BonnieYu的個人專頁

今晚好開心, 因為生性孤寒嘅老闆請食飯, 對佢不寄予厚望!!! 不過食免費就算啦 ... 經利源東街小販檔再到餐廳, 會有一個好強烈嘅對比, 餐廳比我想像中大, 燈光好柔和感覺好舒服, 穩穩陣陣 ... 至於食物方面: 蠔 - 雖然我唔係食家, 但都知宜家唔係食蠔嘅季節, 不過餐廳老闆極力推介來自愛爾蘭同法國嘅蠔 .... 講真, 真係冇介紹錯, 前者肥美, 後者比較瘦, 但鹹水味好重, 好鮮 ... 正 !! 水牛芝士沙律配葡萄黑醋醬 - 唔使多講, 水牛芝士唔太溜, 跟新鮮蔬菜同黑醋配合, 已經開哂胃 !! 磨菇湯 - 好濃郁, 好香好好味 !! 巴黎牛油焗扇貝伴鮮露筍配香檳汁 - 牛油將扇貝焗得好香, 跟露筍配合得非常恰當 !! 扒澳洲羊骨排伴香濃乾葱紅酒汁 - 羊架好好味, 一點"蘇'味都冇, 再伴紅酒汁, 帶點點甜, 好特別 !! 甜品大會 - 有心太軟, Mousse Cake, Cheese Cake, Tiramisu and Creme Brulee .... 因為餐廳老闆好好人, 俾我哋試哂咁多款甜品! 蛋糕唔太甜, 糕身好幼滑! 至於心太軟冇試到, no comments !! 因為冇影到相, 其實個餐包都好好食, 脆卞卞 !! 另外, 最後的驚喜 ... 就係杯香滑咖啡 (Vesuvio Coffee Bean, 100% Arabica Double Roast) 當然我唔係識, 係抄餐牌嘅 !! 我敢話係ORO18食飯, 唔點咖啡飲, 簡直一大遺憾事 !! 以紅白酒任飲再加以上食物, 四位只需$1,400 .... 抵 !! 經過今晚, 要重新估計我老闆啦, 同呢間餐廳一樣 .... 實而不華 !!!!! 多謝老闆 …查看更多

D Corner係一位朋友介紹下認識, 我朋友一向都愛食兼咀刁, 佢介紹得應該冇錯! 餐廳格局俾我感覺好寧靜同好decent, 跟樓下酒吧的勁歌熱舞好有天淵之別, 所以好有沙漠中的綠洲感覺! 另外餐廳有一個大露台, 可以給人客出外呼吸另一種新空氣, 無需要落樓下, 煙民朋友會明白我意思!! 至於食物方面: 墨汁芝士包 + 蘑菇湯 :-- 黑實實的外表夾雜芝士濃香, 好有趣的配搭, 仲要跟濃郁蘑菇湯一齊熱烘烘奉上, 簡直天衣無縫! 海鮮盆 :-- 有翡翠螺, 三文魚, 牡丹蝦與及來自法國嘅蠔 (Gillardeau), 其實海鮮都冇咩特別評價, 一個字 "鮮" ! 芒果蝦沙律 :-- 鮮甜芒果蝦沙律又令到我個已半飽嘅胃再次打開, 非常新鮮好味! 炭燒豬扒 :-- 豬扒肉質鮮嫩, 炭燒煮法剛好令到肉汁封鎖, 完全沒有太煙韌! 甜品 :-- 咖啡芝士Cake - 唔太甜, 咖啡味好濃香, 蛋糕身好軟滑! - 栗子cake - 我唔喜歡食栗子, 所以no comments ... 不過我朋友話好好味! 順帶一提, 我有幸遇正餐廳有promotion, 以上餐食再加紅白酒任飲到10:30pm, 都係$298+10% .... 有運兼抵食!!!…查看更多

幫襯呢間食館已有三個月, 平均每星期都會食一次晚飯, 就好似返屋企食飯咁! 大有哥平時會去九龍城或深水埗買餸, 有咩靚, 就買咩! 跟住同大有嫂研究點樣煮當晚菜式! 以上資料由一衆街坊提供 ! 其實大有嫂好擅長煮魚, 只可惜我唔喜歡食魚, 所以我會選擇 .... 海南雞 - 可跟白飯或油飯 (肉質鮮嫩) 蝦醬炆豬肉 (蝦醬好香, 唔過鹹)獅子球 (好味道, 炸香咗再煮, 不過我嫌份量多得滯)香煎蓮藕餅 (好香, 好爽口)番茄豬柳 (豬柳唔知用咩醃, 有點胡椒味)如果碟餸冇蔬菜類一齊煮, 就會附送鼔油生菜另加是日例湯 .... 佢哋煮嘅湯同餸都冇落味精, 全部發自內心, 好家庭式 .... 當然佢哋唔係sell services, 係sell溫情...我試過有次見到煮魚湯, 我眨哂咀, 問佢哋有冇其他選擇, 跟住大有嫂滾咗碗菜湯我飲 ... 你話係咪好touching 呢 .... 所以對於啲"無飯"屋企同單身一族, 簡直係必選 ...!!!!! …查看更多

Kyoto Joe是朋友介紹去食.... 餐廳外觀冇特別, 但內裏裝修有別於一般日本餐廳! 餐廳內置樓梯, 有兩層式! 因為我們有十人食飯, 特別訂好樓上位置, 有如一個偏廳, 兩邊牆身都放置四排綠色小盆栽, 視覺上好清新舒服! 還 有一大扇玻璃窗可打開, 望出蘭桂芳大街! 食物方面 .... 串燒 - 我特別喜愛'煙肉蕃茄串'和'無骨雞翼串' .... 蕃茄汁同煙肉中和, 令煙肉沒有溜滯感覺! 而去骨雞翼內包免治豬肉, 外脆內香! '鴨胸肉刺身' - 完全冇痴牙, 肉身唔un! '刺身沙律' - 材料新鮮, 而個沙律汁唔係太酸, 好香!唔需要我多講, 所有'刺身'都非常新鮮, 特別係啲'帶子', 超甜! 就算咁大隻, 都沒有食肥豬肉嘅感覺! 至於, 怕食腥味嘅我, 對個'海膽壽司'一啲都唔抗拒, 原因只有一個, 因為新鮮囉! 個'豆腐燒'同様地外脆內軟滑!而最令我難忘'熱石牛肋骨', 肉身鮮嫩, 好似冬菇個樣嘅熱石, 烘住啲牛肋骨, 熱力剛好, 剛可入口! 我哋連墊底嘅薯蓉及旁邊大蒜都掃清光! 其實仲有牛油果軟殼蟹卷, 帝皇蝦卷, 炸水泡魚皮, 海鮮湯等食物 .... 都好好味!!!! 只可惜不能將所有場內環境同其他食物相post出來 .... …查看更多