豬狼開心瘋狂飲食團的个人专页

好耐冇食過蠔餅，喺網上搵到呢間，既然係屋企附近，不如去試一試。就算冒着生命危險經過強制檢測嘅新都城，都要闖一闖...小店位於街市入面，但環境比想像中企理，坐得都幾舒服。我哋叫咗一個炸蠔餅同炒麵share。蠔餅一上到黎，心諗: 好似好好味喎! 正當我流晒口水，開始分嚟食，老闆娘就過嚟話呢個蠔餅唔得，整過份俾你。佢即刻收咗份蠔餅，然後我地十個黑人問號，食咗咁多年，蠔餅都係咁樣，究竟係咩唔得呢。謎底終於解開，原來真正嘅蠔餅應該係咁嘅樣。顏色都爭幾遠，難怪老闆娘一睇就話唔得。原來我食咁多年嘅蠔餅，都係overcook。食落去非常鬆脆，有少少似日本天婦羅嘅感覺，蠔亦非常新鮮同足料， 完全超晒班。本來諗住兩樣嘢應該唔夠飽，點知蠔餅夠晒飽肚，非常滿足。應該唔會再去北角嗰間潮XX啦。本身跟餐得一杯奶茶，個哥仔見我哋個蠔餅要再炸過，等耐左，送多咗杯奶茶俾我哋，埋單仲有九折。 個種人情味，同溫暖，同對食物質素嘅堅持，差不多要流淚了。呢度嘅蠔餅，應該係我一生人食過最好食。下次想食，一定會再嚟! …查看更多

由於嗰日就黑雨，所以去左商場食lunch。咁見到間餐廳好似新新地，就走去試吓啦，點知係個大大大大大伏。午巿套餐價錢$78起，我哋嗌咗一個...死呢叫個咩....parma ham嘅飯同一個番茄意粉....等.....寂寞到夜深，一個鐘先有嘢食。期間追左佢無數次，不過見到台台都等緊，睇嚟都冇希望架啦。見到個女侍應，自己一個出出入入攞啲嘢食出嚟，啲男士係到hea，都鄧佢好慘。正當我哋兩個想起身走嘅時候，就有嘢食。食物質素還可以啦，不過細碟囉(下面張相)，等左成個鐘，食龍肉都冇味啦。總括來講，無下次。…查看更多

我哋一向支持有香港特色嘅小店，但近幾年小店越來越少，部份結業，有啲比財團收購，質素每況愈下。今次係葵興食到嘅小店，可以話係抵食夾大件！ 鹽酥雞係依度嘅招牌小食，老闆娘話學生放學最鍾意就係食佢！味道的確一流，炸粉嘅厚度剛剛好，食落去啲雞肉都幾嫩，亦唔會太咸。黎到必食！我哋每人叫咗一碗車仔麵。蘿蔔炆得非常入味，絕對要試一試！個牛筋同牛腩亦都夠晒淋。韭菜豬肉餃餡料十足，非常美味！最令人開心嘅係，唔使嗌時菜而兩碗都有菜，令整碗車仔麵變得更健康。衷心希望小店能夠生意興隆，繼續為街坊提供抵食夾大件嘅香港地道美食。…查看更多

其實好耐冇寫食評，但今次嘅經歷太難忘，一定要寫一寫。第一次食，肯定以後吾會再黎個四喜烤夫好油同偏咸由於個擔擔麵太精采，所以特寫左幾張。可以話係一次過滿足晒你三個願望，幼麵粗麵各種粗度，全部齊晒。食落去，感覺非常古怪，第一次食有咁多種粗幼度嘅擔擔麵。而且個湯底都幾咸，食完之後都幾口喝。小籠包都係一個字，咸！店舖設計古怪，唔明點解佢要整啲咁嘅高枱，一啲都唔慳位，又唔舒服。總括來說，行過見到有位，唔好入去，如果見到好多人排隊，請呼籲佢哋吾好食。…查看更多

香港嘅物價真係越嚟越貴！夜晚食返餐好啲，係咁意都要每人消費＄150。今次豬狼飲食團幾經辛苦，終於搵到間正野推介！根據地圖，由地鐵站行到去餐廳只需要四分鐘， 但由於佢嘅位置實在太隱蔽，我哋來回左十分鐘，先搵到間鋪頭。初頭望入去見到好似冇咩人，心諗....會唔會中伏架？ ！但最後都提起勇氣入去試吓。一坐低，嬸嬸就好熱情咁講解個餐牌，真係好抵食！除咗有特價套餐，其他食品仲有九折(2pm後)！我哋一人叫咗一個套餐， 一個係生牛肉湯河，一個係香茅豬扒撈檬，41蚊(再九折） 包o野飲，實在太誇張！份量大唔再講，質素亦都好好。豬扒有成十件，牛肉都差不多有六七塊。牛肉食落去一啲都唔老，個河粉好滑，湯底都好好味。由於牛油雞翼係依度嘅招牌菜，所以一場黎到，點都要試一試！的確，無令我哋失望！個雞翼炸得非常香脆，裏面嘅肉仲係嫩滑嘅，如果吾食就唔算嚟過！至於飲品，就比較普通，紅豆冰有啲太水，柑橘水就正正常常。整體來講，好令人滿意，應該會再嚟幫襯！…查看更多

雖然係地圖望落去餐廳好似離地鐵站有啲距離，但原來五分鐘真係可以行到去！可是幫襯嘅日子落滂沱大雨，幾經辛苦先去到餐廳。食物嘅選擇唔多，但最緊要係貴精不貴多！完全冇諗過＄58嘅意粉會有餐湯跟，雖然係好普通嘅西蘭花忌廉湯，但絕對唔馬虎，都算幾creamy.個長通粉比我想像中突出，個醬調得好惹味，濃烈嘅番茄味之中帶少少辣，十分開胃。個all day breakfast 超級豐富，已經冇叫最誇張嗰個款式，但依然有好多款食物，仲要好多都係打孖上，份量超級足夠！個薯餅同香腸尤其出色好味，蛋亦都炒得幾嫩滑。唯一不足嘅係個漢堡扒，太過乾。個士多啤梨醬搽麵包一流。當然不得不提依度嘅招牌沙冰，就咁睇個樣就好吸引。熱情果嘅味道淡淡地，感覺好舒服，而且份量幾多，可以飲足一餐。環境舒適，唔會太嘈，仲要星期一至日嘅dinner都有得book位，應該好快會再嚟幫襯啦！…查看更多

去科學園其實係為咗睇小齊嘅魔術表演，科學園嘅心水餐廳唔多，最後揀咗依間。比起另一間又係以英文名命名嘅餐廳，依間舒服同好食好多！Lunch set (星期一至日都提供) 有自助salad bar, 只提供蔬菜生果，唔會有火腿嗰啲。不過款式都算係幾多，味道亦幾好。呢個一口牛絕對唔可以一口食落肚，都幾大塊！有牛香，幾juicy，而且唔un。個五穀飯非常清，感覺上好健康。個忌廉汁非常惹味，配上手制嘅菠菜麵，軟硬剛好，豬女好鍾意！個三文魚煎得香口，但如果裡面生翻少少效果會更好。可能因為落雨，餐廳得好少客，非常靜，侍應亦貼心服務，環境絕對令人滿意！…查看更多

聽講依間餐廳好爆，所以未夠十二點就去到等開門。環境都幾舒服。原來依個就係傳說中嘅芝士裙漢堡包！真係好大塊芝士，芝士迷必點！雙層牛肉配芝士裙，洋蔥同蕃茄，好豐富，牛肉漢堡帶有肉汁。旁邊嘅薯角都炸得好香脆！原來pie係指個presentation! 超creamy同重芝士味，意粉軟硬適中。不過食到一半有啲滯。個免費甜品橙糖味道一般，但神奇地解滯！值得一讚！…查看更多

真系唔系咁多間餐廳會再出團購而我地又再買，呢一間都算是數一數二以團購質素來講絕不馬虎！一開始先上兩杯白酒， 雖然狼仔唔系好喜歡飲酒，開餐前飲少少卻幾開胃。沙律總共有兩款， 分別是Chick Caesar 同Smoked Duck Salad。兩款沙律無論味道同分量都剛好。要雞蛋裡挑骨頭系個湯，雖然是幾Creamy, 但是磨菇湯作材料就不是人人都可以接受，磨菇味道太出，狼仔都系喜歡飲番白湯或豆湯。最正當然系個牛排，五成熟，煎得剛好， 略滲少少血汁，但仍保持著牛本身即鮮味。第二次食都依然覺得系食過咁多間餐廳之中數一數二牛排煎得堅好食的一間！個三文魚都唔輸，也是煎得剛好。 本身個三文魚都好新鮮，在加上處理既時候，煎得內脆外軟， 十分香口！甜品是Gelato雪糕，應該是自制的，因內裡包含了朱古力脆脆，開心果杏仁, 真系好有心！最後，我地都同樣叫左熱奶茶，味道同賣相都好細心，並不是一般茶包沖制，卻散發出淡淡英式紅茶的芬香！…查看更多

依間鰂魚涌區出名嘅餐廳其實想試好耐，但由於價錢偏貴，一直都冇試到。今次佢推出團購，見價錢都幾合理，就買來試一試！入到餐廳，這個感覺係，嘈！當時有啲懷疑我哋可以點樣支撐整餐飯。至於食物，我哋有以下嘅評價。沙律嘅份量都幾多，味道唔錯，有好濃郁嘅芝士味，煙三文魚都幾新鮮。個湯同我地想像嘅有好大嘅分別，感覺係平日雜豆中嘅青豆磨蓉然後加水，我哋只好當水咁飲。本身以為佢會比較creamy。個魚唔夠新鮮，食落有啲腥。反而作為配菜嘅薯仔更為好味。叫左五成熟嘅肉眼扒，但有啲過熟。無咩牛香，肉質亦無彈性，只屬一般水準。又係薯條反而更好食。甜品有驚喜！mousse cake 有濃郁嘅朱古力味，而且density較高，感受到佢慢慢係口腔溶化。整體黎講，環境太嘈，食物質素一般，不值再去。…查看更多

如果唔係團購，我諗我冇咩機會試到依家餐廳。第一，位置係長沙灣，附近冇咩地方行。第二，位置都幾難搵，好難會路過。簡單來講，因為位置。六點鐘去到，得好少人，感覺都幾冷清。個團購餐都幾豐富，等我慢慢介紹俾大家。個湯都算creamy, 清楚地食到煙肉同洋蔥，但未算惹味。本來以為華多夫沙律係另一樣野，好彩狼仔鍾意食西芹啫。個凱撒沙律比較啱我，芝士味夠出，用料吾馬虎！炸漿唔厚，依然可以好清楚咁食到同見到魚肉，魚肉都算嫩滑，調味剛好。薯角炸得好香脆！賣相雖然一般， 但味道非常豐富。太陽蛋配上漢堡扒煙肉洋蔥，味道一流！牛扒有點令人失望，雖然叫咗五成，但明顯過熟。唔算un，但肉質較實而且唔係無牛味。整體上食物份量都幾多。飲品普普通通。到咗任食甜品嘅環節，先試咗個吐司。水準比我預計高，吐司非常香脆，所用嘅係台式抹茶醬，而雪糕就係日式嘅抹茶雪糕，質素令人滿意！兩個心太軟都流心，但有同樣嘅問題，個蛋糕太過濕。都係雪糕最好味！我地另外再叫雪糕!! :) 本來諗住一定食到佢個奶凍，點知到走嘅時候都未雪好。再用心睇一睇佢嘅溫馨提示，我終於明白！原來佢奶凍除外嘅意思係，就算你早落單，都要等好耐，甚至食吾到奶凍！今次真係輸咗...…查看更多

地點算系銅鑼灣之中不太就腳，為於Fashion Walk既一個超級市場內。再加上小豬曾經嘗試致電到店內訂位，先知道沒有訂位服務，於是差不多17：40就到左餐廳。不過發現吃完後，大概六點九，連一半既位置都還沒坐滿，其實可以加埋電話預訂既服務，方便我們這些用團購付費既食客我們一共叫左三個Dishes, 分別是關西大板燒蛋包飯，山葵燒汁極上牛肉焗飯, 焗芝士火腿地雞三文治。關西大板燒蛋包飯($89)小豬實在太耐無食過蛋包飯， 雖然這個蛋包飯並沒有附上任何肉類，但是蛋包飯上面既木魚配搭得好好，個感覺真系好似食緊大板燒， 而且個蛋也好滑， 完全滿足了小豬想食蛋包飯的願望!山葵燒汁極上牛肉焗飯 ($89)先說份量，焗飯份量竟然差不多系蛋包飯既1.5倍。焗飯裡既牛肉依然包持著滑滑感。不過略帶一提，若大家不喜歡山葵味（Wasabi）的話，這個飯可能較為攻鼻，雖然並沒有太多辣味。焗芝士火腿地雞三文治($63)這個三文治真心是三個Dish之中最好味既一道！香濃的Cheese, 配上新鮮的雞排，夾在幾塊香脆的面包中間， 並沒有太膩的感覺。不叫這一道真是有一點可惜！最後，我們都覺得這間餐廳質素很好，服務也很好（服務員姐姐keep住加水），但是本身即價錢略貴，每一道菜至少都要多過$80 (額外再加10%服務費)。如果並不是買了團購的話，真是很難walk-in嘗試！…查看更多

近年覺得旺角越來越多人，如果唔係買咗團購，應該都唔會星期五晚去旺角。間餐廳唔係太易搵，由旺角站行左大概十分鐘，先至搵到間餐廳。 今次以$238買咗佢嘅二人餐，價錢尚算OK。頭盤可以揀煙三文魚沙律或者雞肉忌廉湯。一聽落去，梗係揀三文魚沙律啦！片煙三文魚唔算太細，略嫌個汁太酸，食到眼水都標埋。水準令人意外！外賣靚已值一讚，五成熟嘅肉眼扒完全吾un，有肉汁之除仲有牛香。連個薯條都炸得好香脆。Pizza嘅size比較mini，餅底比較似餅乾，但並吾代表佢唔好味，餅底鬆脆，餡料都幾豐富。以為上面嘅係雲呢拿雪糕，一食落去，唔係喎！原來係乳酪！乳酪配窩夫都係第一次，感覺上健康啲，味道酸酸地都幾好味。如果個窩夫脆少少會仲好！跟餐仲包野汁，成個餐都幾夠飽。以佢嘅質素，相信唔需要再出團購啦！食完飯一出到去，已經有十幾人等緊位，今次真係唔小心食咗間人氣店哈哈！…查看更多

見啲食評都吾錯，對間餐廳有啲期望。入到去環境不錯，枱放得吾太近，坐得都幾舒服。$68-98 嘅假日set lunch，配上依個環境，今時今日係香港算係ok抵食。先食前菜，麵包係香草包，上嘅時候熱辣辣，香脆好味。個甘荀湯都幾好，夠熱而且帶淡淡清香嘅甘荀味，都幾creamy。沙律用左好幾種菜，算係幾有誠意。到個一刻，我地都好滿意啲食物。食完前菜等左差唔多30分鐘先至有主菜食，精彩嘅事情發生，我地以為去左第二間餐廳。事先聲明，係影相前已經盡量令佢嘅賣相好少少。望落去真係以為自己係茶記食緊炆米。說好的菠菜呢？天使麵煮到似米粉，個汁超稀，無忌廉味，一啲都吾上粉。我唔可以話佢好難食，但一個人完成整碟係有啲難度。叉燒飯?! 望一望真係好似。點解吾可以放得靚啲，至少輸味吾好輸樣，俾人影幅靚相! 味道其實還可以，係個飯嘅汁可以再creamy d 同濃d。跟餐仲有杯野飲，我哋兩個都叫咗凍奶茶。個茶相當稀，好似飲奶溝水甘。絕啲都要甘講，環境靚無用，食物質素更重要，絕對無下次!!!…查看更多

想食車仔麵幾個星期，終於狼仔好細心咁搵咗近排好熱嘅肥哥車仔麵俾豬女試。由石硤尾地鐵站行過去大概需要五分鐘，都算幾就腳。間舖係一間大排檔，室內同室外都有位置，但當時我地唔知室內有位，一見到室外有位就坐左落去。食物嘅選擇都幾多，決定揀幾款一齊share食。依碗有蘿蔔，牛腩，墨丸同生菜，粗面底。粗面嘅份量都幾多，比起狼仔公仔麵抵食。個蘿蔔同牛腩都非常惹味，墨丸彈牙無雪味。依碗有牛丸，魚腐，灼牛肉同生菜，公仔麵底。個牛丸比上個禮拜係老趙食嘅好食，冇咩筋，魚腐比較似魚片，厚身啖啖肉。個灼牛肉值得推介，醃得好入味，之前冇食過依一種味道。呢度嘅車仔麵其實真係唔錯，不過係30幾度嘅高溫下食熱辣辣嘅面，真係會食到身水身汗，雖然係辛苦啲，但係有一種地道嘅感覺。提提大家，可能因為最近上過新聞，食客都幾多，想食嘅十二點半好去到，唔係就要係高溫下慢慢排隊啦！…查看更多