whatishungry的个人专页

見到OpenRice 個牛肉船麵好吸引，個濃湯好似好正，而且一面倒得。所以今日過海做完嘢特登搭車過嚟食，點知，又係一個極失望嘅經歷。個船河一上枱見到個湯底都知唔妥，個湯望落一啲都唔濃郁，同OpenRice 啲相相差甚遠；個湯無乜牛味而且偏甜，味道就好似是但一間泰國或越南餐廳都做到嘅普通湯底，我唔覺得係一個特別經真材實料「餚」出嚟嘅湯底；而且果幾條炸豬皮有好勁嘅油臆味。碗粉絕對唔係難食嘅，但真係好正常勁普通，感覺同食越棧無分別，咁點解我要特登搭車過嚟食呢？！而且杯青檸梳打，佢唔知係攪錯定乜，唔係青檸係黃檸，而且應該係落咗檸檬汁開稀嘅，杯底果啲超酸。總括而言，正常過唔正常，唔洗特登搵黎食。後未埋單$82，openrice 果個牛肉船麵係$120，而且我發現menu design 都同OpenRice 原本果個唔同，舖頭名稱冇變，所以我估可能係易咗手或者係轉左大廚，所以質素差咁遠。不過值得一讚係樓面叔叔好有禮貌而且熱心幫忙，如果食物做返好應該還有潛力。…查看更多

職員服務態度好好，環境亦算企理舒適，可惜食物質素唔係好掂。沙嗲湯底唔夠味、豬骨湯底如清湯般無味、肥牛食落似鞋口豚肉，向職員確認後肥牛，不過食落完全冇牛味，丸類食物比街市買的現成貨還差、豆腐有少少酸味、嚮鈴等同超市現成質素、海鮮亦不太新鮮，大蜆稍稍淥完已經全部離哂殼、蝦及鮑魚相比下較好，但談不上鮮味。唯獨油麥菜及頭盤的半隻龍蝦及四款開胃前菜已經係全晚較為好食。如果唔著力認認真真改善食物質素，相信難以叫客人食完再返兜。…查看更多

趁住生日同屋企人搵間平平哋嘅酒店食lunch buffet，但估唔到就比呢間劣質餐廳破壞晒心情。我真係好懷疑openrice的笑臉是如何得來?罪行1: 一到場餐廳竟然搵唔到我booking. 完全無我電話姓名資料，我話我係7.1下午幾點打黎book嘅，好彩佢哋臨時安排到張枱，否則我哋一行五人點算？😓罪行2: 睇openrice 啲comment 講到嘩呢度lunch buffet都好多海鮮吖、啲生蠔好正吖！所以我第一樣野食就係拎生蠔，but SORRY! 嘩大佬，一咬落去成口沙！唔係一兩粒沙喎，係成個口好似去牙醫洗牙都冇咁多沙吖🤬，𠼱都𠼱唔切。我估可能一隻係咁啫，再試多一隻.....我真心崩潰，又係一口沙，叫人點食吖，想夾硬吞都吞唔落啦！我成個口「刮刮聲」，𠺘口都𠺘唔切！真係好離譜，我行去拎生蠔位置同個疑似高級少少嘅職員講，你哋啲生蠔好多沙喎！佢竟然答「係呀，我哋知，而家同廚師講」然後就拋低我自己就咗去。Fine, 最多我拎其他嘢食先，反正我都真係冇勇氣再試。（後記：我哋有人後未去拎啲生蠔，真係冇沙嘅，但係毫無鮮味。唔知佢哋係咪真係有換過批生蠔啦，因為我拎果陣啲生蠔係全部攤晒出嚟任人夾，而其他人拎無沙果批果陣就係逐啲逐啲兩隻兩隻咁拎出嚟比客人。）罪行3: 魚生明顯食得出係唔新鮮。首先，我極少見到酒店自助餐會預先將啲魚生切哂放響雪櫃，定抑或我孤陋寡聞？我真係食親都係你要師傅先會逐塊切比你喎！好啦，我「當」唔同酒店有唔同處理手法，但魚生質素也不至於咁差嗎？首先，希靈魚係明顯雪咗好耐，雪到質地硬晒；另外一種魚（見相中粉紅色果款）係直頭有怪味！點吖而家，係咪要食乜𠼱乜㗎呢間嘢？罪行4: 食到我個人都冇哂心機😞，唯有轉軚去食熱葷。（講真我食自助餐要食到熱葷真係極少可，要間嘢幾冇嘢啱食先要食熱葷呢？）我抱住「可能呢間啲熱嘢好食啲呢」嘅心態去夾硬搵啲嘢食，但真心覺得呢間酒店嘅自助餐真係完全無誠意兼好無質素。全部菜式賣相都好核突吓，而且全部嘢食都好cheap, 同我阿媽平時響屋企煮嘅餸差唔多，猶如屋企家常便飯嘅菜式一樣，大佬酒店自助餐喎，點擺得呢啲嘢上枱㗎？但味道阿媽可能煮得仲好啲。講多無謂，有相有真相，你哋自己睇。罪行5: 呢餐真係由頭到尾都咁「精彩」！求其食啲嘢填飽個肚離開呢個鬼地方，當買個教訓算。埋單果陣，我check過張單係啱嘅，於是我姐夫用信用卡找數，到出咗信用卡張付款單，我姐夫望一望價錢差不多於是簽啦，簽完就好似平時咁拎返張卡啦，咦，張卡唔係佢嘅🙁？原來佢將我哋張卡同隔離枱張卡調亂左，而隔離枱又好似我哋咁簽咗先發現原來張卡唔係自己果張。大佬，收銀果位/收卡果位侍應可以小心啲嘛！調亂客人信用卡都好明顯係人為錯誤啦，萬一大家都唔發現拎走埋張卡就真係精彩。既然簽錯咗，要比返張void單我哋keep都係正常過唔正常嘅指定動作啦，但位侍應又係要擾攘一輪先比到我哋，真係好有趣。😒總結：如果因為話佢平所以就要接受如此劣質的食物及服務，我真係不能苟同。我六月頭才去完普慶餐廳同樣係食lunch buffet, 人哋一樣有長者優惠、成人價亦不相伯仲, 但菜式選擇、食物質素、服務態度真係好過呢間好多班，基本上我唔應該咁樣比較，因為唔同level嘅嘢其實不能放在一起比。我只能夠講呢間真係我食過最差嘅一間自助餐，真心覺得等同食緊普通商場嘅food court質素（可能更差），買個教訓便算了，無下次，亦絕對會忠告身邊人千祈唔好去。至於點解openrice有咁多笑臉，我就不得而知了，反正我嘅經驗就是我信錯了！…查看更多

好少會幫襯呢間，因為無乜幾可會食沙律。之前食過一兩次，品質唔錯，起碼係真心有Heart沙律，材料新鮮、賣相靚、份量唔多但正常可以。Check返先知原來網上 (google同openrice同佢哋自己社交平台) 都不斷聽人講呢間啲店員成日西口西面，連老闆有時回應啲客都好唔客氣。我今日終於經歷到，服務姐姐態度係唔友善ga la，但起碼無鬧我囉，或者要預咗嚟得呢度食就唔好要求佢有恩勤服務，咁平衡一下對大家都好啲。食物選擇今日無咗我最愛嘅西蘭花，個牛油果綜合沙律我丁粒牛油果都食唔到，叫左個芭樂沙律好難食 (或者個人口味我根本唔應該叫呢個)，但薯仔、藜麥依然好食。但佢不時會轉menu，就今日經驗個人覺得係遜色過之前。不過觀塘極少有類似真心沙律店，有多個選擇依然係好嘅，不過就唔好期望有好好嘅客戶服務啦。…查看更多

放假想去電影中心睇場戲，隨意想找附近的cafe小店食個all day，見到呢間幾多like，加上黃店更加想支持下。餐廳有兩層，用餐地方較細，但可能我去時係中午時段唔多人，坐得舒服，而且望住窗外熙來攘往的馬路，與店內寧静悠閑的格調對比極大。開放式的小水吧，感覺猶如去咗歐洲的cafe。主打要試佢地個all day breakfast，個人對於有薯餅的all day 總會額外加分，牛角包是軟軟的那種，牛油味濃，滑疍加入適量黑松露不會嗆了疍味，炒菇菌、肉腸、煙肉、蕃茄也是真心製作唔係hea造，食材新鮮有質素。近排戒奶，叫了Americano, 加$3有大杯，咖啡味濃但唔苦。價錢不算平，正常食all day 嘅價錢但符合質素。店員後生有禮貌，而且很有活力。希望年青人繼續做好間cafe等多啲人懲罰佢。如想在鬧市中找個地方抖抖氣、飲咖啡，這𥚃值得推薦。…查看更多

獨自一人夜媽媽工作完歸家，諗住豪豪地食餐好慰勞下自己，但成9:00又唔想食咁多。叫左個煎魚柳大蝦配薯菜，等左成20分鐘先上菜，已經算數。賣相「看似」正常、但一切就嚇死人、啲魚肉生嘅、以為自己睇錯、再切多下、堅係生喎⋯⋯侍應一句「唔好意思」拎走碟「魚生」，隔十分鐘後終於見條魚熟返，前前後後入座30分鐘先真係開始食，一食，魚係完全無味嘅、蝦正常、最好食係啲薯菜囉（椰菜、椰菜花、紅蘿蔔）、因為完全白烚嘛，唔洗考㕑師能力，千祈不能加佢個拌汁、加左簡直破壞白烚個原味，呢間嘢真係經典。最後，連僅有希望嘅凍咖啡一樣瀨嘢，有怪味嘅！極之失望、嘥錢又嘥氣，嘈都費事、blacklist 你把啦！最後悔無影相做鐵證，食得咁衰個人都無哂mood影乜鬼,你地想試下有幾堅就去試下啦。…查看更多

去左Megabox 睇完戲、晚飯唔知食乜好，見到呢間嘢好似型型地，走左入去試。我地三個人先來幾個頭盤：素雞仙人掌沙律，主要係未食過仙人掌所以想試，口感似蘆薈咁稔稔地、滑滑地幾得意亦好清新、但素雞就一般啦，我本身食肉獸，對於扮肉嘅素都麻麻地，唔難食嘅但我prefer真雞肉多啲。亦叫左個我最愛嘅牛他他，呢個我大推、勁好食，佢仲要加幾塊烘焗麵包薄片，將牛他他當醬咁搽上麵包、好食到喊。另外叫左一客海鮮帶子濃湯，又係正到暈，味濃但唔杰身、唔係出面加cream加粉blend到杰達達果種，好濃嘅海鮮味兼隻巨型帶子勁彈牙，帶子都係要大大粒先夠yummy!主菜叫左個慢煮乳鴿，橫睇掂睇都似中式菜，anyway，主要係貪得意食個慢煮嘢，我覺得連味道都好似中式滷水乳鴿吖，ok la 但唔算好好味、勝在肉身堅係嫩嘅。另外叫左個手打意粉，（係，又係帶子，我堅like帶子食物），我記得好似係用橄欖油炒嘅，因為有陣油香味、意粉我就略嫌有啲稔身，我本身鍾意食較硬身意粉，我個fd鍾意食稔身佢就好like，但唔知係咪因為手打關係，佢係有𡁻口、煙煙靭靭咁。最後加多個甜品做ending, 叫左個士多啤梨芭菲、第一次食呢樣嘢，（起初我仲以為係啲類似雪糕、乳酪甜品杯果啲，點知黎到個樣完全唔係我諗果啲）其實食完我都講唔到芭菲係啲乜嘢，淨係知好好味，咬落好似有啲nuts味，口感似雪糕非雪糕咁嘅嘢. 餐廳整體食物係有質素、而且賣相亦好精緻，環境巨大寬敞，半圓形卡位坐得舒服，但地點響megabox 就真係有啲「窄洗」啦，希望下次黎再試其他嘢啦。…查看更多

為左farewell同事，特別揀個未去過嘅地方lunch. 睇相就覺得地方舒服、而且有室外位置幾開揚，一於試試。但臨當日（星期一）朝早先book已經太遲，只能夠食1:30pm，又講明用餐時間得一小時。心諗有無咁巴閉？觀塘、工廈、仲要食完都2:30pm仲有咩人會幫襯？去到二人枱已經準備好，lunch menu都有7-8款嘢食，選擇困難症發作 。日式、西式都有，最特別有「慢煮」items，呢啲字眼最可以捉拿消費者心意，lunch都要食慢煮幾奢侈，一於叫個慢煮芝麻雞伴秋葵。上菜用木托盤，有現代文青feel，雞件的醬汁令賣相稍深色黑左啲，不過聞落好香、望落仍然吸引。食落雞件肉嫩、唔鞋、夠juicy，調味頗重啱我重口味人士；秋葵略嫌有少少渣。三件雞睇落好少，但其實女仔食落都夠飽。咖啡就有待改善、欠缺咖啡的香濃味，而且用紙杯上有點怪怪，又唔係外賣。環境尚可，黑白灰調夠簡潔。樓底矮、多人時都頗嘈吵，少人時段可能會舒服啲。outdoor area 其實無乜景觀可言，加上現在天時暑熱就更加唔會想出去，但如果煲煙、或者包場有outdoor 開揚位就點都吸引啲！總括而言，嘢食才是一間餐廳重點，呢間絕對推介。…查看更多

聽講呢間野呢幾日先開，開之前PR做得幾好、又搵森美、靚靚剪綵，「吹」到幾行，我都對佢幾有期望，尋日去尖沙咀搵食醒起佢開咗，但朋友已經話新開一定勁排隊，點知經過時「竟然」完全無人龍、仲要半個場都有吉位！無諗咁多，好想試就衝左入去。入到去近門口半個埸啲位都好熱，想坐入面啲卡位又無位唉，是但啦想試新嘢姐，心諗坐低左可能會慢慢涼啲。一坐低，侍應比個menu埋黎今日得呢幾款、仲要無A同D.....(烏鴉飛過）。吓，唔係新開㗎咩？乜都無，得個四個餐比人揀？？？仲要，個menu咩事，睇左我以為自己去左西式cafe，意粉、田園沙律、扒⋯⋯吓，唔係茶餐廳嚟嘅咩？炒粉麵飯乜都無？如果係食呢啲「西」嘢，我點解要黎呢度食呢？唉，都坐低左唯有響無得揀之中求其揀個啦。落完單後，依然感受唔到個場有冷氣、好熱吖，天花板明明見到最少有六部冷氣，唔通見無乜客連冷氣都開少啲？？再周圍望下有咩可以影.....答案係無咩值得影！大佬，你用「荔園」個品牌吹到咁大，可唔可以俾啲誠意吖？得牆上面果幾幅大象、咖啡杯嘅畫、同天花板幾隻純白旋轉木馬裝飾就叫集體回憶？唔該唔好蹧蹋「荔園」呢個本地品牌！唔係攞到個名就可以hea做㗎！我完全感受唔到呢間餐廳同荔園有咩association? 先送上是日餐湯，聽侍應講係「蘑菇忌廉湯」....我個fd飲左兩啖投降，其實佢地落奶煮湯可以唔洗咁重手、咁over嘅，結果變成奶湯真係唔係人人受到，反而送湯果幾支脆餅乾條係成餐飯叫比較好食㗎啦。我叫左個牛脷田園沙律，牛脷唔知點解可以林到咁古怪、唔算好難食、但絕對唔可以叫好食，都擺到入口嘅，但果堆hea到爆嘅沙律菜可唔可以揀啲好啲㗎？啲菜苦嘅！我個fd叫左個青衣柳，佢話未食過咁實嘅魚柳，唔講以為自己食緊雞柳。坐左成粒鐘依然又熱又焗嘅環境下是但叫埋杯我們估應該會「相對較穩陣」嘅咖啡飲埋走人就算，一如預料，咖啡依然和食物一樣伏，飲兩啖放棄。我只想快快離開呢間野，永遠black list。埋單盛惠$186，ok，我當買個教訓。再次證實，PR技倆做得再好，願意俾錢請藝人、請記者做宣傳，餐廳始終係食物質素才是最重要。唯一值得稱讚的是侍應服務，雖然佢地唔算好醒目，但勝在有禮貌，員工值得讚。…查看更多

話說放假出發行山前必須要食餐豐富才有力，本來想食新開果間茶記，但一見到人龍就唔想排。漫無目的朝著地鐵方向行，就諗起好似從未試過M18啲意粉（早餐飽點就試過），一於試下啦。餐牌有大約五、六款意粉，全部賣相都好吸引(嘻....我總是被照騙)而且本身鍾意食濃味嘢，一於試試龍蝦湯雞扒意粉啦。套餐包括飲品、麵包及意粉，大約七十幾蚊，我覺得以cafe黎講正常價啦，店舖又四正企理。奶茶是一貫的好飲，之前食早餐已經surprise個奶茶咁好味，因為始終對西式cafe奶茶有點卻步，最怕茶包加鮮奶果種，但這間應該係用茶記果啲絲襪奶茶，好正。果片排包要讚，唔係就咁比片包hae你，佢地有烘過個包然後才上碟，咬落少許脆口，從細節中見細心。龍蝦湯當然不能以高檔龍蝦敖煮極濃果種相比較，但仍然有足夠龍蝦味，而且不會死命加茄膏整色整水酸死你，加上雞扒皮脆肉嫩，太陽疍再為整體賣相加分，又夠大份，慢慢食完後充滿力量應付行山旅程。放假日有這個brunch 作開始，正！…查看更多

有個記者朋友大讚呢間得，於是有日響西營盤就試左啦。果日lunch無記錯好似12:00先開門，但現場已經有短短人龍啦，好在一開門就有位唔洗等。餐廳裝修極簡陋，講白啲係無裝修，幾塊白色牆、掛左啲display foamboard. 我估佢地應該係不時借個場比某啲文青團體攪下展覽咁啦，總之裝修係無。店舖面積好細，坐得30人到。當日叫左個雞肶飯，因為個fd 係show 雞肶飯張相而吸引我去試呢間，睇相以為係鹵水肶，黎到先知係醃肶、無汁果隻。幸好飯上面拌左㗎喱汁同超鮮嫰嘅芥蘭，隻肶係有啲乾身，但醃得幾入味，加埋杯珍珠奶茶，的確係一餐好地道嘅台式午餐。而且就係地方簡陋、午餐亦絕不賣弄花巧，反而真的讓我感受到最樸實、最貼地的媽媽味道。…查看更多

之前問同事約人響Soho食嘢邊間好，同事推薦呢間，但千叮萬囑我要6:00好去拎位，否則有排等。講到咁誇我都唔敢怠慢，準時6:00去即刻有位，店舖唔大，大部分位置做左open kitchen. 裝修唔算特別、我地主要想happy hour飲下嘢，叫左幾碟小食（對我大胃王來講呢啲只係小食）基本上樣樣都細細碟、好精緻、而且有質素絕對唔係hae整比你。碟beef in Betel leaf好正、牛肉質感好特別、配上沙爹醬超夾；個炸魷魚係必食、送酒之選。我叫左個有香茅味嘅mojito, 幾特別。食食下發生左件小插曲，牆身突然有隻曱甴出現、仲要係曉飛果隻，對於我又唔會有特別不滿，食肆都係眼不見為乾淨㗎啦。食物質素已經掩蓋左呢件事，不過如果留意下衛生情況就更好啦。提返大家呢間真係好多人，七點到已經full哂，九成係鬼佬。有為數不少嘅顧客冇位就直接坐響門囗出面塊大梯級或者立食，如果啲嘢食唔掂鬼有咁墟冚咩！…查看更多

跟同事來這裡食lunch，一到便見到人龍，店外企位也有兩個鬼妹站吃，心想應該有一定水準吧。一路排一路被餐廳裝修吸引著，保留著戦前舊建築的閣樓，水泥牆不知是真殘舊或是扮殘舊，牆上貼著泰文舊街招，看似Tiffany blue 顏色的掛牆飾櫃，夠哂fancy的粉紅色紙皮石地，連洗手盆都有型過人。坐低每個set lunch都叫一個share 食，和牛金邊湯粉係重口味人士必選，湯底超濃味（但我掛住食忘記影碗粉），其他都是地道泰式炒飯、炒粉，味道也不錯，但比碗粉搶哂fo，相對顯得無乜特別。小食有很多，叫了炸魚皮、炸豬皮都好食。唯獨價錢略貴，$120幾一個lunch只得一碗湯粉的確係貴，size又不是太大，但夠飽嘅。然而碗粉的確真心有質素，久不久豪一次都可接受嘅。（P.S. 因為裝修太特別，我和朋友周圍影相，外國廚師<我估應該係老闆？否則點會咁趕客？！>都有從水吧行出來阻止我們影。但而家咩年代，人人都有手機，你放咁多心思落裝修度點解又唔比人影呢？我唔係好明，不過算，你地頭唔影咪唔影囉，但語氣可以溫和啲唔洗咁勞嘈。不過，樓面落單果啲泰國姐姐係好好禮貌、好有heart 嘅，仲要識講廣東話好有親切感，要讚…查看更多

今天又到西營盤做嘢，諗住行去高街睇下有咩醫肚，比佢個霓虹招牌吸引埋去睇，見舖面OK又想快食完就閃，於是坐低嗌咗個牛尾湯湯粉餐，驚喜在佢係「真心牛尾湯」，足料濃味而且唔係比牛尾「碎」你，係堅一嚿嚿可以𡁻嘅牛尾肉，好味到我當住家湯飲鬼哂。黑松露炒蛋夠特別，不過我本身唔太好松露、唔識評。又見佢有個gimmick 樽仔奶茶，我呢啲奶茶毒友點會唔試，對於「十字牌」我無乜集體回憶（我唔係果個年代嘛），不過個奶茶我就好like，可能茶味偏重啱哂我。而且店舖裝修幾有型、有幅類似graffti 嘅牆、廁所位扮後巷貼滿街招幾有心思，不過趕時間又一條友無影到相。唯一不足店面偏細好少位，想坐耐啲都唔好意思阻住人做生意。下次過開黎可以返兜，我見到隔離檯個燒春雞好似好正😝😝…查看更多