food.bellies的个人专页

父親節中午一家去銅鑼灣「 鮨幸 sushi Kou 」食咗個廚師發板壽司。雖然好早訂位但係都係訂唔到 bar 枱，減弱咗食廚師發板嘅味道。雖然是廚師發板，但係食嘅主要都係大路嘅壽司，拖羅海膽甜蝦池魚......。有時諗，食普通嘅廚師發板，其實同喺壽司鋪自己落 order 分別不大，都係差唔多嗰啲壽司。嗰日嚟講，壽司係好味，魚同海膽都夠新鮮；性價比嚟講，以廚師發板嚟講算係平，以普通壽司店嚟計就算係貴。…查看更多

普通餐廳格局，冇乜特別，但就腳，係市中心少有嘅葡國菜/澳門菜餐廳。菜式係一般餐廳水準之上，所以平日都甚多人幫趁，需要輪籌。菜嘅份量足，因為已經嚟過幾次，所以我哋4個人只係叫咗個二人餐，有兩個黑松露野菌蘑菇湯、特色拼盤(馬介休球、墨魚餅、多士同一小杯沙律)、松露乳豬意大利麵同慢煮牛柳連煎鵝肝，另外再加兩個菜：燒沙甸魚同辣肉腸炒雜菜，跟餐甜品有木糠布甸，自己加咗葡撻。乳豬雖然賣相唔算好靚仔，但係味道唔錯，做到皮脆肉嫩，唔輸廣式乳豬。沙甸魚煎得好靚，不過要鍾意食魚嘅人先至會鍾意，因為魚刺頗多。其他菜式都冇投訴。跟餐甜品木糠布甸水準亦甚高，唔會差過澳門官也街嘅甜品鋪。…查看更多

我們一家在上海生活過一段時間，對上海菜算是十分熟悉，父親節食一餐上海菜也就不算特別。多年前去過上海的小南國，那時候小南國開始在上海冒起，但也不算是什麼名店，印象中其實相當地痞。當然今日無論上海的小南國抑或香港的小南國，裝修格局已經不可同日而語。可能是父親節的關係，餐枱的佈置比平日緊迫許多，亦無平日的寧静。雖然我們很早就在六時多已入座，但熱門菜式好似鱔糊已經售罄，但難得的是雖然客人多了很多，但廚房出品出奇地對保持水準。「清炒河蝦仁」保持一貫水準，香港中價餐廳用河蝦做清炒蝦仁的的已經不多了，這裏是少有的一間。「椒鹽小黃魚」外脆內嫩，無可挑剔。這裏的「紅燒小元蹄」做得特別好，肉嫩又不爛，醬汁漂亮。「樟茶鴨」也不錯，就是茶薰的味道淡了點。還有一個久違的醃篤鮮，但實在太飽了，只能將僅餘的胃納給了飯後甜品「桂花蜜拉糕」。…查看更多

The Optimist係Pirata Group旗下嘅西班牙餐廳，雖然開咗幾年但係之前一直都未有機會試。Pirata經營嘅其他餐廳水準一般都頗高, 呢一餐都冇令我失望。平時去西班牙餐廳通常會重點試吓唔同款式嘅Tapas，雖然依度嘅tapas嘅種類唔算好多好特別，但樣樣味道都唔錯。今次有驚喜嘅反而係主菜，我哋叫咗2kg斧頭扒, 半隻西班牙烤乳豬同埋龍蝦飯 - 每一樣都分量十足，調味同烹調得恰到好處。總括嚟講，The Optimist 環境舒適、價錢合理，亦都有好多適合分享嘅菜式，係一間好適合一大班朋友食飯慶祝節日嘅餐廳。…查看更多

位於時代廣場食通天的西餐廳，不過不失，其中蟹肉黑魚子火箭菜沙律值得推薦。烤乳豬(¼隻) $328烤虎蝦及香煎帶子意大利飯 $328炒雜菜 $78蟹肉黑魚子火箭菜沙律 $178…查看更多

餐廳裝修平實，闊落舒適，金鐘地鐵站太古廣場地庫出口見到大堂架紅色小巴就係。頭盤叫咗牛肉他他、焗蝸牛同埋兩個洋蔥湯。好耐冇食焗蝸牛，但係呢度做得麻麻，淨係得蒜蓉味，欠缺牛油香味，牛肉他他都係幾好，洋蔥湯都唔錯，洋蔥味夠濃郁。主菜叫咗龍蝦尾闊條麵、肉眼扒、炸雞扒同埋青口。龍蝦尾闊條麵同肉眼扒都唔錯，青口亦都係水準之上，但炸雞扒就及唔上麥當勞嘅麥炸雞。甜品叫咗蘋果批、焦糖燉蛋同埋心太軟。前兩者都好好。呢間餐廳嘅服務值得讚一下，甜品嚟之前我走咗去洗手間，跟住甜品就到，但我未返嘅時候啲蘋果批同心太軟上面嘅雪糕已經開始融融哋，侍應就主動收返去等我返嚟再整過拎出嚟。…查看更多

兩公婆行街經過見到間餐廳個名幾得意。我係潮州人當然知道呢間係「自己人」菜館。太太嘅口味已經比大多數潮州人嘅更加潮州人，所以就訂張枱今日同兩個女嚟飲茶。餐廳環境唔錯，佈置比較西化，對住維港靚景。點心以廣東點心為多，中等價錢，比酒店中菜廳平，比街坊酒樓貴。蝦餃唔錯，幾鮮味，灌湯餃幾夠料，有原隻瑤柱，點心一般都唔錯，唯獨鮮蝦腸粉較差，啲蝦又嚡又冇味。潮州點心叫咗個韭菜粿，太太話皇后街街市曾記嘅好食啲同平啲。甜品叫咗個好耐冇食嘅清心丸綠豆爽同埋個外型好有特色嘅鳥巢布甸。…查看更多

正值韓國瑜被罷免的晚上，和妻子到度小月吃晚飯。餐廳位於銅鑼灣時代廣場地牢扶手梯旁，地方不大，祇有10張8張枱，所有顧客就在行人的目光下進餐。食物質素普普通通，肉燥飯當然不能夠跟臺灣的比較，但香蔥炸大腸及花生豬腳卻做得不錯，適合香港口味，沒有油膩膩的感覺。鳳梨蝦球賣相不錯，但冇蝦味，普普通通的黑椒杏鮑菇牛肉，普普通通的鹽酥雞，配上普普通通的荔枝酸啤酒，連普普通通也講不上的珍珠奶茶。不過以餐廳嘅價錢嚟講，大概不能要求太高，普普通通的一間餐廳，普普通通的一頓飯就是了。…查看更多

聽見九記牛腩重開，兩公婆作為老顧客好開心又可以嚟食牛腩伊，兩個人食咗三碗牛腩湯伊麵。九記牛腩嘅牛腩其實唔算十分好，但佢個湯底好好。宜家啲牛腩質素已經比以前自由行盛行時候好番好多，部位接近崩沙腩。喺九記要食好啲嘅牛腩要用天價食佢嘅爽腩。…查看更多

招牌肉骨茶係新加坡口味，胡椒味濃，仲可以無限添飲，唔錯唔錯。古滑雞飯一般，雞肉略嫌實咗啲，同冇乜雞味，雞肉上面淋嘅雞汁就味道唔錯，類似天天海南雞個汁。整體來講性價比都幾高，下次嚟會想試佢嘅招牌辣椒板麵。…查看更多

好多時聽到分子料理，總係會聯想到啲古靈精怪嘅食物，有啲似舊式素菜館，用齋嚟模仿豬肉牛肉魚肉，唔知點講，個感覺總係怪怪地。如果帶住呢個諗法幫襯厨魔梁經倫嘅Bo Innovation，你會有驚喜。畢竟，一間米芝蓮兩星餐廳唔可以冇一定嘅食物質素。一餐晚餐食落嚟，你會訝異餐廳嘅心思，由餐廳嘅裝修、佈置、擺設，每一道菜唔同嘅餐具、洗手間嘅佈置、播放嘅音樂，以至餐後提供俾客人攞返屋企嘅懷舊糖果同明信片，都緊扣嗰餐嘅主題 "Remembering Hong Kong"。至於晚餐菜式，有十幾道，每道菜嘅份量都唔算大，唔使驚食唔曬。總體感覺，前菜比主菜出色，食物味道唔錯。叫得做分子料理梗係好多食物都係估你唔到嘅，當然有啲人會話，要食炸豬大腸同腸粉嘅味道，不如去深水埗食真嘅好過啦。不過我諗梁經倫係想用分子料理一次過做啲昔日香港小食俾人欣賞，講得大啲，就係對「獅子山下」精神嘅致敬。…查看更多

疫情放緩之後我哋屋企開始咗報復性消費包，今晚去四季酒店龍景軒食晚飯，叫嘅都係「經濟」小菜。作為四季酒店嘅中餐廳，服務確係一流，唔會過分殷勤，但細節位令你感動。餐前小食係拌茄子，而我係唔食茄子嘅，就將碟茄子俾咗太太，原來侍應看在眼裏，冇幾耐就攞過另外一碟露筍伴雜菌俾我。去好嘅餐廳我哋好多時都會鍾意叫炸物，因為普通餐廳嘅炸物一般都做得麻麻。我哋叫咗個蝦多士，蝦鮮味，多士鬆化，遠勝太子鳳城。屋企人鍾意食雞，我哋叫咗半隻炸子雞又加個西檸鷄，兩種雞都好好，不過炸子雞好多地方都整得好好，但檸檬雞做得好似呢度咁好就比較少有。但出奇地係，今晚大家公認最好嘅菜式竟然係XO醬炒豬腩肉，豬肉入味，龍景軒自家XO醬味道獨特，唔會死鹹，好味。餐枱上都有碟素XO醬，侍應見我哋鍾意食就再攞一碟嚟。又叫咗羊肚菌豆腐同鴿肉炒飯，略為普通，冇乜特別。甜品方面，餐廳送咗俾每人一件奶黃酥同桂花糕。奶黃酥好過半島嘉麟嘅奶黃月餅，唔好錯過。另外我哋叫咗楊枝甘露同煎堆仔，大女認為呢度嘅楊枝甘露係全香港最好嘅，芒果新鮮又冇「渣」，但煎堆仔就真係唔好食。總嘅嚟講，連續十二年米芝蓮三星(香港中餐廳得三間)嘅龍景軒係實至名歸嘅嘅，而且服務恰到好處，令人舒舒服服。…查看更多

第二次嚟麒藝館食飯，依然有叫佢哋嗰個天下第一豬(燒乳豬)，依然好食，但性價比真係唔高，二百幾蚊得六嚿乳豬，值唔值得，就見仁見智。前菜叫咗個鮑汁鳳爪，味道唔錯，但鳳爪略嫌瘦啲，小籠包就正正常常。叫咗個花膠蟹肉蛋白，花膠算係呢度嘅招牌菜，但今次真係整得麻麻，啲花膠嚡咗啲，淋咗啲，又淡咗啲，令人失望，但墊底嘅蛋白幾好味。叫咗個金銀泡飯二人份，但分到有六碗，個白蝦黑叉燒炒飯都唔錯，呢間餐廳嘅出品口味偏向清淡，加埋新派嘅裝修，應該啱中意現代中菜嘅顧客嘅口味。即燒無花果天下第一豬，$258例唐酒花膠蟹肉蛋白 $168鮑汁鳳爪 $68白蝦黑叉燒炒飯 $168和味「咋咋」金銀泡飯，2~3位 $198灌湯豚肉小籠包(兩隻) $44…查看更多

一家人嚟鴨大哥午膳，店內裝修一般，平實到連枱布都冇，價錢亦相當親民，係性價比相當高嘅餐廳。點心嘅選擇亦算多，味道相當扎實(但蝦餃普普通通)，燒賣牛肉鳳爪棉花雞都唔錯。Noise唔講唔知，原來呢間餐廳係厨魔Alvin Leung旗下嘅中式餐廳，但冇整蠱做怪，由裏到外，相當平實可人。北京烤鴨半隻258元，份量亦相當多。一般烤鴨店只著重鴨皮，鴨肉變得可有可無，而鴨大哥嘅烤鴨鴨肉做到嫩滑入味，整體毫不油膩，一定唔會食到滿口油，當然要追求「大董烤鴨」油香四溢嘅烤鴨顧客就會嫌唔夠滿足，不過以香港人嘅口味應該合格有餘。海鮮鴨湯泡飯，材料十足，味道層次豐富，值得推薦，另上嘅一兜脆米有畫龍點睛之效。墨西哥牛奶叉燒包，係一般本地麵包店墨西哥crossover叉燒包，賣相唔算好，但餡料分量十足，味道不錯。…查看更多

屋企人食晚飯好多時都會揀海福樓。屋企人鍾意食雞，而呢度嘅炸子雞做得好好，真係做到皮脆肉嫩。今晚嘅炸子雞依然出色，前菜嘅海蜇同埋百味豆腐都好好，我哋八個人叫咗三碟海蜇，可見海蜇做得不錯。可惜今日太晏嚟，好多平時鍾意食嘅菜色(叉燒，龍躉)都已經賣曬。…查看更多