01012010me的个人专页

上次路經沙田見到間新開泰國菜，望完個餐牌都好似幾吸引；不過剛剛食完晚飯，就唯有等下次先試。星期日六點幾去開沙田，就諗住試吓新野。見到要排隊都諗住轉軚，但咁啱有高枱嘅位，就入去試一試佢。睇完個餐牌叫咗豬肉船麵（寬河粉），紅咖哩牛面頰肉飯，泰式鹹蛋魚餅，一個香茅青檸沙冰，一個芒果沙冰。等緊嘅時候周圍望，見到左右兩邊都有個水煲，以為係啲特色野飲。到我還番個餐牌俾侍應嘅時候先聽到佢講：噢，呢到爭個茶。咁都見到佢地忙到冇停手，枱都唔得閒執；何況我又叫咗個沙冰，冇茶飲都唔緊要。繼續等緊嘅時候聽到隔離枱個仔（一家四口，父母同一對仔女）講：你（同亞媽講）照將啲汁撈落個飯到啦，個炒飯無味呀！我個心已經沉咗一沉。到個船河嚟到嘅時候，一試個湯即時意會到個仔所講嘅野；我地食開淡味野嘅都覺得佢淡味。香茅青檸沙冰淡味都可能係杯沙冰本身啲成份唔濃味，連芒果沙冰都冇乜芒果味先過份！最正常都係個咖哩，我地有衝動叫多個白飯用嚟點個咖哩汁。泰式鹹蛋魚餅個味又好濃，我地要點咖哩汁先食到。食完晒諗住飲番杯茶，話晒人地特登拎嚟。倒完啲茶落個杯到即時有油浮面，咁可想而知隻杯洗得有幾乾淨！最後埋單四百幾蚊，同我預期差唔多；再仔細睇睇原來收咗十蚊茶錢。我唔覺佢個apps版面有寫要茶錢。:(…查看更多

睇飲食節目真係會促進經濟。因為睇完人地食炸大腸，老婆大人又突然挑起個癮想食炸大腸，咁啱又要出鑽石山，所以就揀咗呢間韓國野食而又有炸大腸食嘅舖頭。可能大家之前因為疫情少咗出街食飯，都要排咗差唔多30分鐘先有位（仲要係門口位）。又係食物拼圖時間︰上方︰韓式甜辣炸雞（半隻）。佢真係做到你會食到甜同辣兩樣味，又唔會俾個醬搞到個炸雞唔脆。本來想叫多幾樣野食，不過大家都覺得睇定啲，等野食嚟咗再加好過食唔晒。估唔到半隻雞都有咁多件，老婆大人食咗兩三件就投咗降。左下︰豬肉飯卷。其實有8件，大家各食咗一件先醒起要影相。同日式果啲飯卷又有啲唔同，佢就會實啲，可能唔係用日本米，好似冇咁香。右下︰炸大腸。嚟呢到食嘅主要原因都係因為佢，果然冇令我地失望！雖然有幾件係有啲肥，但係佢個皮係炸到脆嘅，好似食緊豬肉紙果隻脆。另外仲有杯芒果+橙嘅乳酪，不過冇影相就已經冇咗一半。呢個組合都幾特別，飲得到幾濃嘅芒果味。…查看更多

以前喺荔枝角番工嘅時候好少去工廈食晏，一來舊公司好嚴謹，出入食晏都要打卡；二來一班人去食飯，上上落落先知道冇位，咁個晏就唔駛食架啦。 今次咁啱過開嚟呢頭，就上嚟試吓佢。可能疫症問題，要訂位先可以坐"本部"；我地walk-in客就被安排到另一邊嘅單位坐。老婆大人嘅食物拼圖︰左上︰千層麵。雖然睇落份量好似好少，但係做得到"千層"嘅效果。（之前食過另一間嘅千層麵係壓成"一舊"）右上︰牛肋骨。有驚喜！肉質比想像中嫩。最初見到$170一個牛肋骨有啲卻步，但老婆大人想試，就即管試佢一試（畢竟買一條完整牛肋骨都係百幾蚊，仲要放落焗爐焗就得，冇技巧可言）左下︰帕爾馬火腿+桃。又另一個新組合，中和咗火腿嘅咸，好味好多。中下︰餐湯（應該係蘑菇湯）。滑。右下︰咖啡。有隻熊嘅造型，呃like 一流。…查看更多

本身想去帝國中心食另一間，但係等位實在係等得太耐（58號飛，叫到42號），唯有轉戰另一間coffee shop 。可能正正係午餐時間（大約一點半左右），所以未有客食完想埋單嘅意欲。搞到我地等咗45分鐘先入到去。又可能入到去已經過咗最繁忙嘅午餐時段，野食好快就到咗。左上角︰cappuccino ，右上角︰waffle with almond ice cream and cream左下角︰flat white，右下角︰egg Benedict with Salmon咖啡就一般，唔係一飲就覺得好好味果啲。egg Benedict 整體係okay嘅，係個蛋唔係好"流"就扣咗啲分；最有驚喜都係個waffle，雖然有個雪糕喺面，但係都無減少到佢脆嘅口感。連埋個雪糕咬落去真係又熱（窩夫）又凍（雪糕），又軟（雪糕）又脆（窩夫）。 …查看更多

有次同同事食完飯講開呢間餐廳，啲咖啡又好飲，又坐得舒服。之後同事坐言起行，約我第二日就去試一試佢。呢間餐廳都好守規矩，又有屏風又隔開枱坐咁，食晏時間都俾張4人枱我地兩個人。好，入正題。吞拿魚蘑菇長通粉。其實……同你煮完長通粉，之後開一罐罐頭吞拿魚撈落去係冇分別（分別就係唔駛自己做）。本身想食鰻魚，但係佢個日式鰻魚炒飯啲鰻魚係碎上，所以揀咗呢個"小頹飯"。點解會係"小頹飯"？因為我真心覺得我同事叫果個先稱得上真．頹飯。雞扒司華力腸飯。因為我地冇"分甘同味"，所以好唔好味就唔知啦。但份量同賣相……真．頹飯呢個稱號真係當之無愧！！同事話上次嚟食（唔係食呢個飯）再加咗個特飲，飽到上心口。咁同事之前推介嘅咖啡，又點可以唔試下呢。相對起野食，呢杯咖啡係唯一對板嘅，起碼佢真係用部咖啡機沖出嚟，又拉番個花。飲落朱古力同咖啡味都飲到，唔會話是旦一樣蓋過咗另一樣。如果冇咗杯咖啡，單單以一個頹飯/小頹飯加一個餐湯（原諒我真係唔記得係咩湯），收呢個價錢一定係劣評（員工canteen 呢個價可以食兩個頹飯）。不過服務就幾好嘅（起碼會顧你感受，唔會你明明喺到飲緊餐湯，都要你夾硬渣的位出嚟，等佢可以放但佢手上面個主菜。）…查看更多

其實已經是第二次光顧，不過第一次因為沒有為拉麵拍個照，所以沒有寫食評。今天終於記得為它們留倩影，就上來分享一下。不是同事介紹，這一間座落在角落，毫不起眼的拉麵店我應該留意不到它的存在。可能是這個原因，午餐時間（一點左右）也只得兩個客人。（亦可能是疫症問題罷）這個牛肩胛肉濃蝦湯拉麵，當然第一時間嚐一嚐它的濃蝦（不是龍蝦）湯底。湯，果然夠濃，又嚐到蝦的鮮味。拉麵，相比湯底就較遜色了。可能我比較喜歡吃軟硬適中的拉麵，這次煮得比較硬一點。牛肩胛肉，又有個驚喜。肉軟而不爛之餘，還有4-5塊肉，相當有分量。還有紫菜和半隻溫泉蛋，相對平凡的配菜。同事的大蝦濃蝦湯拉麵，雖然我沒有嚐過，但賣相還不錯。…查看更多

疫情下大家都會少咗出去食晏，所以之前呢間要等嘅舖頭都唔駛等，不過量體溫呢個步驟都唔會唔做。點解會有個咁嘅標題？因為之前嚟食嘅時候叫咗個漢堡包，但當其時侍應冇俾到張包住漢堡包嘅紙我，淨係俾刀叉，所以食起上嚟有少少麻煩。到第二次再嚟食先知道原來有果張"紙"提供。言歸正傳，今次嚟食咗個all day breakfast，以一間喺九龍城賣burger嘅舖頭入面嘅all day breakfast賣$58，佢嘅CP值都算可以接受。炒蛋真係好滑，啲腸仔略為鹹咗少少；但係杯咖啡喺一間食burger嘅舖頭就算係幾好飲架啦。…查看更多

話說樂富中心裝修完之後都未上過去行過，咁外母大人又想買野食，咁就上去買個外賣。等候期間咁當然就四圍行下，路過見到pokka cafe個蛋糕都好似幾好食咁樣，但外母大人其實剛剛先飲完茶；雖然口講睇下先行下先，但心入面已經想買一塊半件試佢一試。行完番轉頭，最終外母大人都買一件朱古力棉花糖蛋糕試一試佢裝修完，蛋糕會唔會好味左。我地同企蛋糕櫃後面位女侍應講左兩次"唔該"，佢望左我地兩次，但冇任何反應（即係聽到我地叫佢，但無視我地）。最終我地想走之際（因為件蛋糕其實都唔算平，一件都要$58）有個疑似經理先出現理下我地，先叫落左單。最後，同一個女侍應竟然徒手（係，手套都冇戴）去拎件蛋糕，仲要疑似掂到蛋糕上面的朱古力（因為見到佢抹左一下手）；但蛋糕櫃入面有個蛋糕鏟同埋蛋糕鉗，佢唔用走去用手。我忍唔住同外母大人講我所見到的事，女侍應望左我一望，繼續佢包蛋糕工作。我相信pokka cafe唔會當佢自己好似茶餐廳一樣的水平罷。原本都想試下佢個下午茶，但係見到門口果個侍應都咁樣做野，唔難想像入面會係咩景況。…查看更多

話說同老爸食飯，想近近地又試吓新野。見呢間亞萊泰都好似幾好，咁就嚟試一試。有個套餐$668 （4-6位） ，有前菜有兩樣主菜揀吓，有個羹又有菜，仲有甜品同芒果糯米飯。見都OK抵食又唔駛左諗右諗，咁就叫咗呢個餐。老婆大人話想食蝦餅但係又唔想淨係試一樣野咁少，咁就另外叫咗個小食拼盤。一上菜竟然唔係上前菜（青木瓜沙律），而係上主菜先（烏頭魚）。雖然拎出嚟嘅時候都有煙，但係水未滾，大家都係只係可以坐晒喺到望住條未食得嘅魚。隨後飛天通菜同小食拼盤都上埋，先見到"應該"係前菜嘅沙律被送上枱。再之後海南雞（第二個主菜）都到咗，另外粟米魚肚羹都上埋菜，成枱都係野食。 （手忙腳亂咁幫侍應哥哥/姐姐安排位置放野食，之後都冇影相就開始食）青木瓜沙律 （青木瓜原來係裝飾）烏頭魚 （鮮，滑）海南雞 （都係鮮同滑）粟米魚肚羹（足料，唔係飲緊生粉獻）小食拼盤（份量略少）飛天通菜（不過不失）甜品 & 芒果糯米飯 （其實太飽，冇認真試）…查看更多

今日大老板放假，小老板邀約食午餐。見天氣咁好（之前落大雨），又冇咩想食，咁就跟小老板一行三人出去食個晏。因為同事幫手訂咗位，所以去到唔駛等位（其實都係得兩﹑三枱客）。見有海南雞+黃薑飯，心諗"農家菜"又"海南雞"，應該唔會點有伏，咁就點海南雞黃薑飯，送中式湯同糖水。小老板同另一位同事就各自叫咗小炒。本身第一次嚟食，見到隔離枱個蒸魚都唔錯，海南雞呢啲普通野應該都唔太有問題。叫完之後大家諗住Share食，問伙計拎咗三對公筷，伙計都即刻拎嚟（試過去食肆問拎公筷會被黑面）。中式湯都OK，青紅蘿白瘦肉湯，不過不失。黃薑飯隨後到。可能其他地方會用海南雞啲油整落啲飯到，呢到可能主打"農家"，健康啲，所以冇落，都可以接受嘅。到主菜上場，我一拎隻碟感覺到隻碟好熱，已經心知不妙。再睇睇碟雞，我不禁同小老板講啲雞好似"湯料"（即係美名咗嘅"湯渣"）。我即刻問拎碟"海南"雞嚟果位侍應呢碟係咩，侍應神回應反問番我你叫咗啲咩？同事口快快咁答咗佢叫咗海南雞，侍應好隨口咁話呢碟咪海南雞囉。我都忍唔住回咗句我覺得佢唔似海南雞先問你，驚你俾錯白切雞我。（呢到有海南雞，白切雞同豉油雞）食落口更加似"湯料"，因為︰1. 雞肉係熱嘅（直情似喺湯到拎出嚟咁！正宗海南雞唔係要浸凍水架咩？）2. 雞肉係"鞋"同乾嘅3. 雞肉冇雞味4. 碟底有雞油在流動。小老板同另一位同事試過都有同感，大家都話啲雞肉似湯料，咁應該俾埋碗雞湯我地先係架嘛。可能聽到我地嘅對話，當我地問另一位侍應嘅時候，佢好快咁答我地呢碟係海南雞，因為佢地會起咗骨。（咁係唔係即係起咗骨就係海南雞？）平心而論，其他兩個小炒係OK嘅，但係海南雞就扣晒分。佢個餐正價$48，其實我見到X假期六月左右都有講過有幾間好食嘅海南雞，價錢都係差唔多，但我相信海南雞唔應該係我今日見到呢一碟咁嘅樣。心情太差，所以冇影到相（有影可能我已經幫佢"發揚光大"）。但我相信大家根據我上面嘅描述，應該都會大約估到碟海南雞係咩樣。1. 熱 2. 乾 3. "鞋" 4. 有雞油喺碟底…查看更多

元朗太多太多太多好野食。原本行完浪背水塘，想去食刀削麵，不過食開果間去到已經變咗另一間舖頭（後來行吓行吓先知道原來佢搬咗）。老婆大人一向鐘情沾麵，見到有間叫彩AYA 嘅沾麵舖頭，二話不說即刻開GPS 搵間舖。左行右行竟然俾我地發現原來間刀削麵搬咗；一輪爭扎之下最終都係下次先番去回味，今次試咗新野先！左轉右轉終於搵到呢間"隱世"舖頭（因為都有少少難搵，喺一條橫巷入面），去到已經有10個人左右排緊。大大個餐牌喺門口，只係有沾麵賣，冇其他小食。三種湯底（豬骨，黑油，蝦湯底），三種麵底（小麥，黑胡椒，檸檬伯爵茶（今日special）），已有紫菜 + 溏心蛋 + 筍 + 叉燒。淨係咁都可以做咁耐（仲有分店添），個麵應該都唔差。因為排緊隊嘅時候已經問咗我地食咩，入得去坐低大約十分鐘已經有得食。老婆大人叫咗黑油 + 小麥，我就梗係試一試special 嘅 檸檬伯爵茶配蝦湯底！ 黑油湯底好香，蝦湯底超濃 （好似賣告白咁，不過呢個係事實）；小麥麵真係普通咗啲，檸檬伯爵茶就有淡淡嘅檸檬味，不過伯爵茶味就唔多食到（可能蝦湯太濃）。呢到加湯真係差唔多成個湯底整過俾你（爭在冇咗啲筍呀，蛋呀，叉燒呀咁囉）（謎之聲：呢個人好貪心）。你如果真係真係真係唔夠飽（應該都唔會），可以同佢拎番個清湯嚟飲（應該係豬骨啩，我好飽冇問佢拎湯）。性價比都好高，唔怪得獨沽一味都可以大排長龍。…查看更多

因為有小許前因，加上老婆大人穿了高跟鞋，又因為這個"lab eat" 的地址實在太"特別"了(87-89 號不在84, 85號的後面)，所以老婆大人是黑著咀臉進入餐廳的。招呼我們的侍應還不識趣的說要"準時"八時半還枱(當時不過是七時半)！頓時老婆大人的臉更黑了，坐下後更說不想吃了。因為這裡的生蠔不錯，才選老婆大人生日的日子來試試。另一位侍應看到我不停張望生蠔的餐牌，主動拿了那個餐牌給我們！好言相勸之下才點了六隻生蠔，一個帶子意大利飯。(原本生蠔有一個套餐是有白酒/香檳的，但老婆大人說她其實連生蠔也不想吃，酒也不想飲)最終生蠔來了(我們點了兩種生蠔)，正如那位拿餐牌給我的侍應所介紹的一樣，生蠔很飽滿，很大隻，另一種就比較重海水味。帶子意大利飯相對就有點平凡了，帶子沒有煎過/煎得不夠，意大利飯不夠乾(可能擔心我們還不了枱，盡快煮給我們罷)最終八點就完成了(信用卡收條上顯示的時間是2000) 。當然當時的情況沒有可能有心情影相罷。…查看更多

上一次經過時已經想一試，不過老婆大人話下次先，去咗食另一間粉麵。今次老婆大人唔想煮飯，就去試一試呢間新嘢。聯和墟其實都已經有幾間泰國菜，但都係越食越差，或者性價比越嚟越遠。今晚叫咗四樣野，全部都可以再試之選。冬陰公金邊粉  清冬陰公金邊粉         炸蝦餅炒蕃薯苗呢間新開張雖然可以揀嘅野唔多，得金邊粉，河粉同米粉，但金邊粉唔會煮到好爛 (試過食好似糊仔嘅金邊粉，即時拍枱走)清冬陰公其實同冬陰公差唔多，不過味就輕啲，辣同酸都依然有喺到。最抵食都係蝦餅同炒菜，平時起碼>$30，宜家可能新開張，每樣都係$20.…查看更多

聽聞有新舖開張，我同老婆大人梗係去試吓啦！(當然之後知道去錯咗，新舖果日咁啱休息)見到佢有蠔餅，而老婆大人又係蠔控，咁就二話不說坐低睇吓仲有啲咩啱食。最終叫咗炸大腸，馬拉盞通菜，黃金南瓜鮮魷，同埋滿心期待嘅蠔餅。炸大腸 - 不過不失，老婆大人覺得佢炸得比較乾，乾到有啲"柴"馬拉盞通菜 - 我地兩個都覺得夠惹味 (自己應該整唔到咁嘅味道)黃金南瓜鮮魷 - 一致讚好 (如果唔係有佢應該俾咗喊樣)，因為極邪惡(咸蛋黃+魷魚)但又超好味。南瓜軟硬適中，魷魚夠爽口蠔餅 - 老婆大人食咗少少就停咗手。細問之下佢覺得粉太多，蠔太細，仲有蛋殼，再加上勁多油，食唔落。我就淨係覺得粉太多(雖然平心而論蠔都唔少)，但真係食1/4塊已經飽咗一半。最終我淨係食晒啲蠔就算啦。雖然街市入面嘅大排檔唔會好高預期，但真係俾唔落笑樣(投先都講過冇個黃金南瓜鮮魷就一早俾咗喊樣)，所以……OK啦…查看更多

三軍未動，糧草先行。去祟光血拼之前，當然先要祭五臟廟！銅鑼灣我覺得是一個"偏遠地區"（事物總是相對的，對嗎？），遠道而來當然要試有特色的東西。網上看到這個所謂"沾麵專門店"，很早已經想試試有什麼能耐可稱為"專門店"。可能大家都在血拼？下大雨？還是只是十二時，未到午飯時間？大門一開時我們是唯一的客戶時，我的心其實一沉，有考慮過轉身去另一間；不過見到太太看到海報上海膽沾麵，帶子沾麵的模樣時，我只有一試。拉麵，冷麵，甚至沾麵我都經常吃，但這裡的海鮮真是非一般的"鮮"，有日本魚市場刺身丼上的刺身80%的品質。每個位上還有一個小電爐，可以讓你把沾麵的湯保持在微暖的狀態。另外不得不提湯內櫻花蝦的數量。我會形容為"櫻花蝦好像免費的，整個湯內也是蝦，一口就已經吃了幾十隻"蝦"了"。食物是好，但價錢就……更"好"。畢竟銅鑼灣舖租都比較貴罷！…查看更多