老公耐唔耐都鐘意比下驚喜我，今次無啦啦嚟接我放工，仲話要帶我去間特色餐廳食好嘢～
原來佢就係帶我嚟呢間網上有好多正評嘅西班牙私房菜。
由於老公都係第一次去，所以都搵咗搵先搵到，因為佢個入口唔係喺大街，而係喺小巷。
上到去嘅環境都幾驚喜，裝潢有情調，環境幽靜，非常適合一雙一對嚟燭光晚餐。
因為一早訂咗枱，所以今餐係為我哋度身訂做嘅～超有心思！個侍應話如果即時上嚟嘅都有得食，但就只可以係即日餐牌上嘅菜式⋯⋯好在老公早有準備啫！
逐道菜上，成晚食咗兩個鐘，感覺真係好開心～侍應喺上每一道菜時都會好細心咁作簡單介紹，而且開放式嘅廚房不時傳出香味（真係只有食物嘅香味，唔知點解真係無油煙味），仲要每一道菜都好好味，又好精緻，真係色香味俱全！其中我最鐘意食嘅就係以下呢三樣：
蕃茄好新鮮，麵包好脆，仲有淡淡嘅香草味，加埋一齊食真係perfect match！
溫泉蛋流出嚟嘅蛋漿配以portobello同惹味洋蔥，仲點埋紅莓醋，真係難以形容嘅美味！
最後嘅呢個甜品，更係為成餐晚飯畫上完美嘅句號。味道好似creme brulee咁，但佢質地又唔係好似燉蛋咁，反而係好creamy。而且面頭嘅焦糖又好香脆，真係另一驚喜之作！
總括而言，呢間餐廳無論係裝潢、服務定食物質素都令我哋好滿意～一定會再幫襯！
