la mah的个人专页

本來一心想黎食街食辣魚, 點知勁多人排隊..朋友就決定過隔離串燒店食燒物啦..天寒地凍, 見到依間拉麵店..好似新開就決定外賣一碗過串燒店, 暖一暖胃 (特別一讚串燒店老闆, 真好人)一碗諗住暖下胃既拉麵, 我都唔會特登走上黎寫食評不過真係幾驚喜..因為一開頭睇佢餐牌, 都係大路野,豚肉拉麵, 餃子拉麵呀咁…先50幾蚊..小店一間..店員都係年輕人多..客人亦唔算太多 (以依條街計)見到佢即柯打即煮, 見到廚師都幾用心, 慢慢整下麵, 又好細心咁切開個溫泉蛋..外賣拎走, 雖然都係行去隔離食店即食.. 但紫菜已淋, 無辦法...拉麵個麵質都不過不失, 最令我驚喜係個湯底..夠熱, 辣咀的.. 仲要好鮮甜(好似係魚乾湯底..唔記得全名).. 食得出係用心熬出黎,唔係味精水..塊豚肉亦係高質素, 入口juicy唔韌估唔到依個價錢, 都真係有流心既溫泉蛋最後..好難得我會清晒成碗麵相信留係店入面食會更加好味..50幾蚊找數.. 實在驚喜..天寒地凍都係一個好選擇..不過我見條街食店好多.. 老實講,如果唔係辣魚要等…我最初亦未必會試食依間新店..希望依間小店, 會keep住咁用心整拉麵.. 多d人識欣賞啦!:)…查看更多

俾朋友睇雜誌捉左黎試，點知認真麻麻!! 個場話係有1萬尺大，係大呀，不過d位密呢...... 一隻手掌位置都無，左右2邊d人傾計完全聽到晒，仲要咁岩係粗口橫飛!!:(入門口時又混亂，排到去lift門都唔放人入去!入面仲要係無人ga wo!!!我地就係出面係咁逼.....最後要好似小學生咁叫入去......... 又窄d位，人貼人咁!! 侍應又倒瀉幾次水，落單又落錯.... 食物方面，刺身第一次黎就好好樣，有晒乾冰，點知第2輪時就走晒樣，甜蝦甩頭甩尾。蟹粥得蟹腳係入面，仲要好大碟呀!!!其餘d煮物都係好大碟!!!!!最離譜係d焗蠔，一上黎個個睇到嘩嘩聲!!一食，搵唔到隻蠔ga!!全部都係沙律醬............隻蠔仲細過5蚊銀!!!唯一可以既.. 就系隻串燒雞翼幾好食.. 夠乾身囉.. 但係我俾$200黎唔係食雞翼架ma!!!走時仲要同人逼lift!!!依個安排真係好唔掂!!! 下次都係唔好做白老鼠!!!!:(…查看更多

接人收工.. 其實一路都想試依間餐廳................ 終於可以一試。入面是茶記格局，但帶有點香港特別... 個人覺得有少少似蘭芳園既茶記版....不過坐得舒服.. 天氣唔熱就更加坐出面..叫左魚翅撈飯..個名起得好有氣派. 上碟賣相不相..配上穫氣十足的蛋炒飯，好好味!!!! 裡面d海鮮亦都多，算足料，有魚有蝦等..............$68亦算值回票價......另外麥片蝦都唔錯，省去剝殼煩惱... 而且一碟都好大埋頭，有成10隻............ 愈食愈帶點微辣，好開胃。服務就不過不失啦.. 同茶記一樣.. 下次...下次等天氣涼少少................會試埋打邊爐:)…查看更多

唔係第一次幫襯啦.. 平日開飯食小菜的平靚正之選。星期一至五仲有特價小菜.. 質素唔錯的........ 去到先會叫個$10的例湯(係成個瓦保上的).....足料好味道!食海鮮菜式的特別鍾意... 今次叫左個蝦伊麵先$48，好多新鮮蝦架! 另外仲叫左元貝，都係$48有4隻，今次蒸得剛剛好，而且單單是元貝肉都有5蚊咁大，好鮮甜，抵食!另外再叫左d炒蜆呀、菜呀咁，2個人食，每人都係$90............真係好抵食! 唔太介意環境的話(其實都有冷氣亦算企理).... 絕對值得推介!!!:)…查看更多

自問蟹癡，最鍾意食海鮮食蟹.. 星洲過江龍, 當然要幫襯。環境簡潔，以綠襯白，而且位置唔算大!一心黎食蟹，今次就決定試勻餐廳招牌2隻大蟹...白胡椒蟹，胡椒香氣湧出黎，香香辣辣，愈食愈熱...... 蟹好大隻厚肉，蟹肉更加呈一梳梳(不過個蟹殼同樣堅硬，食蟹鉗時就好「拿手唔成世」... 不過見到隻蟹鉗仲大過自己隻手，真係好開心................!!!!!!!!! 不過，本身不太好胡椒的我，更加鍾意於辣椒蟹，蟹本身大隻肉甜唔再講，D辣汁更加惹味，帶D蛋花，好好食! 仲要連埋饅頭沾汁食，一流，食過番尋味!本來仲想叫咖啡骨架，不過食依2蟹都食左2個幾鐘.................. 仲開始滯滯地..不過其實都幾貴下... 耐唔耐食一次都可以的! …查看更多

Lunch.. 決定去食烏冬........ 每次去到都要等位.. 不過德福lunch無咩選擇.. 只好呆呆地等..叫了冷烏冬，麻醬辣肉碎.. 相比起湯烏冬, 個人覺得冷烏冬味道較好.. 烏冬質感扁身帶煙韌.. 加上濃郁麻醬香，的確不錯不過.. 肉燥的確少之又少....... 加上無任何配料.........份量亦不多.. 其實只是一碟胡麻醬撈烏冬.. 無飲品.. 埋單便需$50幾$60蚊..其實幾唔抵食.........友人A更直指食唔飽.. 哈哈....... 看來下次要醫肚的.. 都唔會選擇這間了!!!(但無諗過食烏冬都食唔飽架嘛...) …查看更多

見平日門口好多人排隊，今次一入去就食得，決定試下。價錢一d都唔平!壽司以件計，珍寶帶子要$39/件，海膽要$32/件，即$64先有1客，連北寄貝、甜蝦都要以件計，件件$15以上，其實都算貴..味道呢..壽司質素其實都可以既, 夠大件, 但係論味道...其實同出面普普通通的壽司貨色差唔多..好似北寄貝壽司咁... 北寄貝係厚身加大件過出面其他食店，但其實食落同人地$18/客的無乜分別....甜蝦如是....海膽就直情板長貨色，唔明點解可以叫價叫到$64/客卷物就普普通通，唔係好食到令我回頭，見隔離檯叫左火山卷，係，好巨型好搶眼，小朋友或者會好歡喜，不過其實只不過係飯多，入面d料都係玉子呀蟹柳呀咁..所以無叫到烏冬還不錯... 多味精..量少... 但質感可以!反而值得一讚的是伴烏冬的吉列豬扒，鬆脆，肥瘦均勻，非常好!!!!!其實..............貨色是新鮮的，味道亦是中上... 但同價錢唔太吻合......加上環境擠逼嘈吵(好似元朗d壽司店...係慣左要坐到人撞人先安樂)所以... 試過一次就好...........…查看更多

Baby自旺角開業，已經一直想試。cwb再開分店，就腳，終於一試。以價位黎講，環境算不錯，以黑白為主，加上昏暗燈光，耐用又襟看，很聰明的設計。不過對食客黎講，就有d昏昏欲睡的感覺.. (特別不是baby的superfans)餐牌選擇不多，沙律dressing份量剛好，食落夠Fresh，很好; 湯的味道也出乎意料的好，喜歡那濃稠的質地;正當一切都很滿意之際, 卻被主菜baby三食擊倒。如baby一樣，份量少但賣相漂亮，看起來也很對胃口。一試黑松露滑蛋，味道濃郁，但蛋卻略嫌不夠滑溜，但以這價錢來說，還算可以接受。再試三文魚，其實只是薄薄2片，欠魚味，甚至有過熟情況，顯得過腥，但醬汁尚算開胃清新; 最不滯的便是意粉，味淡，質感淋，完全不到水準，吃了2口便停下了........本想試一試甜品，還是算了........不過百多元價錢，這種食物和環境，也不能給個劣評啦................ 只能說是ok吧..要提一提的是，侍應的態度實在惡劣......... 叫我們坐低後，一杯水一個menu都沒有，要三催四請先拎過黎..........由上菜到拎碟走，都無問過一句，大家樂茶餐廳d服務更加好..........只有套衫靚係無用的!!…查看更多

真係好失望! 之前食過幾次朗豪坊店，水準不錯，每樣都好滿意，見銅鑼灣開了分店，經過，就即管入去試一試。裝潢，相比旺角的已經差好遠。感覺好似大型壽司連鎖店咁! 叫壽司，又要睇完Menu，再自己對番號碼，再搵番紙去剔，十分唔User friendly，感覺好似去左食放題，定係元氣迴轉咁!最失望係質素，三文魚呀果d勁薄、甜蝦無味、牛肉他他勁細件又鞋、有個咩牛肉壽司先過份，乾爭爭軍鑑樣子ok，還見得人，用料亦新鮮，但$35一件，我覺得合理質素，唔係特別突出。叫左第一Round，已覺得唔對路，立即止蝕，埋單走人。唔知食左乜的情況下，竟然要$278蚊! 總共只食了20分鐘...完全無飽的感覺 只有一肚氣..............................宵夜時段可以有100現金劵用，依種質素可能都可以接受但正價時段，講緊差唔多碟碟30蚊的壽司， 依種質素實在差勁，大型連鎖店壽司的質素都無! 價錢仲要貴咁多，實在不值一試! 未知旺角店的質素是否亦同樣下降，但起碼依排我一定唔會再幫襯! …查看更多

以五星酒店來說，這裡的環境不算得上很華麗，帶點樸素的和式風格，所以立即被身穿和風的女侍應 和 窗外的維港景搶了風頭。壽司刺身，新鮮，以這個價錢來說，只能稱得上是中規中距，令味蕾難忘的感覺欠奉。特別三文魚和帶子等大路刺身，實在欠缺驚喜。最欣賞的是鐵板燒，特別是牛，味道香口，且入口即溶，火候掌握得剛好。最後的師傅自製雪糕，為整頓飯帶來驚喜。整體來說，還是滿意的。但以這價錢，應該可以有更好的食物質素，期待增進。…查看更多

記得剛開業，這店很旺場，點知過幾個月再來，竟然只有一檯客!坐窗邊，感覺良好。但食落去，其實都依然有水準生蝦刺身肥美鮮甜，特價只係$60，很抵食冬陰公就一般般，不過不失，若果香一點會更加好最正是咖喱蟹了那隻蟹很肥很厚肉，且有很多膏，加埋咖喱做得夠香，只係粉太厚，其餘的都很不錯地點不太就腳，不過亦會再幫襯…查看更多

唔知點解會有咁多好Comment, 會唔會因為我無試棉花冰?大家都盛讚的棉花冰，我地一行四人都無試。反而試了個....... 白甚麼 同綠茶甚麼，(個名好靚ga.. 不過唔記得)一上黎.. 就係一球綠茶雪糕，加一個布甸.. 究竟係豆腐味丫?奶味丫?定雲呢拿味呢?我地一行人都食唔出..............或者係我地味覺有問題!一間甜品店.. 唔應該只得一款甜品ok 囉..棉花冰我唔知.. 但係依個甜品$25一個.. 唔值得我再回頭!…查看更多

上水西餐唔多..特別係舊墟.. 所以Souffle特別搶眼!門口貼了很多報導.. 身為行內人.. 一看就知報導是拉大來印的....而且是一窩蜂的新店介紹..不打緊. 還是抱住一試的心態.等位等了約15分鐘.. 好旺場最搶眼的是開放式Kitchen..其餘的裝潢其實好一般.. 而且位置同位置好逼.. 其實都幾嘈.. 看著餐紙，感受到大廚的用心.. 想將用心製作的西餐帶入上水..不過..試完d食物之後..牛扒大蝦..牛味夠...帶香...但肉質好韌..好韌..大蝦不過不失，無蝦味.. 不過燒得夠香... 一般般餐湯.. 只能說平椰林閣的白湯高一個水準.. 但又未到好足料果種西湯.意粉.. 做到Al Dente 的口感.. 不錯.. 番茄味亦剛好.. 只是海鮮方面有點不滿意.. 毫無鮮味可言!最失望係最後食到的炸魚薯條.. 等了差不多20分鐘.. 即炸的..即炸的薯條當然問題不大.. 但那炸魚實在很唔掂..脆皮硬得可以敲出聲.. 脆皮和魚肉可以完全分離.. 魚無味..脆皮厚.. 唔掂!每人$170.. 3樣野.. $340蚊依個價錢.. 係上水黎計.. 實在不值!我寧願食上水廣場味x拉麵隔離果間集團cafe.. …查看更多

因舊而出名的廣成冰室，唔知幾時開始變左人龍店星期日去趁墟，排足30分鐘先有得食。一如以往，侍應態度十分惡劣，聲大夾惡。食物速度亦一樣咁慢，等足10分鐘先有杯野飲，再等10-15分鐘先有牛通，食完個牛通飲埋杯野，蛋治終於到.............不過，牛通是值得欣賞的，喜歡湯底夠清，帶有薑的清香，牛肉亦帶有鮮甜牛味，並非一堆無味的肉。至於蛋治，不過不失。只可以講，等咁耐，佢又立即整，都幾難會整得唔好食.........而很出名的紅豆冰，去到$20杯，仲要無得跟餐，一定要散叫。一黎到好吸引，大大條冰柱再加3/4滿的紅豆，奶味香濃，但係呢，愈食愈甜，我飲左1/3杯就停了...........................真的很甜!!!!!!不過，出左名，一個常餐仲係收20幾蚊，有牛通蛋治同野飲，其實都算好質素....... (不過值唔值得等足30mins，又要逼餐死呢..就見仁見智la)…查看更多

雜誌報紙電視經常見到它的出現，無奈..天后太遠，人太多，失去了那股去的衝動。新開的尖沙咀店，雖然位於人流極少的Woodhouse，但總比過海好。一場來到，叫了燒丸子，顏色夠鮮豔，未食已經先興奮，食落煙煙韌韌，可以蘸上炒黑白芝麻或紅豆蓉，個人是偏愛芝麻的。另外，叫了期間限定的士多啤梨大福，粉紅色的賣相很girlish，包著紅豆蓉和原粒士多啤梨，食落感覺酸酸甜甜，好過癮。見隔雜台有燒紫薯和蘋果批，仲有一個綠色正方形的東東，賣相好吸引，可惜已食不落了.. 唯有下次再試。一間唔只得裝潢的甜品店，價錢亦算合理，難怪天后店人氣如此旺盛，但願在Woodhouse也能夠保持這一貫水準吧!:)…查看更多