私家廚房 (已結業)

間唔中都會同屋企人出去食飯，唔想次次都食個幾間，所以今次就出旺角揀咗間想環境舒服啲食小菜既地方，一家人輕輕鬆鬆食餐飯，今次全權由屋企人落單。

脆皮德國鹹豬手

OK汁煎南非大虎蝦

籠仔荷葉海龍皇蒸飯

首先就係脆皮德國鹹豬手，皮脆肉嫩大大碟，再點少少酸辣汁，味道啱啱好。接著就係OK汁煎南非大虎蝦，個汁酸酸甜甜，蝦大大隻蝦肉爽口彈牙，好開胃會自然想食多幾隻。然後係籠仔荷葉海龍皇蒸飯，飯上面有魚蝦蟹加少少蒜蓉，但個重點係個飯到，好香口入哂味，唔小心又會想食多碗。

薑蔥焗美國桶蠔

生炒骨

燒汁脆米安格斯牛粒

再黎既係薑蔥焗美國桶蠔，上菜時熱辣辣出哂煙，蠔好大隻夠哂肥美，配合薑蔥味無得輸，非常滿足。之後係生炒骨，味道唔會過份酸甜，好適合送飯。最後就係燒汁脆米安格斯牛粒，一半矮瓜一半牛肉，味道濃沃送飯一流。

結論，旺區好選擇，適合一家大細去食，好多餸式選擇，一定有野啱你食。