rubylovegood的个人专页

諗住「豆乳X人」終於有競爭對手啦，但sorry，真係無對比無傷害。叫左「三色芋圓布甸」，成兜嘢$32，好失望。芋圓硬過我條命，淡過我啲口水，連糖水都唔浸下，𡁻嚟都覺得嘥牙力。啲布甸好似食大菜糕咁，成兜嘢硬瓜瓜，乾爭爭（見圖）。可能係我嗌錯，或者豆腐花或豆乳飲品會好啲嘅，但呢個item都係食返佢對手好過啦。…查看更多

見到OpenRice大獲好評，諗住試下，但大伏，勸大家唔好上當。一坐低，侍應比暖水都已經好奇怪（邊有西餐界暖水），仲要個杯好污糟。叫左「喇沙凡立貝意粉」，哇，個意粉賣相仲衰過薩X亞，仲乾過自己煮嘅。相信唔洗我多講，睇相一目了然。仲叫左「焗煙三文魚薄餅」，都唔知邊度開始。個薄餅係麵包舖嘅薄餅底⋯ 簡單嚟講，即係發粉多過麵粉嘅麵包。但賣相仲衰過麵包鋪嘅薄餅包，誠意0分。無野多講，咁樣都仲嚟食就係交智商稅啦。…查看更多

網上見到炸燒賣有14隻口味嘅醬，就吸引到我去試伏了～ 1️⃣ XO醬牛肉蛋炒腸粉 $44 (⭐️評分：6/10)味道不過不失，但坦白講有少少失望。腸粉幾滑身，牛肉炒得啱啱好，份量對$44嚟講都充足。自問唔算好重口味嘅人，但感覺整體味道較淡，XO醬味亦唔出，另外略嫌腸粉偏油膩，食完成個底都係一層油。2️⃣ 炸燒賣 + 甜酸火龍果醬 +$24 （⭐️評分：7/10）消費滿$30以上，+$20可以追加套餐，所以我點左+ 5粒炸燒賣餐，再+$4可以配特別醬，當然就點左得呢度先有嘅火龍果醬。炸燒賣炸完感覺唔會太油膩，口感幾新奇。火龍果醬有淡淡嘅甜酸味，配炸燒賣係唔錯嘅，但火龍果味就真係食唔到。 整體感覺唔差，創意滿分，但冇人哋吹噓到咁好食。…查看更多

星期日同屋企人出街食lunch，順路又見到呢間喺OpenRice 上面有唔少好評，所以就揀左嚟食，但食物質素同整體感覺都好令人失望。😢首先一坐低感覺已經唔太好，個店員係揸住餐具嘅頭（即係我哋用嚟夾餸同埋放入口嘅位）放低喺我哋面前嘅，睇見都唔開胃，呢啲咁基本嘅問題係絕對能夠避免嘅。☹️我哋叫左四個lunch，分別係大蝦冬廕功湯粉、清萊白咖喱雞飯、泰北咖喱雞手作麵同埋海南雞飯（油飯)。啲食物嘅份量偏細，如果空肚嚟，會夠飽但未必食到滿足。1. 泰北咖喱雞手作麵 $82先講泰北咖喱雞手作麵，啲雞肉係煎嘅，勁細粒，得menu上面嘅一半大小，而且有幾粒嘅邊煎燶晒。啲手作麵不過不失，但咖喱太辣，食得有啲辛苦。2. 清萊白咖喱雞飯 $70餐廳用咗一隻好淺嘅碟裝住啲咖哩同雞，白飯分開上。咖喱偏稀，好難𢳂之餘，賣相亦不討好，但味道整體ok。3. 海南雞飯（油飯) $83海南雞飯佔咗menu一大半，個伴湯有豆腐、菜、草菇同埋肉片，睇落幾吸引，就叫咗個嚟試。但實情係，個湯並冇草菇同菜，得幾塊肉片，面頭亦浮咗一層油，如果有返多少菜去襯托點綴會更好。而且雞肉口感好韌，食過咁多海南雞飯，最韌嘅就係佢⋯ 🥵4. 大蝦冬蔭功湯粉 $88冬蔭功湯粉味道正常，唯獨係份量真係好細碗，個人覺得唔值$88。5. 泰館特調配奶茶雪條 +$38見到有好多人推介泰式奶茶，見到menu最底有個「泰館特調配奶茶雪條」幾新奇吸引，就加$38試試。呢個飲品將奶、茶同埋雪條三樣分開上，首先試咗一啖雪條，一開頭食落得啲雲尼拿/奶味，食咗幾啖先有好淡嘅奶茶味。奶同埋茶喺室溫上嘅，亦冇加甜，諗住擺多陣、雪條溶咗會令到杯奶茶凍啲、易入口多啲，誰知個雪條喺劑過、放好耐都唔溶嗰隻，食完成餐飯都只溶得一半，冇令到杯奶茶甜啲同凍啲，如果有額外上糖水，或者先雪藏奶茶會更好。本身冇諗住寫食評，所以都冇咩影低相，但越食越一肚氣，覺得唔值OpenRice上面嘅二百幾個好評，所以決定寫返篇負評，以正視聽。🤨…查看更多