SpaceBar0mm的个人专页

假日中午去中環拎嘢，順便食啲嘢，今次比間嘢個名吸引左，所以就決定入去試一試。係兩種慢煮牛肉中簡左美國安格斯牛肋骨，牛肉同脂肪比例大約一半半，肉質因為慢煮既關係好軟林，油香味好重，表面有少少燒香味，連個汁一齊食味道層次唔錯。下次應該會試下個慢煮紐西蘭牛面肉。除左牛肉都點左少少其他嘢食，分別係焗肉醬意粉，黑松露蕃薯條同七味一字雞翼。焗肉醬意粉中芝士味特別特出。蕃薯條好甜，連沙律醬加黑松露一齊食味道好夾，一字雞翼表面炸得好脆，肉質好嫩有些少辣味。中午簡簡單單又一餐。…查看更多

有一段時間無咩點去試新野，今次就放工近近地係灣仔試下一間港式fusion菜為主既酒吧，見到個餐牌個時，好多野都想試，但怕叫太多會浪費食物。一行兩個人，每人叫左杯野飲，分別係Mama Mia同BPJ: Cox Apple，我飲個杯係Mama Mia，應該係以西瓜同米酒整出黎既cocktail，果皮味好香容易入口。我地主要叫左啲小食類為主既食物，可以慢慢傾計慢慢食，分別係炸雞皮、蓮藕片同話梅乳豬。本人就對雞皮特別有愛，而今次既炸雞皮炸得干身唔油膩，個醬就似BBQ味做膽再加啲特別味入去，同炸雞皮好夾。蓮藕片炸到有啲似蔬菜薯片，上面有個甜甜地鹹鹹地既醬，我覺得就係腐乳為主整出黎既醬，個醬同蓮藕片都好夾。最後就係話梅乳豬，先講配角，個薯蓉好滑軟綿程度啱啱好，有食開中式燒肉既應該都知話梅同乳豬係一個好好既配搭，所以主要係睇個醬，醬既質感口感味道都非常好，真係無得輸，而乳豬皮脆肉嫩豬味十足，個份量兩個人食啱啱好。整體感覺良好，菜式到飲品都有新意，特別係個話梅乳豬好出色，送酒一流。…查看更多

聽朋友講有間酒樓有叉燒飯加佛跳牆唔錯，我第一時間就湧出星爺食神既回憶，二話不說就約朋友去試下係咩一回事。第二日放工同幾個朋友一齊去食，一坐底我已經決定要食谷飼豚肉叉燒飯配原盅佛跳牆，其他就交比朋友決定。過咗陣，我個黯然銷魂飯同超級無敵海景佛跳牆就到咗，叉燒飯大大件，咬落去夠彈牙好滿足，而佛跳牆就好足料，有鮑魚海參等，整體味道醇，去開既話可以試下依個組合。然後係蒜片和牛粒，和牛粒淋身牛味重但油份不足，配蒜片好夾。之後係明太子賽螃蟹，蟹肉十足蛋白亦好滑，平時好少食，但感覺唔錯。再黎既係啫啫遼參雞煲，雞肉好滑遼參爽中帶腍，蔥入哂味好好食。到肉絲煎兩面黃，湯汁另上可以保持麵質香脆，我自己比較鐘意唔落湯汁就咁食。最後係脆皮香芒蝦球，蝦球爽口，配個汁甜甜地淡淡芒果味亦幾夾蝦肉。食到尾叫咗個蘋果拔絲，糖絲外型華麗，蘋果表面好脆，果肉爽口香甜，係個唔錯既結尾。總結，依餐飯可以食到電影既感覺，整體感覺良好。…查看更多

相信大家約會成日諗爆頭去邊到食，今次幫大家搵到間幾有FEEL既酒吧。雖然我今次係同朋友去，但已經覺得個地方好適合拍拖約會。直入主題，我地分別叫咗3杯酒，係Honey Bee、What the Duck 同Sea Smile，賣相影相呃like無得輸，我飲個杯係Honey Bee，有啲似奶昔，口感Creamy帶少少蜜糖味，三杯酒味都唔算濃，適合女士容易入口。叫咗6隻生蠔，3隻Harty 同3隻Gillardeau，3個人食啱啱好，Harty肉質肥美，而Gillardeau海水味濃，十分滿足。熟食就點咗香烤蜜糖雞翼，雞肉好入味夠滑。第二樣係炭燒德國腸拼盤，有辣肉腸黑椒肉腸等，每條腸都有自己特色，可以每人每樣食少少，三人食份量啱啱好。第三樣係炭燒安格斯牛仔骨，牛肉味濃，焗薯好好食，薯仔好滑連芝士煙肉好夾。最後係甜品The Love of Eiffel，有馬卡龍、朱古力、芝士蛋糕等，但我覺得重點係視覺，絕對係加分要數之一。總結，酒吧整體感覺氣氛良好，係一個拍拖約會好去處。…查看更多

間唔中都會同屋企人出去食飯，唔想次次都食個幾間，所以今次就出旺角揀咗間想環境舒服啲食小菜既地方，一家人輕輕鬆鬆食餐飯，今次全權由屋企人落單。首先就係脆皮德國鹹豬手，皮脆肉嫩大大碟，再點少少酸辣汁，味道啱啱好。接著就係OK汁煎南非大虎蝦，個汁酸酸甜甜，蝦大大隻蝦肉爽口彈牙，好開胃會自然想食多幾隻。然後係籠仔荷葉海龍皇蒸飯，飯上面有魚蝦蟹加少少蒜蓉，但個重點係個飯到，好香口入哂味，唔小心又會想食多碗。再黎既係薑蔥焗美國桶蠔，上菜時熱辣辣出哂煙，蠔好大隻夠哂肥美，配合薑蔥味無得輸，非常滿足。之後係生炒骨，味道唔會過份酸甜，好適合送飯。最後就係燒汁脆米安格斯牛粒，一半矮瓜一半牛肉，味道濃沃送飯一流。結論，旺區好選擇，適合一家大細去食，好多餸式選擇，一定有野啱你食。…查看更多

星期六係佐敦附近同朋友食完晚飯，book咗係旺角戲院午夜場睇戲，所以大家都決定行番過去旺角，途中經過個時見到依間愛甜品，大家都見仲有一段時間，所以就入去食番碗。一入到就聞到好香既薑汁糖水味，所以未坐低我已經決定要食有薑汁既甜品。坐咗陣我好快就揀咗薑汁豆腐花，淡淡既豆香，薑汁薑味十足唔太甜啱啱好。而我朋友就叫咗士多啤梨班戟同楊枝甘露，兩樣我只係食咗一兩啖，士多啤梨班戟甜甜酸酸幾好食，但個班戟皮就覺得厚咗少少，個雪糕朱古力味幾濃。楊枝甘露芒果柚子再加些少士多啤梨甜甜酸酸，都幾夾，正正常常楊枝甘露味。總結，整體感覺唔錯，地方舒舒服服，成件事都輕輕鬆鬆。…查看更多

特別日子特別地方，你懂的。今次揀咗間環境唔錯既餐廳，用餐氣氛亦好好，係一個唔錯既選擇。唔講咁多，直接講下今次主要食咗啲咩。落完單，先送上既係意式餐前包，係一種唔算硬唔算軟既麵包，加少少橄欖油或黑醋，味道唔錯。無耐之後送到既係蘑菇忌廉湯，口感細滑帶蘑菇蓉，菇味香濃，絕對唔會失望。主菜係經典之作卡邦尼蜆肉意粉，水準極高，Al Dente口感一試便知龍與鳳，蛋黃味同芝士味比例好好，少少煙肉同蜆肉再加一隻半熟蛋，調味簡單但非常好食，賣相到味道都十分出色。瑪格麗塔鯷魚披薩，味道亦相當簡單，番茄同水牛芝士再加上鯷魚，披薩脆邊，鯷魚味特出，係一款外國人經常食既醃製魚。想了解外國人食既味係可以一試。最後總結，想同另一半開心下，依到會係一個不錯既地方。…查看更多

閒日放工想飲兩杯，日式居酒屋係其中一個非常好既選擇，今次就係銅鑼灣附近覓食，之前行過門外都有留意依間居酒屋，今次就入去一試，入到去二話不說就點左杯黑啤解解渴，再慢慢睇下有咩好食。一開始就黎左串燒類食物，燒鯖魚燒到表面好香口，魚肉油份無流失。之後就係長蔥雞肉串同自家製免治雞肉棒，長蔥甜味好吸引，雞肉唔會燒到好干，點些少辣椒粉好夾，而自家製免治雞肉棒好好食，有雞軟骨係入面，外酥內脆口感好豐富，點少少鮮蛋黃令到雞肉棒加多份香滑。最後就係醬油燒飯團，淡淡既醬油味，有穀米係入面米香十足，飯焦香配酒一流。見到有和牛食當然要試下，揀左日本產霜降A4和牛燒，燒之前會比你睇下有幾多克先再燒，對我而言A4和牛比A5和牛更加好食，牛味同油份既比例適中，牛味香濃入口即溶。再黎火山熔岩桂魚卷，桂魚卷外脆飯軟，加芝士醬味道好濃，壽司都可以適合伴酒。最後就係野菜天婦羅盛合，比較特別既係有紅椒天婦羅，甜甜地幾好食。總結一下，居酒屋都可以食到新穎既菜式，非常適合三五知己飲番兩杯。…查看更多

話說皇室堡商場重建後，基本上除咗睇戲，都無係呢到食過嘢，今次陪朋友係到買嘢，順便就係到食餐飯。因為大家都想食啲香口嘢，所以今次揀左呢間Pastaholic，價錢亦幾合理，環境都幾舒服，唔係太嘈。兩丁友怕眼大肚窄，所以唔敢叫得太多嘢食。等左一陣就有嘢食到，首先係煙肉雜菇蕃茄忌廉意粉，一食落口就覺得好舒服，有輕微嘅蕃茄酸味，味道啱啱好，唔會蓋過曬其他味。再黎就係黃金四重芝士披薩，對我黎講PIZZA簡簡單單已經好好食，就咁食就有淡淡芝士味，加啲附上既蜜糖醬，就會有第二種味道，甜甜地好吸引，我比較鐘意加蜜糖醬既味道。之後就係脆炸原條白身魚配有皮薯角，魚塊炸得好好，魚肉仲好滑，薯角就無咩特別。各自點咗杯飲品，分別係鮮水果茶同西班牙白雞尾酒，雞尾酒帶少少酸味仲有微微既水果香，而鮮水果茶，茶味幾特別唔太甜帶少少幽香果味。最後朋友再叫咗杯朱古力芭菲，我只係食咗一兩啖，有幾種唔同既口感，幾過癮。總結，下次個PIZZA可以叫大啲。…查看更多

入到元朗，朋友介紹下，知道有間好難先食得到既沾麵，聽講好多時都會賣哂，反正得自己一個，就行過去睇下仲有無機會可以試到。因為門外無咩人加無招牌，完全唔知自己經過咗，打比朋友問多次先知自己已經行過龍。門外只有兩三個人，等咗5分鐘左右就可以入去，朋友話我好好運，第一次去兼無準備既情況下就可以食到。入到去店員問我食咩，但當時個腦完全一片空白，完全唔知可以點落單，同佢講左聲，我係第一次嚟，佢先介紹比我知。最後要咗原味豚骨湯底加今日Special麵底。有好幾年無食過沾麵，依稀記得個沾麵湯底應該係好濃，而呢到既湯底好似無咁濃，但我都幾鐘意個味道。個筍幾好食，無啲奇怪味，叉燒中規中矩，雖然溏心蛋個流心效果好好，但覺得蛋個調味醬唔夠入味。而個麵，我又食唔出係咩特別味，好似同正常無咩分別，偏淋同會痴住一舊舊，但整體都算係好食。十分鐘都唔洗已經食完起身走人，出到門口先見到係伯爵茶味麵底，可能無食過原味，所以真係食唔出有咩分別。有機會會想食多次，但如果要排隊加就時間，就應該唔會考慮。…查看更多

近期經過香港仔，應該會見到呢間餐廳門外經常有一大班人等位，因為唔鐘意等位既我，所以遲遲都未去食。直至有一日係午市既尾聲，門外無咩人先走去試，落單個時就已經係午市last order，之後間中都會有客人入嚟，可惜已經係休息時間，所以想食之前要留意番個營業時間，小心白行一趟。今次揀咗個雜錦天婦羅飯午市套餐，連前菜及麵豉湯。有四款前菜可以選擇，我就揀咗刺身六件，係三文魚、帶子同甜蝦，刺身大大件好鮮甜，因為餓餓地所以好快食哂，下次應該會留嚟送飯。因為即叫即做既關係，所以要等一陣先有得食。雜錦天婦羅有炸蝦、炸番薯、炸南瓜、炸冬菇同炸矮瓜，所有天婦羅都炸得非常好，粉薄表面干身而唔油膩，食材新鮮兼濕潤，保持食材本身應有既特色。每食一啖都覺得好幸福，估唔到香港仔都會有呢個水準。當時既感覺就好似日本節目孤獨的美食家入面男主角既心情一樣，好難用文字去表達。最後可惜已經last order左，如果唔係會想叫多條秋刀魚試下。…查看更多

自從朋友介紹後，時不時係尖沙咀諗唔到食咩，就會去星林居食碗酸辣米線，因為個酸辣湯底真係好出色，食極都唔厭，而我覺得小中辣普通酸既比例係最好，易入口得嚟又酸酸辣辣，令到本身唔太鐘意食米線既我，都覺得米線好食咗。食酸辣米線既其中一個好處，就係有花多眼亂既餸菜比我揀，次次都心大心細，而今次就揀左豬紅、蘿蔔、蟹籽包同豬腩肉。豬腩肉份量雖然唔多但好夠味，蘿蔔好甜無渣夠大舊，酸辣湯配豬紅味道好夾，再加罐汽水咁就一餐。雖然話酸辣湯令到米線好食咗，但如果有得轉其他粉麵類就會更加好啦。睇真啲間野好似改左名，但應該都係同一間？…查看更多

平時係茶餐廳食早餐，一定會食沙爹牛肉麵，最近因工作關係多咗係元朗出沒，只要早咗有啲時間就會去永順食個沙爹牛肉麵，食過一次就會永遠記住依種味，所以只要有機會係元朗就會再去食。入座後，基本上好快已經落好單，因為沙爹牛肉麵要啲時間，所以我多數會要多個三文治食住等，雖然今次我叫咗餐蛋治，但我會推介鮮牛蛋治烘底，只係得閒轉下口味。沙爹牛肉麵個湯底勁濃沙爹牛味，一啖湯一啖麵，好快就食哂，但我唔係幾食得出蟹王麵同出前一丁既分別，所以我係無轉蟹王麵。雖然咁既早餐，會有啲肥膩，但好食既話又有咩好怕。…查看更多

細細個既時候，我舅父成日帶我去食舊店既拱照車仔麵食，以前一個月會食幾次，仲記得會有煎釀三寶食，細個既時候覺得好好食，同好大碗。今次係咁耐以嚟第一次去到新店食，新店既環境好咗，坐得舒服咗，仲有唔洗吹住個頭既冷氣。食車仔麵，我多數會食油麵，覺得係最夾啲油膩嘢。今次既餸有豬扒、豬紅、豬大腸同蘿蔔，豬紅唔易散夠入味，豬大腸好易咬夠味，豬扒幾嫩，蘿蔔好甜。正常時候我會要辣汁，但當日喉嚨唔係幾舒服所以無落到。其實回憶就係回憶，無咩特別，車仔麵整體偏鹹，食完好頸渴。…查看更多

本身好少機會入屯門，今次有機會去屯門，見到附近有間好出名既章魚燒，當然要去試下，但估唔到買一盒章魚燒要等成45分鐘，見佢咁受歡迎等一次半次都無妨。係周圍行到腳斷先過左一陣，雖然係即叫即燒，但一個小食類既食物要等咁長時間真係有啲扣分，唔等都等左一段時間，點都頂埋去。終於都等到，可以食得，外型都幾吸引，仲有好多木魚絲。一試之後，發覺無想像中咁好食，中間只係得一粒章魚無其他野，雖然章魚燒個心軟綿綿，但外皮唔夠脆，而且沙律醬同燒汁可以再多少少，因為覺得唔係幾夠味。只可以講同日本食到既章魚燒好似，但唔係我食過最好食既章魚燒。…查看更多