kayingwbea的個人專頁

有一日真係真係真係好想冰，本身我係想帶男朋友食附近另一間都好岀名嘅日式刨冰，但去到勁多人排隊，於是就行返過嚟甜姨姨呢邊試吓😛前面有4,5個人排隊，但都好快入得！其實好懊惱到底要花生醬味定楊枝甘露，最後都係揀咗楊枝甘露！即叫即整都等咗一陣～嚟到份量好大，兩個人一定夠喉 冰都算幼身，乳酸味，整體酸甜比例唔錯，芒果沙田柚都足料入面仲有啲脆脆，整體都好食，不過我個人都係鐘意真芒果個種香甜多過呢種乳酸芒果嘅組合。如果下次再食，應該會試花生醬味了。…查看更多

其實我本身冇特別鐘意食台灣嘢，可能因為台菜甜味偏重？但呢間餐廳俾我感覺有啲唔同，係我鐘意嘅味道，唔會太甜，夠咸香！好欣賞呢個牛三寶麵！我哋揀咗刀削麵，口感好，最愛粗身面！牛三寶有牛腱、牛筋、牛肋條，件件都好好入味好冧牛肉湯都唔錯，香濃得嚟唔會太甜！另外叫咗一個虎咬豬最愛肥肉嘅我好鐘意！入面有一舊肥豬肉榨菜肉鬆都好好食，成個包都都係我愛嘅組合。鹽酥雞，炸得夠香脆，雞都嫩嘅，但咸咗啲。玉米起司蛋餅見到台灣個隻醬油係面就知佢夠台 loll 有拉絲，正！柯仔煎，都幾多柯仔。最後仲加咗個仙草芋圓，超足料，唔係死甜，芋圓質感都唔錯！食都捧住個肚 loll 呢間會係我想encore嘅台灣嘢！…查看更多

大坑對我呢個新界人嚟講係一個秘景，數埋成世人一定嚟不超過5次！睇門口餐牌見到Set Lunch幾吸引，即管試下！Appetizer揀咗 EFC - Elementary fried cauliflower我估佢係招牌菜，因為菜名入面有餐廳名。 🧐十分有驚喜，第一次食炸椰菜花，炸皮香脆內裡鬆化，份量都有4， 5舊，足夠過口癮。Main加錢叫咗個Steak with fiies （medium rare ）無論份量同味道都好好，件扒熟度啱啱好，外層焦香，有調味配嘅香草醬都好好食。原來仲有甜品，我都冇為意仲諗住埋單🤣雲利拿雪糕仲有件曲奇，完美一餐！樣樣高質食到飽都係$207， 仲有嘢飲，咁啱之後都會去開大坑，會考慮encore！…查看更多

咁多間韓式炸雞過江龍入面最愛呢間啲雞真係又香又嫩！今次叫嘅係「社內相親」餐 Set C！其實炸雞係錯嘅，因為Goobne不嬲主打無油焗雞，最愛都係果味醬油蒜香，香濃惹味，揀咗無骨啖啖肉每件都好似雞髀肉咁嫩！另一樣至愛一定係芝加哥Pizza，芝士愛好者冇可能唔鐘意食，餅皮脆身有咬口，男朋友話覺得加咗薯蓉，我自己唔係好食得出，但的確係啖啖Creamy。另外加咗兩個沙冰，一個藍橙味，一個西柚味出色！解膩！…查看更多

大概一年前跟公司嚟食過一次，個時覺得十分正，一直都想帶男朋友嚟食，襯住5周年，終於成行。Openrice book位，一嚟到就入得。首先係呢到環境十分正，成間餐廳都佈置咗鮮花真植物，每枱都有個小花瓶，十分用心。必嗌 #HAPI Breakfast一大碟Ham同Cheese，Yogurt，少少生果，炒蛋，同Bread Basket😳 仲有一杯橙汁。價錢唔係平，但性價比高，每樣Item都唔係Hea擺出嚟。不過今次麵包籃冇回憶中咁好食可能上次有牛角包，覺得贏咗，同今次稍稍唔夠熱。另一個Main叫左 Steak with 香草醬冇影Menu唔記得咗叫咩名，Steak叫左3成熟調味同熟度啱啱好香草醬帶少少酸味，同肉好夾Side Dish嘅菜都整得好好，爽脆同時又有焦香。另外叫咗一個果茶⋯唔好飲⋯ 好失望 🤣 好似藥水味⋯ 但唔記得咗叫咩名了Conclusion 💬過咗一年整體都Keep到水準服務好啦，本身男朋友想叫3個Main 但俾Staff阻止咗, 溫提我哋份量都多，最後的確係啱啱好。不過呢，除咗個果茶，另一個少失望位係，今次再食Menu少咗好多嘢食，睇返Openrice其他食評嘅Menu係多起碼一半選擇，而之前好幾樣食過想俾男朋友試嘅菜式都冇咗，八爪魚Risotto啊，啲前菜啊，之前真係花多眼亂，樣樣想試。今次個Menu就一眼睇晒嚕，應該轉Menu前都未必會再食了。…查看更多

本身諗住係隔離百佳買嘢咋，但行過見到佢有78蚊片皮鴨，忍唔住直接入去食埋晚餐！78蚊片皮鴨（唔包兩食唔連殼）其實我食片皮鴨嘅經驗都唔太多，食親都係一般街坊酒樓，所以我都講唔出佢正唔正宗，但味道都OK嘅。呢度應該半隻鴨左右啦，片得都幾好，薄薄一層肉連皮脆卜卜面皮都做得唔錯，層層分明，厚薄適中。柚子大蝦球本身上枱見到得5件，有少少失望，但一食落原來佢每一個蝦球都好扎實啖啖鮮蝦肉，加埋個汁有啲驚喜嘅！另外仲叫咗花膠浸時菜正正常常，有啲碎碎嘅花膠。成餐飯就係正正常常，一般街坊酒樓，叫餸食飯，落街想食片皮鴨都會考慮Encore的。…查看更多

呢間真係由細食到大，以前細個去自修室，Lunch成日都食呢間。點講好⋯ 你話佢好好食就一定唔係，但唔知點解就係會對佢念念不忘。叫咗一份單點豬扒＋雞翼份量贏晒，男朋友第一次食，見到個份量都嚇親，一開始仲以為我水佢 🤣應該有4塊左右咁多嘅豬扒雞翼都有6隻，做完Gym食，夠晒蛋白質。其實我平時唔係特別鍾意食豬扒，但呢間嘅豬扒又覺得好好食佢雖然唔係梅頭扒，但都夠淋，鍾意佢有一圈肥肉。雞翼都好大隻，佢個炸漿又係我鍾意嘅味道，夠惹味，雖然食完要飲好多水🤣加埋次次都叫嘅上海粗，湯底係胡椒清湯。有時聽到隔離枱啲新客會問係咪有烏冬，我都會心諗，無錯，我都鍾意佢似烏冬。…查看更多

呢間其實都幾出名，但我竟然先第一次試，而我係覺得非常有驚喜嘅！今次叫咗個二人餐，有兩個主食，兩個小食，仲有湯有嘢飲同甜品份量非常足夠，性價比極高！第一個主食揀咗水門雙拼飯對於個水門雞同油飯超滿意就算係雞胸都好嫩滑，油飯味道好，配埋佢個雞飯汁非常惹味，想買一支雞飯汁返屋企。至於個炸雞就正正常常，相比起嚟我更喜歡水門雞。第一個小食加35蚊要多半隻雞，估唔到仲有雞血同雞雜！好Surprise 好好味！另一個主食就揀咗 紅咖哩牛肉飯，本身以為佢係瘦嘅牛肉片，但原來佢用肥牛，我好滿意，最鐘意食肥嘅，飯都係油飯，另一個Surprise位！而佢個咖哩比想像中辣，帶少少酸，但好開胃，好好食。第二小食揀咗馬拉盞肉醬芥蘭，呢個就中規中矩啦，本身以為係炒菜，但原來佢係炒肉醬淋上灼嘅芥蘭上面正正常常，但冇想像中惹味。最後加 15蚊 甜品轉咗做芒果糯米飯芒果好甜！完美句號！…查看更多

做嘢都攰了，Lunch想有啲Me time，於是自己去咗食好食Lunch，日日返工都經過，決定試試佢！😁遊日懶人鐵板三文治 - $73唔知點解要叫自己懶人咁Hea 🤣 但呢個三文治一啲都唔Hea，入面有 吉列和牛漢堡，芝士，蛋黃醬，菜佢仲收埋咗隻帆立貝係入面！之前睇過一次個Menu，今次叫之前冇認真睇食食吓食到原隻帆立貝都真係幾驚喜！吉列和牛漢堡味道不過不失，質地偏軟熟（個人更偏愛有咬口啲嘅漢堡）整體都好食。加咗40蚊跟餐有嘢飲有小食炸魷魚圈夠脆味道正常，但份量偏少，唔夠喉。🥺總結：三文治雖然價錢貴，但係好食嘅小食正常，份量大啲就好了！Lunch嚟講好好坐，如果個日有心情想食貴Lunch同Me Time ，都會再Encore  …查看更多

身為川辣(但其實唔太食得辣)愛好者,最近經過雅蘭見到呢間新開冇耐(?)嘅【花椒子】終於嚟咗試！其實真係好想試佢個魚頭肥腸鍋但見到佢嘅Lunch Menu都好似好抵食，決定都係下次先嚟試火鍋！ 【水煮牛肉飯 $68 】唔會太油唔會太辣，但又夠香夠味，牛肉份量都合理入面仲有粉絲。唔錯！【酸菜鱸魚飯  $68 】可能係我近期食過最好食嘅酸菜魚味道有層次，酸咸辣味道係我鐘意嘅比例本人怕太酸，鐘意食酸嘅朋友可能就唔同意了魚嘅份量好夠，仲有薯粉，好正！一定會再嚟食！【口水雞 $68 】非常一般⋯份量少⋯隔離傷心酸辣粉好食好多⋯ 唔會Encore呢樣仲加咗錢叫咗芒果同士多啤梨沙冰 （$38） 係真生果味嘅冰，唔會個啲假味糖漿冰叫得過！…查看更多

Lunch Time同同事一齊去食。其實環境裝修係靚嘅。All Day Breakfast $148我叫嘅All Day breakfast，入面有腸，手撕豬，薯餅，炒蛋，烤蕃茄，酸種多士，沙律＋生果。呢間嘅酸種多士幾好食嘅，應該搽咗牛油先焗，夠香脆。手撕豬有驚喜，連埋炒蛋一齊擺係多士上面食味道唔錯。沙律菜新鮮，其他Side dish就中規中矩。同事叫嘅 澳洲和牛漢堡 配薯條 $132另一個同事叫嘅 三文魚水波蛋牛油果酸種多士 配蟹肉他他我淨係食咗佢地條薯條，所以就唔Comment喇。但我覺得呢間最大嘅問題係⋯份量太少⋯其實味道係唔差，但去到呢個價位嘅Lunch，真係有啲唔夠食。特別係同事叫嘅三文魚水波蛋，三文魚都係得一卷，多士都係得一塊，真係唔夠食。另外All day breakfast我都覺得份量唔夠⋯ 呢個份量，又未去到真係好好食，但要俾呢個價錢，我諗未必會再Encore了⋯…查看更多

其實我最愛嘅都係紅薯粉，但經外賣平台冇得揀薯粉，Remark咗轉薯粉但都送左米線，咁我諗外賣都真係冇得揀薯粉了(?)唔緊要，米線我都OK。😌金獎腩肉無錫骨蘿白米線 - 中辣 （$69 連運費）湯底之前去堂食都係叫開小辣，今日想挑戰下中辣，佢何湯底算係有層次嘅湯底，似雲貴香湯底，不過老實全盛時期嘅雲貴香更好食（而家嘅雲貴香就差咗了⋯）金獎腩肉身為肥肉愛好者嘅我我基本上食任何一間麻辣米線都會叫腩肉，一間小鍋米線嘅腩肉做得好唔好係佢係咪好米線嘅關鍵。呢間叫得自己金獎腩肉真係唔試唔得啦。 有啲人鐘意食瘦嘅，我就鐘意食肥嘅，呢間夠肥，但又唔會真係成夠肥膏，讚！調味都做得唔錯。無錫骨同事介紹嘅，其實係豬軟骨，甜甜地帶丁點酸味，炆得幾好，夠軟冧，白蘿蔔通常食親都係甜的，唔似浸咗糖水，係蘿蔔本身嘅甜。米線 - 呢間米線偏彈牙，唔錯。…查看更多

返工Lunch Time去食，睇佢成個Menu，的確係幾有南洋特色，即使佢賣嘅一啲睇Title其實似港式茶餐廳會有嘅食物例如常餐，但佢都加咗好多南洋風味入去。呢點係抵讚嘅！唔似出面有啲餐廳得個餐廳名有特色。係出面等位個陣見到門口貼住嘅海南雞髀飯係超超超想食，佢張圖好吸引⋯點知坐低冇晒油飯，本人覺得海南雞飯係唔能夠唔配油飯的⋯所以立馬決定放棄，有點Sad，唯有下次再戰。同事話呢間嘅豬頸肉都好食，因為想食啲有汁嘅飯，所以揀左咖哩豬頸肉飯。同事就揀咗炭燒香茅豬扒飯。咖哩豬頸肉飯 $72 ***佢個豬頸肉真係幾特別，燒汁偏甜，有少少似瑞士汁，又唔會太漏，幾好送飯，但佢豬頸肉質偏乾身，我個人就喜歡肉質肥美有油香嘅肉多啲喇⋯而個咖哩我都覺得普通，一樣係味道偏甜，都係嘅，南洋菜本身就係偏甜，咁講佢其實幾正宗。炭燒香茅豬扒 $58 ****我鐘意呢個飯多啲！豬扒Juicy有油香，份量好足！雖然味道相對普通，但豬扒整得Juicy已經好好啦。今次真係隔離飯香！…查看更多

公司有Team lunch嘅時候同事都好鐘意叫呢間，所以之前都食過幾次外賣，但堂食就第一次，結果當然冇失望，Pizza緊係熱辣辣最好食！【蝦仁水果沙律】$158生果足料，蝦仁大隻同夠Fresh，Dressing係醋同欖欖油，雖然我個人麻麻哋鐘意醋，但相信鐘意食醋沙律嘅朋友會滿意。不過呢道應該係今日叫嘅野食入面性價比最低，除非好想食菜，唔係我覺得可以Pass loll 【煙肉忌廉粗意粉】$148鐘意食Carbonara嘅朋友真係必嗌！忌廉汁超香濃，加埋粗面夠晒掛汁。煙肉好香好惹味，而且同出面食嘅其他煙肉味道有啲唔同，係有少少港式燒肉嘅感覺，可能有用到類似香料去醃製，用燒肉形容可能有啲怪，但真係好好食！【藍芝士蘋果Pizza】$178我不嬲都唔太鐘意食加熱過嘅生果，但呢個Pizza真係好驚喜！藍芝士味道好出，配埋清香蘋果，蘋果加熱咗都係爽脆嘅，比起生果可能更似瓜。冇諗過呢個Combination可以咁夾！以前食外賣已經覺得好正，今次食新鮮出爐覺得又更好食了，芝士熱辣辣溶溶地，Pizza真係要熱食係最正！結論：一定會Encore，仲有好幾款想試嘅菜～…查看更多

係荃灣行街行到攰想搵地方坐下於是坐低食個雪糕雙球嚟講實在唔平叫左一球柚子，另一球海鹽柚子似韓國柚子蜜入面有柚子皮海鹽味道似香港牌子個隻海鹽雪糕但質地比嗰個牌子好另外男朋友叫左牛乳軟雪糕 ok la兩杯夾埋七十幾蚊都係嘅呢個價錢呢講無理由差過十幾蚊杯雪糕兩杯都係好食但未至於驚喜意料之中嘅味道勝在可以坐低休息下所以都覺得還好本身啱啱比完錢個位俾人坐左即刻灰咗然後食兩啖有返位又即刻覺得抵食返🤣🤣所以個位真係好緊要…查看更多