越南越順餐廳

香港嘅物價真係越嚟越貴！夜晚食返餐好啲，係咁意都要每人消費＄150。今次豬狼飲食團幾經辛苦，終於搵到間正野推介！根據地圖，由地鐵站行到去餐廳只需要四分鐘， 但由於佢嘅位置實在太隱蔽，我哋來回左十分鐘，先搵到間鋪頭。初頭望入去見到好似冇咩人，心諗....會唔會中伏架？ ！但最後都提起勇氣入去試吓。

一坐低，嬸嬸就好熱情咁講解個餐牌，真係好抵食！除咗有特價套餐，其他食品仲有九折(2pm後)！

生牛肉湯河

香茅豬扒撈檬

我哋一人叫咗一個套餐， 一個係生牛肉湯河，一個係香茅豬扒撈檬，41蚊(再九折） 包o野飲，實在太誇張！份量大唔再講，質素亦都好好。豬扒有成十件，牛肉都差不多有六七塊。牛肉食落去一啲都唔老，個河粉好滑，湯底都好好味。

牛油雞翼

由於牛油雞翼係依度嘅招牌菜，所以一場黎到，點都要試一試！的確，無令我哋失望！個雞翼炸得非常香脆，裏面嘅肉仲係嫩滑嘅，如果吾食就唔算嚟過！至於飲品，就比較普通，紅豆冰有啲太水，柑橘水就正正常常。整體來講，好令人滿意，應該會再嚟幫襯！