chanpopo的个人专页

每次經過見到佢門面好神秘，都想好想入去試吓，睇完餐牌發現原來係專食蟹粉，更加有好感. 終於有時間，加上又有商場優惠券，決定帶埋媽咪一齊去試吓. 打電話book枱話booking滿左要walk -in. 以為佢好爆 去到諗住會係好多人，點知得兩台四個人… 咁樣都唔俾人book? 餐廳非常「精緻」.. 無諗過咁細. 一共就6-7 張枱. Menu 就兩版. 得幾款野食. 我估個個都係嗌個幾味. 味道其實唔差，但係性價比極低. 諗起以前喺上海出差去蟹王府買嘅蟹黃膏，香好多creamy好多. 相比之下就覺得呢間嘢難食… 煙燻蛋得一隻，都係令我有少少意外. 盛惠$78. 儘管蛋上面有黑松露同埋蟹肉，但係都係定價太高… 如果有兩隻蛋，我都覺得收費還可以. 本來仲叫咗一個海鮮拼盤，但係因為真係食得好唔過癮，已經好想走… 最後取消咗，冇食到. 我覺得如果一兩個人嚟過吓癮嘅話都可以，但係如果諗住三四個人嚟食就非常唔抵. 其實佢咁樣真係好快會執… …查看更多

Business lunch 想食日本野又唔想食魚生就揀左鐵板燒. 店面空間唔大，兩張鐵板有10個位圍住，仲有5-6張細枱. 因為想食鮑魚就揀左最多海鮮個餐. 成個lunch 好似有4-5道菜加個飯. 有個前菜同沙律，湯，之後第一道上既主食係蝦. 嘩好鬼爽口呀味道調得岩岩好. 有鮮味又有鐵板煎既香味. 之後就上鮑魚. 師傅攞出黎我地見到咁大隻已經好似大鄉里咁嘩嘩聲. 因為好大隻好厚，燒既時間都耐，但係一路望住師傅燒覺得好幸福，聞到個陣香味已經成個人可以飄起師傅介紹話個鮑魚無咩點落鹽，主要係佢自身既海水味所以食落好清新又爽口. 跟住仲有和牛薄燒同炒飯. 因為實在太好食，我已經忘記左要影相. 好少食鐵板燒我可以捱到去個飯. 但係呢次我成碗食哂. 最後仲有甜品同餐飲. 完美作結. 開心…查看更多

心血來潮好想食叉燒飯，咁啱就喺朗豪坊出嚟見到太興. 已經好多年冇食過，但係心諗做燒味起家，叉燒一定好食. 點知我仲天真過天真嬌. 一上枱見到已經唔係好開胃，食落去叉燒好鹹好鞋. 得其中有兩個係紅色嘅，其他都係深啡色，我直覺覺得啡色個堆係隔夜叉燒. 個飯落左好多汁，每一啖都好鹹. 我已經叫少飯，但係都只係食咗三份一. 再食落去對唔住自己個胃. 其實成$70一個飯都唔算平，但係點解質素差得咁緊要？求其一間酒樓既叉燒都好食過佢… 我唔知太興仲有咩好食，亦都唔想知，因為以後唔會再嚟. …查看更多

自己一個本身想去返美味佳，但係見到吳留手個招牌格局都幾有街邊串燒風味，就決定試下新野. 叫左好多好common既串燒. 因為基本野先係最難做特好食. 不過好失望，第一碟上既係金菇肥牛卷. 牛肉好咸，金菇居然未熟?!?wtf? 開左兩舊都係咁 我決定退左佢. 雞腎係好食既. 不過紅紅地唔知熟左未，但係都食哂.台灣腸既肉好梅，但係台灣腸suppose係好爽口 Q彈的～ 個雞翼鹹到爆... 我淨係食左一隻...串燒之中我最鍾意食韭菜，但係同樣失望. 好鹹... 我食左兩條都放棄. 個鹹味我估係黎自既醬料... 份韭菜黑黑啡啡咁... 個種鹹味係落咗好似落左好多老抽感覺... 食唔出有乜野特別之處. 七月份舖頭都冇開冷氣，越食越唔舒服. 附近咁多傳銷店，可以試其他，不必嚟呢一間.…查看更多

其實我覺得食物質素，湯底都唔差。不過定價真係好貴，88折完都好肉赤，兩個人食麻辣燙都要$800埋單?!!???!?最唔抵食係一碟碟既，所謂安格斯$128得10塊（條），仲要每片都係比手指粗少少。牛柏葉大約只有100g(?)份量盛惠$128。唔建議叫。串串其實係每枝竹簽$5，食物質素相對價錢尚可。但係再加埋一就真係唔多值得。貪得意lor.餐廳抽風極差，加上我本身就鼻敏感，中後期真係食得好辛苦，淨係想快de走。其他食評都有提到，呢間服務堅係差，個個都黑口黑面。我第一次去唔識點落單，問佢係唔係得一張紙劃野食，個伙計就好唔耐煩：其他野咪係出面攞lor 茶芥每位$15，另收加一。我又唔覺得要去到差評，因為食物都幾好，但係明明一碗魚蛋粉可以用$30食而家要十倍價錢唔係好憤氣。下次唔會再去。…查看更多

係日本食過另一名店的龍蝦包，一直念念不忘。見到公司附近開左Hungry Lobster, 都知道佢略有名氣，所以lunch time唔係太多人黎試試。Lunch time 係有lunch set 包飲品，大約$70-$120，豐儉由人。不過我一心想食龍蝦包，就無order set. 龍蝦包味道就一般啦，不過龍蝦份量都好足。我個人覺得另一名店好食啲。整體都唔差，重點推介個湯，好濃好香。飲品仲有pressed juice，選擇多。我上次試了eye protector, 好好飲又健康。朋友都唔算好大食，不過就覺得未夠飽，我就剛剛好。好胃口既可能要再加碼先夠飽肚。環境方面，始終係銅鑼灣，都唔會期望好闊落，不過同朋友吹水下午茶都係一個好既選擇。…查看更多

成日見到門口好多人排隊，都打消左去排隊嘅念頭。今晚天氣凍凍地又有少少雨，門口冇咁多人決定去試一試。叫咗都好多嘢，有燒菠蘿、秋葵、安格斯牛仔骨、豬腩肉、栗米同埋一個豚骨湯飯。豚骨湯拉麵就食得多，湯飯就真係未試過，原來係會超好食個湯得好濃味，但又唔會死鹹死鹹咁。個片豚肉雖然薄薄地但係好鬼彈牙，好似一次食緊幾片咁。湯裏面仲有我最鍾意嘅大蔥，好香，送飯一流。至於串燒都唔輸蝕，肉類醃得好入味，所以食物上面好少調味粉，都已經好夠味。肉類好爽口又唔會靭，去到最後要爭食添埋單走既時候先知海膽原來係佢地既主打，下次一定會再黎試…查看更多

一向都好鐘意食串燒。有日行街見到個易拉架已經心郁郁想試。今晚同朋友飲完野又好似未夠飽就決定黎試下，當食宵夜。尖沙咀租貴，一個細細既鋪位只有兩張吧凳，主力做外賣。小妹個人黎講係好鐘意地踎野，坐係街邊我覺得幾有feel. 睇完一輪，叫左個花甲，羊架，雞翼，五花腩同撈麵。當時差唔多十點，仲有宵夜優惠，十蚊一串。坐喺度等嘢食嘅時候，睇咗佢哋貼出嚟嘅新聞報道同埋簡介。呢間店由幾個年輕人夾份開，有一間鋪做到依家尖沙咀有分店。報道有提及佢哋好努力去學師，返大陸搵唔同嘅調味料，所以對佢哋都幾大期望。可能因為期望太大，最後係有少少失望。出菜嘅速度係我始料不及咁快，我心諗燒烤邊有可能會咁快攪得掂。一試就試得出係預先煮熟然後再加調味料燒兩燒。成串都孜然粉同辣味之外，咬開外面既皮就會試到入面本身好淡，冇乜點醃過，亦都唔係由生燒到熟，無乜咬口。再加上坐係到個時不斷聽到微波爐響，個心真係一沉。個撈麵我無試，但係朋友嘅評價係一般。我好欣賞年輕人有勇氣創業，但係係起步初期既儲客階段都咁取巧，將來就好難撐得住，再加上尖沙咀嘅飲食業競爭咁大，我真係唔太樂觀。…查看更多

夜晚十點幾無乜選擇，就入黎試下。叫左招牌菜-老壇酸菜桂花魚麵同肥腸麵，仲有雲耳。因為飲品半價就叫多個珍奶同酸梅汁。起初真係無期望，諗住醫飽肚就算。可能我地肚餓，所以覺得好好食。個湯底好清甜，酸酸地辣辣地好醒胃。啲魚好滑，不過雪味都幾重。呢個辣係我好鍾意既「重慶辣」。哈哈。我真心覺得係大陸食到既麻辣係最好味。估唔到係到食都咁原汁原味肥腸好爽，不過個湯略嫌多油，但係食辣就梗係多油啦。麵就碗碗都一樣，幾爽口彈牙，唔錯。個樽好得意，不過飲品既味道普通，無咩驚喜。…查看更多

兩年前，我男友仲未係我男友。佢帶我黎呢到食野，話係佢食過最好食既海鮮煲。我一試難忘，拍拖之後都耐唔耐返黎重溫一下。對上個次食係四個月前，個靚煲既料已經少左好多，不過我明白，百物騰貴，只要保持到個水平，貴少少無問題。但係今日去食真係食到把幾火。個煲一滾，指定動作就係飲一碗湯先，嘩！我X. 水黎既，再撈一撈，得返四五舊豬軟骨，以前多到食唔哂嫁。個雪花肥牛唔係雪花，係大暴雪，成片牛肉得5%係紅色。我太勞氣拿拿淋叫佢換左無映相，但係我發誓，真係得5%紅色。問返先知佢地以前個廚走左，斬手指無下次。呢間野唔單只溝淡左啲湯，仲溝淡埋我既愛情…查看更多

以前聽過朋友講呢間好特別好好食，我又特別鍾意食海鮮，所以今次同朋友黎慶祝生日。因為一開始已經揀咗個招牌拼盤 Hot Seafood bag，你可以任意揀三至五種海鮮，視乎食量同budget啦，我哋揀咗四樣。落單嘅時候，服務員亦都提醒我哋個評判入面有薯仔同腸仔，都飽肚，所以就冇乜嗌其他野。佢哋用個膠袋袋住所有海鮮同醬汁再用一個網袋裝住，方便「混醬」。個膠袋入邊有一團煙焗住啲海鮮，好得意。我哋個拼盤揀咗青口，翡翠螺，龍蝦仔同扇貝配檸檬牛油汁，撈完出嚟好香牛油味。雖然感覺好Guilty但係美食當前點忍到口。…查看更多

我一向都不喜歡食拉麵，反而，沾麵令我留下十分深刻的印象，從此拜服於日本人之製麵工藝。然而，這家可算是我吃過最難吃的日本麵屋。沾汁我選了黑蒜，朋友選了豚骨原味。兩碗沾汁都全是油和味精的味道。我完全吃不到黑蒜的香和甜，也沒有豚骨味。沾汁完全掛不上麵，比出前X丁更差。叉燒冷冰冰，非常薄，肥瘦不均，應有的肉汁和口感欠奉。沾麵不爽口，好像在吃漿糊一樣，而且份量很少。一個賣$78還要加一，我奉勸各位不要去浪費錢。難怪星期日晚市時段仍有不少空座。我和朋友發誓這一輩子都不要再去。…查看更多

雖然住尖沙咀，但係一直都無試過蘭芳園。以前一直都聽過佢個大名，話佢既奶茶係全城最出名。今次試過，其實好失望。同朋友兩個人叫左一個晚餐-黑松露大蝦拼牛柳同龍蝦汁蟹籽雞扒撈丁，兩杯凍奶茶。個牛柳我就食唔到有黑松露，不過朋友就話有少少。無論係個汁定係塊牛柳都係好普通既貨色，味道比花園餐廳仲差少少，但係個大蝦係ok既。不過咁樣盛惠90大元又貴左少少。講到個撈丁就把幾火，龍蝦汁呢？蟹籽呢？我淨係見到豉油同薑蓉。坦白講，係香港有少少名氣既餐廳要收50幾蚊一個撈丁我都唔覺得合理，人工鋪租都要錢呀。但係你做咩要呃我有龍蝦汁同蟹籽？我真係因為個龍蝦汁而想試。極度失望。因為我鍾意飲奶茶，所以都試過好多地方既奶茶。比較之下，我覺得公司pantry姐姐每日拉既仲好飲。大家唔好抱太大期望，試過下，打左卡就算啦。呢啲「名牌」都係留返俾遊客慕名而來啦。…查看更多

個日涷涷地就同屋企人去打邊邊, 點知周圍都爆滿就是但啦...去左呢間...噩夢!!!!!其實佢裝修都唔差, 都坐得好舒適...但係去食野, 最重要係食物既質素!我地叫左一個枝竹鯇魚鍋. 佢個湯底雖然有成條魚尾, 但係就少少魚味都無, 淡而無味. 但係顏色就唔知點解好深?!?!湯底差, 材料仲差..- 芝士腸唔知點解嚴重變型- 金菰個芯壞左都會攞俾人- 蟹柳就色素好深, 滾完會有一pat純紅色既野甩出黎, 而且賣相都好差由於佢人手真係好唔夠, 叫加水, 埋單都要等好耐. 就連個老闆親身落場都搞唔掂...個老闆係幾好笑容, 不過咁既質素, 我下次都唔會再幫襯....…查看更多