Mr. Bone的个人专页

第一次嚟。過海做完嘢，想搵個地方坐低睇書，諗起bookmark咗好耐的睡飽吃吃，上社交平台 check咗佢今日有開，營業時間係1300-1800，咁就嚟排隊喇~1258到達，有3個人喺店外排隊，佢地都係女仔、單拖。西西里島開心果巴斯克：$68/件，唔平，比我最鍾意的Yumo貴$5；由於睇咗食評，心知蛋糕細件，所以冇期望落差，而佢係細既；presentation係唔合格，其一係餐具唔講究，cafe提供餐叉而唔係蛋糕叉，而叉同碟又完全唔合乎比例，用佢拮蛋糕，唔方便之餘，真係2、3啖完食，失去享受甜品的儀式感；其二敗筆係隻碟崩咗一忽，唔優雅其次，整親就唔好啦；味道方面，蛋糕好食，但未到世一（hemma都唔係），蛋糕的堅果味濃郁，但層次較單一，口味的對比嚟自3個部分：蛋糕體、蛋糕面（焗燶的部分）同開心果醬：蛋糕面就住嚟焗，呈金黃色，未到接近燶的狀態，所以喺味道上冇造成好大對比，但對於唔鍾意焗燶的焦苦味的人嚟講，佢烤焗得非常討好，令一般人容易接受；開心果醬有令味道昇華，但食開開心果醬的人都知，就咁𢳂開心果醬出嚟食都一定滿足無比，所以，開心果醬好食係意料之內，冇大驚喜；最讚同最有記憶點係蛋糕體的質感，佢勁滑，食落味道有啲似豆腐，而堅果味亦非常濃郁！蛋糕體唔係流心，而係質感細緻、軟滑，有啲人食流心巴斯克時會驚佢中間唔熟，呢度的巴斯克就會係一個好選擇Latte：$40；睇咗唔知係咪由Foodie寫的食評，話睡飽吃吃難得係蛋糕好食、啡又好飲的cafe...令飲緊Latte的我懷疑人生，杯咖啡真係平平無奇~最近差唔多日日飲Latte ，近期飲過最好的係Parkside@Nina，呢度的Latte係有特別而討好的味道，但果個應該係鮮奶味而唔係咖啡味。整體嚟講，咖啡味唔突出，$40細細杯（~150ml），唔值，不過無辦法，入場必須點1杯飲品餐廳環境唔錯，檯與檯之間有距離，加上食客多數單拖，而cafe喺平日午後營業，嚟得的人都比較chill，所以坐落幾安靜。座椅係實木，唔算舒適。Cafe有2層，上層用餐區有梳化，但應該係俾幾個人一齊坐，位置開揚嚟呢度食嘢有幾點要特別留意：（1）店內冇廁所！唔知係咪嚟得不合時定cafe一向如是，以為cafe一定有廁所，而我亦搵到一道疑似通向洗手間的門，門外寫「staff only」，問店員洗手間位置，佢話：「廁所塞咗，你可以行番去西營盤站隔離XXX的廁所」聽到有被嚇一跳，由港鐵站口行過嚟要3-4分鐘，單拖點咗食物、俾埋錢，想去洗手間就要離開舖頭，來回6-8分鐘，呢點好難接受，如果食食下先人有三急咪好弊？；（2）Cafe只收現金：㩒定錢先好嚟；（3）蛋糕冇得外賣；跨區嚟到，本來想外賣幾件蛋糕俾屋企人試下（當時自己都未有得食），但店員話不設外賣，冇盒、冇紙袋，所以，如果真係想外帶，就要自備食物盒，不過，試食後，覺得冇外賣都唔可惜，雖然蛋糕唔差，但以入口的驚喜度嚟計，Yumo、Mr. Cheesecake甚至Liberty都高分啲。個人而言，睡飽吃吃同hemma的檔次差唔多，算係幾好食，但食一次就夠，而呢一次主要係湊熱鬧。我咁遲先嚟，最終只係刪走wish list的其中一項，試完過但搵唔到一個回訪的理由~…查看更多

本來想喺10月份的周末嚟午餐，可惜訂位時已滿座，只好另擇日子。11初的周末中午，食客少，用餐時段只有另外2檯客，環境安靜。我同狗狗爸爸點3道菜午餐，大家刻意㨂唔同的湯同主菜，share嚟食，儘量試多幾款，再決定日後會唔會再嚟。坐低冇耐，已經覺得今次體驗值得，不枉此行。而家好期待餐廳快啲出秋冬餐牌，有機會會試下12道菜添。雖然我哋點的只係3道菜，但項目唔少，有可添食的3款小食、餐前飲品、3款前菜、湯、主菜、飯以及咖啡/茶。不經不覺地食下食下，我都好飽，到尾聲時，狗狗爸爸就話佢6-7成飽。所以，如果同男士一齊嚟，建議可點5道菜，咁大家都會覺得豐富、飽足(餐廳要求同行者點餐須劃一，以便同步上菜) 。(前菜) 焗碧根果：乾身，唔油，帶堅果香(前菜) 醃漬茴香：有麻油味，惹味，爽脆帶𡁻口；如果冇記錯，侍應Berlin好似話係用茴香莖製成(前菜) 芥辣腰果：腰果似包住糖衣，略甜少辣，芥辣味溫和，唔攻鼻，唔嗆(餐前飲品) 菠蘿甘筍雪梨汁：清新；各種食材的味道好夾，飲到菠蘿的纖維但冇渣(前菜) 甜醋天桃：以印度街頭小食為靈感，釀入由甜醋製成的啫喱，開胃唔酸，有啲似山楂味，幾特別(前菜) 醃漬芥蘭頭：少辣，開胃；芥蘭頭爽脆，有咬口，慢慢食好滋味(前菜) 欖菜螺絲卷：欖菜醬似抹醬一樣軟滑，帶輕微鹹味；螺絲卷沿紋路撕下醮欖菜醬食，蒸螺絲卷配醬食落好輕盈，炸螺絲卷外脆內軟，似軟心多士，兩種做法都好味、特別(湯) 仙翁米老菜圃冬瓜湯：清甜消暑，適合夏天，湯頭甜，有少少類似薏米的味道，層次豐富，湯清冇負擔(湯) 松茸菊花浮萍，即豆腐松茸湯，套餐跟呢款湯要+$68，估計大部分食客第一次嚟都會為咗見識文思豆腐而加錢；廚師的刀工縱然值得欣賞，但湯就唔太值得加錢品嚐，主因係另一款湯更好飲；呢款湯有濃濃的菇味，不過係預期的味道，欠驚喜，亦唔係特別適切某個時令，見識一次就夠(主菜) 豉香涼瓜素方：擺盤可愛、別緻，似迷你版的童話森林；食材係幾款唔同品種的苦瓜，入口亦食到佢哋各有不同的獨特味道，呢款主菜因食材的多元而喺味覺上有所變化，值得一試(主菜) 牛肝菌茴香土豆：擺盤、味道較直觀、單一，但遷就到任何人的口味，論驚喜比唔上另一道主菜(飯) 野菜荷葉飯：賣相靚，份量略少；荷葉飯粒粒分明，入面有蓮藉粒，口感豐富；飯面有脆米，令個飯有硬脆、爽脆、軟糯等唔同層次的口感，不過，我覺得脆米同個飯唔夾，脆米好似破壞了咗原本個飯的正氣、暖身的秋冬食補感覺(餐飲) 咖啡/洋甘菊茶：咖啡可4㨂1，茶只得1款；我點Latte，狗狗爸爸點茶，無論咖啡/茶，味道都好普通呢間餐廳地理位置好、環境雅緻，燈光柔和但唔會令人昏睡，有包廂，洗手間仲係用免治馬桶，我同狗狗爸爸對環境都有讚冇彈。侍應服務好，會留意我哋的進食速度，見我哋食完小食會主動問係咪需要添加；上每道菜時會簡單講解，而當我哋問多啲資料時，佢哋(尤其Berlin)都非常樂意補充、分享。當我哋用餐時，佢地都距離我哋遠啲，而當我哋食到差唔多或者係我哋有需要時，佢哋就會適時出現。食物方面，擺盤精緻、用心，調味恰到好處，唔會側重某種味道，而全餐的食物無論係味道定口感都各有不同，多層次，體驗全面。價錢方面，以餐廳的地段、環境、服務同食物質素，性價比非常高。當我哋食到最後時，餐廳派咗回饋表，收集我哋的意見，反映餐廳重視客人的反䭉，所以，我哋都好俾心機一齊傾、一齊填。基本上，我哋就每個評分項目都諗唔到餐廳有咩缺點、不足，全滿分。不過，如果真係吹毛求疵，都有2個可改善的地方：（1)女洗手間的抹手紙放太滿，抽唔出紙巾；(2)飲品的賣相同味道都好普通，最後先上的飲品，成為一個反高潮，有改進、提升的空間。…查看更多

平日放假，同狗狗出街食飯。以前去過將軍澳Chilli Lime，食物啱口味但欠特色，途經Yoho Mall分店，見佈置優雅帶古典風，又有室外用餐區，主人可以同寵物坐低開餐。平日午市套餐定價$100-120，價錢視乎主菜而定。套餐包前菜(3選1)、主菜同飲品，跟餐+$30可享用甜品(芒果糯米飯/香蕉煎餅)。泰式青木瓜鹹蛋沙律：前菜；配料多而「特別」，除咗一般常見的青木瓜、甘筍、車厘茄同花生外，佢仲加埋蝦、魷魚、鹹蛋同粟米，食材豐富、颜色吸引但偏離正宗；味道唔係傳統泰式青木瓜沙律的重酸、重辣，而係異常溫和，如果唔執著係咪正宗泰國口味，其實佢相當適合香港人印式芝士燴菠菜連烤餅及印度黃飯：主菜；係餐廳特別提供的選項；午市套餐冇素食主菜，我同帶位的侍應了解係咪可以提供素食選擇，佢好快回覆可以俾我喺餐牌的蔬菜類中揀選一個項目，而套餐就跟主菜的正價收費，+$10包烤餅同印度黃飯；欣賞餐廳有彈性處理食客的特別飲食要求，而餐牌中亦有唔少素食選擇印式芝士燴菠菜：濃稠，同烤餅、黃飯好夾；菠菜蓉有淡淡香料味；芝士比外面食到的大粒，佢無論味道定質感都好似硬豆腐；雖然只係一細碗，但絕對夠食，食完亦唔漏；呢個素食主菜係餐廳的推薦項目，值得一試烤餅(正宗)：菜名中的「正宗」係指原味；烤餅帶油份，有2件，食曬一定飽；fluffy，口感煙韌，幾好食印度黃飯：飯量唔多，~100克；鍾意印度米乾身同低碳，食落清爽，最啱夾埋咖喱/其他多醬汁的菜式一齊食熱咖啡：點餐後好快送到；細杯，似double shot espresso，唔肯定係咪espresso(侍應冇俾奶，只俾黃糖）；飲落好苦，麻麻哋，最後要咗奶，不過整體都係唔好飲狗狗食評🐕📝：食物🍽️：媽媽帶定食物俾我，不過，原來我都分到嘢食，包括青木瓜沙律入面的大蝦、魷魚、粟米同車厘茄；見到媽媽剪蝦蝦時，我都感覺到佢好新鮮、彈牙；平時我冇得食青木瓜沙律，因為太重口味，但呢度的青木瓜汁水唔多、唔辣，我都食得呀環境🌳🪑：戶外座位範圍好大，仲連住商場的寵物室外友善空間，有放狗便便的垃圾桶，又有寵物相關的設計，行前啲仲有我同類(狗狗)的星光大道添；用餐區有帳蓬，餐檯椅夠大張，檯面高度又適合用餐，環境好啱我嚟chill下寵物友善度💖：寵物設施就冇喇，而侍應對我都唔熱情，不過，侍應聽媽媽話要帶埋我食嘢，都係歡迎既；侍應上餐時，特別問媽媽我係咪「ok」(應該怕我襲擊佢)，咁樣問一下係好正確架，起碼佢有意識上餐時可能要小心啲。當然我要澄清，我攻擊的對象從來都只係食物㗎咋~…查看更多

呢間café有唔少好評，已bookmark好幾年。假日，同狗狗爸爸帶住狗狗出外覓食，本來打算去附近的Chef's Stage Kitchen，但佢的假日brunch有啲貴，加上室外座位越整越差，風扇勁多塵仲離譜到放埋上櫈，見到都唔想坐低。呢個時候，諗起Brava Java Coffee & Co.轉角就到，於是嚟試下。呢度窗明几淨，環境悠閑，室外座位有啲逼(有2張檯)，我哋坐果張仲只得圓櫈，地台比地面高咗一級，要安放寵物車有啲難度，話雖如此，呢度實在比Chef's Stage Kitchen乾淨、企理太多。Café的餐點喺假日只可單點，而且以輕食為主。Brava bacon：主打香腸、煙肉的全日早餐，$128，係狗狗爸爸的午餐；食物有香草肉腸、煙肉、焗豆、炒蛋、大啡菇、香草薯粒、蕃茄同意大利軟包；坦白講，香港冇邊間café的全日早餐價格公道，近乎所有全日早餐都以雪藏加工+罐頭食物為主，喺屋企不但能完美複製，食材仲可以更講究。由於呢間café只供應輕食，午市嚟到，狗狗爸爸食麵包/貝果應該唔飽，喺冇選擇下只好揀咗呢款全日早餐(如果想多啲原型食物，可以點另一款全日早餐，$138)。呢度的全日早餐不外如是，擺盤只係合理地將食物拼湊一碟，份量唔算多，蕃茄x1薄片，焗豆x1湯匙，香草肉腸雖然有2條，但佢係日式短幼香腸；呢款全日早餐性價比低，唔推薦意大利軟包，挪威鹹香焦糖芝士及手工肉桂蘋果醬：$88；點餐時期望好高，除咗貴，佢喺餐牌上有一個「皇冠」符號，代表廚師推介；上檯時，我有俾佢的份量震撼到，首先，個意大利軟包似馬莎果款咁大個，打開一睇，見有唔少芝士刨絲同肉桂蘋果蓉，份量大，不過，餐廳為佢改咗個咁詳盡的菜名，但偏偏冇提到有museli！雖然我對穀物唔反感，但muesli的份量實在唔少。單以份量計，呢款餐點幾抵食，但佢個菜名實在引發咗我一個好大的期望，我期待食到芝士的鹹香同埋肉桂蘋果的香甜，鹹鹹甜甜咁，可惜佢淨係得個「甜」字，「挪威Tine Brunost焦糖芝士」冇乜味道，意大利軟包又唔係軟，有啲韌，好難切開；期待的鹹甜紛陳不見蹤影，換嚟係成碟食物淋咗好多糖漿，糖漿+麵包+穀物早餐，根本就係一枚澱粉熱量炸彈，糖份超標；除非好飢餓要即時補充萄萄糖，否則唔建議點~凍朱古力：$40；賣相有漸層係幾靚，但奶多，混和後飲品變咗淺啡色；雖然佢唔係一杯出色的凍朱，但狗狗爸爸話佢都有朱古力味Flat white：$38；幾靚(尤其隻杯)，拉花正常；咖啡的果仁味明顯，幾醒神；份量少，估計150-160ml，幾啖飲完狗狗食評🐕📝：食物🍽️：爸爸、媽媽帶咗食物俾我，不過，我都食咗少少大啡菇、蕃茄、沙律菜(有黑醋汁)同意大利軟包環境🌳🪑：室外座位高咗一級，地方淺窄，爸爸、媽媽抽咗我架戰車上去，擺好我個陣之後，佢哋再逼埋L形咁坐低，我哋連轉身都冇位；而家已入秋，坐室外都唔熱寵物友善度💖：0分，公平啲講，café亦冇自稱寵物友善；店員上餐時冇特別留意我(我比較百厭、為食)，照樣想直接喺我身邊上餐，媽媽好擔心我會撞到啲食物同埋偷食…查看更多

有唔同朋友提過想嚟食嘢，最後揀咗其他cafe，終於搵到一個平日嚟午餐。Openrice上唔見set lunch的餐牌，但餐廳喺1130-1730供應午餐。可能觀塘區飲食業競爭大，呢間主題cafe的食客聊聊可數。近窗的用餐區擺放中學生檯椅，近牆果邊就有幾套復古木製餐檯椅。我同朋友點咗1份午餐+飲品+甜品，單點1客意粉+(跟主菜半價)飲品。牛油果香芒凱撒沙律：午餐，$72；話係凱撒沙律，其實似鮮果沙律，菜底少，係沙律菜而唔係羅馬生菜；沙律以雜果為主，有芒果、火龍果、菠蘿同橙；生果新鮮，但切細件而大小參差、橙係一瓣，核較多；牛油果半個；仲有未經烘焗的腰果，腍咗但較健康；以由cafe供應的沙律嚟講，已經唔錯，量多足料，颜色豐富，可以收貨！如果備材時花多少少心思，就更喜出望外青醬野菌蝦肉貓耳朵：主菜，$100-110；算大碟，有3-4隻中蝦；青醬奶油味重，調味好，䬹人追住食；貓耳朵煮得剛好，質感唔軟爛；意粉入面有少量菇同洋蔥Flat white：跟午餐半價+$21，再+$4轉大杯；大杯同正常size分別明顯，只差$4，值得；咖啡奶味香，奶啡愛好者會滿意巴斯克芝士蛋糕：跟午餐+$32，有擺盤而份量夠2個人分享；整開甜品的朋友覺得幾好食，雖然唔突出色，冇乜記憶點，但亦唔會令人失望開心果鮮奶：跟主菜半價+$25-30；朋友話開心果特飲一般係奶昔，所以試下；飲品面灑咗少量開心果碎；朋友話有開心果味，滿意整體嚟講，人少地方大、價錢唔貴、食物有水準，值得一試！只係門鈴聲大，又經常響，次次都俾佢嘈親而嚇一跳。…查看更多

之前喺Il Bel Paese Italian Express買過芝士，選擇多，感覺地道，所以，想食意大利菜時，就諗起呢度。餐廳提供3款全日套餐，有3個主菜選項：烤雞、海鮮意粉同薄餅。我同朋友3個人，點咗2個套餐，再單點1客主菜同1客甜品。套餐可經Openrice「預購」（可到餐廳後再上網買），每客平$40左右。意式雜豆湯：套餐A的湯品；豆類豐富，味清，質地濃稠，豆唔會煲到過爛，啱啱好芝麻葉牛油果沙律：套餐C的前菜（沙律），實物同圖片不符，不過幾清爽、好食；芝麻葉新鮮，牛油果量少但質量好，芝士份量多，配搭橄欖油，飽足感十足意式烤雞（半隻）配蔬菜：套餐A的主菜；朋友讚雞肉好食，雖然切的時候冇肉汁，但感覺嫰滑；烤蔬菜量少但款多，有南瓜、甘筍、意大利青瓜、青椒、radish、乾蔥頭等雙拼薄餅：套餐C的主菜，可於餐牌中任選2款口味；點咗吞拿魚同布拉塔薄餅；薄餅切成8小件，方便食；吞拿魚薄餅材料豐富，大件；布拉塔薄餅有水牛芝士、風乾蕃茄同車厘茄，味道天然；大家一致認同批皮好食，帶𡁻口又有啲脆邊，唔鎅口，未食過咁好食的厚批批底菠菜意式雲吞：單點$148；有11、12隻；饀料係芝士菠菜，creamy，好食，朋友話如果鹹度稍微調低會更好意大利雪糕：套餐A、C的甜品；餐廳提供多款口味，但唔包開心果同乳酪味，既然單點同樣係$38/球，點解唔俾揀呢2款？揀咗Nutella同榛子，餐牌翻譯Nutella為花生醬，但應該係朱古力榛子；兩者味道好像真Tiramisu：唔好食；底部係海綿蛋糕，咖啡味同酒味唔夠香濃，整體質感過濕，而個人口味覺得佢的蛋糕體甜咗少少，面頭的可可粉朱古力味唔濃；呢個甜品係反高潮整理嚟講，餐廳地理位置優越，喺尖東站出口隔離，好易搵；環境唔錯，座椅舒適，但朋友覺得冷氣唔夠。餐廳喺商場入面，要攞鎖匙使用商場的洗手間，而洗手間喺上一層，路程有啲遠。侍應的服務非常好，笑容滿面，就連廚師都有喺我哋離開時講拜拜，而且侍應經常加水，又會留意住我哋的用餐進度，最後，佢都有了解我哋的用餐體驗。不過，由於我哋被安排坐喺離出菜區稍遠的位置，當有需要召喚侍應時，對方未必即時留意到。除咗Tiramisu，基本上所有嘢都好好食，而MVP係薄餅！價錢方面，套餐正價$268，加一後接近$300，呢個價錢唔包飲品就唔算抵食。所以，點套餐可考慮經Openrice預購。有機會都想再嚟食薄餅~…查看更多

狗狗爸爸睇到社交平台帖文，餐廳喺4-7/10 1200-1700推出牛扒薯條tasting menu，每客$249，包經典核桃沙律同主菜(牛扒薯條)，主題吸引，一於訂位試試。周日1345到達，喺餐廳側邊的食肆人多狗狗多，但呢度冇食客，變咗包場。沙律好快送上，諗住快少少食完便離開，可惜其後出現小插曲，最後食咗2個鐘。經典核桃沙律：之前食過，鍾意沙律入面的醃洋蔥；食材簡單，有羅馬生菜、醃洋蔥同核桃，醬汁係略帶檸檬味的橄欖油；生菜爽脆；醃洋蔥微酸，唔鹹，開胃；敗筆係核桃，食落好腍，冇正常脆身的口感，食多幾粒先察覺佢氧化咗，有油膉味；向狗狗爸爸求證，佢都食得出，只好同侍應反映，之後廚師親自向我哋了解，其後亦解釋批核桃係前一日焗好，餘貨亦唔係粒粒出現同類問題，所以餐廳都唔確定成因；最後，廚師主動提出換過另一款沙律俾我哋尼斯沙律：之前喺度食午餐，可以揀尼斯沙律/核桃沙律，呢款沙律雖然食材豐富(羅馬生菜、素吞拿魚、雞蛋、車厘茄、薯仔)，但唔係我的心水，不過餐廳只得2款沙律，所以當聽到換另一款時，都知道係尼斯沙律；沙律料多，食材新鮮，只係薯仔連皮烚，冇調味，麻麻地；製作呢個沙律要烚蛋又要煮薯仔，所以，上菜需時，時間觀感真係幾長牛扒薯條：有一份由侍應送上，另一份由一位唔係穿著黑色廚師服但又應該對菜式熟悉的店員/店主送上，佢提我哋一定要連汁食；呢件素牛扒由𤠣頭菇製成，估計每份餐用咗2隻菇，而餐廳又冇花太多心思擺盤，令牛扒的presentation唔靚，沿邊位巖巉，模仿上冇咁逼真；撇除擺盤，主菜都幾好食；偽裝成牛扒的猴頭菇染咗鮮紅色，有牛扒血腥的視覺效果，口感上係菇的軟腍，至於味道方面，如果唔點醬，依然食到少少甘苦味(唔知餐廳係咪自己浸發𤠣頭菇，處理程序又真係唔簡單)，配合醬汁可有效覆蓋到陣甘苦味；薯條唔熱但鬆脆，不過因為超幼，所以冇乜薯味；醬汁係靈魂，每次嚟游，最期待就係醬汁，呢款醬creamy，唔識形容佢的味道，但入口溫和呢個餐冇加一，抵唔抵食見仁見智，我抱嘗新的心態嚟，的確得到我想要的體驗，但客觀咁計，1個沙律+2塊猴頭菇+1堆薯條+醬汁，唔算抵食，所以，要諗多啲係研發呢道菜的時間同心思。食完後，心諗：我會再幫襯嗎？今次出現核桃沙律同擺盤呢啲小細節問題(前者餐廳都有誠意處理)，我覺得呢度的消費同餐廳對細節的執著未算對等，而呢一點係由第一次嚟食嘢直至而家，都喺唔同範疇呈現，令人又愛又恨，而且一次又一次，難免失望~…查看更多

冇乜人為呢間餐廳寫食評，唔通好少本地人幫襯？餐廳1年1度的慈善自助餐今年喺10月4日進行，有午、晚市，每節用餐時間3-4個小時。今年我同狗狗爸爸晏晝過嚟，比上年遲，1400到達，離午市完結(1500)1個鐘。遲有遲好，餐廳入座率7成，易搵位，加上大家食得八八九九，基本上唔需要花時間輪候食物。同上年一樣，自助餐檯呈L型擺放，有侍應幫手挾食物，由門口附近的自助餐區順住行就攞到醬汁、小食、烤餅、咖哩、糖水等返埋位，飲品方面，侍應會到每檯斟甜檸檬水。自助餐的食物同上年非常相似，有位負責人講話今年有一道新菜：椰菜青豆，而呢個菜式就連餐廳平日的自助午餐都冇供應，另外，有幫忙挾食物的侍應讚炒飯好食。各式醬料：估計係薄荷醬、椰子醬同蕃茄醬，味道溫和、唔辣，配dosa、烤餅都好食青瓜乳酪：味淡，質地稀，配dosa會好易浸腍塊餅，可配米糕、炸物椰菜青豆：微暖，味道清爽，帶椰菜的甜味，加埋青豆都幾飽肚扁豆湯：足料，香料味十足，較稀，唔heavy 三角豆咖喱：唔係一般認知上的咖喱味，有啲似忌廉醬，質感creamy，醬入面有少量豆，好味Dosa：整好再放出嚟，唔係好熱、好脆，但依然好食，一塊餅有薄脆的部分，亦有較厚、有糕餅口感的部分薯仔dosa：有薯仔饀，唔使點醬都好食烤餅：點選時以為係chapati，原來係roti，望落同食落較油膩、厚身；dosa相對好食啲；呢款烤餅有少少似pita，唔易咬開，難用手撕細件點醬食菠菜芝士：菠菜蓉creamy，個醬好「杰」，入面有好多芝士，味道清爽但易飽肚，好食餐廳冇提供刀叉，只有一隻小木匙，所以都係用手食；環境光猛，洗手間的廁格細但乾淨、企理、有香味，侍應執拾的速度算快，而且普遍非常友善，尤其負責自助餐區的侍應，佢地好熱心，分菜好大方，仲會鼓勵食客試多啲唔同款式的食物。呢個慈善自助餐捐款多少無拘，有心人係支持行善，唔拘泥究竟「值唔值」。餐廳透過行動回䭉社會，食客透過捐款支持餐廳，好有意義！期待下年的慈善之約！…查看更多

每年都帶狗狗嚟2、3次，但會避開炎夏，試過夏天嚟，室外座位又熱又多蚊，搞唔掂。酷熱天氣警告下，同狗狗爸爸、狗狗到天空之城，驚見大飯糖開闢一個寵物友善用餐區，被膠簾圍封的一處餐廳外圍裝咗冷氣同風扇，馬上連餐牌都唔望就推住寵物車衝入去~呢個用餐區地方淺窄，擺咗2張2人檯同1張3-4人檯，有2部冷氣同幾部風扇同時開動，足夠降溫；牆上裝咗掛鈎固定狗帶，狗狗喺自己身邊活動，方便照顧...呢啲都係細心位。其他免費的寵物友善設施就冇喇，但自費的有寵物餐：雞肉(細)$25、(大)$35。All day 英式石斑魚薯條：套餐除主菜外，包自選前菜、配菜同甜品各1份，亦可補差價點飲品1杯(平日有2款免費飲品 - 冰茶，假日暫停供應）。預設的前菜、配菜、甜品唔使加錢，但要轉其他指定選目就要加錢，所以，原本$138的套餐，呢度加啲，果度加啲，埋單變咗$179，以呢個級數的餐廳嚟講，價錢偏貴。芒果金柚有機沙律：前菜，唔使加錢，份量細，2啖左右；食唔出沙律菜係咪有機，芒果、金柚好少；食材唔多但沙律醬汁多而鹹；唔好抱太大期望IMG:2]英式石斑魚薯條：狗狗爸爸的主菜；魚塊炸得幾脆，狗狗爸爸話食到魚味；魚同薯條份量唔算多，但配咗一大碟沙律醬煙肉流心蛋芝士飛碟：預設配菜係薯餅，改呢款飛碟+$6，值得，因為佢食材多啲、工序多啲同冇咁熱氣(主菜已經跟炸薯條)；飛碟放耐咗，麵包變得冇咁脆，流心蛋、半融芝士，都幾好食；煙肉望落似火腿法式焦糖燉蛋：+$10；呢度所有要加錢的項目水準8唔錯；甜品用Paul Lafayette同款的淺砵，份量同外面食到的差唔多；味道唔錯，由於套餐以定食形式上菜，哪怕焦糖係即時燒(唔確定)，食的時候已變咗液態焦糖，但佢都好食既；甜度頗高，冇Paul Lafayette的雲呢拿籽，但都有雲呢拿味，燉蛋亦滑西瓜沙冰：+$25；零擺盤，都大杯，算係真材實料，沙冰夠冰涼，可解暑；估計有加糖水，但西瓜味足整體嚟講，原本餐廳的性價比唔高(可取：毋須加一，食物以定食形式提供，款式較多)，餐廳的舒適度同服務普通，食物味道可以但冇乜驚喜，定價過高。不過，帶住狗狗的話，評價提升好多，因為喺香港實在太難搵到餐廳容讓狗狗涼冷氣，單係呢點都值得由ok跳至好評~狗狗食評🐕📝：食物🍽️：我食到爸爸、媽媽個餐入面的沙律(走醬)同少少麵包，另外，我都飲咗少少凍冰冰的西瓜沙冰，個餐唔大份，我只係分到少少，好在爸爸、媽媽都帶定少少零食俾我；佢地話雖然有寵物餐，但屋企成日整雞肉俾我食，唔好嘥錢~環境🌳🪑：迫迫地，我哋一家三口霸咗張大檯，呢個位大啲，勉強放得落我部的戰車；餐廳有冷氣幫我降溫寵物友善度💖：對我嚟講，有得同爸爸、媽媽一齊食嘢已經好滿足，美中不足係店員冇主動俾水我哋，我哋呢啲小動物天時暑熱過到嚟都好口渴架嘛…查看更多

收藏好耐，趁平日放假，終於可以試下。經Openrice訂位，1330到達。餐廳外觀唔錯，建築物係玻璃幕牆，但室內感覺侷束，冇自然光，燈光略為昏黃，座位排得密，離廁所近，檯椅亦好普通，以呢個價位嚟講，用餐環境麻麻。幸好廁所乾淨企理，只係水籠頭感應後，出水時間短兼水量少，洗手要有耐性。睇咗Openrice的餐牌先訂位，但嚟到係另一回事（可能近日轉咗餐牌？）平日午餐只有1款：1個小食+1款Dosa+飲品，$178，須加一。如果想食其他印度烤餅/飯，只可單點。Samomsa chaat：聽完侍應簡單講解做法後，由3款小食中揀咗呢款；菜式係將samosa打碎後再以乳酪同其他香科調味，製成品的面層灑上脆脆同石榴籽；賣相吸引，份量唔細；味道有層次，微酸帶少少甜、辣，口感上有乳酪的順滑、薯仔的腍、samosa炸皮的脆；推介！Dosa：餐牌上有5-6款dosa，呢款單點價格最高，可能因為食材種類較多，有牛油果、羊奶芝士、火箭菜同風乾蕃茄，喺營養上平衡啲；dosa唔算大，打開見到饀料所用的食材幾新鮮；風乾蕃茄唔似出面買到的咁鹹，羊奶芝士唔膻，牛油果熟度剛好，火箭菜新鮮，整體味道清新！不過，dosa放耐就唔脆（尤其加咗餡料），要快啲食Coconut chutney：好重椰香味的醬，味道清新，好食，量少，食落唔「漏」Soup aloo sabzi：印式薯仔蔬菜湯，用料豐富，惹味帶辣勁；問侍應係咪可以添加，佢有拎多一小碗俾我Flat white：套餐包咖啡、茶/印度奶茶，咖啡可揀奶啡，唔使補錢。以為大多顧客會點印度奶茶，但發覺望落似熟客的人都係點咖啡；咖啡幾大杯，飲到咖啡豆的烘焙味；以cafe角度評價，略嫌拉花有進步空間，若以印度餐廳角度睇，咁佢的咖啡水準唔錯，侌人滿意整體嚟講：環境：苛刻啲講，以呢個價位嚟講，餐廳佈置一般，檯椅平凡而櫈腳亦唔係特別乾淨；最大問题係侷束，冇空間感，隔離檯講嘢聽得一清二楚，廁所近在咫尺服務：侍應唔熱情但勝在有問必答，經常斟水，見我對印度菜冇乜認識，就主動遞上有食物照片的餐牌俾我參考食物：賣相還可，味道非常適合香港人的口味，惹味而辣度溫和，但未去到被吹捧的高水平，只屬於唔錯的級別，而喺度飲到有cafe質素的奶啡都有啲驚喜；性價比低，平日午餐連加一接近$200，呢個價位可以搵到啲包semi buffet/甜品的午餐，而環境佈局又好啲的餐廳；bookmark咗的話，唔嚟未必會死心，但試完就冇誘因回訪，除非當佢cafe咁嚟飲杯咖啡，咁都ok~…查看更多

之前嚟Café&Meal MUJI都係飲咖啡、食甜品，未試過食正餐，主因係覺得佢份量細、唔抵食。今次朋友提議嚟呢度晚餐，先有機會坐低正式用餐。點咗三品素食料理套餐，$88，自選2款冷盤、1款熱盤，再選配16穀飯 / 白飯/ 麵包 /鹽麴烤蔬菜。揀咗鹽麴烤蔬菜(小份)，額外+$25點多1客大份。芝麻醬拌菠菜冬菇：冷盤；做法非常簡單，完全可自家複製，味淡，無特色；菠菜自身唔夠鮮味，喺缺乏醬汁助力下，食落好寡，唔推介羅馬蕃茄配柚子檸檬汁：冷盤；用小玻璃碗裝，視覺、味覺透心涼；呢個蕃茄品種多汁但茄味淡，幸好有酸甜柚子檸檬汁，建議將蕃茄整細件再撈汁食昆布味噌節瓜：熱盤，但上菜時只係微暖；1小件節瓜，面鋪有本菇、杞子；以味噌及昆布調製的醬汁濃稠、鮮味，豐富咗整體味道的層次鹽麴烤蔬菜：主菜；比冷、熱盤更出色；配料多，有雙色椰菜花、絲瓜、豆角、雞樅菌等；烤過的配菜有咬口，鹽麴提升蔬菜同菇菌的味道，帶鹹香；由於額外多購1客大份，所以好㩒食無糖豆漿：正常三品配麵豉湯，落單時店員表示麵豉湯有鰹魚成分，改為冷/熱豆漿，無形中由湯品變飲品，更合胃口；豆漿無糖，健康、有黃豆味，好飲整體嚟講，環境一般，檯椅排列稍逼，附近有幾檯家庭用餐，有大人、有細路，如果想喺一個清靜的環境用餐就唔太適合，勝在唔限時；價格：食物份量極細，如涼拌菠菜只得2啖，唔夠食，只係食物睇落豐富、精緻，性價比一般，另有好處係自助免加一（朋友黯點正常三品，有肉、海鮮，就覺得夠飽）品；服務：店員會上餐，而斟水要自助，食完曬亦冇人主動執檯（可能因為冇限時，冇翻檯壓力）。試完Muji的正餐冇失望，但唔會主動再嚟，因為細份唔抵食，不過佢的菜式的確清淡、健康，以外食嚟講，係一大賣點。…查看更多

早1日訂位，平日夜晚嚟到，設90分鐘用餐時間。餐廳似逆市奇葩，平日仍持續有人排隊，不過幸好餐廳夠大，最後，我同朋友都可以坐耐啲。餐牌上的主菜/飯/意粉都跟餐飲，但飲品選擇少，只有冷/熱檸蜜、咖啡或黑糖薑茶，其他飲品及餐湯可-$8，各式甜品則+$30。以湯、飯/意粉、特飲同甜品咁計，連加一~$250/位。另外，仲可以+$30選配小食。牛肝菌湯：上菜時以茶壼裝住，由侍應席前倒入一隻放咗2小瓣牛肝菌的闊口茶杯；份量唔少；湯色飽和度高，入口亦濃稠，雖然頂多只係以蘑菇製成，但味道唔錯，鹹味適中龍蝦海鮮濃湯：上菜時冇牛肝菌湯的花臣；湯入面有海鮮料，如蜆；朋友話味道可以但冇乜特別羽衣甘藍藜麥雜菜沙律：+$30換的小食，份量竟然有啲睇頭，唔孤寒；配酸甜柚子蜜，開胃焦糖蕃薯條：+$30換的小食，份量大，滿滿的一桶；蕃薯條色澤金黃，入口香脆，表面淋咗蜜糖（但冇焦香），香口、好食，不過，餐廳竟然跟埋個蕃茄醬，配搭非常古怪荳子超級食物沙律：唔平，冇跟餐飲，唔抵食；顧名思義，食材係人所共知的各款超級食物，純素；沙律菜幾新鮮，牛油果略熟，味道尚算軟滑但已呈輕微瘀黑，藜麥、穀物的份量唔多，feta cheese正常，青蘋果、腰果只係點綴；全碟最好食係紫洋蔥，生食、好甜；沙律唔細份，但食飽就講唔上（飽肚的殼類太少）美式手打牛肉漢堡：幾個朋友share嚟；$170+只係咁真係幾令人失望；朋友冇話唔好食，我就試咗薯蓉同沙律菜，正常；個漢堡包好細，配菜佔咗隻碟的3/5，性價比低西班牙海鮮飯：同樣係朋友食，賣相可以，但飯量少，雖然如此，朋友都食剩1/4，話唔算好食千島醬海鮮薄餅：以為餐廳賣麵包，pizza應該好耍家，但當見到係厚批時真係好失望（個人喜好問題）；薄餅的用料唔多，賣相麻麻，蘑菇片明顯係罐頭直出再放上餅面，焗製亦唔到位，焗完啲蘑菇仲帶濕，而且颜色蒼白，不過，薄餅單價唔高，如果想點樣嘢食飽個肚，可考慮Tiramisu：同朋友點咗4款甜品，呢款最好食；朋友本身唔想點，話太細杯，的確係，幾個人分，每人1匙；質感軟滑，有酒香特濃開心果杏仁蛋糕：喺餐廳門口見到凍櫃display，朋友已經話必食；送到上檯，覺得佢勁迷你；味道方面，1個字：伏！蛋糕唔好食，冇開心果味，開心果碎「淋」曬；未食過咁差的開心果甜品美式特濃朱古力軟心蛋糕：大件夾抵食，尺寸大到嚇一跳，1-2個人唔太建議點，3-4人就好適合；有香濃朱古力味（未到「特濃」），朱古力忌廉同朱古力海棉蛋糕層層相夾，食完會「漏」但滿足到想食甜品的慾望卷。奧樂蜜C蜜糖檸檬：擺盤有心思，蜜糖伴碟，味道香甜；卷蛋入面的檸檬味忌廉同檸檬果凍令層次豐富咗，同時亦中和到蜜糖的甜味，值得一試f熱鮮奶拿鐵：好飲，雖然一杯的份量唔多，但咖啡味香濃亦有奶香（加$3轉十字鮮奶），不過，呢啲都關乎咖啡師的手勢，因為喺Beans將軍澳分店都飲過淡而無味的咖啡食完就明點解餐廳可以逆市吸客：（1）環境：枱與枱之間有啲距離，座位舒適，餐廳溫度適中，坐得舒服；（2）服務：侍應的服務態度非常好，有求必應、冇甩漏，部分侍應好年輕，態度亦好，動作勤快，每次飲完水時，侍應會主動斟水，亦好頻繁地清碟；（3）食物：但凡加錢的食物、飲品水準唔錯，份量唔細，哪怕只係小食，賣相都令人impressed，不過，主菜係有啲「搶錢」。如果2個人嚟，不妨點1個餐，然後加餐湯、小食、甜品，轉特飲，再單點多1杯飲品同甜品，計落~$160/位，性價比高啲。…查看更多

以前（當時連小洪賓都未聽過）去開將軍澳分店，果邊設計、空間感一流，食物水準唔錯，性價比高。當時，午餐包湯/沙律，餐飲可選奶啡，有造型、大大杯，食完飽足又滿足。今日放假，為求新鮮感，就去咗尖沙咀分店。5月份午餐由$98起，只得主菜+餐飲，小食/甜品可額外加錢。意大利憤怒大通粉配意瓜：$108；午市餐牌上有幾款素食選擇，呢個睇落最純粹（冇芝士），適合素食人士；上檯時，通粉冒煙，非常熱，絕對唔能夠即時擺入口。由人手落單到上菜，極速完成：落單後1-2分鐘有飲品，~5分鐘有埋主菜，估計好大機會係預製+微波爐翻熱，一諗到可能係咁就相當失望。味道方面，茄醬的味道非常好，餐牌寫係「（漚（熬）煮3個鐘蕃茄汁，辛辣）」，佢的質地濃稠，適合用嚟掛汁，辣度夠，味道濃郁，相當惹味；散筆的係大通粉，煮/翻熱過籠，幾乎每粒都未篤已散或一叉即散，莫講話al dente，佢的水準甚至比普通西餐的出品更低，嘥咗個茄醬；意大利青瓜切到好細粒，水份重，冇乜味，只係點綴Latte：檯上有牌仔寫「餐飲咖啡可免費升級意大利Caffe Carraro coffee」，落單時，侍應反轉牌仔話是日咖啡係左面的「Honduras」，呢個時候睇見幅圖，先知原來Caffe Carraro coffee係膠囊咖啡，唔係咖啡豆，有少少失望，但都點咗latte試下；咖啡嚟到，細杯，冇拉花，顏色係淺米色，咖啡味唔重，似飲緊帶薄弱咖啡味的牛奶Tiramisu：望落大杯過latte；質地可以，𢳂落層次分明，手指餅冇浸到淋曬，甜度啱香港人，亦食到有些少酒味，不過，甜品的味道好單薄/單調，冇層次，當食到酒同cream cheese的味道時，哪怕唔係食家都食得出食材質素較低，只有表面的味道，唔會想追住食整體用餐經驗：呢度無論上菜速度、味道同服務都猶如快餐，飲品落單冇耐就送上，令餐廳免卻斟茶遞水；食物應該係翻熱食品，pasta肢離破碎，咖啡稀，tiramisu味道單一，以上總總都令人幾失望。講番呢次的特別體驗。當食物送上時，因為太燙口，只好慢慢食，等佢放涼。望望下突然發現點解冇意大利青瓜既？仔細睇，係成碟都冇。問侍應，佢同另一位職員（應該負責廚房）聯繫後，話落漏咗，幫我重新整過。新上果碟多咗意瓜粒，食物同樣燙口。再隔一陣，侍應送上tiramisu，話因為落漏材料而請我食。原本因為餐廳的食物質素，我同個菜名一樣都幾「憤怒」，不過，侍應同職員好有禮，加上免費甜品，點都緩和咗負面情緒。呢間餐廳最好的地方係（1）環境；（2）職員的態度（服務一般，主要因為得1個侍應睇曬成個場）；至於食物，光顧前要做定期望管理。最近睇過小洪賓的片。當遇到劣食時，小洪賓會爆粗，而佢亦曾經以意大利人身分，評價香港的意大利菜。與其周圍覓食，小洪賓不妨先踩場試下自己名下的分店，用食客的角度，發掘餐廳更多可以進步的空間！…查看更多

少入西貢，入嚟lunch前睇過Openrice食評，但冇邊間餐廳想試，因為有供應素食的多數係cafe，除咗貴（如Little Cove Espresso)，仲好悶添~同朋友邊行邊搵，見到呢間餐廳喺店外棟咗個素食餐牌，亦有提供午市套餐。喺多個午餐選項入面，有「印度香料烤雞卷」，下面有行字話可改為「炸鷹咀豆餅鷹咀豆蓉卷」，所以直接點咗呢個餐，唔使單點素食。是日餐湯：午餐可揀湯或沙律，沙律寫明有肉；是日之選係西蘭花湯，跟湯有一小塊法式蒜蓉多士；湯有少少稠，但唔係忌廉果種厚重質地，飲落唔漏，份量適中，味道清清地亦有少少飽肚感；西蘭花的份量應該唔多，湯只呈淡綠色，飲落亦冇乜西蘭花味炸鷹咀豆餅鷹咀豆蓉卷配沙律、薯條：上檯時，已覺得好大份、足料；鷹咀豆餅/蓉有起沙的口感，好鍾意；調味唔重手，恰到好處，食得好舒服；份量大，可以2個人share再額外點多1個前菜/甜品，應該已經夠飽同滿足，健康美味；沙律新鮮，應該加咗檸檬黑醋汁，清新；幼身薯條，上檯時唔熱，味道正常；因為個卷，我會俾呢個餐5粒星，係日日食都唔會厭的食物烤雞配沙律、薯條：朋友的午餐；半隻烤雞，有肉汁，亦有少量醬汁；朋友食曬，味道應該唔錯凍黑咖啡：凍飲毋須加錢，味道正常餐廳環境幾好，每檯有花點綴，座位舒適，檯與檯之間距離闊落，適合傾計。剛入餐廳時都擔心中伏，因為1300去到，附近的餐廳已坐滿人，唯獨呢度無論室內、室外亦冇客，點知原來佢的食物水準幾高！餐牌上的食物選項乜都有啲，有啲「立立雜雜」，定位唔係太清晰，可能算係多國菜？坐到1330，開始多咗啲客，而侍應端出嚟的食物亦好香、好大份、好吸引，見有食客帶狗狗坐室外，佢點咗個沙律，份沙律滿滿一盤，主人同狗狗可以分享，令我都想計劃一下同狗狗一齊嚟。侍應的服務可以，唔係好殷勤，但加水、執檯好爽手，上菜亦幾快。我同朋友喺餐廳留咗1.5小時，可慢慢享用食物之餘，又能夠靜靜哋傾下計。…查看更多

餐廳主打菇菌+雞鍋，喺香港算幾特別。佢的野菌雞鍋較出名，而素食者就可以單點素鍋。餐廳平日有午市優惠，喺Openrice可以平少少買到3款套餐（肉/海鮮），而單點食物就有88折（唔適用於鍋底）。午市冇加一而且供應時間長（1230-1600），2小時用餐時間，冇客就可以繼續坐，計落午餐比晚餐抵食好多。同朋友即場買咗1張套餐券，再單點野生菌養生鍋、刺身金耳菌、芥辣紅乳菌同板藍根青菜。2個人有2個鍋，1大1細，加上可以到自助區拎醃菜同生果（各2款），好夠食。鹽醃海帶莖：自助前菜；似韓式醃菜，唔辣，味道略鹹，海帶莖滑身帶𡁻口，好食醃蘿蔔：自助前菜；蘿蔔爽脆，有辣勁，開胃刺身金耳菌：$68；幾乎個個寫評價的人都點，聽落好似幾特別；賣相先聲奪人，冰鎮，青檸片同金耳菌間隔排列，旁邊放切半的小青桔，應該係俾客人唧啲青桔汁配搭享用，亦有日式醬油同wasabi；主角係金耳菌，佢的質地同味道激似蒟蒻，雖然適合扮魚生，但本身冇味，唔點醬油同wasabi就味如嚼臘；試過以青桔汁拌食，味道好酸、好怪；建議大家唔好點呢個前菜芥辣紅乳菌：$58；呢個前菜/小食同樣係食質感，但佢特別啲；上檯時，第一個反應係：「做乜俾碟未熟的豬膶我？」無論颜色同質感，佢都好似生豬膶，瘀紅色又滑潺潺，朋友試咗少少經已投降，接受唔到呢個紅乳菌的口感，而我就覺得佢好特別，撈咗芥辣好惹味；值得一試野生菌養生鍋：湯料足，有大量雜菌同竹笙，仲有紅棗，感覺滋補；用一個非遺墨脫石鍋上檯，個鍋份量十足，但已撞崩少少，而且鍋唔深，湯底份量有限；侍應提議未落火鍋料前先飲湯，湯幾清甜；湯底有油，唔確定佢係咪真•素食，可能同野生菌土雞湯底一樣，只係冇連雞件上~野生菌品質和牛套餐鍋B：$130；火鍋料豐富，有白菜、粟米、薯仔（心內美）、黑豆腐、冬瓜、安格斯保樂、牛肉丸、蝦子滑、土雞片，前菜/小食係鮮椒溏心皮蛋，連1大杯手打檸檬茶、靈魂口味碟，鍋就係單人小鍋野生菌土雞湯底；呢個1人餐的配料多，份量唔多，基本上係2-4小件，鮮椒溏心皮蛋就係1隻開3件；套餐賣相精緻，全部細碟上，感覺有啲排場；試咗蔬菜，唔係太特別，黑豆腐略嫌粗嚡，鮮椒溏心皮蛋油膩但入味；手打檸檬茶夠2個人飲，微甜；葷食人士可試下呢個套餐，食材樣樣有啲，淺嚐即止板藍根青菜：$48；朋友話必點，因為香港食唔到，而且爽脆、鮮甜；佢似細棵的嫩芥蘭，連菜花食，唔苦，爽口；但始終只係葉菜類，取價都幾離地生果：自助區供應西瓜、柑；西瓜清甜，keep住refill 蘸料：放咗已調配好的靈魂蘸料，因為唔覺得特別啱口味，所以冇試；拎咗生蒜、芫茜、蔥、芹菜，再加少少醋都好好食；蘸醬唔係必須，就咁喺個鍋撈上嚟，食物已經有鮮味環境方面，餐廳佈置典雅，坐得幾舒服。負責我果邊用餐區的侍應都幾熱情、健談，但就漏單，單人餐的鍋底等極都未有（套餐的配料已送上），前後問咗2次，最後先由一位上菜員送上雞鍋連爐具。個爐似露營用果種，餐廳又有啲出風位，所以侍應要花時間調整爐的擺放位置，其後發現鍋底一直滾唔起，原來冇gas，於是又要換gas~食物同價錢方面，性價比一般，用餐後直至第2日，都覺得口乾同出現輕微身體不適反應（我對味精敏感），估計同啲鹹/辣前菜有關，食咗唔係太舒服整體嚟講，呢間餐廳值得一試，第1次嚟會覺得用餐體驗美好，但建議lunch嚟，消費較低。記憶點唔多，主要係食環境同體驗。佢啲菇係多，但餐牌只列出各種菌類而冇標價，加上全屬單點，冇拼盤，人少的話，就算佢菇多，都冇錢+胃納試多幾款。嚟多幾次可能就覺得不外如是~…查看更多