！…查看更多

晚上喺旺角遊蕩，於是同朋友想去茶聊食飯傾吓計。餐廳嘅設計好靚，佢係一樓嘅，一出𨋢入門口就見到雲石地板，轉入去就見到望向街外嘅大玻璃，有個好闊嘅cashier。坐低左之後，睇啱食咩就行出cashier俾錢落單，之後服務員就會送嘢食同飲品過嚟。同朋友夾左一個飯同一份甜品，然後一人嗌左杯嘢飲。食下食下先諗起未影相，所以淨係影咗個甜品同埋自己杯嘢飲。因為本身鍾意食牛油果嘅緣故，覺得呢杯牛油果飲品都幾好飲，唔會好漏，入面有啲好感好似雪耳嘅嘢，幾好食。疏乎你嘅口感好鬆軟，好有飽足感。佢本身有少少甜味，加埋糖漿就更加甜，如果唔鍾意食太甜嘅人可以唔加糖漿就咁食。 餐廳嘅位置比較偏僻，客人唔係好多，食物嘅質素幾高。不過佢嘅嘢食價錢都比較貴，一個飯可能要$100-200，間唔中想食餐好，或者想同朋友坐低舒服傾吓計，呢度係唔錯嘅選擇 。…查看更多

適逢放假，同朋友出去港島區行吓，坐下叮叮放鬆吓，於是就嚟咗呢間餐廳食lunch。一入門口見到好多好靚嘅牛角包，仲聞到好大浸蘑菇味。其實我哋本來就係為咗佢嘅mushroom toast慕名而來，結果嚟到已經賣晒lu唯有下次早啲再嚟試啦。於是，我叫咗個avocado Benedict加Bacon。有蛋，有煙肉，有牛油果，再加埋benedict sauce，食完勁飽。至於個味道我冇太大嘅comment，普通嘅Avocado benedict。 朋友叫嗰個係Baby Kale&Avocado salad，普通羽衣甘藍、半個牛油果、有啲cheese，加兩塊麵包。本來都想試吓佢最出名嘅個牛角包，但係食完真係太飽，都係下次再試啦。至於員工服務方面，間餐廳比較迫同多人，啲員工都比較忙。但整體上來講餐廳嘅服務都OK嘅。…查看更多

早排見呢度人少少，而且心血來潮想飲芝士奶蓋茶，所以行咗入去食午餐，歇一歇。呢間野本身係喺戲院隔離，主要都係做炸雞汽水呢啲睇戲小食，都冇期望佢嘅午餐會好好食。但係食落真係有好大改善空間，同埋個價錢同質素落差太大。首先，我嗌左個台式肉操糖心蛋飯。個飯係凍嘅，啲肉操都係凍嘅，而且有浸苦味，我懷疑佢冇落鹽。成個飯得隻糖心蛋正常少少。見佢新開，啲員工嘅態度都幾好，都可以俾多次機會佢嘅，食物質素一般都接受啦。不過$58真係有啲太貴啦，收$30好啦呢個飯😂之後臨走之前，我嗌左個奶蓋四季春。可能台式飲品比較易整，呢杯嘢飲嘅質素同一般台式飲品冇咩分別。個奶蓋幾香幾滑，啲茶幾清甜。最正係可能因為呢度鋪租平， 只係$20一杯，我覺得性價比都幾高，下次會考慮下試埋佢芝士奶蓋芒果。…查看更多

因為同朋友食生日飯，所以第一次嚟呢間餐廳，結果成餐飯，間餐廳播左四五次生日歌，似乎大家都好鍾意呢度食生日飯。坐低之後，因為佢只係有一個餐，所以都唔使諗食咩。首先上係沙律同埋牛油餐包，個沙律個汁有啲怪，唔係好啱胃口，個餐包就係普通西餐嘅餐包，冇咩話好食唔好食。之後上嘅係三份牛扒，我哋嗌左medium。個人來講，唔係太識食牛扒，但係食落唔un，有啲血水，都OK的。我幾欣賞佢個洋蔥汁，個味調校得幾好，至少我未食過咁特別嘅洋蔥汁，雖然其實我都唔係好肯定佢係咪洋蔥汁😂 之後上無限薯條refill，我個人覺得啲薯條比較鹹，但係啲朋友好鍾意食，仲refill左兩次。佢係幼身嘅薯條，好似McDonald，咁當然佢炸得香脆過McDonald。最後我哋嗌左兩個甜品，檸檬批同朱古力蛋糕。個檸檬批酸酸地幾好食，朱古力蛋糕個朱古力味就唔係太啱胃口，同埋上面嗰粒唔知咩莓個味好膠。但係整體都唔錯嘅。至於員工服務方面，佢哋都好友善，要講英文，制服都幾靚。最美中不足嘅係，個甜品本身係為咗朋友慶祝生日預備，但係佢哋寫錯咗朋友個名😂😂 至於餐廳嘅環境都幾闊落嘅，至少枱與枱之間傾偈唔會聽到隔離枱講咩，燈光比較幽暗有情調。整體觀感都OK啦…查看更多

早排去完泰國旅行，特別掛住泰國菜，所以同屋企人一齊去食泰國菜。呢間舖頭雖然細細地，裝修亦好似普通茶記咁，但食物嘅質素好好，亦都似係泰國人打理，嘢食都比較正宗。呢個泰式炒麵好足料，好似張圖咁見到有炒蛋、蝦仁、芽菜同蔥。味道偏甜酸辣，加左檸檬汁之後個酸味會更加強烈。好似普通泰式炒麵咁，啲麵條會比較淋淋囉囉，一個人食應該好飽。我特別欣賞佢炒熟左啲芽菜，因為有啲泰國人會擺啲生芽菜喺泰式炒麵隔離，食落去都幾唔夾同埋有草青味。當然每個人對食嘢嘅感覺係唔同，我比較鍾意熟嘅芽菜。第二樣叫左我最鍾意嘅木瓜沙律。呢個沙律佢整得都幾辣，建議唔食得辣嘅人唔好叫呢個。就算平時好食得辣嘅人，都記住同佢講小辣。呢次我係冇嗌小辣，食到噴火。但係木瓜沙律嘅口感好好，同花生、番茄仔、少少生菜夾埋一齊，食落去好清爽，亦有飽肚感，同時又幾健康。…查看更多

是日跟友人約了去某個地方傾野，因為肚餓嘅緣故，於是在旺中買啲外賣一齊share，其中一樣叫咗呢份烤鴨煎餅。因為買嘅時候係四點，都冇咩人排隊同等緊嘢食，好快就已經整好同埋可以攞走，前前後後用咗10分鐘都無。食物方面，雖然我哋嗌左細分，但係其實個份量都唔少。煎餅個口感好豐富，入面除咗烤鴨同埋個汁，仲有啲青瓜絲同蔥花，食落好爽脆又好香。如果一個人食，可以當一份午餐或者晚餐。如果下次再有機會喺旺中行街，一定會試吓其他口味嘅煎餅…查看更多

是日因有優惠卷，而一試這間新開的Ruby Tuesday。剛甫進店內，餐廳空間感非常充足，樓底很高，有大玻璃窗讓陽光影射進店裏。桌子和桌子之間的距離很寬闊。餐廳很貼心為客人預備了信封size的紙袋，用來裝起用過的口罩，留待餐後帶番。食物方面，我們一行三人點了三個餐，份量很多，我們三人share食物，幾乎吃剩了大半個餐。首先，我們點了個兩個漢堡包餐，其中一個跟onion ring，一個跟焗薯。只要不是跟炸薯條，都要加錢。漢堡包中間夾了1cm厚度的牛肉漢堡、炸洋蔥、芝士、生洋蔥和生菜，口感豐富。洋蔥圈的味道一般。焗薯size很大，配搭sour cream味道不錯，酸酸地容易入口。另外我們點了個蘆筍雜菌意大利飯，味道是酸酸的，飯的軟硬度剛剛好，而且很多雜菌，口感不錯👍飲品方面，熱咖啡就是普通的黑咖啡加奶，沒有什麼特別。店員很親切，落單的反應也迅速，態度友善。整體而言，我對此餐廳印象不錯，下次有機會到尖沙咀食飯，又剛好想食美國菜的話，一定會再來吃…查看更多

下午兩點半左右到餐廳食tea，叫左個蕃茄湯長通粉（$30），同埋辣汁炒鴨胸意粉（$39），價錢恰當。個辣汁鴨胸意粉都幾辣，幾香口，食完個人出左一身汗。佢用嘅係幼條意粉，口感幾light。份量剛剛好，8分飽，加埋個羅宋湯，9份飽。個湯好足料，好多洋蔥絲同椰菜，幾有誠意。不錯不錯。…查看更多

大約十一點左右黎到 人龍竟然長到轉左去另一邊 睇黎同我地一樣慕名而來嘅人都唔少 不過旺角嘅甜品選擇少 所以我地就決定等位 等左半粒鐘 其實都算快 因為我地前面本身有差唔多二十幾個人 我地被安排坐於上層 起初以後上層嘅裝修會靚啲 不過上到去就只到四幅牆 有少少失望咁 而且d位有啲逼 人又多比較嘈 綠茶奶涷 $49味道尚可 最頂嘅雪糕略甜 綠茶味唔係好夠 中間d慕絲其實幾滑 不過就同d青蘋果肉粒唔太夾 d肉粒好甜又好酸 最底部嘅奶涷就冇咩甜味 茶味最濃 成杯分量唔多 比左五十蚊食完都硬係覺得唔係好夠喉咁 唔係幾化算 整體黎講 其實佢整得都okay嘅 旺角地區黎睇呢個收費都差唔多 只係之前一直有咁多好評 黎到就冇咩驚喜 所以覺得失望啦…查看更多

行在幾粒鐘街腳仔都軟埋 由於唔想哂左啲響時間排隊食飯所以我地就行到八點幾左右先去食野一入到去店舖嘅空間唔算大 大約有二十幾個座位 好好彩我地去到嘅時候岩岩啲人走哂唔洗等位 我地一入去冇幾耐出面又出現一位小人龍了厚切豚肉烏冬 $80 :)啲豚肉啖啖肉爽口彈牙唔油膩 個湯底香濃得黎又唔會似好重味精 燒雞排烏冬 $75呢個就感覺同其他烏冬店整嘅冇咩分別 普普通通咁Service都唔錯 服務多數係後生仔 幾有耐性介紹menu 不過價錢就有點偏高 唔係烏冬發燒友可能會略嫌不值…查看更多

難得紅色假期就當然唔少得出街「覓食」喇！見華星冰室一直有咁多好評 於是就黎試下一去到嘅時候 見到入面嘅座位唔多 不過人就幾多下 因為我地兩丁友人少少 排左五分鐘就有個伙記就叫我地入去同人撘枱 首先就嗌左個常餐 厚多士 火腿炒蛋 叉燒意粉 熱奶茶 同埋一份校長多士同澳牛一樣 落單唔洗五分鐘就即刻有得食 快靚正 校長多士就等左十分鐘左右其實校長多士就係 一塊厚多上面放左黑松露同焗溶左嘅芝士 聽落好似唔係幾夾咁 但係食落又真係幾好食 好香濃黑松露同芝士味除左啲位逼啲要相就下 其他大致都唔錯 平民價可以食到一餐有特色嘅下午荼都幾好…查看更多

情人節相約兩位好友到近日很紅的spade吃晚餐到達時剛好是七時正 大概是人們都到預約好的餐廳用膳的原故 我們不需要等候就能馬上入座了 我們一行三人點了 黑松露通粉 卡邦尼忌廉汁吸管面 白雪公主與巫婆 綠茶雪糕先來的是黑松露通粉分量多 擺設簡單 極度香濃黑松露味的通粉 三片蒜蓉包剛好讓我們都有機會嘗到 不太咸味道剛剛好 卡邦尼忌廉汁吸管面因為本來就很喜歡卡邦尼的味道 所以對這份面當然是贊然後就是女生都喜歡的甜吃了白雪公主與巫婆是一個oreo朱古力雪糕多士磚頭 外觀十分漂亮 擺在多士上是兩個雪糕球 朱古力餅乾 oreo餅乾等 切開多士 裏面的面包依然暖暖的 配上雪糕口感一流 這個多士磚士算是我吃過最好吃的 不膩也不太甜 下次要試一下松鼠樂園！還有最後的就是綠茶雪糕了雪糕以餅乾盛載着 一人分量來說算多而我們三人當然不怎麼夠分雪糕上有一個蝴蝶配 朱古力餅乾很香濃綠茶味道 甚至讓我們有多吃一個的想法 當然最後我們打消這個念頭 以這個綠茶雪糕 為我們的晚餐劃上句號整體：受歡迎的原因很明顯 食物美味價廉 食上正餐和甜品都只是90元 沒有加一 侍應生服務態度好 好像咖啡店 自助式購餐 沒有限時用膳 和三五知己相聚的好地方…查看更多