JuRuRu的个人专页

京都小山園只得一間茶房「元庵」在西洞院通御池下，店內只得13個坐位，西洞院店位置非常吊腳附近又冇乜名勝及舖頭行，所以沒有太多遊客及沒有排隊人龍，真係特別去朝聖先會去，抹茶控的我去過2次為了食它最出名的抹茶流心蛋糕卷。某晚放工7:30到達香港店要排隊，等位時睇menu見入面除了抹茶流心蛋糕卷及雪糕之外其他甜品京都店都沒有，有點奇怪，為什麼香港店有的？排了一小時，終於有位， 第一時間order抹茶流心蛋糕卷，好彩仲有最後一件。Order蛋糕卷可以跟set選menu内的抹茶或培茶，連最貴的雲鶴濃茶都可以揀，當然揀個貴。抹茶流心蛋糕卷上枱時非常失望，個流心去咗邊度？ 這個蛋糕卷的靈魂是個濃郁抹茶味的流心帶出整個蛋糕卷的抹茶味，真的是小山園的出品嗎？:(雲鶴濃茶上枱時真係嚇咗一跳，點解濃茶濃到杰撻撻一攤綠色醬咁樣，綠色醬得好少僅僅覆蓋杯底而且杰到流不到杯邊飲， 問店員如何享用這杯濃茶，店員話要用隻鐵匙羹筆來飲。吓！ 用鐵匙羹飲抹茶真係聞所未聞！家中一向飲開小山園「又玄」抹茶粉沖的薄茶，茶味甘香帶草青味原全冇苦澀味，對於賣$369 40g更高級雲鶴 抹茶有期望，點知杯茶非常苦澀，好不容易才能飲完，不知是否真的用雲鶴沖，如果是的話， 呢杯抹茶絕對係糟蹋咗高級的雲鶴抹茶。抹茶流心蛋糕卷同濃茶完全同京都店面目全非，真的是小山園分店？ 雖然店方聲稱是官方授權的海外加盟店，但我的味蕾告訴我已經受騙了！…查看更多

在商業大廈內的車氏粵菜軒,樓面不大所以每張枱之間基本上係冇距離,非常擠擁。叫咗數款大路點心, 蝦餃、 帶子水晶球、鮑魚棉花雞, 竹笙上素餃、蝦腸、鮑魚灌湯餃。 點心上菜速度頗快, 餃子皮薄，蝦腸的蝦亦新鮮。但鮑魚灌湯餃除了有隻鮑魚仔之外，基本上沒有其他料，不太值。而食上素餃時, 竟然咬到一些白色硬物， 投訴後女侍應馬上取走及取消上素餃。 之後男侍應捧住幾碟魚腐周圍sell, 我哋冇問價錢就要咗碟, 魚腐有4大粒, 中間有隻蝦仔，豆腐味多過魚味,味道都可以。但埋單時發現碟魚腐收$78, 明明另外有張點心紙寫魚腐係$58, 經理話兩者係唔同, 我哋食個碟多隻蝦, 相差$20 只是小數當買個小教訓, 唯有下次去食飯小心啲唔好叫啲不知價錢的食物。當然亦唔打算再來車氏了。…查看更多

Baby Mon Cher 在Sogo B2 已經有間舖, 最近Sogo 在裝修完後的B1再開多間cafe, 買的甜品跟B2一樣, 多了飲品及有十多個坐位可以坐底食。Cafe 內布置成法式彷古水晶吊燈及馬其龍裝飾品, 帶出一點點法國風情。今次叫了新出的MyMelody 的紅莓白朱古力慕絲及綠茶忌廉沙冰。MyMelody 頭上的黃色蝴蝶是芒果味朱古力, 白色面亦係白朱古力, 耳朵部份係紅莓慕絲, 慕絲幼滑帶有紅莓的酸味, 食下去發現內裏原來包住朱古力慕絲, 增加口感味覺層次。MyMelody 頭下就有一片堂島卷, 用一圈海綿蛋糕包著中央全是忌廉是堂島首創, 忌廉係北海道牛奶做, 做得非常輕盈, 一點都不膩。沙冰綠茶味濃帶少少苦澀味, 冰冰凍凍真的很消暑啊！…查看更多

MyMelody 是我最喜歡的卡通人物，得知在朗豪坊開期間限定餐廳真的萬分期待啊！正式開業後2天6時去到竟然己經派完籌 真的估不出My Melody的魅力是如此厲害啊! 連跟門口公仔影相也要排長龍。隔天下午3時去到終於攞到籌, 但要等200張枱!!    因人多關係, 每枱客亦只限90分鐘用餐。反正也是打算吃晚飯就周圍行, 打發時間。到7時半終於可以入坐喇, My Melody 圖案及公仔充滿於店內, 某些枱面亦有My Melody圖案, 真的想把它搬回家。店內亦有大量MyMelody公仔給客人攬住影相拍照。食物方面晚市全部都是套餐, 有前菜、主食、飲品及甜品, 價錢由$158起, 特色甜品須另加錢。二人分別叫了A-極上豪華日式盛盒及E-溫泉玉子牛肉山賊燒石燒飯。主食會插上MyMelody或Kuromi 圓形牌仔,而A餐壽司蛋亦印有MyMelody頭形圖案, 而E餐內亦發現切成花形及音符的配菜, 除了這些之外就是一個普通的壽司餐及石燒飯, 味道一般。甜品加錢叫了意式情濃班戟配士多啤梨雪糕和黑白金磚多士。 前者班戟上印有MyMelody 頭形及用朱古力粉印出大M頭, 這個甜品是最多My Melody圖案, 而另一個甜品就有用朱古力粉印出大Kuromi頭, 味道尚可。臨走時打算把餐紙及食物牌拿回家做紀念, 待應見到即刻主動提出給我們一些新的乾淨的拿回家, 服務真的很細心體貼, 抵贊! …查看更多

星期五約友人在此午膳，打開餐牌看見價錢俾佢嚇咗一跳 估唔到响世貿中心日本餐廳竟然會有最平$45嘅套餐，抵食過啲茶餐廳。我同友人分別叫咗$98雜錦刺身定食及$98雜綿壽司定食。 刺身有5款，有甜蝦、三種白身魚及三文魚，全部都係厚切，刺身鮮甜。 :) 壽司定食有八件壽司加三件小卷，雖然不是高級食材，但每款都新鮮，白身魚亦都是旬的魚，不是一般大路貨。這個定食仲有跟一碗小烏冬，真的食的很飽。 :)見餐牌其他小食亦很經濟，晚飯又多一個好選擇。…查看更多

天寒地凍最好食個火鍋取暖， 但又唔想打邊爐咁豐富，於是去咗蟹家食蟹鍋。午市蟹鍋定食$160包沙律，二片三文魚刺身，味噌湯，白飯及餐飲。主角蟹鍋有鱈場蟹腳，蟹鉗，小蟹蓋及配菜。蟹腳粗大，原條蟹腳肉非常容易取出來，蟹肉厚厚的極鮮甜。蟹蓋下原來藏了很多蟹黃，用匙羹撥進咀裏，那份芳香濃郁叫人回味。有些蟹黃溶化入湯中，湯中充滿蟹的鮮味，令我不禁整個鍋的湯都喝掉。　    食完這個鍋後成個人都暖笠笠。 …查看更多

八日門面非常低調，門口只有一個小小的招牌用藝術字寫8日，用全黑的木做店的外圍，完全沒有窗，大門深鎖的模樣，非常之神秘，如果不是從媒體得知這間是日本餐廳及伊藤師傅的新店，真不會走入去。餐廳面積不大，有四張四人枱，高嘅bar枱及壽司counter , 大約可坐三十多人左右，因店面積細，洗手間設於後門譚臣道隔離舖中。是日午市二人坐壽司counter 分別叫了刺身定食$206 及北海丼定食 $248。 午市定食全包沙律，蒸蛋，味噌湯及甜品。友人叫的刺身定食有五款刺身各兩件， 今次有甜蝦，油甘魚，白身魚，帶子，吞拿魚。刺身的確是非常新鮮但分量較少。北海丼定食有海膽，帶子，三文魚籽及蟹柳。海膽非常味濃鮮甜，口感creamy，完全冇苦澀味，食得出係高級貨。 帶子爽口清甜亦都不是一般雪藏貨，三文魚籽咬下每粒魚油在口內四濺油脂香郁， 醬油醃製但不會過咸 。在這些新鮮食材內最夾夾不入係嗰幾條仿蟹柳，我寧願唔好放在這個丼入面。　伊藤師傅選擇食材非常講究有原則，刺身非常新鮮好味，但在灣仔午市來說真的太貴了，真的是一分錢一分貨。　…查看更多

元旦日下午來到雲海當然要試吓日本嘅傳統新年食品一御節料理啦!首先待應端來了一個傳統嘅漆製"屠蘇器"盛載盃台及注入了日本酒的酒壺，選擇了酒杯然後放上去盃台上，待應會分三次倒酒入個酒杯內，傳統上飲了屠蘇酒一家人全年無病無痛。之後端上一個黑色精美漆製木盒，內裏放了賞心悦目御節料理，每一道菜有它的含義全部都係好意頭的食材。 黑豆- 有除邪氣之用，代表長壽健康無災無病，用醋醃製染成白色及紅色的甘露子通常會跟黑豆放在一起，亦都代表長壽 希靈魚子-象徵多子多孫 紅白二色魚蛋-象徵日出的形貌，紅色除魔白色清净的意思 沙丁魚 - 在古代會把沙丁魚放入田中做肥料，有五穀豐收之意，萬事順利 海胆龍蝦 - 龍蝦足鬚長腰身彎曲，有長壽之意 紅白蘿蔔絲 - 似綁在賀禮上花繩，祝賀願意成真木盒内每樣食材烹調得宜，非常美味。 湯跟平常的差不多，只是多了兩件年糕, 年糕表面雖然只燒焦少少，但整碗湯也有一點燒焦的味道。 刺身有蝦，白身魚和吞拿魚，極為新鮮，但材料跟menu 所寫的不一樣 燒物係薄燒牛肉卷跟沙律 最後係紅豆米飯，分量大概有3件壽司，代表著幸福喜氣和圓滿之意。食完這個新年餐真的很滿足，唯一美中不足的是沒有甜品。希望2014年身體健康，萬事順利。…查看更多

大除夕下午路經Tony Wong 見餅櫃有幾款聖誕做型的新口味蛋糕，有選擇困難的我最終決定買JADE 和 Raspberry & Chocolate Yule Log返屋企食, 選這兩款因價錢最平，四十多元一件，而最貴的snowman 要$88一件，真的太貴了!回家後先食JADE 做下午茶， 外型係綠色啫哩半球體，頂上有聖誕樹型狀的黑朱古力傍邊有四粒crunchy， 入面係開心果做嘅mousse， 包圍著中間的士多啤利啫哩及士多啤利custard， 最底層有杏仁海綿蛋糕。 開心果mousse 幼滑充滿清香嘅開心果味，士多啤利酸酸咪咪，而兩款士多啤利不同texture帶出不同層次口感，再加上開心果及杏仁味道係一個清新的配搭。晚飯後食Raspberry & Chocolate Yule Log做甜品， 聖誕樹幹嘅做型，前後放了一片方型黑朱古力，蛋糕面灑上了紅桑子powder， 入面係Manjari 朱古力mousse ， 中間係紅桑子compote, 底層係朱古力味海綿蛋糕及榛子crunchy。 這個蛋糕充滿濃郁朱古力，紅桑子帶少少酸味增加少少層次，但始終味覺上感覺較單一平淡，口感的驚喜不及JADE。…查看更多

Tosca 週末午市set lunch, 可選$398 3個dishes或$448 4個dishes。麵包有四五款，鬆軟香脆，細細個易入口，帶微暖，用蕃茄干做嘅牛油軟滑。 最喜歡用墨魚汁造的這款，面層有焗芝士，好香囗，encore 咗—次。　 頭盤分別叫咗芝士茄子及炸鯷魚仔，茄子面層有片烤焗過嘅芝士用蕃茄及菜做伴碟，再加上用黑醋調味，酸酸咪咪中和芝士嘅膩，好味! 而炸鯷魚仔跟紅洋蔥及薯仔沙律，鯷魚仔炸得鬆脆，配菜新鮮可口。主菜叫咗鱈魚及雞胸，魚係slow cook 非常滑，冇加調味味道清淡沒有什麽味道，配牛油果醬食，亦是淡淡的。 雞胸同魚有非常強烈的對比，雞胸肉鞋菇味道咸，—黒—白的對比。甜品要咗tiramisu 和apple cake， Tiramisu 用杯盛載，忌廉芝士較多， 海綿蛋糕較少，但咖啡味濃郁。Apple cake 外層有二片青蘋果圍邊，面層有蘋果味啫喱同下層的海綿蛋糕隔開做成多層，味道非常有層次，酸中帶甜。最特別係Petite four 用棉花糖墊底，好像用雲盛載著，非常配合窗外的風景。…查看更多

試業期間手忙腳亂， 我要紅蘋果但佢俾錯咗個青蘋果我， 返到屋企先發現，好彩兩款都只係表面啲jam 味道不同，入面是一樣的。 其實對芝士餅期望唔高，我個人不太喜歡食嗰啲好rich 好膩好硬個隻，但呢個餅做得好有層次，入面有軟芝士之外仲有海綿蛋糕，食到蘋果中間居然有啲蘋果肉，好驚喜! 而Passionfruit chocolate dome, 外面用熱情果jam帶少少酸的味道，入面係海綿蛋糕，最中間先有一塊朱古力mousse, 蛋糕口感軟綿綿， 不太甜，好味! 七彩繽紛嘅Macaron有十一種口味，每個都有個可愛貓樣　買咗兩個分別係綠茶味及杏仁味，macaron 外層酥脆內層煙韌，綠茶味個款綠茶味不濃，但兩款都有濃郁的杏仁味。 …查看更多

平安夜午市已經好難訂枱食飯，難得怡東軒有位兼可以用匯豐生日優惠有一磅蛋糕送。 坐下叫了茶後，侍應即奉上五小碟，有三種調味料兩款小食，茶芥每位$20 怡東鮮蝦餃 $45 - 蝦大粒夠爽 蟹黃帶子燒賣 $45 -  原粒帶子鮮味猪肉沒有太多肥肉 蟹肉菠菜餃 $48 - 菠菜好嫩但冇乜蟹肉 瑤柱蝦乾蒸蘿蔔糕 $45 -  蘿蔔切條好有口感蝦乾瑤柱好入味 特色三味腸粉 $62 - 有三條分別係蝦，牛及叉燒。 腸粉皮薄滑，三款口味啱哂想食多種口味的我 竹笙花膠灌湯餃 $98 - 好足料除咗竹笙花膠之外仲有帶子蝦餃，湯底好清香 用咗信用咭生日優惠有一磅Tiramisu蛋糕贈送， 侍應奉上蛋糕時會同我講生日快樂，雖然當日不是正日 　侍應亦好細心幫我們影相，影到滿意為止 即場食咗半個蛋糕，打包另外半個返屋企食。 匯豐白金卡有8折優惠，今餐二人食咗$350左右仲有蛋糕送， 這裏服務殷勤又細心， 環境舒適， 點心好食， 非常滿意的一餐。…查看更多

星期三訂枱星期日一時去這間餐廳食晏，十二時半左右已到達，滿懷喜悅去吃一餐美食，但估唔到帶位給我們這張咁細咁矮嘅枱，連放兩隻碟也恐怕放不下，仲要係攝响梳化同個櫃的罅之中，有冇搞錯!   如果成間餐廳也是用這個尺寸的枱，我也得接受，但其他食客坐在舒適大枱及梳化，難道是因為我訂枱時說明用openrice coupon所以獲此待遇!?  問待應可否轉去正常嘅枱，佢話冇，之後再問個經理佢話有客人no show 先幫我轉枱。如果佢轉唔到枱俾我，我會選擇離開去食第二間。 食物方面有Amuse Bouche二選一， 頭盤buffet，主菜五選一，甜品buffet，咖啡或茶。　原價$298一位，用openrice 週末早午餐coupon，兩位$398。頭盤有麵包、湯、芝士、刺身、沙律、點心、選擇豐富，點心嘅蝦餃唔知係咪叮熱，啲皮硬崛崛，而白身魚嘅刺身亦唔新鮮食落有種好塑膠嘅口感，個湯好咸，係啲菜算新鮮， 醬汁種類亦多。待應收碟很快，快到我跟本未食完就問都唔問就收咗! 其中包括Amuse的蟹腳也被突然沒收! 食完頭盤後，等咗主菜好耐都唔來，催咗幾次等咗差唔多成個鐘先至來 ，好彩食頭盤都已經好飽，唔使餓住等。 我叫嘅主菜係Smoked Salmon Croque Madame, 係三文治入面有一片菜及一片薄煙三文魚，三文治上面有一層芝士，芝士上再有一隻煎蛋。麵包太厚身而入面啲料太單薄，完全只有食麵包嘅口感， 基本上主菜入面所有食材除咗隻蛋都可以在頭盤bar入面自己挾，建議唔好揀呢個主菜。 甜品有十數款可揀又有雪糕和生果，最好食嘅係朱古力餅仔， 朱古力味香濃，而兩款蛋卷味道一般，最差係聖誕樹cupcake, 做得好實好硬好乾。在這餐廳食飯不太愉快服務差食物又一般，都唔會再來。 :(…查看更多

今年公司做冬去咗文鼎酒家，一行十二人叫咗一個四人餐再加一個六人餐，散叫咗文鼎十八斬及另加點心。文鼎十八斬係凍蟹刺身以多款酒來醃製再用了18種材料的特製醬汁調味，日式長腳蟹刺身食得多，中式就真係第一次，隻蟹斬咗十幾件，蟹刺身肉不多，但膏就滿溢，特製醬汁酸酸辣辣，好特別的一道菜。 :)寧波菜味道偏濃帶甜，我最喜歡紅燒肉煮得淋不太肥膩，蘿蔔亦好入味。:)雖然叫咗十人分量嘅餐，但店方好主動給我們十二碗湯丸糖水，真抵贊! …查看更多

打電話去訂枱星期六食午飯時經理話要坐bar枱問我哋有冇問題，好似好滿座咁，點知去到時見到好多吉枱，好心訂枱嗰個就唔好話要人坐bar枱咁趕客啦！午市Set lunch 有5款主菜選擇，價錢由$198-$368頭盤包3款，有洋蔥湯，椰菜花切粒扮做成意大利飯和煎三文魚 :)主菜叫咗用枝竹羊腩煲做concept 嘅羊扒，腐乳嘅泡沫，薑汁南瓜配料，真有少少羊腩煲的風味。 :)另外一個主菜叫咗意大利紅蝦跟蝦子油意粉，紅蝦煎成半生熟，外面熟而入面生，口感一流，最喜愛帶微辣的蝦子油意粉，充滿蝦子的鮮味，店方仲將一小瓶的蝦子油放在桌上，讓人客自己可添加。 :):)甜品係紫糯米糍包著雲呢拿雪糕，伴碟有白朱古力及椰汁珍珠，好似飲紫糯米糖水。 :)侍應在每道菜上桌時有詳細介紹，非常細心，抵贊!  :)   餐廳嘅分子料理，烹調方法獨特充滿個人風格非常有誠意! 會再同朋友來! …查看更多