Bacchus526的个人专页

我都係睇Open Rice食評，見到有間食四川辣野既小店，位置雖然在大馬路，但呢段路比較偏遠的，大部分人會去荃灣廣場果邊用餐，尤其揸車要泊車，商場會方便好多，所以呢間小店可以經歷咁多事件，都仲可以屹立不倒，都幾硬淨。Open Rice內既食評大部分都係讚多，食物質料高，我今晚專登去一試。今日雖然是公衆假期，現場有4枱客，環境都算，寬敞唔會太逼夾。店內枱椅等就有點舊，不過都算乾淨整潔。食物方面，今晚菜單：招牌口水雞 （$88/例）果然香辣非常，不過隻雞就瘦左小小，肉不多。椒焗花甲加粉絲底（$98+$12）姨姨話呢度啲食物有啲辣，本來我叫小辣，都改為BB辣，好彩聽話改BB速，真係堅辣，但非常野味，一定要encore。明爐香辣魚（$268）本著試下心態，依！唔太辣，但味濃，如果鐘意食蒜頭嘅人，就會非常開心，裏面超多蒜頭伴料，魚皮超脆口，肉質鮮嫩，做得好好。手撕包菜（88/份）無乜驚喜，我會覺得雞油萵筍會更正，不過姨姨話如果有豆苗，下次食雞油豆苗仲正。椰菜餃（$42/份）完全不辣，仲要有湯墊底，食完感覺好似重生了。蔥油餅（$30/2件）姨姨話蔥油餅係自家制，所以好小油，乾身，蔥油餅好薄身，煎得好香口，食完所有食物，用蔥油餅做結尾，真完滿。…查看更多

聽聞麵底正湯一流，仲要有好多特別的款式，點會諗到棉花雞會融入湯麵！知道可能會好多人，所以一開門，我哋就已經去到餐廳第一張枱入內，環境都ok，枱擺位就好密，有點迫，不過，都做生意明白的。當日叫左兩個小食，兩碗麵同一杯自家飲品。雞絲粉皮，粉皮好滑身，咬落QQ口感，有驚喜，無諗過最有特色係呢個。海蜇頭，老實講，一般囉！有咬口，但味道我覺得一般。棉花雞麵， 食我又真係幾特別嘅， 湯底都係較清的，成件事係好融合在一起，現在所見，每枱都有人叫呢個麵。好頭好尾即牛腩牛肉麵，湯底有啲唔同，比較濃同厚的，不過無棉花雞咁特別，味道係expected，但都可以試試，好味！如果覺得自己係細食量，可以叫少麵，因為都幾大碗。黑豆水，自家飲品，試左，無comment另外，值得一讚呢度既姐姐非常有禮同服務周到，不停幫我地refill水。所以，餐廳唔好生意，唔好只係怨市道唔好，問問自己餐廳做了什麼去生存去搶客呢！…查看更多

都唔係第一次，我次次都用OpenRice去book位，去到會講明OpenRice訂位，姓乜同幾位，但幾次都話我無出席，要我upload番張單去證明，好麻煩！請工作員工做番好啲，唔好再錯，餐廳食物質素同環境都幾好，唔好因為咁而影響了餐廳的聲譽。…查看更多

餐廳有室外及放置高枱，氣氛唔錯，始終位於諾士佛臺，飲野都仲可以，用餐就免了，人來人往，好污穢，枱又唔乾淨，個經理又黑口黑面，目無表情，企位門口真係趕客咁樣。食物方面，唔差喎，叫左個Australian Ribeye Steak (14oz)，炭燒半生熟，牛肉味濃，肉質好冧又無根，以180蚊黎講，真係好抵，性價比高。再叫左個牛肉鵝肝小漢堡(2pcs)，小小的漢堡出奇好味，鵝肝入口即融，有驚喜，但118蚊好似貴左啲，不過都值得一試。食完野，諗住坐底飲下野，每人叫左一杯啤酒，不過唔知係咪覺得我地坐太耐，佢地想要番枱，所有成日行黎執野，又不停問加唔加食物同飲品，15至20分鐘行埋黎一次，好鬼煩擾，啲伙記同個經理一樣，口黑面黑，好似欠左佢地咁，不過我地都唔理，照坐照吹水。如果有時限，應該入坐前要講清楚，唔好做埋哂啲小動作，好樣衰囉～…查看更多

以往對墨西哥餐廳既感覺係好重味道，好膩。今次試既呢間墨西哥餐廳，主打食burger，又試下有無驚喜，如只論食物質素，個人認為一定會再去。今次試了3款食物：墨西哥手撕豬肉三文治麵包好厚，但烤脆了，唔會好難咬開，裏面有好多，係好多墨西哥醬汁豬肉絲，有啲生菜同埋 醃咗嘅酸菜伴碟，食落冇咁油膩。德州燒烤牛肉漢堡一出黎，好巨型既感覺，無可能一口咬得哂，我就攞走兩塊炸洋蔥圈先，咁就可以一大啖咁咬哂所有料，塊漢堡真心覺得正，超juicy，medium rare 加埋脆口煙肉，食完已經想再order 。慢煮澳洲牛面頰菠菜意大利飯本身對意大利飯既興趣不大，not my favorite ，食落啲米都唔係熟哂，有咬口，味道就一般，無乜特別之處。最後，希望餐廳可以改善服務質素，門口位無人招呼，客人自出自入咁，員工對客人好似視而不見定係眼睛有問題呢？舉哂手都無人理，叫佢加少少水要好耐，已經唔爆場，如果全場爆滿，真係難以想像。…查看更多

之前睇YouTube見到有介紹呢間台灣人開既台灣菜，又有好多係香港工作既台灣人黎幫襯，講到咁地道既台灣菜，點都要試試。第一次去，星期日未夠11點，未開門已經要在隔離天橋底排隊，大約有40人左右，眼見餐廳那兒地方細細，頭一轉未必入到去，天氣咁熱，仲要係街曬住排隊，第一次係放棄左。呢次，我選擇平日，仲諗住過左lunch時間先去，睇下會否好啲，大約1點45分，都要等10張枱先到我，好彩呢次唔使曬住，等左唔夠20分鐘可以入場。提示：餐廳門口，員工只會安排下一個入內既客人，才會企門口，其他排隊既全部天橋底先係排隊。好多人以為無人排就衝去門口，不過門口都有一大張告示，寫明天橋底排隊。唔諗咁多，試佢啲推介爆蔥滷肉飯（糖心蛋），呢個係必食，滷肉有肥有瘦，好正，喜歡食蔥既人就啱哂，成碗都係蔥。如果有啲蔥爆一爆混埋生蔥，可能更正。花雕雞麻油雞湯，老實講，一般，太油太膩，啲雞都唔滑，出黎既時候，湯仲要唔夠熱。台灣牛肉麵，麵質係一流，有咬口得黎唔硬，牛肉就見人見至，幾厚身同地肉質偏硬身，唔係人人鐘意，本來都幾高分，可惜，有啲麵未熟透，仲係一扎咁。九層塔鹽酥雞，無驚喜，一般炸雞。滷肉燙青菜，真係好失望，用白菜仔，點解唔用台灣菜，失望。總括，如果唔使曬住排隊，等15分鐘，都可以試下啲主食推介，如果要等好耐就算了，不值。…查看更多

睇左幾遍食評，都讚揚Total B食物質素有保正，今日專登去試下。天氣炎熱，行去亨成街係有啲辛苦，星期日下午1點幾，成條街多間餐廳都唔full，全部可以直入坐底。去到Total B，係街尾位置，裏面得3pair情侶，仲有幾枱吉位。入面無乜特別裝修，好普通簡陋。叫左兩個burger，一個傳統牛肉漢堡，另一個是燒烤風味牛肉漢堡。味道係唔錯，麵包好香口，大量芝麻，我覺得太多，食既時侯，吸左入喉嚨，咳到呢！老實講，個漢堡扒係有牛味既，有一定厚度，不過，size太細了，咬左幾啖都未食到塊漢堡。之前有人post個漢堡好巨型，我就無試唔到啦！誇張左囉！同我食果件差2/3啦食到一半，由於個漢堡加埋啲醬汁，集中在包既中間位置，不小心用力一夾個包，未食既半塊漢堡飛左落地，無得食。總括而言，成80至95蚊一個burger，試左就算。…查看更多

呢間餐廳位於東涌Sheraton酒店，但不是酒店裏面既餐廳，要由酒店正門右手邊，有個玻璃門進內，就可以見到呢間土耳其菜餐廳既正門。大家會被餐廳既裝飾同佈置吸引，好有特色，令人覺得好grand同elegant，價錢當然有番咁上下水平啦😅😁餐廳側門有露天位，出面都仲有工程，比較多塵，食飯都係坐番入去好啲。試左餐廳職員介紹既幾款菜式Kibbeh炸得好香口，食落唔覺好重羊味，點埋個醬會好味很多。Chargrilled Octopus Leg老實講，除非好想拍照留念同打咭，如果唔係，可以慳番，真心覺得全無特別。Falling Off the lamb Bone Shoulder正如其名，一攞起隻羊肩，啲羊肉真係甩咗出嚟，味道不錯，有個白飯配搭會更好。Maison du Mezze Utlimate Mix Grill最後食呢個串燒，全部肉，好彩有啲薄餅係底，唔係淨食肉有啲悶。飲品就叫左杯Yakult Lemonade，酸酸地，餐前飲會好啲，當開胃酒咁飲。總括黎講，都會建議去試下呢間餐廳，環境一流再加上食物質素都唔差；不過，有4個人或以上去用餐會好啲，每一碟菜式都係大份量，而且仲大多是肉類，多啲人一齊食可以試多幾款菜式。…查看更多

如果係油麻彌敦道，唔係望上去大樓既二三樓，都未必會留意到有間餐廳食酸菜魚，因為地鋪既餐廳都已經好多選擇。入到餐廳，都好闊落，又乾淨，都無話好似小X羊咁一陣麻辣嘅味道。 牆上面嘅圖畫都幾有心思。全部都係魚，無錯，只有魚既套餐，留意，每一碗都好大碗，88蚊一個套餐，其實幾抵食。酸菜魚套餐，跟米線，非常好既配搭，魚肉好滑，真係好滑，配料都好豐富，有蓮藕片、芽菜、酸菜、蘿蔔、腐皮等等，一個人食一定好飽另外一款，藤椒魚套餐，跟白飯，啲飯唔係普通 絲苗米，米質好有咬感，讚！但碗紅色湯底既藤椒魚就真真真太油了，好彩叫左碗白飯，正好用黎吸油，魚都係好滑既，不過啲配菜真係食唔到。酸菜魚梗係要有油炸鬼，可惜唔係外脆內軟，質地太硬了。反而個麻辣手撕雞嘅味道就真係好好，可惜越食越就越覺得鹹，要飲好多好多好多水。如果怕肥既，唔好試啦！未食過既都可以一試，但肯定唔可以成日食。最後，人手不足，成日都要自己行去搵伙記，服務有待改善。…查看更多

星期日早上，原本想行去荃灣廣場果邊睇下有無啲特別少少既餐廳或cafe食個早餐，點知經過白田霸街，有間好開揚，又新裝修，樓底超高，空間感極好，係外面望入去已經感覺好舒股既cafe，立即入去試一試。早餐試左4款食物：Scottish Smoked Salmon Salad 蘇格蘭煙三文魚沙律三文魚同蔬菜都好新鮮，再加上黑酸醋，早上食起來，覺得個胃都清新左All Day Breakfast - Fresh All Day煙三文魚+炒蛋+栗米+韓國芝士腸+沙律菜+牛角包正常一個早餐全餐，無乜驚喜，又唔係好好味，但一啲都唔難食。Bacon Australian Wagyu Cheese Burger 煙煵澳洲和牛芝士漢堡呢個漢堡，高度推介，成個配搭係perfect match，包既質地鬆軟，煙肉又好有口感，個漢堡非常juicy，絕對要試。Spicy Fried Half Cut Chicken Wings 香辣一字骨雞翼好重炸粉，太多了，如果用黎happy hour送啤酒還可以既，可惜我係食早餐時間，覺得好油膩。整體感覺係好好既，因為cafe樓底高，再加上門口開放式，空間感同舒適度已經高一班，再加上，工廈區好難搵到呢啲cafe，食物質素都唔差，值得再去。…查看更多

中午時分，途經佐敦，成條街都係食店，當見到“十三姨”呢個名幾特別，真係忍唔住要入去試試。第一次去既食店，睇餐牌就選擇招牌菜或推介，點都唔會差得去邊既，如果真係連招牌菜都唔掂，呢間食店以後都唔使幫襯。枱上面有兩款豉油，一款薄身淡色啲既，用黎食飯，唔太咸，不過無乜驚喜。另一款用嚟食麵的，好甜下，有少少似海南雞飯嗰啲甜豉油。值得一提，十三姨辣椒醬，青綠色既，真係好辣，唔食得辣既就唔好試了。十三飛，大家去到必試，我將麵改為翠玉瓜麵，試下乜野口感，入口爽脆，都幾清新既味道，湯底不錯，唔會死咸，但保持清湯味，牛肉質素都不錯，夠冧身。另一招牌菜就係，老闆娘鵝肝煎蛋飯，呢個真係必食，性價比奇高，竟有三塊鵝肝，外脆內軟入口即溶。見到有相片介紹， 椒鹽白飯魚，但又強調係素食，好奇心態下，叫黎試試，食左幾啖，都係唔知係乜野材料做的，問姐姐是什麼，原來是椰青肉，真係好驚喜，完全諗唔到，但食落既口感同真的白飯魚好相似，果然有諗頭。仲要有多款免費飲料供應，呢個價錢，值！抵！…查看更多

由於無晚市，餐廳只開到6點，今年情人節，係街無晚餐食，唯有食個午餐補數。平時午飯時間，Campsite真係爆到無可能等位，又無得做reservation，今日，仲要情人節，竟然有得book位，現場唔爆，walk in都有少量位，依家啲餐廳真係難做。第一次光顧，餐牌有牛有雞有鰻魚有藜麥，都是套餐型式，有湯有沙律有咖啡茶。當上菜，我真心覺得自己好似去左camping一樣，一個camping用既鋁兜裝住個鰻魚飯，襯埋個鋁咖啡杯既熱齋啡，真係好有camping feel，完全配合到餐廳既名字 Campsite。鰻魚飯味道不錯，價錢合理。另外叫左一個ribeye，唔記得影相，不過質素一樣好，168蚊有呢個牛扒質地，抵死啦！餐廳既員工都好有禮貌，工作節奏同效率都好滿意，值得一讚。…查看更多

晚飯時間，門口每次都排長長人龍，試過6點鐘去到，都係全院滿座，同需要排拾幾張枱，好幾次都無機會去這兒用餐。由於餐廳不太大，只有拾數張2人枱（可變4人），不過都幾迫，今次中午去，終於有位唔使等，Yeah....…查看更多

今日行過太子，見到七喜，聽聞佢呢度嘅爽脆鯇魚皮非常之好味，有位唔使等，立即衝入去試下先。地方就好舊，坐既舒適度就麻麻地。叫左薑蔥爽脆鯇魚皮同薑葱牛肉撈麵：果然名不虛傳，鯇魚皮非常爽脆同滑，加埋薑葱同少少辣豉油，配合得非常適中，其實撈麵食都得。呢個薑葱牛肉撈麵就令人失望，牛肉好靭，認真麻麻地，呢麵就黐埋一齊，一舊舊咁，賣相同味道都一般。下次可以淨係外賣個薑蔥爽脆鯇魚皮就可以了。…查看更多

南豐紗廠最大特色，就係小動物可以周圍走同休息，所以有小動物既朋友，可以來走走。今晚既晚餐係西式cafe，餐廳以開放式設計，雖然唔係露天，四周環境都開揚，唔會好迫既感覺。先來一個沙律，有一隻半熟蛋，幾片雞肉加火箭菜，最特別係有支test tube裝住沙律汁，要自己倒出嚟同撈勻，沙律入口好苦，好奇怪，諗左一陣，應該有酒撈左落汁，碟沙律有啲碎nuts係甜的，可能就係要做個平衡。豬鞍扒，入單時會問要全熟定7成，今晚我選選擇7成，係好juicy，但太生，應該得5成左右，豬就唔好太生啦！🦞包幾新奇，香港都唔多地方有得食，唔似得英國有間餐廳只賣龍蝦，呢度既龍蝦都唔錯，打開個包，見到成隻龍蝦肉係裏面架！食物質素，我覺得唔錯既，以星期日黎講，環境清靜又唔多人，坐得舒服，真係一流。當然，對餐廳唔係好事，但想舒舒服服享受一個晚餐，呢度係一個好好既選擇，尤其是有養小動物既朋友。…查看更多