高曾的个人专页

居住元朗多年，偶然機會下認識了位處水邊圍邨內開業多年嘅「國際餐廳」，此後不禁愛上。跟居住元朗數十年嘅友人談起此餐廳，他們亦對其一無所知，可想此餐廳隱世嘅程度。「國際餐廳」開業多年，至今仍保存開業時的昔日裝潢。寬敞空間內，鋪上瓦仔嘅牆身與地台、不鏽鋼櫈框架配上茶色玻璃枱面及啡色軟墊，極富七、八十年代嘅特色。裝潢雖然經歷時間洗禮，但仍然歷久常新，清潔衛生且保養得宜；有幸店鋪位處房委會物業及有老闆夫婦兩人親力親為用心打理，此特色小店仍能在時代巨輪下繼續發光發亮。要數「國際餐廳」嘅推介食品，首位必定係粉仔。粉仔有蝦米湯底或豬骨湯底，本人會推介蝦米湯底(原味）。由於粉仔係老闆親自製作，特色十足。有一次在下午茶時段點粉仔，老闆問是否趕時間。原來粉仔剛售罄，老闆為了不讓客人失望，即時製作。如此誠意製作嘅粉仔，每碗只售18元！而且即製嘅粉仔，仲有D好似意大利粉嘅 Al dente 口感，大家不訪碰碰運氣，喺早餐或下午茶時段黎「國際餐廳」，睇吓同即製粉仔有無緣份。「國際餐廳」另一精采嘅推介就係佢嘅豐富醒晨早餐。由30元起嘅三文治餐至39元嘅豬扒沙律餐，全都抵食夾大件。食畢一個配湯粉麵嘅早餐，飽肚感可一直維持至午飯時間，絕對能夠幫您充滿電迎接一天嘅挑戰！特別想提一提沙律餐，沙律醬份量適中再混合蘋果、菠蘿、紅腰豆、青瓜、粟米、中芹，感覺清新。最後要推介嘅係熱奶茶。現時坊間茶餐廳嘅奶茶絕大部分都係採購集團式已預先調配好嘅茶葉沖製，欠缺特色；「國際餐廳」則用自家配方，茶膽用多種茶葉沖掣因而份外香濃，再配合市面上越來越少見嘅傳統厚身玻璃奶茶杯，絕對無得輸！惠顧多時，老闆夫婦知道我怕熱奶茶放涼，每次均會待我差不多用餐完畢才奉上熱奶茶。喺時下餐飲業界爭相引入新食品吸引顧客眼球及搶佔市場時，「國際餐廳」仍然緊守崗位，以「用心服務，大眾收費，貨真價實」嘅方針經營，除讓顧客尋回昔日街坊茶餐廳味道，從中亦可體現香港人獅子山下嘅精神同埋一份濃厚嘅人情味。…查看更多

今天天氣十分炎熱，氣溫達攝氏33度。雖然如此，仍無阻我到南丫島 hea 嘅計劃。一年四季，我每季都會到南丫島 hea 一趟，除左踏步山徑強身健體外，亦會到 LoSo Kitchen 享受遠離繁囂嘅小島風情。由昔日街頭舊舖到街尾現址，每季到南丫島我都會到 LoSo Kitchen。先不談食物，單係老闆娘熱誠待客已令人難忘；如在下午茶時段有幸坐上靠海的座位，夕陽斜照下海面泛起片片鱗光，即使滴酒不沾，此道美景亦可醉人。浦坐下，老闆娘即時奉上冰涼清水，接下來更驚喜係仲有清甜涼透心嘅西瓜！消暑解渴後，就開始今次嘅正餐😋。先來一個夏日必點嘅椰青，椰青經過老闆娘精挑細選，全部肉嫩多水。細心一看，仲要走埋「塑」，飲管並非塑膠製品！傾談下，得知老闆娘為了保護環境，即使成本增加亦決定停用發泡膠或塑膠即棄飯盒及餐具，更親自清洗不鏽鋼飲管確保清潔衛生👍，抵讚。再黎就係另一個必點及令人一試愛上嘅推介菜式 - 炸魚薯條。炸魚肉嫩有肉汁，性價比甚高；另加錢將薯條改為沙律菜及配上黑椒腸，沙律菜新鮮及調味得宜，黑椒腸的黑椒味濃郁，可口非常。好人、好境加上好食物，LoSo Kitchen 絕不會令人發嘮騷。…查看更多