GOOLOO4的个人专页

話說我個人都好喜歡食生蠔，平時食自助餐，一定會揀啲有蠔食嘅地方，但一般放題就好少有任食生蠔，而家終於搵到喇，仲要係高質果隻！唔講食物住，先講點餐，我不嬲都覺得平時啲放題畫紙仔好唔環保，呢度就透過wechat用自己嘅電話落單，雖然要download wechat,但都好容易用，又可以減少廢紙，值得一讚！講番食物質素，我最關心嘅生蠔，職員會俾個牌仔你，你只要將個牌仔放喺開蠔師傅度，佢開完就會有人拎去你張檯！啲生蠔雖然係任食，不過質素一啲都唔差，好大隻又夠厚肉，又新鮮，唔會奀挑鬼命，幾好！刺身同壽司都好新鮮，唔會一陣雪味！熟食夠晒熱，特別欣賞佢嘅燉湯，值得推介！…查看更多

「Kowloon, Kowloon Hong Kong, We like Hong Kong」，見到同撈同煲呢個名，同埋佢嘅所有裝修格調，就諗起舊時嘅香港，以前令人懷念嘅香港！周圍嘅環境，餐具，擺設都好有懷舊味道！湯底：花雕醉美人鍋，半隻雞分開上，自己落可以控制番隻雞生熟度，雞夠新鮮！黑豚肉，晾喺度嘅設計好得意，仲有青瓜片夾埋食，唔會覺得肥膩，口感又好！羊肉同樣新鮮，唔會好膻！餐肉菜甫餃同美人餃啲餡夠特別，美人餃有蟲草花喺入面。野飲試咗佢地自家制野飲，薏米水同山楂紫背天葵，幾特別幾好飲，不過口味偏甜。成晚我最喜歡呢條金魚造型糖不甩。有專人放條魚去「游水」！剪開痴埋啲糖椰絲，食落又咸又甜，好攪笑！…查看更多

平時睇日劇成日都見到日本啲上班族放咗工去居酒屋嘆番兩杯，食番一兩碟小食，鬆一鬆先番屋企食飯，好似一日嘅疲累都可以消除咁，呢日我又試下學佢地食下居酒屋！朋友推薦呢間位於西營盤嘅居酒屋，本身呢度周圍嘅環境都同平時繁華嘅香港唔同，加上佢嘅裝修擺設都好有心思，令我覺得好似真係去咗日本咁！隱藏menu?坐低之後，侍應會推介是日有咩推介，而呢啲推介係menu冇，好似呢個䲞魚刺身薄切，配酸汁，魚好新鮮，配埋個汁好醒胃！推介又點只咁小，仲有呢隻生蠔！成隻手咁大隻，好飽滿，口感仲有啲creamy！menu上當然仲有好野食！我個人最喜歡就係蟹糕多士！總括嚟講，食物係高質，雖然價錢係貴咗小小，不過都值得嘅！…查看更多

食放題我通常都要揀大喜屋，因為質素有保證！之前都食過其他分店，不過極尚大喜屋就真係第一次試，不過因為我唔係太鍾意食生野，所以今次都係食熟食為主，但係咁樣反而有意外驚喜！原來佢啲熟食都係非常之有水準，絕對冇Hea你！除咗畫點心紙之外，喺出面都有好多選擇攞！特別推介就係片皮鴨同埋呢個燉烏雞湯！呢兩樣一定要即刻攞，因為好快就會冇晒！片皮鴨係廚師即場逐塊切，雖然佢切得比較厚身同埋多肉，不過都好好食！烏雞燉湯都好好飲，不過真係好搶手，想攞多碗都比較困難，所以建議一見到就要拎啊！其他熟食好似烏冬，串燒都唔錯，特別要讚一讚個蒜片牛柳粒，好有風味，牛柳粒好有牛味又唔韌！最後就係生果同甜品，值得一讚嘅就係種類真係夠晒多，雪糕雪條都有兩個雪櫃，有Häagen-Dazs同埋movenpick! 亦都有韓國嘅雪糕雪條！…查看更多

放假特登同朋友搵下靚cafe chill chill 地傾下計！呢間環境舒適寧靜，最啱悠悠閒閒過一日！見到lunch set餐牌都覺得個價錢偏貴，同街外餐廳差不多，所以對佢嘅食物質素要求自然都會高啲！午餐送餐湯同包，係南瓜濃湯，入口感覺好綿密，包可以點醋。今次叫咗吉列蝦野菌意大利飯！估唔到意大利飯有啲驚喜，唔會煮到太林，又唔會太硬，好有咬口，最怕意大利飯煮到好似平時食嘅飯咁林，呢個啱啱好！而且個味好香，個野菌汁好味！吉列蝦得兩隻，好彩size算大，皮夠脆，蝦肉都算彈牙！朋友食炸魚薯條，好賣相幾靚！舊魚仲好大塊好厚，又夠脆同熱辣辣，朋友都覺得好滿意！再飲番個涷芒果菠蘿茶，酸酸甜甜又冰涼，好舒服！咁樣度過一個周末真係好正好relax😌…查看更多

嚟呢間餐廳食野之前，都知道甜品係出名，尤其係蛋卷，不過未食飯都要食正餐先嘅！見到餐牌都覺得個主食都幾吸引同抵食，因為我想主攻甜品，所以揀咗個最抵食嘅海藻烏冬甜品餐，有沙律，一個烏冬，飲品，最緊要係有蛋卷！都係$99！估唔到主食海藻烏冬有啲驚喜，同平時食嘅烏冬唔同，呢款幼滑好多！主角蛋卷！我揀咗黑芝麻味，芝麻味夠香，cream夠香滑，蛋糕同cream嘅比例差唔多係一比一，我自己唔怕食cream,所以覺得個比例剛剛好！另外再叫咗兩個甜品做我嘅主菜，日本草莓pancake同抹茶窩夫！士多啤梨好甜，食得出真係日本嘅士多啤梨！pancake偏厚身，蛋味較濃！唔錯，最正就係上面有個小布甸！一次過滿足甜品控嘅慾望。抹茶窩夫，配埋抹茶雪糕一定唔會錯，亮點係有栗子醬，平衡番咁多綠茶味！…查看更多

作為一個街坊，我經常都會喺荃灣遊走，睇下有咩好野食。以前會去路德圍同大商場搵食，但而家越來越多人，開始發掘下其他地方有咩好食。今次就見到喺福來邨附近開咗間食日式料理嘅小店，個名叫初見創作料理，都幾有詩意，就入去試下個Lunch!一睇個lunch menu，都算多選擇，連石燒吉列牛都有得食，而且價錢都合理，意大利粉，意大利飯等等都係50幾至70幾蚊不等，鍋物都係60幾蚊，我覺得如果係好食都合理嘅，不過好唔好食試過先知。今次我揀咗石燒香草吉列牛肋肉。呢樣好似最吸引!個牛嘅樣好似好靚，有啲香草包住，急不及待將佢放上去舊石度燒! 吱吱吱聲好開心!我燒到8成熟，咬落去唔係入口即融果種，不過唔係韌，但就好有牛味，好香!有鹽同個牛肉汁點嚟食，個汁有啲洋蔥味，我自己鍾意點鹽多啲，可以提升個牛味，汁就太濃味蓋過啲牛味!有隻唐心蛋，整得啱啱好!野飲方面，加兩蚊可以要懷舊波子汽水，不過天氣太凍我揀咗玄米茶，暖笠笠之餘可以解下肥膩!總括嚟講100蚊內食到咁嘅水準，我覺得唔錯，可以再encore!…查看更多

早排放工一個人去咗食飯，想食啲特別啲嘅野，於是就試印度菜，就喺openrice搵到呢間印度菜，而且價錢唔係好貴就入去試下。一入去發現好多印度人一家大細喺度食野，老闆員工等等全部都係印度人，即刻好有異鄉風情！一望個餐牌，其實好多都唔知係咩嚟，對印度野一啲都唔熟悉，就亂咁叫咗一樣野試。我就叫咗個芝士煎餅，佢仲配一個辣豆湯，同3個酸辣醬點個芝士餅食，個芝士餅又好脆好香芝士味，幾好食！點埋啲醬試下，啲醬係幾特別，我諗呢啲就係印度風味，一定要試😂😂我個人就覺得唔點好食啲🤣🤣第一次試辣豆湯，佢好杰身，好似一個汁咁，好似係打蓉咗嘅豆汁咁，幾好味！飮埋個印度奶茶就係好圓滿嘅睌餐😋😋…查看更多

星期日下午，嚟到工廠林立嘅新蒲崗，喺呢度有間開咗幾個月嘅茶室，我就喺度度過我假日嘅午後時光！點解叫佢做tea bar，唔係cafe，可能好多人下午茶都鍾意叫杯咖啡，但呢度著重嘅反而係茶！茶嘅選擇種類多到嚇親你，今次我就叫咗個綠野仙蹤水果茶，朋友就叫咗薄荷水果茶！連糖都好有心思，係心型的！最重要係叫tea set佢係可以無限refill,但唔係只係加水，係會加番茶，唔會越飲越淡！講番食物，我見好多人叫high tea set,我都覺得好抵食，不過今次我就叫咗一個panini, 個餡係bbq source雞肉加芝士，個配搭好夾好好味！另外叫咗個忌廉野菌意粉，個忌廉汁同啲菇都好好味，用真材實料！最特別係呢個生果沙律set,$88兩位用，包兩杯任你refill嘅野飲，真係可以嘆足一個下午。佢每款生果配搭嘅source都好有心思！袖子沙律配薄荷葉蜜糖好醒胃，又唔會太酸，我最鍾意呢款！蜜瓜青提子青瓜配藜麥香醋汁都好特別，呢3款青色嘅水果原來好夾！另外紅石榴配蘋果乳酪汁，我第一次咁食紅石榴，好特別！最後係雜果芒果配熱情果醬，呢個就有啲偏甜，因為啲芒果比較甜。但整體真係好驚喜，我好鍾意！呢個仲可以買啲茶葉自己番屋企沖，我都忍唔住買咗兩小罐試下！…查看更多

入得來試，當然係為咗一個臭字，相信好多人都會同我一樣比呢個臭字吸引到，究竟臭臭鍋係咩呢？去到門口，都幾多人排隊，但係點解臭又會有咁多人食呢，唔通真係出名臭！一打開餐牌，其實食物嘅選擇唔算多，但係佢嘅鍋物有不同口味嘅配搭，一於就叫返個招牌臭臭鍋，睇吓點樣臭法。而飲品都有唔少選擇，一般台式飲品都可以喺度搵到。等咗大概10分鐘，主角終於都黎喇！個鍋裏面有好多配料，有台式嘅肉丸、豬肉片、臭豆腐、娃娃菜、腐竹等等，以我個人最鍾意就係入面嘅豬紅同埋大腸，依兩樣野配合臭臭地嘅獨特湯底，食完後有一種非常特別嘅餘韻，齒頰留「香」。每個套餐都可以選擇跟飯或者粉絲，加＄12仲可以有一大碗滷肉飯添。滿滷肉飯都幾好食，肉汁都幾多！我仲叫咗杯熱嘅香芋奶茶，味道OK。如果嫌唔夠配料同小食，可以另外加單，不過其實食埋個滷肉飯，已經覺得好滿足了。我另外加左甜不辣，配上臭臭火鍋原來幾好食！…查看更多

日本料理往往貴精不貴多，通常一般食店只會買一至兩款食品，甚少好似香港咁一間鋪頭仔，產品卻包羅萬有，務求滿足所有客人口味。而今日同大家介紹嘅就係獨沽一味，以吉列牛排為主題嘅居酒屋-琥酌。話到明居酒屋緊係叫番啲酒先啦，雖然唔係好識飲酒，不過見到酒牌有唔同嘅特色啤酒，所以最後都嗌左清酒啤酒試一試。樽上嘅招紙其實幾得意，印上了一隻貓頭鷹，仲標明使用赤米，食店亦好有誠意，會提供一個同樣牌子的玻璃杯給你品嚐啤酒。基本上餐牌只有寥寥可數的食品可供選擇，而套餐的吉列牛扒，不同的地方就是肉質級數的選取有唔同，價錢亦有頗大分別，我選擇了最基本的來一事，但是已經非常美味！食每一啖牛扒都感受到料理呢啲食物嘅人非常有要求，因為要處理到外脆內軟係十分困難，而呢啲牛扒正正係脆得黎，有啲油膩嘅感覺都冇，但肉質依然保持得非常可口。第一次來食，我會極力推薦基本版的吉列牛扒，價錢雖然比較便宜，但食物竟然會比到你一個喜出望外嘅感覺。…查看更多

相信大部份人假期都會同我一樣，成日都會瞓到朝百晏，起左身都唔知空住肚食早餐好，定係去真真正正食午餐好，禮拜日出街要食餐好少少一啲都唔容易，一般餐廳都會大排長龍，不過唔緊要，今日同大家介紹呢間餐廳雖然係市區，仲要喺地鐵站旁邊，但係一定唔使等餐死先食到好野！想食得豐富啲，所以嗌咗西冷扒配薯條呢個午餐， 塊扒肉質一啲都唔差，以呢個價錢絕對係性價比高，而薯條非常香脆，係啱啱炸起的，抵食！呢個餐仲跟埋湯，而今日嘅湯係蘑菇湯，味道濃郁。其實呢間餐廳最出名嘅係佢哋嘅飲食潮流，主角係唔同口味嘅無麩質可麗餅，究竟無麩質係咩意思，我問過店員同喺網上睇左啲資料後得知，原來係歐洲近十幾年來都非常提倡使用無麩質的麵粉製造麵包、面食，目的係令到食用者可以更健康，因為麩質其實會令到潛在性對小麥有敏感嘅人免疫系統受破壞，但事實上冇對小麥有敏感嘅人，影響應該不大。而呢塊可麗餅口感不錯，比起平時食開嘅更有彈性，係幾好食嘅。…查看更多

天氣熱，口淡淡，唔知食乜好，最好梗係食乜都有得揀嘅放題啦。老實講，日本野真係食極都唔厭，食極都唔膩。今次嚟到嘅係殿大喜屋，聽個名就知應該係會有宮殿咁大，入到去，果然格局比起平時嘅放題餐廳寬躺、舒適。打響頭炮梗係食刺身啦，有陀螺、北海道帶子、甜蝦，樣樣都非常之新鮮，尤其係赤貝真係好鮮甜，一定要encore !食得多生冷野，整返啲滋陰嘢，唔好睇呢碗野個賣相窄窄地，佢其實係海南椰子雞湯，飲落都幾滋潤，大家不妨一試。潤再食壽司，呢個容器幾特別，鵝肝帶子壽司又幾過癮，不過我始終鍾情於鹽燒左口魚邊！而呢味生牛肉他他係我放題第一次食到，口感其實不錯，都OK新鮮。蝦天婦羅新鮮炸起，香脆可口，而不能不試當然係我最喜愛嘅咋榴槤波波，榴槤粉絲必吃！…查看更多

之前同同事lunch黎食過首首.韓式小館既lunch set, 覺得環境同食物都唔錯, 所以約埋朋友黎試下晚餐順便慶祝生日 ^^ 比起lunch set, 夜晚既menu多好多選擇, 而且款式同賣相都比一般既韓國餐廳摩登😋반찬 前菜:每人三碟～其中一碟唔少得一定係泡菜😆막걸리 米酒:細細枝但酒精含量比一般米酒高, 味道亦較濃! 份量兩個人飲岩岩好🥃해물김치전 海鮮泡菜煎餅:米酒配煎餅係韓國人落雨必食之選～煎餅辣味十足, 咬起黎卜卜脆唔會太厚身, 加埋旁邊既沙律菜中和番油膩既口感👍🏻 매운 갈비찜 辣炖牛肋骨:牛肋骨有先炸過再炖, 肉身焾得黎辣味又夠濃! 岩晒我呢D重口味又愛辣既人😍石頭窩米糕伴雪糕呢間餐廳有好多非傳統既韓式甜品, 用熱石窩裝米餅加雪糕真係第一次見~ 但味道係意想不到既襯同好食!!PS. 去洗手間經過二樓時發現二樓既裝修更精緻同有藝術感! 窗邊位置仲可以望到利東街既夜景~…查看更多

自己好怕多人，甚少去中上環食嘢，但係朋友好夜先至喺中環放工，迫於無奈下唯有就範，喺中環搵啲嘢食。依家天氣好熱，成日都冇晒胃口，所以今次揀咗一間甜甜、酸酸又辣辣嘅泰國串燒店，諗住醒一醒胃。有各式各樣嘅泰國啤酒，當然仲有汽水奶茶等等。餐牌嘅食品一眼睇晒，串燒種類大眾化，除咗一般嘅豬肉、雞肉同牛肉，仲有燒雞皮、泰式魚餅。燒燒雞翼先，味道真係好香口，即叫即燒。試吓新野，第一次食鰻魚串燒，估唔到泰式口味嘅鰻魚串燒又幾特別架喎，啲皮仲係脆卜卜，係幾正嘅！除咗串燒之外，呢度仲好出名食海南雞，隻雞都幾肥美。我個人會比較推薦大家食燒菠蘿、泰式魚餅同埋燒魷魚鬚。總括而言，雖然串燒種類唔算太多，但價格非常大眾化，所以最後我們叫了很多，兩個人去食，喺中環黎講，埋單一啲都唔貴，叫咗勁多嘢食，反而仲覺得食到好「豪」咁呀！…查看更多