Gundamlover的个人专页

上星期五要去天后睇醫生睇完醫生咁啱係食飯時間, 都預咗度度都好多人不過好難得有機會晌港島食, 來都來了, 照食啦行過呢間餐廳見仲有位, 於是就入去食。揀咗個雞扒飯, 同埋加錢點咗杯熱LATTE個賣相同佢MENU9成9似, 己經覺得好靚食落WOW咗出黎~!因為個雞扒太好食...個衣好脆但一啲都唔硬配佢個菇汁係超夾個菇汁食得出係好有心機整同出面食開果啲好唔同, 好杰同有好多粒粒配埋個蛋飯食真係一絕....可能我肚餓啦...5分鐘左右就清曬....個LATTE都好味好SMOOTH有層次但唔苦下次有機會想再試埋其他野....不過可能我會受唔到誘惑.ENCORE呢個雞扒飯 .,. 哈哈~~…查看更多

上星期要坐通宵機去日本，晌機鐵站CHECK IN行李後返中環搵食。朋友話就開咗間拉麵叫我去試試，於是就到中環涼茶舖果條街試試佢。　門口寫住＂冠軍拉麵＂，不過我就聽到未聽過….總覺得日本得獎的拉麵基本上一定會被報導…anyway，以平常心入去試吧。　入到去，好似居酒屋加拉麵店的感覺，頗不錯。尤其係水壺同辣醬器皿都係用日本野，幾好。雖然只係得一半人，不過都好嘈。　我同個friend點左最基本的拉麵，5款的串燒，免治雞肉飯。原本想串燒配啤酒，不過啤酒未有得賣，殘念。等左好耐之後，拉麵終於來喇…飲一淡湯，已經覺得不妙…以為去左味千…點食都似係開水湯，而唔係真係煲出來的，然後果個醬油就非常之油…雖然未至於入唔到口，但點都唔可以叫好食囉。不過平心而論，佢個叉燒係好食的，又稔又入味，肥瘦又適中。之後黎個免治雞飯，都ok。雞肉唔算滑，不過夠入味，配埋大量藥味，撈飯一流。米飯亦軟硬適中。食到呢度，諗住間舖都係少少差啫，同埋以佢拉麵質素黎講係貴咗少少，點知之後先賴野…個串燒等左好耐好耐之後，先至上抬。一黎度，我同個friend都呆左唔識出聲，因為佢用一大pat獻汁淋上啲串燒度（有圖有真相），一來正宗串燒絕對唔會咁做，二來同佢餐牌相片有極大出入…都算啦，照食啦。放到入口……咸到要叫救命….5串入面，食左第一串係咁，第二串咬第一啖都係咁，個問題晌個汁度，所以理應每一串都咁咸，於是我同個朋友都決定叫經理狀既人黎。我：「唔好意思，呢個真係咸到成唔到」女經理：「無理由架，我地既醬汁係預先調好架喎」(<-同咸唔咸無關係吧？)我：「真係架，呢幾串我地無掂過，不如妳試一試丫」女經理：「無理由架，不如你試埋個帶子丫」我：「個問題係晌個汁度，所以每一串都好咸，妳不如試一試丫」女經理：「無理由架喎，你地係第一個咁講」(<-佢都係唔肯試下)到最後佢自己都唔肯試下自己啲出品有無問題，而我當然係堅持要取消呢個菜，而且俾左百幾蚊仲要俾加一而走。佢既對答令我諗起政府Well，賣野食比人，自己整出黎既野食，自己都唔敢試唔俾咸臉，我怕有其他師兄師姐會瀨野！！…查看更多

6點放工後約左朋友食飯，但天氣熱，我地兩個都無乜胃口，於是朋友提議去食串燒，食少少跟住飲啤酒。Good idea！於是我地就去左呢間”乾杯”。聽講呢間野個concept同店名都係抄台灣同名集團，後來仲俾人告，不過事實係點都無乜所謂，啲野好食就得啦。特登早啲黎係因為知道佢入夜會好多人，我地到步時都仲係得一枱客。Btw，唔知點解入口度門要好大力先推得開…。我地點左兩份生啤酒，牛脷，蟶子皇，台灣腸，燒鱔，豬頸肉同埋荔枝煙肉卷。講番裝修，乾杯俾人感覺好似日本居酒屋…應該話台灣係抄日本居酒屋，而佢係跟足台灣去做。基本上係舒服的，店員又ok有禮。由於枱面細，所以佢地收野收得好快，如果唔係可能無位放食物。野食方面，啤酒夠凍無問題。蟶子皇好新鮮，不過落太多鹽喇，搶曬啲鮮味。如果落少啲鹽就好完美。牛脷唔掂，又硬又咸。燒鱔就一流，燒既程度同埋調味都係妙絕。咬落去表面脆裏面稔。豬頸肉同埋荔枝煙肉卷都好好食。前者略咸。台灣腸就唔得唔影相，不過都係買番黎燒，無乜野好講，味道係好的。擬似老細的人中途問我地啲野好唔好食，我地都同佢地反映左食物太咸的問題。我地都明白人地要靠酒水去賺錢，而野食咸啲可以令到客人叫多啲野飲，不過咸得滯就過份左。埋單$440左右，以總共6串野2杯啤酒黎講真係幾貴，有人請時咪黎食囉 XD仲有，食到7點已經好鬼嘈… …查看更多

之前行過呢間野門口，當時封住裝修緊，但貼左好大張poster， 有好大隻貓眼，寫住「醬汁飯專門店」，已經有啲期待，今日同同事過開合和中心，發現間野開左，於是馬上試一試。呢 間cats eye入面好細，我諗得十零廿個位，但不論內外裝修都好日式，open kitchen睇 住廚師煮野幾好feel，好似去左拉麵店咁。原 來「醬汁飯」係以四款醬汁互相配搭的日本滑蛋飯。除左主打咖哩之外，仲有忌廉汁、濃茄汁同埋牛肉汁+漢堡扒。不過和牛漢堡扒已經賣曬……今 次食住佢個三色咖哩濃茄汁飯，我個同事就試左忌廉汁咖哩飯。日 本店員同我落單後，等左約5分鐘先有得食…店員有少少手忙腳亂，原來人地尋日啱啱先試業， 睇黎仲要花時間熟習呢。等 到個飯黎….先講個賣相，真係無得頂！個半熟蛋非常靚。例牌，相機先食。之後一食，蛋味好濃好滑，配合個咖哩一流。咖哩係 傳統日本咖哩，但同平時食到果啲無餸咖哩唔同，好多洋蔥同紅蘿蔔，紅蘿蔔煮到入口即散，okay好食。濃茄汁真係好重茄味，應該落足料，牛肉亦夠稔。份量okay， 不多不少。同事就話個白汁奶味好濃好好食。下次可以試下。仲有，個飯好好食，好似壽司店啲飯咁有lim性，用日本米係唔同啲。走 時聽店員講，由於漢堡扒製作需時而且成本貴，所以每日都係限量，中午同夜晚各有一定數量，賣完就算數。野 食okay，店員好有禮貌，下次會來試漢堡扒。…查看更多

因為要去一田買野，所以有機會入去大埔，於是就問定朋友有咩好食啦，朋友就話有間野好出名，好多人，好有歷史，於是就黎試下。間野叫蔡潤記，晌一條唔起眼的巷仔，都唔易搵。去到坐低，果然係舊式店鋪，內部裝修好舊，但大約有五十個位（因為全部係圓枱要搭枱）麵位由二位女仕負責，反而男仕就寫單。佢話自己馳名魚蛋同埋牛腩，咁就一於試下魚蛋牛腩河啦。順便加多個汔水（聽朋友講話有奶茶…可能佢記錯啦）呢度煮野唔快，份量亦不多，魚蛋係細細粒果啲，咬落去無乜魚味，又唔彈牙，牛腩唔稔又唔香，最慘係佢個湯底，除左豉油水之外真係咩味都食唔到….實在睇唔到有咩咁突出，唯一好處係平（但又唔係超平）…只此一次，下不為例。…查看更多

上次黎呢度都唔記得係幾時喇…今日同同事A去完海港城做完野行過去搭地鐵，想食少少野又想平平地又想快快手，原本想落silver food court，但又記起上次落去都無乜好事，於是就拉咗同事A入海防道熟食中心。我叫佢求其揀一間，佢就揀咗呢間…咁我平時食開「得髮」，未試過呢間，咁就一於試下啦。一般牛什粉麵茶餐的menu，今次叫左個牛丸麵同牛腩麵。牛丸麵同平時食開旁邊的「得髮」爭少少，元朗係屬於幼滑形，而佢同旁邊屬於粗獷形。但有咁raw味先似番大排檔！麵就一般貨色。不得不提佢個辣椒油，絕對有畫龍點晴效果。牛腩炆得都叫入味，但就唔夠稔，大排檔水準來說，差不多。叫埋凍奶茶同凍檸茶，埋單都唔駛八十蚊，無得投訴但諗唔到點讚好。下次都係食番隔離屋…查看更多

 話說本人細細個就隨父親晌黑布街搵食，因為有得泊低架車晌門口食野的地方唔多，晌黑布街既龍記同埋王萍記係我家常去的食店。當年成日食炸醬麵同埋水餃！上年龍記結業，心想又少個地方食舊式麵檔水餃，點知有朋友話新開返，仲改左名，不過都係佢地兄弟班底做，於是搵日放工後健身前去試一試。而家門面真係好靚，改左名叫「大隻佬」…哈哈，我諗好記過叫龍記囉，因為以前都無人叫間野做龍記。大隻佬老細好熱情…但其他姐姐就好似愛理不理咁…講番食物，今次就食左個招牌豉油王炸醬撈河同埋水餃。水餃一如以往的味道，令人懷念。豉油王炸醬撈河都好食，不過唔覺得佢太過「豉油王」囉…普通野黎。炸醬感覺無以前過濃的味道，可能係因為撈左比較淡的河粉啦。總括黎講都係好食，不過略嫌貴少左左，四十蚊一個撈河，好細碗，細埋淨水餃都只係啱啱好夠飽….睇黎大隻佬唔係咁啱大隻佬去囉，哈哈！…查看更多

最初對呢間舖頭有印像係因為佢個任拎的出前一丁麻油，之後因為夜晚晌灣仔上堂，所以偶爾都會黎食。雖然作為茶餐廳，佢個早餐真係麻麻地（沙爹牛唔係好掂），不過佢地個炒公仔麵真係幾得。乾身之餘，個汁既咸度同甜度十分適中。最重要係佢個下午茶餐三十幾蚊，有四隻炸到香脆既雞翼仲有兩個公仔麵底就真係好抵食囉。除左公仔麵之外，下午茶餐仲有好多野炒野食，最重要係晌條無乜人既橫街入面，靜靜地嘆下午茶就最正。…查看更多