snowchicken的个人专页

同老公喺旺角行完街，正煩惱唔知食乜好，就路過呢間泰國嘢。聞到佢門口個串燒攤檔啲香味，已經比佢吸引住；再見佢平日都有人喺門口等位，覺得應該都有啲保證；最後上埋openrice到睇，原來有咁多正評添～咁就同老公決定等位都要試！等咗二十分鐘左右，終於有位。因為環境有限，且坐無虛席，所以都坐得比較逼。不過個非常敬業樂業嘅伙記非常好，見我哋買完嘢，一袋二袋，都主動幫我哋掛起啲嘢，費事逼住我哋。好喇，講番正題啲美食。話明係比佢啲串燒吸引，咁梗係先點兩串嚟試下。叫咗一串串燒沙爹雞、一串串燒沙爹豬。果然色、香、味俱全！嚟到嘅串燒同門口嘅一樣香噴噴，加上見到嫩滑嘅肉同一大堆金黃色嘅沙爹醬灑晒上面，真係望到人垂涎欲滴。放入口，肉質果然鮮嫩，唔會韌，又唔「鞋」。而且配上濃郁嘅香口沙爹醬，雖然係辣咗少少，不過辣得嚟好香，又唔會蓋過啲肉味，真係令人再三回味！ 之後嚟嘅係冬蔭大頭蝦湯。本身都怕好辣，但好在都唔算。而且味道好濃郁。大大隻大頭蝦，令到冬蔭公嘅鮮甜味更為突出。而且份量都唔少，兩公婆飲極都飲唔完咁。 然後就到泰式菠蘿炒飯。好足料，嚟到嘅時候亦好香，真係枱枱都會叫嘅招牌菜！啲炒飯唔會太「林」，咬口啱啱好。而除咗有好多洋蔥、粟米等配菜之外，啲海鮮配料亦都好多，而且雖然細細粒，但都好鮮甜呢！ 最後仲有加一蚊就可以叫嘅泰式木瓜沙律。不過呢個就辣咗啲，我唔係好食到。但老公就話好好食，木瓜辣得嚟好爽甜。結果佢一個清晒。總括而言，樣樣嘢食都令人滿意，唔怪得知平日都爆滿啦！…查看更多

星期四難得早放工，就自己一個落咗旺角輕鬆下。放工拖住疲倦嘅身軀咁辛苦，梗係要食下啲甜嘢，補充下糖份，等自己醒神下。次次路過呢間都好多人，不過可能今日真係早，所以好快就搵到位。（雖然樓下都係滿座，要上樓上先有位）樓上裝潢都好有feel，自己一個坐喺到，真係份外幽靜，可以比辛勞咗成日嘅頭腦放鬆下。享受完環境，點少得主角呢！先叫咗個焦糖蘋果甘寶梳乎厘。但因為即叫即整，所以都唔少得叫杯嘢飲，邊飲邊等，慢慢享受難得嘅空閒。所以就叫多杯芒果熱情果砂冰。砂冰先嚟，芒果味濃郁，配上淡淡嘅熱情果味，兩者好match！而且啲砂冰係出奇地幼滑，滑到完全唔似砂冰咁。不過滑得嚟又唔會毫無咬口，因為當中混合咁啲粒粒（有問過個侍應啲粒粒係咩嚟，不過腦袋完全處於放鬆狀態，問完就唔記得），令幼滑嘅砂冰都有好豐富嘅口感！而且飲品嘅甜度適中，就算飲晒成杯都唔覺膩添呢！轉眼間，甜品終於整完。梳乎厘嘅至高境界，就係食咗好似無食咁。果然，呢個梳乎厘真係一流！放入口，猶如食咗陣風咁，打得極度幼細。淡淡嘅蛋白香，加上脆面，真係令人食到停唔到口！而裡面嘅蘋果，除咗香甜之外，亦鬆脆可口！加上焦糖同甘寶嘅點綴，仲有冰凍嘅雪糕，味道真係好清新，令人一試難忘。如果要挑剔嘅話，就只可以話真係太細個，令人食完都唔夠喉。食完呢個美味嘅下午茶，真係令人可以叉足電咁離開了！…查看更多

今日約咗朋友去中環行街，早咗少少到，諗住問朋友到未，點知佢話佢仲剪緊頭髮，叫我上去Salon到等佢。根據佢嘅指示咁去搵間Salon，先發現原來呢間Salon好得意，樓上Salon，樓下Cafe。見朋友都仲未得，無理由呆坐嘛，咁梗係食住嘢等佢。不過因為已經食咗lunch，所以就點咗個All day desserts。朋友話呢間Cafe嘅精品咖啡好有質素，係用由意大利空運到港嘅咖啡豆。難得嚟到，咁就加埋錢轉杯mocha。Blueberry Waffles用上新鮮嘅藍莓，配上極為幼滑嘅忌廉，襯上外脆內軟嘅Waffles，真係非常美味。個人真係好鐘意食忌廉，覺得佢個忌廉真係打得好幼滑！放入口，真係滑到好似食緊空氣咁，質地好正！唯一覺得美中不足嘅係忌廉奶味唔夠濃。而Waffles好香脆，一啲都唔會林，好明顯係即叫即整嘅。而內裡又出奇地鬆軟，整體感覺令人好滿意。Cheesecake嘅topping我揀咗chocolate，淡淡嘅朱古力香，配上濃郁嘅芝士蛋糕，真係有畫龍點睛之效。而且，芝士味除咗濃厚之外，質地亦同忌廉一樣咁柔軟幼滑，真係令人讚嘆！而vanilla ice cream ，用上Dreyer's 雪糕，絕不欺場！最後嘅精品咖啡，果然係水準之作！賣相吸引之外，咖啡味亦香濃、幼滑、甘醇，一試就知係認真、比貨嘅咖啡。雖然呢間公司做開Salon，但估唔到做埋Cafe都做得咁有誠意，咁認真去製作食物同飲品，下次真係要再嚟試埋其他嘢食呢！…查看更多

星期四終於約到個好耐無見嘅朋友食飯，所以就下佢，試下喺佢公司附近嘅呢間日本嘢。咁耐無見，一見面就梗係要吹下水，所以點少得飲品。朋友係酒鬼，所以一嚟就點啤酒。我唔好酒，就試下佢嘅特飲——peach mocktail。淡淡桃味，感覺幾清新，用嚟送油膩嘅燒肉，夠晒解渴。嘢食方面，我哋先叫咗份泡菜小食。雖然話係小食，但份量唔少。咸咸地又辣辣地嘅泡菜，朋友話佐酒一流！雖然我唔飲酒，不過泡菜辣得嚟都好香，飲住杯mocktail都一樣覺得好味。之後就叫咗份美國Prime牛角切同侍應極力推介嘅限定美食——緬甸虎蝦同北海道特大帆立貝。美國Prime牛角切，牛味好重，亦唔覺油膩。而且可能係角切，所以好彈牙。侍應仲幫我哋燒到啱啱好，非常惹味，亦唔會韌。至於緬甸虎蝦，勁大隻！侍應一路燒時仲一路介紹，話師傅專登用刀割開蝦殻，令佢燒得更好味！果然，虎蝦唔單止鮮甜，蝦味突出，仲要極為爽口，真係令我哋讚口不絕！最後嘅北海道特大帆立貝，又係另一驚喜！除咗帆立貝同樣鮮甜、大隻之外，佢配上牛油、蒜蓉同黑松露醬嚟燒，令到鮮甜嘅帆立貝更添一份惹味！濃郁嘅醬汁，更能突出帆立貝嘅味道！雖然我哋唔算食咗好多嘢，不過可能份量都唔少，所以兩個都覺得好滿足咁捧住個肚走。…查看更多

最近芝士撻大熱，特別係呢間，我每次假日經過都話要排成三粒鐘先買到，又或者好多時一早售罄。今次難得屋企人星期二放假，見人比較少，排九個字左右就得，所以就買咗番嚟分享。夜晚我放咗工先試到，所以都擺咗好幾個鐘。不過根據指引，都係可以唔駛翻熱咁食，所以就懶得拎去叮。滿心期待咁一口咬落去，芝士果然夠幼滑！感覺好似食緊cream cheesecake。不過唔知係咪無叮熱嘅緣故，所以芝士味並唔突出。只係較為享受佢嘅芝士質地多於淡淡嘅芝士味。屋企人見我話芝士味一般，就試下叮一叮佢。結果，半融嘅芝士果然味道較為突出！但都係無預期中咁濃郁嘅芝士味。總括而言，芝士質地幼滑，但芝士味未夠濃。雖算得上係一般嘅美味，但似乎名氣過大，令人期望過高，真係覺得唔值得排咁耐隊去買幾粒芝士撻。…查看更多

星期六喺香港仔做完嘢，就順手落咗西環買嘢。買完嘢，見有啲肚餓，咁啱路過間麵店，門口個侍應好有禮貌咁推介，就入去食埋晏先番屋企。午市套餐都幾抵，除咗有個拉麵之外，仲有沙律、前菜、後食同汽水，於是我就點咗個白匠套餐。汽水係樽裝嘅，充滿懷舊風味。沙律同前菜雖然細細碟，不過都幾好味，特別係蕃茄，估唔到會咁鮮甜！主菜嘅白匠即係豬骨湯麵。香口嘅芝麻加上濃郁豬骨味嘅湯底，配埋彈牙嘅麵條，真係唔錯！麵上嘅紫菜，每一塊都印有舖名，非常有特色。餸方面，流心蛋值得一讚！一咬落去，蛋漿隨即流入口中，濃厚嘅蛋黃味令人陶醉其中。至於叉燒，亦有驚喜！肥瘦適中，豬肉味亦突出。只係稍為薄咗少少，如果係厚切嘅話，就令成碗麵更錦上添花喇！最後嘅甜品係一粒香芋雪糕糯米糍。我個人最鐘意食香芋味雪糕，所以正中下懷，可以好滿足咁番屋企喇。…查看更多

星期六要同同事一早入香港仔做嘢，咁梗係要醫咗肚先啦！舊區雖然好多特色餐廳，但我哋都係決定揀間環境光猛，裝潢靚嘅餐廳嚟食早餐。做嘢需要大量energy，所以我哋就比呢個「重量級全餐」吸引咗。香煎火腿同有營茄汁豆只係一般，無咩特別。不過忌廉鮮奶炒滑蛋雖然唔係真係超滑，勝在有啲奶香，令到整體感覺都唔錯。而美式蘑菇腸就有啲驚喜，因為蘑菇味係出奇地突出！本以爲只係平平無奇嘅蘑菇腸，反而令人回味。不過最正嘅係特大香脆牛角酥！唔太熱，溫度暖暖地，啱啱好。仲要真係好香！外表亦好脆、而內在就好鬆軟！可惜唔係真係好特大，食完都唔夠喉。至於杯奶茶，就只屬一般茶餐廳嘅水準，無咩特色。整體而言，$29.5有咁多款嘢食，而且質素都係比大型連鎖快餐店嘅好，都係抵食之選。…查看更多

雖然已經結咗婚，但老公依然好有心思咁搵咗間好有情調嘅餐廳嚟同我慶祝拍拖紀念日。間餐廳樓高兩層，靠近窗邊嘅枱可以望到海，環境非常浪漫。:)不過食物先係主菜，所以坐低之後，梗係第一時間點菜。一睇個餐牌，似乎好多嘢都好好味咁，真係花多眼亂！最後決定都係叫餐，唔駛自己煩。不過海鮮餐其實都有好多選擇，本來想試多幾款，但因為兩公婆嘅好味太相近，所以最後都係決定叫咗兩個一模一樣嘅餐。正式開餐之前，點少得麵包。兩款麵包都外脆內軟，仲有淡淡嘅麥香，配上極為香濃嘅牛油，真係一個好開始。講明係慶祝，點少得同海鮮餐極配嘅白酒！杯酒易入口，淡淡嘅酒香，令唔太好酒嘅我都一飲再飲。白酒梗係要配生蠔。生蠔海水味雖濃，但無掩蓋蠔嘅鮮味！而且雖然唔太肥美，不過蠔味好重，真係齒頰留香！跟住嚟嘅係小食，分別係香草醃三文魚同法式焗田螺。新鮮沙律菜加酸酸地嘅青蘋果粒，配上薄薄嘅三文魚，真係清新小吃，令人份外開胃。至於法式焗田螺，除咗田螺好味之外，估唔到連係配菜嘅薯蓉都製作認真，令人讚不絕口！啲薯蓉幼滑到入口即溶，真係好似食緊cream咁！小食之後就係餐湯時間——招牌馬賽魚湯。果然係名副其實嘅招牌菜！一嚟到已經傳嚟陣陣魚香味，飲落口嘅感覺真係令人一試難忘！啖啖都有魚蓉，質地稠稠地，味道香濃之餘亦非常特別，真係必食之選。嚟到主菜——馬賽海鮮煮龍蝦。本來以為只係細細份，點知份量大得驚人！早知就同老公揀唔同嘅主菜，試多款啦！不過呢款又真係推介之選！除咗因為夠大份外，更因為味道一流。除咗有原隻鮮甜龍蝦，仲有唔少新鮮海鮮配菜，例如爽口嘅蝦、鮮甜嘅青口。不過令人讚嘆嘅係麵包片！當麵包吸晒啲鮮甜香濃嘅海鮮汁後，一食落口，真係令人停唔到口！遺憾嘅係麵包片唔夠多，嘥咗啲咁美味嘅精華。之後梗係唔少得精選是日甜品——朱古力慕絲配雪糕。慕絲極為幼滑，朱古力味亦濃，為成餐晚飯增添色彩。最後飲埋杯香濃咖啡，今餐就完美地結束。總括而言，環境浪漫、食物精緻美味，係撐枱腳嘅好地方！…查看更多

星期日無啦啦都要番工真係好唔開心，咁啱喺灣仔附近做完嘢，就打算同同事醫埋肚先番屋企。同事係呢間餐廳嘅常客，所以佢話一定要帶我嚟食。反正我都無咩主意，就順從佢嘅意願。入到去先知原來呢間餐廳來頭唔少，除咗蔡瀾推介之外，仲係米芝蓮嘅推介！雖然見到有好多推介嘅美食，但做完嘢真係無咩胃口，所以只係點咗個常餐——鎮店牛雙寶湯河加凍檸茶。凍檸茶好快就嚟，除咗夠冰凍之外，檸檬味同甜度都適中，即刻醒神晒！轉眼間，鎮店牛雙寶湯河都嚟埋～啲牛腩嘅賣相已經好吸引，成碗麵食落去更有驚喜！湯底應該係用咗蘿蔔嚟煲，所以好清甜。真係清甜到唔太肚餓嘅我都連湯底都飲晒！河粉唔會太林，配埋啲清甜湯底，真係齋食麵都夠！至於啲牛腩，睇落去已經見到一絲絲咁，覺得唔會韌，食落去真係！而且林得嚟都好有咬口，仲要肥瘦度適中，牛味好濃！最後食連蔡瀾都讚不絕口嘅雲吞，果然無誇大，一咬落去已經覺得好香口，真係同出名嘅雲吞麵家有得比！至於同事食嘅金牌咖哩薯仔三寶飯，雖然我無份食，但都聞到好香好濃郁嘅咖哩味，下次有機會一定要試下先得。…查看更多

星期六同老公探完朋友行開大坑附近，就諗住去搵好嘢食。佢記得佢嘅大表妹講過附近有間無味精喇沙好惹味，所以就諗住去試。不過好奇怪，明明沿途啲餐廳都有唔少客，但呢間已經成七點鐘，都只係得一枱客。老公嘅大表妹一向嘴刁，且喺openrice到亦見到正評都唔少，所以都照原定計劃入去。入到去，老闆娘好友善咁安排我哋嘅座位之後，就向我哋推介佢哋嘅招牌菜——叻沙同肉骨茶。雖然兩個都好吸引，但因為同老公好晏先食完下午茶，所以唔多肚餓。而且見到隔離枱啲嘢食份量都唔小，唯有二選其一就算。咁既然我哋本來就係為咗喇沙而嚟，梗係要食啦！唯有下次再試肉骨茶。飯前先嚟一杯同樣係老闆娘嘅推介——洛神花茶。平日聽到個名唔會想試，不過見老闆娘推介，就試下啦！味道酸酸地，原來都幾好飲，好開胃。之後我哋就點咗廣島蠔叻沙湯飯。喇沙味道適中，夠濃、夠咸、夠惹味！而老公食得辣，就覺得辣度好啱、好正！我則食得無咁辣，就覺得辣咗少少。好在老闆娘好貼心，一早就安排咗椰漿比我哋自家調校辣度。咁我就喺自己嗰碗到加啲椰漿，無損其他味嘅情況下，真係減少咗辣度。除咗湯底好味，豆卜都入晒味，咬落去啲喇沙汁即刻湧晒出嚟，令人回味無窮！就算係蟹柳都好比貨，咬落去一絲絲嘅，一食就知唔係用平價貨。當然就梗係唔少得廣島蠔啦！唔單止唔細粒，仲要勁有蠔味、好鮮甜！配上喇沙，真係覺得好味到食幾多粒都唔夠！而最重要嘅就係佢哋啲嘢真係毫無味精！啲喇沙好味到我哋連湯底都飲晒，但真係完全唔口渴！宜家咁有良心嘅小店，真係好難得！食完湯飯，兩個覺得仲爭少少先夠飽，就叫多個香脆PaPa雞翼。果真係名副其實嘅「香」「脆」！不過可能食完惹味嘅喇沙先食佢，所以相對覺得味道較淡。下次如果食完佢先食喇沙，相信效果會好唔同。今餐雖然只係試咗好少嘢，不過都覺得好好味～而且服務又好，真係一間值得推介嘅小店！…查看更多

老公耐唔耐都鐘意比下驚喜我，今次無啦啦嚟接我放工，仲話要帶我去間特色餐廳食好嘢～原來佢就係帶我嚟呢間網上有好多正評嘅西班牙私房菜。由於老公都係第一次去，所以都搵咗搵先搵到，因為佢個入口唔係喺大街，而係喺小巷。上到去嘅環境都幾驚喜，裝潢有情調，環境幽靜，非常適合一雙一對嚟燭光晚餐。因為一早訂咗枱，所以今餐係為我哋度身訂做嘅～超有心思！個侍應話如果即時上嚟嘅都有得食，但就只可以係即日餐牌上嘅菜式⋯⋯好在老公早有準備啫！逐道菜上，成晚食咗兩個鐘，感覺真係好開心～侍應喺上每一道菜時都會好細心咁作簡單介紹，而且開放式嘅廚房不時傳出香味（真係只有食物嘅香味，唔知點解真係無油煙味），仲要每一道菜都好好味，又好精緻，真係色香味俱全！其中我最鐘意食嘅就係以下呢三樣：蕃茄好新鮮，麵包好脆，仲有淡淡嘅香草味，加埋一齊食真係perfect match！溫泉蛋流出嚟嘅蛋漿配以portobello同惹味洋蔥，仲點埋紅莓醋，真係難以形容嘅美味！最後嘅呢個甜品，更係為成餐晚飯畫上完美嘅句號。味道好似creme brulee咁，但佢質地又唔係好似燉蛋咁，反而係好creamy。而且面頭嘅焦糖又好香脆，真係另一驚喜之作！總括而言，呢間餐廳無論係裝潢、服務定食物質素都令我哋好滿意～一定會再幫襯！…查看更多

難得有多啲時間食lunch，就同同事去咗呢間到慢慢嘆。佢嘅午餐雖然唔叫平，不過真係幾好味，算得上係物有所值。通常我都係食照燒牛小排定食，不過今次同事們都想試新嘢，就跟大隊點咗三文魚海膽丼。果然無令人失望！三文魚同海膽都好鮮甜，真係好好味！唯一美中不足嘅可能就係海膽份量太少，食完都唔夠喉。雖然有埋湯、沙律、蒸蛋同甜品一定夠飽，不過海膽多啲嘅話就會令人更加滿足囉～…查看更多

成日都見到茶木嘅分店勁多人等位，所以一直都好想試下。今次朋友肯早到去等位先，終於可以一償所願！我哋幾個一人叫咗一份晚餐share食，不過味道真係一般，唔明點解真係成日都可以座無虛席⋯⋯諗住可能係佢主食一般，甜品先係主打啦！但結果都係失望。三款蛋糕都毫無特色⋯⋯雖然唔係難食，但食完都唔會記得係咩味。唔通就只有佢成日賣廣告嘅磚塊先好味？奈何今次咁一般嘅經歷，唔會令我想排第二次隊再試。:(…查看更多

最近好友知我心情唔係咁好，所以專登嚟我屋企陪我傾下偈，當然仲唔少得帶埋我嘅至愛——芝麻湯圓嚟氹我啦！食過咁多芝麻湯圓，都真係覺得福元嘅係無敵！:)因為佢啲芝麻真係會一咬就湧出嚟⋯⋯滑到不得了！而且甜度適中，食幾多粒都唔覺膩～就算係外賣都無減佢嘅美味度！…查看更多

上星期三難得同老公一齊早收，未到六點就食完晚飯。不過，喺北角行到九點左右兩個就肚餓，結果忍唔住去搵宵夜食。老公醒起住附近嘅朋友上次向佢推介過間打冷，所以就諗住去試下。但估唔到間嘢原來真係好受歡迎，明明有兩間舖（雖然唔係癡埋一齊），不過平日咁夜都仲要等位！咁多人食，梗係好嘢，所以同老公決定餓住等都要食∼結果等咗二十分鐘就有位喇！老闆好友善咁向我哋推介佢哋新推嘅打冷，咁當然順下老闆意啦！（雖然我本來就係為咗打冷而嚟）不過因為太夜，所以都怕肥，唔敢叫咁多∼所以只係點咗鳳爪花生同南乳炆豬手。結果兩樣都好好味！鳳爪炆得好入味，連花生都比老公大讚一流！因為估唔到花生都會入埋味∼至於豬手，南乳味好香，皮又好有咬口，仲唔會炆得太林，搞到愈食愈餓！食食下，仲聞到隔離枱傳嚟嘅香味∼原來係蠔仔粥！唔知點解會咁香，但就吸引到我好想一試！所以最終同老公叫咗份細嘅∼除咗蠔仔嘅鮮甜肥美，真係一路食都覺得好香，但又唔係蠔仔味喎！一問之下，原來係因為有魚乾！之前都食過蠔仔粥，不過都係第一次食到咁香嘅蠔仔粥∼最終呢餐宵夜搞到兩個食到肚滿腸肥先走∼…查看更多