Siufei Yung的个人专页

自從上次去食完Lunch之後，有啲念念不忘，所以就約咗朋友去食晚餐我發現晚飯原來仲抵食，因為原來一個定食都係百幾蚊，加埋嘢飲都唔駛2舊水落到樓日式吉列黑豚滑蛋丼塊黑豚肥瘦適中，炸得金黃脆口，咬落「咔嚓」聲，粉漿夠薄唔油膩！豚肉本身豚肉味夠，唔會好似，夾埋半熟滑蛋同洋蔥汁撈珍珠米飯，啖啖都係滿足感，百零蚊份量足，定食仲有一片魚生，麵豉湯，麻醬沙律，同鰹魚湯南瓜，性價比唔錯！鮮牛肉滑蛋丼牛肉唔會太薄，咬落去有口感，但仍然能保護嫩滑唔會韌！蛋香同牛味超夾，醬油甜鹹度啱啱好，唔會蓋過肉味。如果鍾意食濕潤丼飯呢個必點，但建議快食，擺耐咗蛋會老少少。飲品係雪糕梳打，食完晚餐有雪糕食又有嘢飲，真係唔錯。…查看更多

一向鍾意食辣，所以如果同一班都鍾意食辣嘅朋友出去食飯，一定會揀川菜。今日朋友揀嘅係一間喺太子新開嘅川菜館，據聞主廚係四川人，想試下正宗四川味。因為係一大班朋友食飯，所以叫咗好多個菜，我好開心，因為可以試好多新嘢頭嗰兩個係涼菜，一個係口水雞，另一個係涼菜四小福拼盤口水雞雞肉嫩滑得嚟又唔鞋，麻辣汁調得啱啱好，麻中帶香，辣度溫和，開胃首選！  涼菜四小福拼盤有四款涼菜，最正係個牛展，牛肉味濃，爽口又入味。 食川菜，又點可以唔點大熱嘅酸菜魚，魚片鮮滑無骨，酸菜夠酸爽，湯底濃郁，飲咗幾啖湯竟然停唔到口，不過我最鍾意嘅其實係佢入面嗰個薯粉，入味彈牙！仲有其他辣菜，川味回鍋肉、元寶紅燒肉、辣子雞、川香毛血旺，麻辣味勁正宗，食到鼻水出晒嚟都忍唔住繼續夾！朋友話唔可以淨係食辣，叫咗一啲唔辣嘅菜色松子魚魚味唔腥，外脆內軟，酸甜汁掛得均勻，松子香口，唔會太油膩，驚喜之作！啤酒鴨嘅鴨肉燜得軟淋，啤酒香完全入晒味，好惹味！ 神來之筆係最後上嘅大盤花菜，食咗咁多肉，嚟返盤花菜係畫龍點睛，炒得好香蔬菜又減膩。  主食叫咗兩碗麵，好似話係呢度嘅招牌菜，私房牛肉麵同紅燒肥腸麵，不過我已經太飽，所以叫試味食咗一啖就算，最特別嘅我覺得係個麵，唔係我平時喺香港食開嘅麵質，唔知係咪四川特產？幾得意。總括來講，呢間川菜館價錢合理，份量足料，辣度可以按客人要求調整，服務態度唔錯，上菜速度夠快。一定會再encore，推薦俾鍾意挑戰麻辣嘅朋友！…查看更多

自從搬咗屋之後，已經甚少去尖沙嘴食嘢，但係今日有啲嘢做，所以就出咗去食Lunch。而家經濟環境真係好差，有心嘅餐廳已經越來越少最唔開心嘅係，好多好食嘅餐廳，當再去幫襯，已經將貨就價，唔係嗰個味道好彩只係越嚟越少，都唔係零，今日就食咗豐富嘅一餐。日式午餐定食，最平只係$88，就可以有一碟碟精緻嘅日式料理。我揀咗咖哩吉列魚柳同埋日式炒雜菜做主菜主食就加咗錢要我最鍾意食嘅麻醬手打烏冬咖哩有少少辣，啱晒咁悶熱嘅天氣開下胃日式炒雜菜夠晒入味，絕對唔係求其淥熟佢再加啲醬汁手打冷烏冬加埋麻醬，消暑清新因為我見佢仲有得追加小食，價錢好抵，我就家咗個糖心蛋暑仔沙律，同埋鮑魚道道菜式由烹調到擺盤都有心思，我唔會話佢係好平嘅一個午餐，但係絕對係值得支持嘅小店。…查看更多

搬咗去筲箕灣幾個月，發現成個筲箕灣都冇乜甜品店，突然好想食甜品，就求其搵間試下。件到呢間店面都好似幾ok，價錢都合理，第一間就試佢（其實都冇乜幾多間揀）。叫咗一個棉花批，同埋芒果西米露加桃膠。店員將外賣送到過嚟，一望，點解咁細盒嘅，已經覺得有啲中伏。返到屋企一打開，個盒細都算，仲唔滿嘅。雖然擺咗隻匙羹做reference，但係唔滿意佢嘅份量，都係明確啲好。呢碗西米露 $36，如果喺銅鑼灣食，我未必會咁大反應，但係筲箕灣。。。，我真係唔ok。另外俾咗$18加桃膠，唔記得影相，係兩粒手指公指甲size加一堆芝麻咁大嘅碎，即係呢碗嘢唔計外賣兜係$54。至於味道，個芒果底的確有芒果清香，芒果份量係可以接受嘅，但係啲芒果完全冇芒果甜味，望下嗰啲芒果粒幾淺色都應該估到，總結就係食咗一pat冇乜味嘅凍糊落肚咁。至於個棉花批，係即焗嘅，熱辣辣，但係裏面啲香蕉焗到出晒水，水汪汪咁。呢間嘢，一定冇下次。…查看更多

因為工作關係，要喺尖沙嘴食飯，尖沙嘴係就係好多餐廳，但係CP值高嘅唔係好多，有啲仲食完一肚氣，收工已經夠攰，想食啲好食啲嘅嘢唔想搏，就去返上次食過一間滿意嘅日式餐廳。上次我嚟嗰陣係食咗佢嘅日式火鍋，今次嚟到見到佢出咗 Dinner set，好多選擇價錢又唔貴，咁就試下啦我叫咗咖喱雞稻庭烏冬set，前菜嘅餃子係正常冇乜特別，但係一定要提嘅係超級驚喜嘅玉子燒，一入口外層微焦，內裡滑嫩，個面甜甜地，我其實仲想再食多一份，不過好似冇得單點，唯有下次再食。主菜咖喱雞咖喱汁濃郁而不膩，有少少辣啱我，雞肉嫩滑多汁，搭配上香軟嘅珍珠米（我最鍾意嘅米飯，我其實唔鍾意食泰國香米），每一口都係滿足感。食完一啖，咖喱嘅香氣喺口中繚繞，令人回味無窮。稻庭烏冬煮得恰到好處，彈牙有嚼勁。仲有要推介嘅係佢哋嘅糖心蛋薯仔沙律，糖心蛋煮得生熟度剛好，完美地保持咗蛋嘅鮮味，新鮮的薯仔搭配上特製的日式醬汁，簡單嘅一味菜，其實要煮得好食並唔容易，但係呢度做到了。仲有佢哋嘅串燒做緊優惠，買一送一，仲要不限選擇，即係可以叫兩串唔同嘅送其中一串，而唔需要兩串一樣，人數唔多都可以試多啲款式。串燒燒得恰到好處，可以一試。另外叫咗特飲白桃梳打，為我疲倦嘅放工後身軀打咗一大波氣！…查看更多

年頭喺朋友介紹之下，去過一間位於荔枝角工廠大廈嘅泰式餐廳，大件夾抵食，一直都想再去但係未有機會。終於今次朋友返香港要去食飯，佢哋想揀返九龍嘅餐廳，咁我就同佢哋去呢度食雖然佢哋有好多唔同嘅嘢食揀，但係個套餐真係抵到冇得輸，所以我哋就決定叫套餐再另加單點項目。生菜包真係我嘅至愛，調味配合一流，唯一缺點就係好食到唔夠喉柚子沙律係一道典型的泰式開胃菜，柚子肉同特製嘅泰式醬汁，每一口都係清新與酸爽嘅完美結合，我冇喺任何一間其他泰國餐廳食過味道咁多層次嘅。串燒豬肉雞肉：肉嘅份量毫不吝嗇，佢哋呢間餐廳最出色嘅真係調味，特制嘅泰式甜醬令每一口都係滿足感。炸蝦餅就係另外嘅單點項目，外皮酥脆，入面嘅蝦肉嫩滑多汁，搭配上特製嘅甜辣醬，真係想食完再食。最後叫咗之前朋友介紹話一流嘅椰皇三重奏，上次因為病咗食唔到，今次一定要叫返。一啖入口，我同朋友都學味吉陽一（嚗露年齡系列）大叫：好好味呀！三重奏係炸椰絲、椰汁布甸、同椰青啫喱，入口三種唔同味道同口感，但係異常配合，唔知邊個諗出嚟嘅。呢個甜品簡直係完美嘅收尾。呢餐，朋友都係讚不絕口，加上價錢真係抵到爛，幾個月冇嚟水準都維持到，希望佢哋可以繼續keep住，等我繼續有平靚正泰國菜食…查看更多

今日我喺朋友介紹之下，去咗一間大角嘴嘅隱世火鍋店，鋪頭唔算易搵，但係去完之後，覺得遠啲都係值嘅。朋友介紹一定要試嘅係招牌菜——花甲蟹鍋湯底。花甲蟹鍋湯底係火鍋嘅靈魂。花甲同蟹都好新鮮，加上細心熬煮嘅湯汁，濃郁得嚟帶有海洋嘅鮮美同清甜。湯底係淡淡嘅黃金色，散發出誘人嘅香氣。象拔蚌唔係間間都好食，呢間嘅象拔蚌口感鮮嫩，紋理分明。喺花甲蟹鍋湯底裏面煮完之後，將湯底嘅鮮味提升到另一個層次，貴少少都應該要食。牛肉係我最重視嘅火鍋材料，我哋叫咗一個牛肉拼盤，唔同部位同油份嘅牛肉都有，啱唔同口味嘅朋友，牛肉肉質鮮紅有彈性，碌十秒好喇，牛肉鮮嫩，同湯底嘅濃郁完美融合，每一啖都能令人滿足。餃子同手打丸都係必食，三款唔同嘅餃都係皮薄餡多，餡料嘅調味恰到好處。煮熟之後，餃子吸收咗湯底嘅精華，如果唔係太飽，仲想再order多一碟。…查看更多

位於香港繁華嘅尖沙咀，「The Harmony」唔單止係一個用餐嘅地方，更係一個能夠令人放鬆身心、享受美食嘅綠洲。環境優雅舒適，一入到去餐廳，優雅嘅裝潢同埋溫馨嘅燈光都能夠令人感到放鬆。木質嘅桌椅同精緻嘅裝飾畫，營造出一個舒適嘅用餐環境。服務員態度親切有禮，令人覺得賓至如歸。香濃而不膩嘅牛肉鍋物湯底係靈魂所在，經過慢火熬煮嘅湯底，濃郁而不膩，帶有豬骨嘅甘甜。湯底入面食得出足料，每一口湯都充滿層次感。順帶一提，湯底都有幾款不同選擇，包括魚湯、味噌，我今次揀嘅係豬骨湯底。牛肉新鮮，分量啱啱好。牛肉碌幾秒就食得，口感鮮嫩多汁，帶有豬骨香味。除咗主打的牛肉之外，配菜都好豐富，包括新鮮蔬菜、豆腐、洋蔥、金菇等，仲有我就唔食嘅大蔥。呢啲配菜用湯底煮熟之後，吸收晒湯汁嘅精華，成個鍋物嘅口感都豐富晒。…查看更多

坊間嘅寵物友善餐廳，大多數都係唔會focus喺食物質素，因為去嘅客人多數都醉翁之意不在酒，不過今次都有啲令我跌眼鏡同朋友帶埋狗狗周圍搵地方食嘢，今次去到將軍澳，地點有啲隔涉，但係環境好靚，好多俾寵物嘅打卡位，仲有俾寵物玩嘅真雪場。不過呢度openrice，我都係focus返食物我哋點咗兩款食物，all day breakfast 大件夾抵食，百幾蚊已經有多款食物，仲要擺盤擺得好靚另外一個菜式係安格斯漢堡，非常足料，漢堡扒唔似係現成來貨，唔知係咪自己整嘅，牛味香濃。薯條份量大，炸得外脆內軟。呢度嘅食物質素不錯，不過最開心嘅真係隔離左右都係唔同嘅狗狗，我真係又有得食，又有得玩，開心到飛起…查看更多

朋友喺荔枝角返工，就佢放工喺荔枝角食飯，我想食亞洲菜，朋友就帶咗我去食泰國菜餐廳唔係好大，不過都幾光猛，有陣時好怕啲工廈餐廳黑麻麻，成日會形住唔乾淨，所以入到去夠光，感覺環境都清潔啲坐低睇餐牌，老實講，我嚇咗一跳，2人餐$245?????? 唔係per head 喎仲有一個2人餐貴少少，$358。咁第一次試就試個平啲嘅先啦，諗住$245嘅嘢，應該都唔會食得飽，如果啲嘢好食先再加其他嘢第一個上嘅菜係串燒，我一睇，點解咁多肉嘅，一串嘅肉嘅份量係我平時食開嘅泰國餐廳嘅接近兩倍。食入口，呢個價錢當然唔expect係黑毛豬質素，但都有肉味，最正嘅係個沙嗲汁，佢嘅調味食得出唔係現成沙嗲汁開嘅，而係用好多唔同嘅香料調出嚟跟住嘅柚子沙律就正常一啲，雖然冇咁驚為天人，但係同樣足料泰式炒生菜，生菜係平嘢，本身真係冇咩期望，但係又係另一個意外，佢嘅調味真係令到普通嘅生菜一啲都唔普通，食完呢味菜之後，我終於confirm呢間嘢最出色嘅應該係調味最後係泰菜裏面我嘅飛佛菜式生菜包，同樣都係份量足調味正，我真係冇諗過百幾蚊per head已經可以食到又好食又飽肚嘅泰菜朋友雖然都已經飽咗，但係佢話呢度嘅椰皇甜品出名好食，但我咳緊醫生叫我唔好食甜，我就要留返下一次了，朋友就自己獨食埋單嗰陣又出現另外一個意外，我食完返通常都會check一check單，睇單見到竟然唔駛加一，我忍唔住問waiter，你哋唔駛加一？侍應答返原來星期六日都要加嘅，不過平日就唔駛，我決定下次一定會嚟，不過都係會揀平日，嘻嘻…查看更多

聽聞呢間啲煲仔腸粉好好食，特登走去食，有一次晏晝12點幾一點去到，然後話未去拎腸粉冇得食，所以我走咗。跟住今日5:10去到，話煲仔腸粉淨係五點前先有， 5:00之後只可以叫$128嘅蟹粉煲仔腸粉，我問佢我肯俾$128但係我唔食得蟹粉有冇可以轉其他嘢，係冇囉，係咪要大枝嘢到咁樣。…查看更多

朋友係香港仔地膽，嗰日出開香港仔，佢就話帶我去食好西，所幸，好西真係好西。魚皮我平時唔係幾食，但係朋友話呢度嘅薑蔥魚皮喺必食之選，咁我就試吓啦，點知真係食到停唔到口，佢嘅魚皮一啲都唔腥，唔會滑潺潺。估你都估唔到，魚皮嘅質感竟然係爽脆。加埋薑蔥同甜豉油一齊食，我話俾大家聽我係打包左一份返屋企嘅。（不過返屋企之後味道真係有距離，所以都係堂食好）金沙魷魚，個鹹蛋味非常之香，絕對唔係出邊嗰啲所謂金沙得少少鹹蛋就算。佢個鹹蛋仲唔知用咗咩方法令到佢係流沙嘅，coat咗喺炸魷魚嘅面度，就算熱氣都要繼續食。另外掛住食唔記得影相嘅係乳鴿同埋沙薑雞腳。乳鴿都炸得香脆，不過我本身對乳鴿一般，但係我啲朋友都食到舔舔脷。沙薑雞腳非常入味，選腳趾都在所不惜。其中一個招牌菜係蜜糖薯仔牛柳粒，呢個就相對頭兩個菜式較為失色，亦都同我食開嘅另一間小炒有距離。牛肉有啲銀，薯仔亦都唔脆。豆腐海皇羹就好一般，生粉多咗啲，材料唔太夠。本身朋友話呢度個石鍋芥蘭好好食，不過因為我唔太鍾意食芥蘭，而非常之鍾意食豆苗，就問店家可唔可以做石鍋豆苗，店家話可以。上菜嘅時候的確好香，但係豆苗都係適宜用蟹肉或者瑤柱扒多過石鍋，所以個味道唔係好夾。最後就算已經好飽，但係都加咗個豉椒炒雙蚌米粉底。雙蚌冇咩特別，但係個精華係個米粉，煎到香香脆脆，再點埋啲豉椒汁，飽都要繼續食。最後要一提嘅係，以上嘅食物係我哋三個女仔一餐之內叫嘅，雖然食淨少少打包左，但係都真係好誇張。（後記，我哋之後仲去咗食糖水）…查看更多

因為疫情關係，去咗中國公幹嘅好友已經好耐冇見。疫情緩和，終於返香港見吓朋友仲要食返餐。呢排真係好多餐廳都係俾budget佢哋寫菜，今次都唔例外。呢餐真係好好味，性價比極高，超級滿意。鹽燒南非鮑魚+魚子糖心蛋椒鹽鮑魚外脆內軟，香口非常，加埋椒鹽個配搭真係好正。我個人本身唔鍾意食魚子，覺得佢有啲腥，但係個糖心蛋就好好味。萬壽果燉響螺汽鍋湯食得出佢嘅滋潤，最令人難以置信嘅係燉完個湯，佢嘅雞同埋響螺等等全部都仍然可以食，唔會好鞋。西芹彩椒雲耳炒星班球星班煎得香口，啖啖肉， 正。蟲草花蒸星班件件一班兩食，兩種完全唔同嘅風味但係都好食。蒸班件一樣啖啖肉，冇咗香口嘅感覺更加食得出個魚味，同蟲草花好夾。中總炸子雞 伴 印尼蝦片蝦片食得出係鮮炸，雞件炸得好香而不油。金銀蛋浸菠菜菠菜鮮嫩，配合金銀蛋咸而不膩。中華軒砂鍋炒飯香港人鍾意食粒粒乾身嘅炒飯，呢個炒飯絕對係符合標準。可惜唔啱我，我比較鍾意台式炒飯，粒粒晶瑩軟滑但係唔會太乾。所以呢個港式標準炒飯我就一般。薑汁撞奶最怕用薑整嘅甜品冇薑味，而家喺出面食甜品，好多時薑湯，薑水等等嗰啲全部都唔落足料去煲。呢個薑汁撞奶，絕對落足材料，薑味糖夠辣，同奶味混成一體，係成餐飯嘅畫龍點睛…查看更多

朋友生日，佢住東區，就想搵間近近地嘅餐廳幫佢慶祝。東區好食嘅餐廳我認識嘅唔多，但係阿詩瑪壹菌絕對係其中一間我會推介嘅餐廳。因為人少少可以叫嘅嘢食唔多，一個拼盤就可以包羅萬有。我哋叫咗個五福民族拼盤，包括白玉青瓜卷、宮廷醬茄子、燈影藕片、山珍腐皮卷、油雞樅蟹籽拌海蜇五個小食，每個味道完全唔同，完全冇重複，但係個個都精彩。我最鍾意食嘅係燈影藕片，佢可以將蓮藕切到咁薄嘅薄片，再加埋醬汁糖漿，香脆可口。主食係雲南野生菌鍋，我最鍾意食菇，呢個菌鍋完全吸收左雞湯嘅鮮味，除咗菇同雞食晒之外，個湯都係飲晒，最後飽到攬住個肚埋單。…查看更多

因為係朋友訂位，所以我冇Menu，上菜嘅時候其實我係完全唔知咩嚟嘅，而家我都應該俾唔到名，但係唔緊要，我都照寫嘅原因係食過返尋味，基本上每日送我都覺得好好食同埋好特別我哋嘅食飯係每位三百幾蚊，然後佢就會幫我哋寫菜，頭盤湯水主菜主食甜品樣樣都齊，呢個價錢呢個味道簡直超值。…查看更多