zi1217的个人专页

抓住冬天尾巴系列之驚喜羊腩煲邊爐店✨ 呢度既有得食羊腩煲，又可以食完加雞湯變打邊爐，而且兩邊都好有睇頭，唔會話兩頭唔到岸，直情煲兩頭到哂岸添！先講羊腩煲嗰邊，炆到超腍超入味，肥膏直情入口即溶，不過我自己重口味就會想佢再羶啲，但朋友就相反鐘意佢唔會羶，另外仲有枝竹冬菇馬蹄竹筍等配料，一路煲一路索哂啲羊汁真心正，仲有跟埋我至愛嘅腐乳醬添✨至於邊爐方面，作為銅鑼灣港島旺區就算係樓上舖都依然覺得比出面平，美國Prime級牛小排，嗰個木盆成隻手臂咁長上枱已經嘩咗聲，咁都係賣二百六，另外同樣係用巨型木盆裝嘅封門柳拼牛脷就兩舊水都唔洗，封門柳同牛小排兩者相比有如兩個極端，封門柳就係食個牛香同咬口感，牛小排就食個油脂香，至愛牛脷超薄切，淥十秒左右已經食得，其嫩口感完全係我杯茶✨另外仲有啲即食小食都意外地唔錯，例如糖心皮蛋加咗酸甜子薑碎有夠討好；火鍋配件芝心獅子狗就每粒獅子狗個窿塞啲芝士入去，望落流流地，但食落反而比吉邊個芝心竹輪有過之而無不及😮 其實仲有唔少配料選擇，只係錯估牛肉份量冇諗過咁大盆，唔係都會想試多幾款😂 話說雖然呢度係樓上舖裝修一啲都唔IGable，係勝在夠乾淨空氣亦夠流通，食咗成兩粒鐘都冇出過汗又唔覺焗，個人覺得打邊爐食得舒服真係好緊要，而且呢度走實而不華路線，全部真材實料實在好有驚喜呢✨…查看更多

蘭桂芳新餐廳系列超好食烤雞！其實我真係好鐘意食雞，而今次呢個仲要係用醉雞柳以法式烹製，感覺亦中亦西有夠fusion，雞肉質地軟嫩帶酒香超正！另外仲有巧克力和牛都唔錯，魚子醬凍天使麵就夠哂清新，前茶方面和牛他他配海膽又好夾，煙燻鰻魚陣微鹹香同魚子醬都好個襯，甜食控一定要試埋甜品，一次食晒兩個年代潮流嘅芝士蛋糕，榛子味tiramisu我超愛，而至潮巴斯克芝士蛋糕加咗柚子味清新咗亦幾過癮呢！btw佢哋3 course lunch set menu都係做緊二百尾，呢個質素食得過喲…查看更多

上個月最新開張嘅高級日式料理店，主打omakase不過今次就嚟食set lunch，以等級嚟講都算經濟，套餐除咗主菜之外有跟沙律、茶碗蒸、味噌汁丶水物（即係甜品）豪華刺身定食有足足七款刺身，包括海膽、帶子、拖羅、牡丹蝦、鯛魚、鰤魚，同埋比較少見嘅吉備奈子，特別欣賞佢將青檸雕花再放海膽上去，其青檸香為鮮甜嘅海膽披上一絲清新嘅微酸感；另外和王海膽丼雖然價錢較貴，但不惜工本咁用上和牛同海膽組合而成，可以話係最高享受呢…查看更多

朝聖人氣台灣任食燒肉！相信呢期最Hit嘅一定係牛大人火鍋，而佢哋嘅同一班底再開多咗間台式燒肉，為一眾過唔到台灣嘅美食迷一解相思之苦！.一眾肉類中最推極黑霜降牛肉眼，比澳沖和牛更有驚喜，當然牛舌都係燒肉必備，作為台式燒肉當然唔少得台灣食物，私心推介屏東燒魚腹同三杯雞，另外仲有自助式嘅櫻花蝦滷肉飯，睇到呢度嘅朋友應該會覺得燒肉放題然後食飯係一件好戇居嘅事，而我當時食之前都有同一想法，但當食到咁上下想食啖飯嗰陣，以一試無妨嘅心態整咗碗，發覺真心不得了，其實佢個滷肉汁係冇肉的，不過唔緊要反正燒肉放題自己加肉上去，重點係個汁爆到超香，加到成個飯就係超惹味，同埋紫菜碎同油浸櫻花蝦都係任落，再加返霜降肉眼或者牛舌撈埋一齊食，個人覺得直情超越左牛角飯嘅地位😂.當然仲有我每次去台灣都會飲爆作嘅嘅蘋果西打，同埋佢同一般放題唔同最後個雪糕可以轉做檸檬愛玉超正囉！(btw當晚我點得最多嘅汁竟然係辣椒醬，作為唔食辣嘅我覺得超級正，因為佢哋個辣椒醬完全唔辣而且有浸台灣醬料味der~).…查看更多

叫咗一甜一鹹～～～分別係日本北海道帶子鹹薄餅crepes～～～有三粒巨型帶子食落啖啖肉！！！而甜款就係紅茶匯聚甜薄餅crepes～～～紅茶吉士加上自家製意式雪糕超好味～～～除咗crepes之外仲有賣相拍得住高級餐廳嘅牛油果蟹餅～～～同埋啖啖肉嘅紅酒慢煮牛頰肉配薯蓉～～～包你唔會嫌淨係食crepe會唔飽呢！！！by the way一定要試埋佢哋嘅雪糕奶昔，用自家製homemade gelato不得了！！！…查看更多

銅鑼灣頂樓新派中菜！今次去呢間雖然響銅鑼灣呢啲旺區，但開平路嗰邊都係商廈同高級嘢多，加上餐廳響頂樓，可以話係旺中帶靜，儘管坐餐廳內部都瞄到靚景，如果坐窗邊更加可以響內陸都睇到海景添！今次初到貴景就叫咗五道菜淺嘗一番.前菜兩小碟分別係陳年花雕醉雞卷同埋櫻花蝦避風塘茄子，前者肉腍入味，而且將杞子收入卷內方便食用做法幾好，後者就以腍中帶質感嘅茄子嚟代替坊間常見嘅豆腐，兩款都好高質，感覺討好.南瓜蟹肉蛋白羹有給南瓜湯賣相，但𢳂起會發現底部係幼滑非常嘅蒸蛋白，以稠身嘅南瓜汁同絲絲蟹肉配搭得非常好，中間仲有件金箔花膠奢華感十足；拔絲紫水晶咕嚕肉則以紅似火龍果代替傳統嘅菠蘿；少咗酸味多咗果甜香.鮑汁鮑魚燴珍珠米；冇諗過一個飯嘅賣相都可以整得咁精緻可愛，用上珍珠米加上鮑汁將燴成一體，粒粒分明得嚟又軟綿，而且索盡鮑汁夠哂香；最後桂花燉雪梨原個上份量超大，潤得嚟又夠甜呢…查看更多

新派韓式禪味素食餐廳！最近響musea又有新餐廳，今次呢間韓國素食聽聞大廚響韓國寺廟跟法師學師，成餐嘅菜式由食材擺盤味道都充滿禪味，今次就嚟試佢哋嘅$698六道菜套餐.除咗餐前小點/韓國花茶/精緻甜點之外，六道菜分別包括好有深山清新系嘅紫蘇籽芋頭湯配醃菜包飯；有如健康版鎮江肴肉嘅雜錦菇菌凍批；薄到透光帶味噌香有如日本煮物嘅白蘿蔔雜菜卷；醬汁好似韓式炸雞而且其脆口感又真係幾似炸雞嘅甜辣酥炸菇菌；韓式錦繡炒飯就配個超濃味嘅味噌湯，一啖飯一啖湯咁幾過癮，同埋漬物意外地辣但又好好食；最後紅棗玉桂糖水煮香梨十足藝術品咁好靚，不過個人覺得唔點柚子醬食會好啲.Btw超鐘意佢中間個透明彷寺廟造型嘅吧枱位同埋混凝土牆嘅一朶朶小花，果然每一個角落都充滿禪味呢…查看更多

二刷長龍台菜燈籠滷味！呢間永遠都係咁多人排隊等位，事關真係幾抵食，今次再去發現多咗個二人餐，套餐內容有個二人份嘅大雜燴冬粉，餸料有：豬耳朵、雞胗、雞翅膀、甜不辣、百頁豆腐、高麗菜、木耳、白蘿蔔、當中最鐘意甜不辣同百頁豆腐、之前有朋友話佢哋過鹹，當晚食就覺得其實可以再濃味啲lol 除咗大碗麵套餐仲包兩杯嘢飲同一客蘋果鹽酥雞，炸物正常發揮係夾埋蘋果片食先過癮.不過講到鎮店之寶一定係佢哋個滷肉飯，滷汁超香濃肥膏同肉量都好多唔會有食白飯嘅情況，個人覺得如果唔鐘意佢哋啲滷味都一定要去試下個滷肉飯，簡係被滷味耽誤嘅滷肉飯店，如果將來佢哋會出大碗版滷肉飯就正了…查看更多

安在家中打邊爐系列之酒鍋秘製雞煲套餐！而家酒鍋推出外賣套餐，份量以人頭計，由湯底到火鍋配料全部都安排好哂，仲可以借爐同借煲添！.今次呢個套餐除咗有雞煲之外，仲有唔少配料：黑毛豬腩肉玫瑰拼盤、掛頂頂級安格斯牛小排、即炸手工雙層芝士漢堡味響鈴卷、酒鍋黑松露蝦蟹餃2.0、台灣空運鴨血、手打花枝丸、手打芝士蝦丸、芝士竹輪卷、三色鮮製生面、雜菌拼盤、蔬菜拼盤，多到食唔哂lol.肉類自然吸引，雞煲惹味牛小排肉味香濃，豬腩彈牙嫩口，其他配料例如兩款手打丸同巨型水餃都係高質手工作，仲有特別要提嘅響鈴雖然外賣冇即炸即食咁脆口，但雙重芝士夠哂癲，仲有blue cheese超香呢…查看更多

天后新cafe！超鐘意佢地個門面，捨棄一般cafe常用嘅落地玻璃，取而代之用上超搶眼三角鐵板，工業風濃厚同時亦變得型格不少，而且四對三角形鐵板都可以打開變成半戶外環境，可惜到訪當日落大雨，發揮唔到佢最大優點.嘢食類型都有唔少選擇，由包點類到飯類都有，當日唔太餓就先食包點類輕食，三文魚牛油果班尼迪克，價錢唔平但份量意外地豐富，Egg Benedict都有兩隻而且仲配埋牛油果，不過講到最亮點應該係個自家醃製嘅三文魚，用上Vodka醃漬再醃乳酪同魚子醬，出嚟效果出色.All day breakfast同樣豐富，有牛油果沙律炒蛋大啡菇車厘茄焗豆薯格煙肉香腸，最特別係有竹炭多士；至於Acai Bowl就以藍莓為主，酸味夠哂開胃；講到整餐至愛一定係佢地個招牌作小班戟；將班戟同香蕉片梅花間竹咁砌成一個輪型，賣相夠哂IGable，雖然話係配山渣士多啤梨汁但又唔係好覺有汁，不過小班戟超好食，口感超鬆軟而且蛋味超香，十級推薦這個呢…查看更多

最近去咗銅鑼灣呢間高級日式燒肉食晏，其實佢地最近係有做放題的，不過晏晝食乜鬼放題丫，叫個套餐食，轉頭再食個下午茶好過啦，啲牛分分鐘再靚啲添。每個餐都有一碟肉、一大盤沙律、溫泉蛋、飯、湯，同埋好過癮地有泡菜，令呢餐日式燒肉頓時起了陣日韓fusion味，又其實鐘意嘅可以一次過燒哂當燒牛丼食都得.兩個餐分別係日山A5和牛同埋澳洲肩胛肉，兩款都拼美國牛舌，不愧為高級餐廳，個餐一到已經有店員幫手燒牛脂燒肉，相都未影得切就幫我地燒咗幾塊，想影相記得要及早講聲，當然人地燒慣燒熟火喉自然控制得剛剛好啦，日山和牛固然係三款牛中最好味，不過我更喜歡相對上厚身啲嘅牛舌，未到厚切但都有一定嘅彈牙度，另外澳洲肩胛肉超薄切但較大塊，廿秒內食得，都有幾香嘅牛味，再加上溫泉蛋撈飯，而個飯仲係我比較鐘意嘅腍飯易入口，食到最後仲有碗菠蘿冰俾你降溫，實在不錯…查看更多

Kiki麵最新推出超豪華海膽拌麵！而家大熱天時就算想食麵都會揀啲冇熱湯嘅麵食，今次響kiki麵度就食咗兩款好適合夏天食嘅撈麵，分別係海膽拌麵同埋海鮮中華冷麵.海膽拌麵一睇個名就知夠哂Gimmick啦，除咗頂部放一堆新鮮海膽之外，廚師仲另外將海膽攪成蓉煮成醬嚟撈麵，每條麵條都染成金黃色而且鮮味仲倍增！另一透心涼之選海鮮中華冷麵，則有元貝大蝦蟹柳蔬菜絲等冷系調料，加上開胃嘅日式醬汁可以話係夏天必備.除咗麵食之外其實都有啲小食係幾吸引，揀咗兩款都係凍食嘅小食，醬煮大根煮到腍哂入哂味但依然好清甜，椒麻雞就好重麻醬味同時又帶點微辣感，嘢飲方面幾鐘意以酸柑代替檸檬嘅酸柑愛玉冬瓜茶，一路飲仲一路啜到愛玉呢！…查看更多

作為一個港產麻甩佬又點會唔鐘意食燒味飯呢，今次食呢間響灣仔三角街，匿埋咗響街市群入面嘅燒味店，雖然周圍都係啲街市檔，但舖頭入面乾淨企理，而且仲有一堆獎盃，睇嚟係猛人開的.同朋友叫咗兩個飯，一個係黯然銷魂鴛鴦飯，有叉燒雞扒同埋兩隻煎蛋，夠哂黯然！呢度嘅叉燒標榜係用上波蘭黑毛豬，除咗夠矜貴之餘肉味仲好香濃，咬落肉質亦彈牙唔黏牙，而且好重蜜糖味，甜甜的幾好味，唯一係半肥瘦食落唔夠過癮，我會想食肥叉更多，至於雞扒意外地有驚喜，外皮香脆扒肉嫩口，其過癮之處係用返叉燒個汁調味同樣係甜甜地咁好追食.至於另一個燒鵝五寶飯就接近返平時燒味飯嘅感覺，叉燒/燒腩仔/紅腸/鹹蛋，仲有主角燒鵝都好講究，要用九個月大嘅佛山黑鬃鵝，製作方法亦同坊間有啲分別，食落外皮更脆，肉質亦冇羶味夠嫩口，雖然價錢比一般燒味貴，但用料同做法都有唔同，可以一試喲…查看更多

話說都好耐冇蒲尖沙咀嘅我最近先發現新太陽終於裝修好，成個場唔同哂之外仲多咗唔少食店，而其中一間係先前改咗名嘅奔之食堂，即係以前嘅犇之食堂，亦係繼銅鑼灣店後第一間九龍區嘅分店，想食嘅朋友唔洗過海喇.師大香酥排骨滷肉飯份量都幾大份，滷肉量夠哂多，作為滷肉飯控呢個冇乜野好挑剔啦，排骨都炸得好香口，如果再鬆軟多少少就完美；眷村紅燒牛肉麵雖然係紅燒但其實辣度唔算高，只係BB辣我都食到果隻，但又幾惹味下，牛肉係牛𦟌位原切但都煮得好腍幾高質.犇之極品拼三寶就有台式香腸/糯米腸/雞米花，台腸係原條打直切半幾過癮，雞米花就似細粒肉嫩版嘅X樂雞咁一粒一啖好香口，基本上有個糯米腸其實可以當係主食xD 仲好咗眷村牛肉捲葱餅，冇諗過作入面都係塞牛肉麵啲厚切肉入去，而且煎得夠哂香口，仲有佢有樽來自台灣嘅愛之味甜辣醬任點，一點即刻返咗台灣咁好正呀…查看更多

朝聖旺角最夯新cafe！呢間開響新活化618頂樓嘅蟲二，其實係上環3rd space班底開嘅新分店，之前都有食過佢地嘅班戟好正，今次試埋佢地嘅熟食先.前菜有蛋黃醬烤魚餅/清新山葵醬魚豆腐方塊/特濃芝麻醬涼拌牛蒡，好鐘意山葵醬同上面嘅脆脆，然後又好鐘意烤魚餅軟腍嘅質感，牛蒡酸酸地都好開胃.包控之選有煙三文魚太陽蛋薯蓉吐司配小蕃茄，亮點係個吐司，食落質感幾特別唔同坊間一般麵包，配上煙三文魚沾埋個蛋漿更加出色，仲有埋個薯蓉超飽肚.不過講到呢度嘅招牌一定係佢地嘅一汁三菜便當，有充滿菇香嘅姬松茸菌茶樹菇小燉湯同和風涼拌豆腐配菜，開胃小食就有花椒味木耳絲/柚子漬蓮藕片/青瓜漬，主食就揀咗煮到超軟腍嘅原條蒲燒鰻魚，仲有個日本太白慢煮蛋可以配鰹魚湯茶漬穀米飯一齊食添.而我最期待嘅當然係班戟啦，伯爵茶味之前響上環已經食過，所以今次就試桂花傳統班戟，配燒海鹽芝士忌廉醬/鮮菓/牛乳雪糕，仲有成個班戟嘅靈魂百花蜜，其花香中和哂所有膩感，而班戟中間仲加咗麻糬響裏面，層次感再高咗，煙煙韌韌好得意呢…查看更多