tomtom2020的个人专页

以前夜晚去飲茶食點心係一件無乜可能發生嘅事，但近年愈來愈多點心店，夜晚歎茶變成好多人日常。呢間點心店位置唔係咁起眼，但內𥚃算光猛企理乾淨。有三款茶選擇，選左蕎麥茶，第一次飲，好甘香，飲落好舒服。叫左3款點心。叉燒包外型係傳統嗰隻，香噴噴新鮮蒸起，個皮軟綿，𥚃面叉燒饀份量同甜度適中，熱辣辣好唔錯，正宗香港comfort food。蝦餃比正常細少少，皮薄，裡面個餡就一般，唔係咁多汁，無乜筍嘅鮮味，一般。相反紫薯咸水角係驚喜之作：首先剛剛炸起，好新鮮，炸得乾身唔油。𥚃面有好香嘅紫薯蓉，加埋傳統咸水角餡料，一流！咸魚肉餅飯，飯蒸得剛好，粒粒分明，咸魚幾香，肉餅滑溜，但可能落得太多生粉，肉味稍欠奉。除左點心，仲有幾款小菜供應。埋單$120左右，中上環開心價，性價比高。最重要係呢度夜晚食夠靜唔嘈，非常唔錯！…查看更多

有時餐廳要受歡迎，唔駛做咁多花巧野，一、兩樣食物突出就可以留住顧客個心，呢間就係其中表表者。中學師弟公司係灣仔，佢介紹食呢間樓上舖。係地下完全唔知上面有餐廳，入到去係茶餐廳寬敞版，無乜特別。打開餐牌，第二頁寫住燒春雞籃，咦，好耐未見過呢個餸，不如叫黎試吓，點知一試難忘！首先來餐湯羅宋湯，正宗港式味道，材料好豐富，偏酸少少，但可以接受，又唔會太浠，味道已經好唔錯。飲緊湯之際，春雞籃已到。半隻雞好大，外型討好，又熱騰騰，新鮮整起。戴上手套，首先撕開雞髀。嘩！雞油雞汁好似泉水咁爆瀉出來，雞肉滑到一個點，又有雞味，醃得個味啱啱好，唔過鹹，關鍵部位雞胸肉唔嚡唔硬，非常好！但最重點係雞皮，脆、薄、香，差唔多係炸子雞個level，勁呀！簡單來講，就係四個字：皮脆肉嫰！半隻大雞，配飯/意粉/薯菜，只盛惠70元，性價比高過IFC，完勝唔少韓式/台式/美式炸雞或燒雞，特別係炸粉厚過塊面皮嗰啲！鍾意食飯嘅人會好滿足咁捧住個肚走，唔鍾意食雞嘅會驚嘆香港仲有好雞食。多謝細佬，非常好介紹，強烈推薦！…查看更多

楓林小館楓林小館是大圍廣東菜名店，殺出新界在港島開店，理應有其實力。點了三個餸菜，等了一會，侍應走過來問我們，乳鴿到了沒有，為何那麼久還未來。但其實他可以看看空空如也的桌面便知道。我們無奈地回答他：乳鴿未到啊...尷尬mode哈哈。正當心𥚃有少許疑惑食物質素時，餸菜上碟了。紅燒乳鴿果然是這店的招牌菜，皮脆肉嫩，肉計豐盈，香噴噴，很久沒品嘗過好吃的乳鴿了，兒時的味道！欖角冰梅骨，用上嫩滑的梅頭豬肉，炸後將欖角和梅子醬與排骨，酸酸甜甜，香、脆、軟之合體，另一道上乘之作。沒有拍照的鮮百合准山炒蓮藕片，素菜大匯合，食材新鮮，很清新的感覺！最後還送了芝蔴糊給我們。廣東菜應有的鮮和細緻，這間大致都做到。環境更是中菜館之中難得的清靜，整體用膳感覺良好呢！…查看更多

介紹COVA？有無再普通啲？是咁的，佢嘅蛋糕就食過(芒果蛋糕好正！)，但佢嘅正餐就真係未食過，又唔知係咪好耐未食過正宗西餐，呢餐真係堅好食。入到去餐廳裡面，好似置身法國咁，扮歐洲旅行mode啓動。加上高貴典雅裝潢，我哋呢啲粗手粗腳嘅市井平民當堂斯文哂呀。叫咗套餐，首先出場係麵包同湯。麵包又香又軟綿綿又熱。克力架同芝士條香脆。蘑菇忌廉湯，又係好香好creamy，高水準之作。主菜之中，黑松露雜菌寬蛋麵好味到唔停得口，黑松露同寬麵配合得天衣無鏠。近年好多餸菜都鍾意加黑松露，但其實好多都唔夾，特別係中菜，連蝦餃燒賣都加，完全將其他食材原本嘅鮮味蓋過，甚至有作嘔感覺，為高貴而高貴，no good。呢個就唔同，黑松露將寬麵同雜菌嘅味道層次大幅提升。雜菌juicy到爆汁！另一個海蝦燈籠椒醬扁意粉都好食，扁意粉滑溜，個醬又幾清新，剛剛好，唔會over。但好戲在後頭，開心果同咖啡gelato雪糕先係戲肉，特別係開心果雪糕，嘩，開心果味道好香濃，滑到一個點！COVA可唔可以推出一箱開心果雪糕外賣返屋企架，正到爆炸！仲有咖啡又係好好飲，店員介紹咗一輪，大致係mocha做base，上面係expresso定latte之類(佢講得好詳細，但我剩係俾咖啡香味吸引住！)。總結，一個字，正！最後要嘉許一位女待應，服務態度殷勤，笑答滿面，令我懷疑自己係咪係香港食飯。…查看更多

雅苑座The Greenery尖沙咀麼地道69號帝苑酒店3樓近年，除重要慶祝或特別聚會外，較少吃自助餐。雅苑座雖不是頂級自助餐質素，但食物種類繁多，長年水準穩定，加上有駐場live音樂表演(不過當日沒有😅)，絶對是穩打穩紥之選。海鮮都是那幾款，龍蝦肉跟蝦爽口彈牙，多膏。刺身很新鮮，特別吞拿魚非常不錯，很重魚味，超長蟹柳也很好。每人獲分配一客香草煎大蝦，肉質鮮甜，沒有燒得過熟而變硬。要注意的是它沒有生蠔供應。熱盤整體水平中上，其中烤羊架肉質頗嫰滑；蒸魚也可以，只是魚味一般；印度咖喱不太香濃；芝士焗帶子則是敗筆，芝士太多太濃，完全蓋過帶子鮮味，鋪在上面的魚子醬更是多此一舉；燒味等中菜屬正常水平；海南雞飯以往是此店主打項目，雞是嫰滑，但沒有雞味，飯則有雞油香味。甜品一向是帝苑強項，其中名物蝴蝶酥依然出色，又脆又香，非常好吃；朱古力蛋糕及tiramisu也非常好！現在有7折優惠，性價比馬上轉高，平日lunch buffet$300以下就可以吃到！…查看更多

在疫情中開設新餐廳，尤如在懸崖上踩鋼線，藝高人膽大。如沒有非一般的決心、毅力、意志、頭腦，以及最重要的實力，是不可能站穩住腳。上個週末，品嘗過這小店的出品，果然非同凡響！餐廳開在商場內的新美食廣場中，裝修走少女風，相當繽紛奪目，充滿歡樂氣氛。粉紅色為主色的佈置為食客增添舒適和愉快感覺，多個位置為打卡熱點，有趣吸引。餐牌設計亦走年青人路線，設計有創意。最重要的還是食物質素。先說咖啡，老闆是咖啡烹調專家，對咖啡甚有研究。我較少喝咖啡，叫了杯Mocha，朱古力的香甜與優質咖啡混合，質感幼滑香濃，果然甚有水準。餐廳其中一個主打是意式雪糕gelato。老闆之前遠赴意大利進修廚藝，雪糕是自家製，款式獨特。試了三款，全部都富有gelato應有之平滑綿密口感，當中特濃伯爵茶雪糕最值得推薦—伯爵茶的香味在口腔內散播，極高享受！Gelato set配意式杏仁餅與貝殼蛋糕同吃，杏仁餅很香脆，與伯爵茶雪糕很夾，如杏仁味再強一點會更好；貝殼蛋糕也頗鬆軟，不錯。另一款推薦的是木瓜牛奶雪糕，木瓜味濃郁，感覺清新，以水果杯盛載，很具心思創意。在炎炎夏日吃著，確是透心涼。這甜品店最獨特的地方是不少食材為本地農場生產，包括梅窩生產之木瓜及洛神花醬(唔講真係唔知香港有木瓜生產！)，看得出老闆對本地農產品的支持，幫襯它等於支持本地農業，非常好。在試業期間所出品的食物已有相當不錯水準，加上在這個時勢創業，深深感受到老闆的那份熱情和實力！…查看更多

同一個keep fit中嘅中佬食飯，以為要食素，點知話要進行乜嘢生酮飲食，去食肉，wow真係估你唔到呀，咁就去鋸扒啦。😄相比雞同魚，對牛嘅熱愛無咁強烈，不過一入呢間日式石燒牛扒店內，就被佢陣陣牛香吸引住。叫左個套餐，除左主角牛扒外，味噌湯、飯同沙律唔駛加錢。我哋叫左最平嘅平鐵牛扒(200g)同次平嘅上腰西冷(200g)。牛扒以較生狀態放係岩石上，自己隨生熟喜好再封煎，適合唔同人口味。平鐵牛扒比想像大份，雖然價錢最低，肉質偏淋，但唔似港式豉油西餐牛扒咁，落大量鬆肉粉，攪到塊扒得個淋而完全無肉味，呢塊係幾有牛味兼唔少肉汁，以唔駛100元就有咁嘅質素，相當超值高水準！另外一塊上腰西冷貴30元，味道當然更勝一籌，肉質結實但唔會靱，有𡁻口，肉味更濃郁，好食！其他如飯同沙律都屬正常水準，服務亦都唔錯，店員同顧客有唔少交流，加上小店經營有heart，一定支持！…查看更多

係香港要搵間日本菜餐廳好食而性價比高並唔容易，呢間餐廳係其中之一。呢間餐廳個menu厚到好似書咁，揭極都有，代表佢食物種類包羅萬有，多到同放題差唔多。好，就每個種類都點少少。首先係燒物，餃子雞翼好飽滿，外面都算炸得香脆，只係唔算好熱。相反牛舌就夠哂熱，醃得剛好，香口多汁又有咬口，香濃嘅牛味滲透係口𥚃面，好好食啊！蒜燒原條茄子大到成塊牛扒咁，又係燒到香噴噴，蒜蓉嘅香味混在茄子𥚃面，只係比較多左少少油，但整體水準高。彩虹卷8件，七彩繽紛，件件新鮮，壽司米飯粒粒分明，壓得剛好，性價比非常高。叉燒拉麵也可以，只係隻蛋少少過熟。交通便利，環境算舒適，會再來食其他食物！…查看更多

暫時去唔到日本，點算好，就係不停食日本菜，其中日式甜品更加係至愛！創業於1836年，I CREMERiA最出名係日本蜜瓜配北海道牛乳雪糕，不過一直無食過。食得最多係芭菲，佢嘅抹茶雪糕有種獨有清香味道，牛乳雪糕香濃，同係日本食無分別，白玉同大福係雪糕最佳配搭，特別大福，食過番尋味！蛋糕都出色，士多啤梨蛋糕軟棉，忌廉極之香滑，好貼近日本水平！其他如抹茶同朱古力則一般。在香港食日本菜最忌同日本本土水平相差太遠，呢間水準算好貼近日本，一試難忘。掛住日本？去呢度食會讓你好似置身日本甜品屋！…查看更多

相比起打邊爐，燒肉比較少食，一來中佬年紀食唔到咁多肉，二來燒肉一向感覺好油。不過咁，其中一個細佬係燒肉達人，佢介紹得嘅都有番咁上下水準！牛角只有呢間有日式燒肉放題，一早用app攞籌，以為去到可以即刻入場，點知6點前去到已經人山人海，仲要等位，心諗有無咁強勁。叫左Level 4澳洲和牛放題，主角和牛睇個樣已經知係正牛，燒到一半至7成熟，又juicy又牛味濃郁，encore左好多碟，食到唔停得口，ichiban!另一驚喜係香草羊扒，有少少膻味，燒過的羊香噴噴，香草令羊嘅味道提升到另一層次，必食！另外牛舌好滑好有牛味，雞腎都好食。海鮮方面，帶子、蠔同扇貝都係正常水準，不過不失，虎蝦蝦肉彈牙爽甜，又夠大隻！食完甜品，飲過Asahi啤酒，捧住個肚返屋企！食呢類日式燒肉無咁油膩，只係成個餐廳都幾多煙。多謝細佬好推介，一定會再來刷過！…查看更多

細細個開始覺得食粥等如病，加上宜家優質粥店買少見少，好少出去食粥。但係呢間絕對令人刮目相看！貴妃雞粥押上招牌兩字，必點。粥嘅份量頗大，雞件又多，少鹹而好滑。粥好綿滑好香，雞油同大量蔥粒與粥混在一起，好夾好好食，食完好舒服，好治癒啊！粥套餐跟小食，點左炸両。炸両好唔好食可以大致反映一間粥店水準。油炸鬼好脆，而且食得出唔係炸左好耐嗰種，無油益味，腸粉好滑，好似紙咁薄，只係賣相一般。再額外叫左蔥花蝦米腸，條腸粉同BB塊面一樣咁滑！上面嘅蔥同蝦米好多，點甜豉油黎食，平民版高級享受！成個粥餐60元有找，價錢實惠，食物唔肥膩又新鮮好食，阿姐服務態度又好，中式粥店有咁嘅水準，好值得推薦！…查看更多

太子一帶有唔少餃子店，食過幾間，呢間最得我心呀! 餃子選擇多，叫至愛的韮菜豬肉餃，脹卜卜，好似金元寶咁大，皮薄饀靚，韮菜同豬肉比例大約7:3, 韮菜太多會太濃，蓋過哂豬肉味道，相反豬肉太多食落會太飽滯，呢個比例好平衡，韮菜好香好爽，但又唔會過濃，又食到豬肉。另外饀料無落太多調味料，好清。湯底係椰子海帶鮮雞豬骨濃湯，清甜到不得了，成碗飲哂，飲完唔口渴，證明無乜味精，如果有少少湯渣食會更好。唯一要彈係包得個樣一般。10隻巨餃先40大元，無打錯，40蚊咋，就有家的溫暖味道，又飽肚又健康，店員服務又唔錯，好過去M記食100倍啦!…查看更多

如果禾牛薈同高流灣(仲有1、2間)係尖沙咀港式火鍋選擇，咁台式火鍋代表就係呢間。裝横格局同另一間以前受歡迎嘅差唔多，但食物質素明顯高一截。睇相已經知酸菜白肉鍋d材料多到就快瀉，吃完都半飽，白肉爽嫰，粉條Q彈，好好吃野(國語tone)!另一重點係響鈴，新鮮炸起，非常濃烈嘅豆香，略浸入酸菜鍋，高級享受!肥牛新鮮有肉味。墨魚丸同韮菜餃都唔錯，特別韮菜餃肉同菜比例適中。豆腐叫錯左，應該叫千層豆腐。😅食完，會好想念台灣。。。仲有，呢間絕對係高性價比之選，湯底只$128, 配料可叫半份收半價。尖沙咀喎，仲想點! 交通極方便，地鐵站一出唔駛一分鐘即到!…查看更多

4個月，等了又等，終於出山去打邊爐啦! 呢間係山林道人氣一向非常旺盛，今晚去寶勒巷新店(順帶一提佢樓上有間中菜叫瑪寶鮮，係隱世高水平酒家!)，水準依舊相當唔錯，食材新鮮! 清湯係真清湯，好多豆腐，好多菜，粟米好甜。美國雪花肥牛係厚切，好有肉味，有咬口得黎唔硬，物有所值。魚三角好滑，滑過BB塊面! 四式餃同菜籃都新鮮。唯一一般係墨魚丸，入面海膽味道平平。值得一提係待應好有禮貌，定期換碟加湯，殷勤服務，難得!係火鍋店林立，互相激烈競爭嘅尖沙咀能夠企得穩，當然有優勝之處，同區港式火鍋除禾牛薈，呢間水準絕對keep得到。…查看更多

荃灣南豐紗廠活化後煥然一新，但對於像我這類對藝術和手作等零知識的市井市民來說，還是看看有甚麼好吃吧。無意中發現了一間外觀光猛企理的cafe，入內發現不少花的精緻佈置，加上這店菜式以可食用花作賣點，賣相色彩繽紛，菜名必有Lover, 女士必定大愛，打卡精選。Vege Lover: 顧名思義，這道菜以蔬菜為主，大啡菇真的巨大，連同蘑菇用蒜蓉同焗，又香又多汁! 水煮蛋也煮得剛好。Burger Lover: 炸軟殼蟹漢堡包，軟殼蟹熱騰騰，炸得香脆，跟羽衣甘藍同吃，減低油膩感，是巧妙配搭。Meat Lover: 用上五花肉與煙肉，醬汁惹味，薯蓉也不錯，有咬口，不是很爛的一類。甜蕃薯條: 這是驚喜所在，焗得香甜，外脆內軟，高分之作!每碟餸均有不少新鮮蔬菜配襯，茶也芳香，吃後一點也沒有飽滯感覺，加上環境舒適清雅，是朋友或情侶悠閒約會的好地方呢。…查看更多