Missz的个人专页

呢間新開餐廳一開始經過唔知佢係食啲乜嘢，裝修木系簡單風格，好有日式格局嘅木枱櫈。睇個名都睇唔出係食乜，攞起餐牌就見到係主打牛腩牛雜麵，$62一碗牛雜麵以旺角區嚟講價錢都唔貴，但係識落就知咩料啦。除咗牛雜粉麵之外，餐廳仲有其他中式嘅菜式例如係炒牛河，炒米粉，揚州炒飯。我叫咗一碗五香牛雜跟新竹米粉，雖然等咗25分鐘先有得食，個湯飲落冇乜味精，牛雜係大大件乜都有，不過就似係斬D頭頭尾尾加落去。牛雜煮得都淋，但係腸同肚嘅部份連埋咗好大舊脂肪，就咁喺張相度都見到碗中間有一舊白色嘅肥膏好油食唔到！個人唔太鍾意太油膩，同埋唔算好食，加上又等得耐，所以成個感覺麻麻地。…查看更多

餐廳係日式木系設計風格，店舖嘅標誌係貓貓嘅肉掌，店入面嘅水杯同筷子托都係肉掌圖案。中午時間12:15店舖出面已經有好多人，我哋大約要等20張枱，正打算放棄之際就發現前面有好多人都走咗。大約等咗半個鐘左右可以入坐。好可惜嘅係店舖嘅招牌忌廉咖喱烏冬已經售罄，而我想飲嘅特色飲品都售罄，最後叫咗個火炙牛肉壽喜燒沾烏冬。掛住喺碗邊嘅牛肉當然冇圖片咁多片，只係得五小片，個人覺得壽喜燒嘅湯底偏鹹，又油又鹹最後話加柚子湯都係加左少少，完全食唔到加左有咩分別。重點烏冬係凍嘅，沾沾下連湯冇埋溫度。湯亦都好難掛上烏冬度，最後都係浸住啲烏冬變咗湯烏冬。牛肉比較薄身，食唔出有咩特別，感覺上有啲名過其實。天婦羅炸蝦拼盤都係香脆，但係一個$168套餐嘅份量同行嘅兩位男士都話食唔飽。整體而言又未至於係中伏嘅，只不過係呢個價錢對比呢個質素，同埋要等咁耐就有啲唔係太值得。…查看更多

之前睇到有人寫呢間火鍋店嘅食評，睇到好吸引即刻叫屋企人去試吓。咁啱平日所以當晚就有位，BB未夠89cm仲唔使收費！本身想揀極黑和牛肩脊肉，但咁啱呢款肉賣晒所以可以免費升級做極尚霜降牛小排套餐。一開始就嚟咗3碟豬3碟牛，平時唔鍾意食火鍋豬肉嘅我，可能今次佢啲肉切得好薄，覺得豬肉都好好食。牛肉就真係唔使講，放喺個煲入面唔記得夾，烚咗好耐先食都仲係咁軟身，完全唔會鞋霎霎。我揀咗椰子雞湯，椰子味好濃，就算唔使點醬油都覺得好夠味。其中一個屋企人叫咗藥膳蟲草花桃膠雞湯，我都覺得好好味，就算連湯底嘅配料紅棗同圓肉都係又大粒又甜，同埋都好多自助配菜，就算2歲小朋友都啱食。飲品嘅種類都好多，可惜movenpick雪糕冇曬朱古力味，如果唔係就完美啦。整體來講都好滿意，下次嚟我會再試吓其他湯底。…查看更多