findeatla的個人專頁

小妹為慶祝老友生日於是上星期喺OpenRice book咗於7pm 二位（因為朋友話呢間火鍋好吃指定生日食呢一間)由於當日我早到，所以我就坐咗喺reception 等待，大約6:40 職員優先安排我入座，並兩次表示計時間七點開始食到九點，當時我覺得佢哋嘅服務相當貼心，之後我和朋友都食得好開心，但係到差唔多八點時候，就有職員埋嚟問我哋你哋仲有冇嘢要加，冇嘅話就交返張枱出嚟，當時我哋仲食緊野並表示我哋暫時冇嘢要追加，1分鐘之後又再問同一個問題，我哋又表示冇嘢要加，有唔夠1分鐘有另外一個職員又走來問我哋仲冇嘢要加冇嘅話就要8:30交枱，因為佢哋有六位客人要入座，又問有冇野要加，如是者前後足足問咗我哋四次，都要我哋交枱，但係當時都係八點鬆啲，但訂枱注明用膳時間係2 小時， 我哋只係食咗一個鐘頭多啲，而且我哋仲未食完。到8:10左右佢哋直接過嚟交低張單俾我哋，但係我哋從來冇叫過埋單㗎，職員放低張單2分鐘之後再過嚟攞返起我哋張單睇下我哋有冇放低現金或者信用卡埋單，當下我哋立刻表示不滿，職員表示只係諮詢我哋，並唔係強制（但係頭先佢哋嘅行為同態度明顯係強制），見我哋不滿才態度放軟，表示可能另一位職員溝通上有誤會，我哋可以坐到9:00而且送甜品俾我哋，當時我哋都已經好失望唔開心，原本好地地嘅生日飯搞到我哋好唔好開心，亦都冇心機再食落去，所以我哋拒絕咗甜品兼且埋單，有趣但係，到我哋買完單之後，清潔姐姐走來執枱，竟然問我哋仲食唔食呀，我朋友好無奈地表示：你地唔係一直都要趕我哋走咩，而家我哋咪走囉，交返張枱出嚟，你仲問我哋食唔食？我同姐姐講其實我都好想繼續食落去㗎，姐姐笑笑口就冇再出聲.#人生未試過打邊爐打得一個鐘#人生未試過打邊爐打一半就俾人趕走#人生未試過打邊爐「被埋單」#如果我係茶餐廳食，職員要求我交枱我會即刻配合#兩位七百幾蚊，如果係打兩個鐘頭嘅邊爐唔係貴，但係得一個鐘就#清潔姐姐最後一問簡直神來之筆…查看更多

早兩個月香港天氣仲係凍嘅時候，我同一位同我一樣好鍾意食辣又好鍾意打邊爐嘅朋友就去咗油麻地渡船街嗰間二家姐度打邊爐，我朋友話之前同佢屋企人去食過覺得好好味，所以就同帶我去食，去到之後我同朋友都例牌鴛鴦鍋啦，佢哋嘅鍋都相當特別，外邊就係麻辣湯底，中間仲有一個鍋係裝清湯嘅。有好多打邊爐嘅餐廳嘅麻辣湯底會越食越苦，但呢度嘅唔會，而且又唔會好油膩，湯底差唔多冇嘅時候，佢真係會加湯，唔係加滾水，呢點非常重要。香港有好多打邊爐嘅餐廳，以食材來講佢哋嘅食材好新鮮，份量又多，所以呢樣野我係非常喜歡架，可能因為我鍾意打邊爐啦，所以食材都好緊要，總括嚟講都不錯，而且我屋企又近，好方便我隨時都可以去打邊爐。…查看更多

早兩個禮拜同朋友去咗銅鑼灣食越南菜，嗰間餐廳叫安南，我都係第一次去食，朋友訂枱嘅。去到嗰間餐廳環境好優美裝修好別致，又環境寧靜，啱晒我哋三個女仔傾計，我哋三個都唔係大食，所以都係叫咗幾樣送啦，首先上枱嘅就係一個蜆湯，睇個湯睇落好清，估唔到好鮮甜好好味，我仲飲咗三大碗添，咁前菜就叫咗個椒鹽螳螂蝦啦，未試過，個名又特別，咁就試吓，食落個味道其實一啲都唔似蝦㗎，佢似魚肉多啲嘅，無蝦嘅彈牙的感覺，但係都好鮮嫩味道有剛剛好，只係食唔出蝦嘅感覺，而雞串燒味道不過不失，都不錯嘅，我哋仲叫咗個炒粉絲，個炒粉絲都相當好味，佢一啲都唔油膩，好清爽好入味，感覺好清新咁。最後我哋女仔當然都會叫甜品啦，咁就叫咗個斑斕椰汁糕，佢一啲都唔甜好煙韌，味道好清新，我覺得好好食，另外仲叫咗個黑糯米西米布甸，可能我哋已經食飽左啦，所以就覺得個布甸比較濃郁，食多兩啖就滯左，但係味道相當不錯。我比較少食越南菜，但呢間都相當不錯，可以值得再去一試。…查看更多

前牌阿妹喺潮福酒家book咗一圍12人席同屋企人食，開始我以為係食潮州菜啦，去到之後發現原來係食傳統嘅廣東菜嘅，雖然我地得七個人，冇辦法啦因為佢哋無半席，雖然潮福冇豪華嘅裝修，但係都光猛乾淨，齊人之後就好快上菜，頭盤是乳豬拼盤，皮好趣，啲肉就厚咗少少，但係肥膏唔多而且啲肉好嫩，好好食，跟住就係龍蝦伊面啦味道比較清淡嘅，啲龍蝦肉就好嫩同伊面好入味又好爽，一啲都唔諗，之後就是龍躉兩味，一個係蒸龍躉，個味道就比較清淡嘅但係肉好滑，火候剛剛好，反而個炒龍躉片又鹹又老，麻麻地；個金湯海皇翅吾係成盅上，分好左12碗上枱咁都好都方便，味道不過不失拉，食到呢度都已經開始飽啦之後上嘅第一雞就老左少少所以都冇乜點食，但係佢嗰個臘味飯就好好味，最後上埋壽包同生果。我哋七個人食12人席，所以其實都剩低好多食物。其實千零蚊包埋加一食到一圍12人嘅菜其實都唔錯。唯一最唔好嘅就係隔離枱有一班大叔成晚喺度飲酒吹水非常大聲，嘈到我同屋企人都冇辦法好好傾計。…查看更多