愛你佛洛伊德的个人专页

乾撈翅 ~ 利苑都失手？？其實，我都幾鍾意食乾撈翅，因為係心機餸，考廚師功夫。乾撈翅上枱時一碗翅加一碗湯，見過一些食客立時把魚翅放進湯內，我通常都會O嘴。乾撈翅嘅精髓就係：以乾嘅翅身食得出翅湯嘅味道，即係雌雄同體。製作過程通常係先攞少少湯畀你試吓味，你可以俾意見，濃啲定淡啲，廚師會按住你嘅口味調教好個上湯，然後將啲湯逼入魚翅裡面。咁就考師傅炒功啦，不可炒燶魚翅，亦不可以濕笠笠，但要夠火喉炒到啲魚翅吸乾唒啲上湯。對我嚟講，嗰碗湯唔係太重要，我會集中享受乾身翅嘅味道，嗒清楚啲上湯喺翅身夠唔夠味，然後才飲湯。當然，你亦可以一啖翅一啖湯，悉隨專便冇乜所謂。今晚呢碗乾撈翅係生拆蟹底，蟹肉新鮮。但係魚翅嘅翅針不夠分明，最上面嗰一層魚翅有少少，輕輕的煎米粉質感，仲有啲蝦子，所以帶點煙韌又有點香口。「點解唔係好似食開啲乾撈翅，亦都唔係好似你menu幅相嘅？」 經理就向我詳細解釋: 呢個係改良版，附近好多福建客人喜歡呢個質感，較配合飲酒，面嗰層魚翅好輕輕煎一煎。坦白講，食落去個口感同味道係唔差嘅，都幾過癮，改良版無可厚非，你知啦，北角城市花園同和富中心，直情係小福建嚟㗎啦，而北角城市花園利苑一定係其中一間最早開嘅分店，起碼超過30年，服務福建幫客人都有幾十年了。所以，我要澄清：利苑係冇失手嘅，因為利苑係唔會失手嘅！ 😉😉即刻用福建話唱返句先：愛拼才會贏！😂😂…查看更多

情綿綿，軟綿綿，意綿綿，暖綿綿，愛綿綿，糾糾纏，繞繞纏，綿綿纏，纏纏綿，癡癡纏。寫歌詞咩，哈哈！其實，我只係想勾畫出一碟炒滑蛋嘅風姿綽約，所綻放出來嘅優雅氣質和柔美體態。無論你食滑蛋蝦仁或者滑蛋叉燒或者滑蛋其他， 記住：個主角永遠係炒滑蛋，而唔係叉燒、鮮蝦或者其他。一碟靚嘅炒滑蛋，一定要夠軟，夠嫩，夠滑，夠暖，不可過油，不可過火。仲要一定要夠多，要完完全全掛滿唒隻鮮蝦，先可以展現出滑蛋嘅豐滿身段，體態撩人，貼貼服服，如何將一隻鮮蝦征服！😂😂😂咁我哋去返現場，問吓啲現場觀眾，請問呢碟滑蛋小姐夠唔夠靚女呢？ 「靚到暈，冇得頂，未見過咁靚，未試過咁正！」現場觀眾嘅反應係一面倒，睇嚟係眾望所歸嘅大熱門。咁啱見到梁師傅，我忍唔住要即讚：梁師傅好嘢，未食過咁靚嘅炒滑蛋。梁師傳笑逐顏開，帶點自信同我哋講:「 炒滑蛋係龍田師傅親自傳授我的，炒滑蛋係師傅嘅名菜之一，唔可以失禮㗎！」原來係龍田師傅高徒，唔怪得知啦！龍田師傅可謂中菜廚師界嘅傳奇人物。當年，貴為鑽石酒樓總廚，但同時間龍田師傅亦係15間酒樓嘅總廚，一人騎十五間酒樓，厲害嗎？服未？後生一輩可能都未聽過鑽石酒樓，真可惜。當時，鑽石酒樓雖未至係最高級，但其實係禾稈冚珍珠。鑽石酒樓的其中一個創辦人就係鏞記酒家老闆甘穗輝先生，所以識食嘅都知，鑽石嘅燒鵝其實都幾好食，鑽石個燒鵝爐都係有駁煙囪㗎。鏞記行一線，鑽石走二線，玩哂啦。加埋龍田師傅坐鎮，炒滑蛋、柱侯牛腩、炆班腩，直情係經典啦！我記得我好細個，真係好細個嗰陣，成日跟老豆去鑽石酒家飲茶，都係見佢叫斑腩飯，而家知點解啦，細個嗰陣時識鬼欣賞咩！去返現場，原來滑蛋小姐已經攞咗冠軍，頒埋獎，謝埋票，來個美人照鏡，全碟清哂。點解，一啲都唔留番畀我？此時，一個好靚仔嘅榮總，咬住支牙簽撩吓排牙，一副趙完鬆嘅樣子，小小囂咁講：「見到靚女梗係要快手啦，十吓十吓！」😭😭😭😭…查看更多

今朝先係尚興食個簡單Business Lunch，你又點會估到，夜晚又喺度食Business Dinner。我睇大家都係費事煩，唔想諗，近近哋，食完又再繼續傾。不過，我都要循例challenge一吓。😂😂Tell me why？「快靚正，最緊要係抵食。」尚興可以同抵食呢兩個字掛鉤，係真唔係呀？ 溏心吉品鮑28頭連鵝掌，都係賣288蚊，抵唔抵？ 切開個鮑魚，真係溏心，黐住把刀，好味入味，樓面輝哥再跟多啲鮑汁加個白飯畀我，冇得頂，極級享受。288蚊，點做呀，Tell me why?中午食咗紅燒翅，二兩翅賣288蚊，已經算抵。 樓面輝哥話夜晚試吓食紅燒大鮑翅，有四兩翅，好大碗，都係賣418蚊，抵唔抵？ 上枱時，真係好多魚翅，凸哂出個碗面，翅湯好膠質、好黏好滑，咁嘅質素，咁嘅份量，都係賣418蚊，點做呀，Tell me why?就係呢個時候，大明星梁朝偉經過我哋張枱去洗手間，我嘅眼睛梗係即刻放大瞳孔啦。尚興孫老闆可能察覺到我嘅異相，揸住杯紅酒，Fing吓Fing吓，神態自若咁行過嚟同我講，梁朝偉成日都嚟啦，跟住孫老闆帶我去睇貼滿成幅牆啲明星相，好開心咁share：呢個咪係黎明 ~ (哦！)呢個係郭富城 ~ (哦！)成日都有嚟啦 ~ (哦！)呢個係張學友 ~ (哦！)呢個係張智霖 ~ (哦！)近來都幾熟囉 ~ (哦！)呢個係關之琳 ~ (嘩！😍)經常都有過嚟 ~ (好呀！😍)同我係好朋友 ~ (我都想呀！😍)Tell me why？Why telling me？😂😂❤❤😉😉…查看更多

你又點會估到，呢間火鍋酒樓嘅午市點心會高班成咁！全部點心每朝由點心師傅製作，用新鮮料，即叫即蒸，就只係為咗個中午飯市，冇早茶，冇下午茶。呢個酒樓老闆究竟點計數？如果你幫襯中午飯市，仲要每人送一粒蝦餃，真係鮮蝦嘅蝦餃，最後仲送你一碗自家煲綠豆沙糖水。呢個酒樓老闆究竟點計數？仲要價錢唔貴，小點18.8， 中點23.8，大點28.8，特點33.8，而家出面啲酒樓冇點心師傅，用啲訂製點心然後蒸返熱畀你嗰隻，都唔止賣呢個價啦，呢個老闆究竟點計數？地點仲要喺旺區靚地點，銅鑼灣利舞臺廣場，地方又大又靚，枱同枱之間好鬼鬆動，食得好舒服，換轉香港其他酒樓，起碼攝多十張枱入去啦，背貼背嗰種，呢個老闆究竟點計數？最緊要係好食，點心師傅嘅手們屬傳統派，食山竹牛肉、叉燒包你會食到以前嘅味道，腸粉好滑好嫩，春卷又脆又多料，流沙包啲汁係會"標"出嚟， 都係嗰句，養成五六個點心師傅就係為咗呢個茶市，銅鑼灣區又做唔到兩輪，呢個老闆究竟點計數？呢個老闆一定唔係計死數囉。一睇呢啲老闆，就應該係每個月晚飯應酬都一百幾十萬，咁不如自己開番間，一年應酬請客費都等如「回本」啦，喺自己餐廳請客又有頭有面，又可以完全控制啲服務同出品，客人食得高興，飲得盡興，大把世界啦！我都學緊計呢啲生數，中午多啲去飲茶，夜晚多啲去打邊爐，學下嘢先，哈哈！😂😂💓💓👍👍…查看更多

真係長江後浪推前浪！今晚由我一個小師妹帶我哋去食中菜，呢位小師妹今年係港大法律系讀最後一年，叫佢做小師妹令我自己感覺後生哂，師兄師妹嘛，其實計年紀我真係做得佢阿爸，諗起都嚇親，有啲接受唔到，哈哈。通常帶人去食飯，都會揀啲裝修靚靚哋，網上好多人推介嘅餐廳，免出事嘛。但我呢個小師妹藝高人膽大，揀咗一間係西營盤嘅地道小店，裝修簡陋，openrice得幾張相，幾個食評彈多個讚，最重要係佢自己都冇嚟過，冇食過，點解咁有信心？真係估佢唔到。呢間小店叫「兄弟記」，位於西營盤皇后大道西210號，即係老牌Sammy's Kitchen過兩個舖位。食過之後，一致裁定：兄弟記好掂，勁好食，直頭係驚喜發現，以後一定多啲嚟幫襯。兄弟記呢三樣嘢最出色： 新鮮、調味、火候。 我哋試過椒鹽鮮魷，薑蔥田雞，火腩大鱔， 呢幾樣嘢個料新唔新鮮一食就知，冇得呃。就算叫個炸雲吞，睇住佢即刻現場包好然後拎入廚房炸。 大廚嘅味覺仲係好sharp，所以啲調味做得好靚。最重要係個火候，呢度鑊氣一定夠，但係無過火，廚師拿捏個火候非常精準，餸菜係佢最佳嘅狀態時候就收火上碟，點會唔熱辣辣，點會唔好食。其實我一踏入兄弟記，就有啲似曾相識嘅感覺， 見到老闆娘終於忍唔住問佢：「我細個成日食東邊街街口嗰間“鏞記”，有間“兄弟記”好似喺附近，我都有食吓，你地係唔係同一間兄弟記？」 老闆娘聽見我識得講鏞記，就知我不是省油的燈，哈哈！呢間已消失的鏞記唔同中環食燒鵝嗰間，不過名字就一樣。諗番起以前鏞記啲小炒真係一流，印象中炒桂花翅靚到不得了，以前就算啲小店廚師功力都有番咁上下。老闆娘開始對我呢位「老」顧客有啲興趣：「係呀，我哋兄弟記開咗六十幾年啦，以前個鋪位喺現在“西埔”嗰度，由我老爺做起，而家我老公接手，又幾十年啦」。原來真係老字號，幾十年嘅功力，唔怪得出品咁好啦！「 我哋全部都用新鮮材料，田雞都係即叫即劏，一食就知，下次你試吓邊魚，我哋會幫你起哂骨，好好食㗎」，邊魚好似早排鼎爺喺飲食節目都有介紹過，老闆娘咁講下次又要再嚟啦。望住呢間兄弟記有啲感觸，又係一間香港小店嘅故事，老公喺廚房，老婆喺樓面，不停咁做，努力地做，咁就幾十年，但係歲月沒有令佢地變得求奇，對出品仍然有堅持有要求，我心生敬意。佢哋唔識搞branding，唔識消費自己嘅老字號，唔識整個懶特別嘅招牌，寫住雞乸咁大隻字「自1950年」，佢哋只係用啲紅色膠片咗三隻字兄弟記貼喺門口就算。佢哋亦都唔識消費下啲舊香港情懷，喺舖頭裏面貼滿哂啲黑白相，佢地實有啲老舖，老顧客相一大堆，唔夠就加啲西營盤、南北行，三角碼頭等舊照實夠啦。 佢哋更加唔識搞社交媒體，邊有facebook邊有網站，openrice都冇人寫佢哋。米芝蓮啲Inspector都唔方有機會行過佢門口，可惜。咁點解我呢個小師妹咁慧眼識英雄，佢話係：「直覺」。係咪咁勁呀？經過一輪抽絲剝繭式嘅討論，原來係咁：睇下個名：叫得兄弟記呢啲名，多數都係傳統派，實力有番咁上下，如果唔係好快就消失，食唔住個名。(Precedent 睇案例)睇下個樣：舖頭裏面的顧客大部分都係男人，仲係麻甩佬，咁啲嘢食多數都有啲保證，如果裏面大部分都係女人，咁就要小心衡量。(Circumstantial Evidence 環境證據)Openrice：不可以盡信，因為識食嘢嗰啲「佬」多數都唔會寫個食評po上網。(Hearsay Rule 聞說證供不可信)對於呢個小師妹嘅直覺加觀察力加分析能力，我絕對相信佢會係飲食界同法律界嘅明日之星，難怪佢未畢業，就已經被一間著名律師行羅致做見習律師，一畢業就可以返工。為咗悉心栽培佢，我哋決定多啲同佢食飯，為咗保護佢嘅身份，我決定唔tag佢，所以你哋估佢唔到。呢個小師妹又可能like我個post同畀comment，但你哋都係估佢唔到，睇佢唔到，哈哈！😂😂💓💓😂😂…查看更多

天香樓，果然名不虛傳。龍井蝦仁：用雨前龍井同埋河蝦，冇錯，係用好靚嘅河蝦，香港應該係只此一家。你會食到蝦味，蝦肉嘅自然質感，再配合龍井茶葉嘅清香，好正宗。生爆鱔背：用新鮮黃鱔，只係用背脊肉所以冇哂骨，爆到靚脆，絕不是乾爭爭的脆，而是帶有煙靭鬆軟的脆，調味一流，這種高水平相信香港只此一家。東坡肉： 天香樓嘅東坡肉做到有肥油但係唔肥膩，妙！ 伴著東坡肉上枱嘅湯汁直情可以飲埋佢，唔肥唔滯。「東坡肉已經出咗油，所以放心食，放心飲啦」，樓面海哥笑笑口咁溫馨提示，可能驚我哋會怕肥。其實我一啲都唔驚，食東坡肉一定要有肥膏，如果只係食瘦肉，不如唔好食，哈哈！蝦子竹筍： 「竹筍現在當造，整碟蝦子竹筍啦，包靚！」 海哥又再溫馨提示。竹筍的確好清好爽，冇酸味，加埋蝦子嘅香，簡簡單單，咁又一味靚餸。蟹皇翅： 原來係用生拆大閘蟹嘅蟹膏，唔怪得知咁好味，更何況天香樓嘅大閘蟹一向都特別高質素，蟹香真係贏人哋幾條街。魚翅嘅份量亦都唔少，裝到個碗滿滿的，我就問海哥有冇三兩翅，海哥笑笑口咁答：「冇三兩，得二兩九咋」，係咪玩我呀海哥，哈哈！呢碗蟹皇翅絕對係頂班嘅質素，不可不吃。酒釀丸子：令人驚喜嘅改良版。一向都覺得酒釀丸子作為甜品，酒味略嫌有點濃，天香樓嘅做法就加咗香蕉粒，橘子，士多啤梨，令酒味淡咗，甜味多咗，同時有啲消滯嘅感覺，真係唔錯。有佳餚，怎可以沒有美酒。天香樓秘製嘅陳年花雕，聞名中外，主要用28年嘅舊酒兌5年以上新酒，獨門秘方我哋學唔到。閒閒地先飲一斤，飲過就知，真係好醇好香好滑，必定上癮，外間找不到，香港只此一家，世界只此一家。以前聽前輩講：在中國要食最靚嘅杭州菜，到香港嘅天香樓，不是去杭州。蔡瀾亦都話：全香港最好嘅餐廳一定係天香樓。我明白了！😉😉💓💓👍👍…查看更多

今日中午喺鏞記約咗老友飲新年茶，兩個麻甩佬，傾吓家事國事天下事。見人少少，玩豪少少😉。82! 攞82嚟!1982靚年份，一入口，冇得呃。一個字：醇。再多一個字：厚。送多一個字：香。你估我係講緊Lafite? Latour? Petrus? Mouton? Haut-Brion? 定係……係通通都唔係！ 我係講緊1982年嘅新會陳皮，哈哈😂😂。用35年陳皮炒個河粉，夠哂嘴刁，喺鏞記唔食師傅啲炒工就笨啦！一味陳皮炒河粉，廚房佬見到一定覺得玩嘢，乾炒牛河都話有啲餸好似牛肉，銀芽一齊埋鑊收尾，仲有啲深色醬油遮掩吓。陳皮炒河粉差不多等於淨炒河粉，無遮無掩，手炒慢啲，鑊拋少啲，河粉都好易黐底變黑，若落太多油炒又會扣分，唔夠乾身。又點會難得到鏞記，你睇炒出嚟幾咁靚，河粉白淨，又夠乾身，陳皮香但唔攻鼻，82年嘛。新會曬陳皮已超過700年歷史，分分鐘歷史悠久過啲法國酒莊，而家仲有條陳皮村成為旅遊景點。陳皮不斷升值，歌有得唱啦：一兩陳皮一兩金，百年陳皮勝黃金，遲啲真係唔知82紅酒貴定82陳皮貴。😂❤😉❤😂…查看更多

俗語話：人不可以貌相，海水不可以斗量。你睇吓碟餸，簡單純樸，顏色分明，氣質優雅， 你又點會估到：係臭㗎，仲係好臭！！我諗起電影《國產凌凌漆》裡面，周星馳與餐廳夥計對答的一幕：凌凌漆：夥計夥計：係凌凌漆：你哋呢度啲豆腐又話最出名嘅？夥計：係啊凌凌漆：臭架喎夥計：出名臭吖嘛！凌凌漆：可唔可以攞啲出名好食嘅過我呢？夥計：都係豆腐囉凌凌漆：唔係啩？夥計：係呀，你當佢臭豆腐咁食，觀感就會fit哂。凌凌漆：咁畀多個炸嘅我吖 (大家對笑)…… 阿琴，香港嘅商場真係包羅萬有啊可？Cut ! 唔該講返碟餸。OK, 喺我面前呢碟叫「紹興蒸雙臭」，屬浙江紹興名菜。何謂雙臭？即臭豆腐同臭莧菜梗(stem)。真係臭到發癲，比炸臭豆腐更臭，臭到嘔，臭到冤崩爛臭，哈哈！點解咁臭？豆腐同莧菜梗首先經臭鹵水發酵，吸收唒臭鹵水後，再把臭莧菜放喺臭豆腐上面一齊蒸，那種酸縮，發霉，惡臭氣味透過蒸氣散發出來，問你點頂。加上臭莧菜和臭豆腐兩者在蒸嘅過程中產生化學作用，臭上加臭。雖然係臭，但係食得好開心，好好玩。每個人嘅反應都唔同，有啲搖唒頭，有啲用紙巾全程掩住個鼻，有啲笑到黐哂線，有啲講哂粗口，有啲搬碟餸去第二邊，有啲話冇問題不停食，現場的互動令到成餐飯都開心哂。不過，真係好臭，食到尾都仲感受到嗰陣臭味。我問坐我隔嚟嘅肥仔William感覺如何，佢帶著堅定嘅眼神咁樣答我:「臭 N.G.H. 吖！！」🙊🙊😲😲…查看更多

晏晝去金鐘太古廣場行吓街，唔覺意見到呢間Dim Sum Library。 中式點心？但係啲裝修成間鬼佬嘢咁，又有Bar Table，唔知係咪嗰啲鬼佬味中餐？唔緊要，入去試下，整番一盅兩件當歎吓下午茶。試咗幾個點心，一蒸一炸一焗，又估你唔到喎，都幾好食，幾認真。蛋撻啲蛋味好香，酥皮如果再做多幾層就好啦，不過佢做迷你蛋撻又唔可以要求得咁盡。 春卷炸得好靚，好乾身，炸油唔舊所以顏色好靚，海膽、蟹肉都新鮮，味道很好。燒賣有心思，兩粒係甘筍汁揉粉，兩粒喺波菜汁，肉質鮮味。PP又多一個好地方Hea吓飲杯茶食個包！😉💓🍴💓😁…查看更多

晏晝食簡單啲， 走咗去灣仔老上海(前身老正興)， 諗住食番條小黃魚，加個嫩雞煨麵。「唔該，要兩條小黃魚，不過我唔想煎，怕熱氣，蒸可以嗎？」我心諗，嗰夥記實以為我玩嘢，你估新鮮黄花咩，蒸魚！ 小黃魚嗰賣價，你都估到大概咩狀態送到嚟酒樓㗎啦。點知，嗰夥記半點猶疑都冇，氣定神壇咁答:「 冇問題呀，雪菜蒸！」嫩雞煨麵先到，一望個賣相都知會好食。煨麵即係慢煮，湯底由淡煮到濃，麵要入哂味，要夠淋，仲要帶點微碎，重點係微碎不可全碎，麵連埋個湯底一啖過，可嚼可吞，特別適合我這些食嘢心急鬼，所以我十分喜愛吃煨麵。兩條小黃魚跟住到，望個樣精神奕奕，肉質仍然鮮甜，雪菜跟調味一啲都唔鹹，調起哂嗰小黃魚味，點解嘅？我真係估你唔到！老上海，好食。💃🍽😁💓…查看更多

感謝恩師的一餐，不容有失，故拜託駿景軒梁師傅設計菜單，不負眾望，出品一級水準，大家都食到lam lam脷，正！其實，我不嬲都覺得駿景軒應該不只米芝蓮一星，咁多年都係一星簡直是underrated。用料靚又新鮮，廚藝又得，譬如食水煮魚，啲配料全部四川送來，完全食到成都的味道。天氣一轉冷，就會諗起梁師傅的煲仔飯。臘味固然靚，但最靚都係嗰煲飯。我可以大膽咁講，真正識得煲飯而又煲得靚嘅大廚，寥寥可數。梁師傅嘅心得係人哋用100度高溫去煲，佢會去到120至130度，煲到好似舊式火車頭咁噴啲煙出來，然後最考功夫就係收尾嗰吓「飯要焗熟，不要煲熟」。好！不過唔明，對於我哋呢啲用電飯煲一代又點會明。梁師傅的煲仔飯，做到粒粒飯都熟透熱透，淋得嚟帶爽身，每粒飯的形狀都好清脆清晰，我足足食了3碗飯，忍唔到口，咁靚嘅飯真係可遇不可求。食嘢唔係只講求食得名貴、食得靚或者食得平，而係當某件食材喺佢最巔峰嘅狀態出場，而佢仲喺最巔峰狀態嘅時候放入咗你個口，恭喜，你有口福了！梁師傅的菜，個平衡永遠做得好好，就算啲配料好搶味，仍然不會蓋過主材料個鮮味。就好似胡椒蝦，你睇啲胡椒粒多到好似唔使錢咁，啲胡椒味焗哂入啲蝦度，但係仍然食到鮮蝦既清爽甜味，服未！再講就真係寫5000字都唔夠，自己睇相啦！送走2016，祝大家2017身心健康，舒適安泰！💃👊💓💓…查看更多

好朋友林總從廣州來港小休幾日，明天要回去了，今晚相約幾位好友一齊食啲懷舊菜，席間出現一支靚茅台(省級政協委員版)，OMG!食吓焗魚腸，煎魚腸，豉油王鵝腸，粉絲炒瑤柱，再飲吓靚茅台，咁嘅pairing，點輸呀？再燒一隻乳豬送下酒，冇得頂！驚喜小發現 - 灣仔金兜記，絕對食得過。林總，明天一路順風！😉😉🐖🍴🍻🍻💓💓…查看更多

投完票，食串燒！走出皇仁書院票站，過對面馬路即見南亭串燒大坑新店，入去試吓囉。食南亭，睇選情！從出品來看，形勢大好，全部串燒都非常出色，無論是牛脷，鮮蝦，廣島蠔，牛肉，雞翼等等都用料好，調味好， 燒得好，冇得頂。飲清酒，賀葉劉！好似最押韻都係佢個名。 鹿死誰手，緊張！🙈🙈…查看更多

入到富臨飯店，一眼就望到呢對字: 「阿一鮑魚 為國爭光」厲害！究竟應該點形容呢位廚神呢？一個字: 掂兩個字: 經典三個字: 楊貫一四個字: 富臨飯店五個字: 銅紫荊星章六個字: 世界廚藝精英七個字: 美國五星鑽石獎八個字: 世界御廚最佳廚師九個字: 世界御廚駐香港大使 十個字: 代法國總統頒贈銀碗獎仲有？11個字: 法國農業部最高榮譽勳章12個字: 阿一鮑魚始創人董事總經理仲有?？13個字: 再唔開飯我真係會肚餓到打人!! (請原諒我心急) 😁😁尋晚呢餐飯， 都可以話係我咁大個仔食廣東菜以來，最好食嘅一餐，絕對係我嘅經典飯局。用心去做，精心製作，上佳材料，超凡廚藝，廣東菜頂班之作，一哥好嘢。最開心係一哥坐埋喺度一齊食，一邊講解菜式，一邊暢談往事，特別是他如何將鮑魚地位提升，從切片碟頭菜升格為原隻食矜貴菜。還有他做菜給達官貴人，國家元首，商界名流等等的軼事趣聞。餸菜出色，故事動人，仲想點？好，首先出場係紅燒雞湯翅，個翅身夠粗夠肥， 但又好滑好嫩，個湯濃得嚟入口清甜，質地滑不留口。招牌菜鵝掌鮑魚又點會失手，日本鮑一定靚，用刀切落去時把刀好似被腍實，要慢慢拖番出來，夠哂溏心。「切鮑魚，你地知唔知點切先最好食，直切？ 打橫切？定喺斜切？」一哥笑笑口問。跟住嚟條兩斤重老鼠斑，蒸到啱啱好，肉質要用鮮到甜嚟形容。炸雞個皮好似紙咁薄，但又好鬆脆，雞肉鮮甜，好有雞味。然後， 玩下食乳鴿。點玩？ 先吃鴿肉伴火腿，屬於懷舊菜，舊時去飲宴的熱葷菜，通常都有呢一味，乳鴿起肉炒好鮮嫩，但係啲火腿點解有啲……「 係唔係覺得啲火腿甜甜地？因為我先將火腿浸蜜糖過夜，然後先攞嚟做餸。」一哥解釋畀我地聽。跟住呢一味乳鴿蛋配鳳尾蝦夠哂特別，乳鴿蛋似鵪鶉蛋大細，蛋黃已熟，但蛋白仲鬆鬆地，有啲似溫泉蛋嗰種質地，好神奇。 乳鴿蛋好食，鳳尾蝦又好味，加埋個蟹粉汁，無敵！最後個荷葉飯，新鮮料多夠份量，瑤柱絲，冬菇粒，鮮蝦，真係乜嘢料都靚，啲飯做到一粒粒夠乾身，問你服未？一哥就係一個，我服哂！係喎， 唔記得講鮑魚點切先好味？呢樣嘢好難講，你哋最好請我去富臨食飯，然後我會示範俾你睇，點樣落刀切先係最好味！😂😂…查看更多

今日下午喺鏞記食糕點，好好食，賣相又靚，但係就食唔到咁多款，個心諗，如果佢每款淨係嚟一件，好似High Tea咁，咪可以食勻哂佢囉。鏞記，其實你絕對有能力做High Tea，諗諗佢!水晶鵝肝凍，懷舊扎蹄片，酥皮蛋撻仔，紫背天葵山楂糕，秘製龜苓膏，水雲玄釆糕，芒果布甸，再加幾款鹹點心，冇得輸！唔好漏咗皮蛋酸薑呀😉😉…查看更多